Imwimwi makanyasa kuerenga Mirindiri ye gore rino here? Hino, edzai kudaira mibvunzo dzinoteera:

Miezaniso ipi yatinopaswa na djehovha ngezve kuti tinodikana kubata kudini anakadzi?

Djehovha aashori anakadzi, uye aanyanyi kukudza anarume kupinda anakadzi. Iyena anonyasa kupurutana anakadzi uye anoda kuziya ngezve kuti zvinyi zvirikuashupha. Uye iyena anoziya kuti anakadzi angakwanisa kuita basa ripi haro raangapaswa.—w24.01 mapaji. 15-16.

Tingaseenzesa kudini tsamba ya Aefeso 5:7, inobhuya kuti: “Musaitewo zvaanoita”?

Muphostori Pauro, wainga ecitingwadza kuti tisabatanidzwe no anhu aya anotiitisa kuti tisazwire Djehovha. Izvona zvinobatanidzawo haiwa basi kutora nguwa no anhu atinoona, asiwo mu maredhi sosiyari.—w24.03, mapaji. 22-23.

Tinodikana kudzidziirira pa ngano dzipi dze kunyepa?

Atidikani kukanda ndangariro dzedu pa ngano dzisikazi kuongororhwa dzatinotumirhwa no hama dzedu kana kuti shamwari uye ma e-mail atinotumirhwa no anhu amweni atisikazii no apanduki anoedza kupangidza hingana kuti anopfarira cokwadi.—w24.04, paji. 12.

Zvinyi zvatinoziya uye zvatisikazii ngezve kuti Djehovha acatonga kudini Mambo Soromoni uye anhu akafa pa Sodhoma no Gomora no pa ndambi Huru?

Atinyasi kuziya no rugondo rese kuti Djehovha akatongera anhu aya kutsakatiswa zvacose. Asi tinoziya kuti Djehovha anonyasa kuziya zvakaitika uye iyena ano usisi.—w24.05, mapaji. 3-4.

Sezvo Mwari “i Buwe” tingagara no rugondo ripi? (Dhe. 32:4)

Tingakwanisa kupsvaka kutizira kuna Djehovha. Iyena akagondeka, anoita zvese zvaanopikira. Uye aazungunuki, aacinji unhu wake uyewo zvinangwa zvake.—w24.06, mapaji. 26-28.

Cinyi cingatibetsera pa kudjairana no ungano ipsva?

Gondai kuti Djehovha acamubetserai hinga mushobo waakabetsera anhu ake kare. Musaezanise ungano yenyu ipsva no ungano yamaipinda kare. Batanidzwai pa mabasa e ungano yenyu ipsva uye petai masimba kuti mugare no shamwari dzipsva.—w24.07, mapaji. 26-28.

Mafundo api matatu e muezaniso watinogumira pana Mateu 25?

Pa muezaniso we mabira uye no mbudzi unonyasa kupangidza kukosha ke kugara munhu wakagondeka uye wakatendeka. Pa muezaniso we mhandwe dzakangwara uye dzakapusa zvinopangidza kuti isusu tinodikana kugara takagadzirira uye takangwaririra. Uye muezaniso we matarento unopangidza kukosha ke kuseenza no simba uye kuita zvese zvatinokwanisa.—w24.09, mapaji. 20-24.

Berere ro tempro ra Soromoni rainga rakareba kudini?

Pana 2 Makoronika 3:4, matarhwa manganani e kare anobhuya kuti “120 makubhiti,” kana kuti 53 mametro e kureba. Asi matsamba amweni akagondeka anobhuya kuti “20 makobhiti” kana kuti 9 mametro e kureba. Zvinopangidza kuti zvinonyasa kubatana no kupamhama ke maparedhi e tempro.—w24.10, paji. 31.

Zvinoreyei ku mubati anoseenzera kugara ‘mwamuna ano mukadzi umwe basi’? (1 Ti. 3:12)

Zvinoreya kuti iyena ndimwamuna we mukadzi umwe basi uye aacadikani kuita uhure. Kusiya izvona, iyena aacadikanizve kuita ciro cinocokuita no rudo no mukadzi umweni .—w24.11, paji. 19.

Ngei tingabhuya kuti bhuku ra Juau 6:53 aigadzi mitemo inocokuita no Kurarira ka Tenzi?

Juau 6:53 inobhuya ngezve kurhya nyama ya Djesu uye kumwa nganzi yake. Djesu akabhuya masoko aya mu gore ra 32 K.A., ku Garireya, ku Adjudha aya ainga asati aano kutenda maari. Asi Kurarira ka Tenzi kakagadzwa mumasure me gore rimwe mu Djerusarema. Ikona, Djesu akabhuya no aya aaizotonga naye kudenga.—w24.12, mapaji. 10-11.