IMWIMWI makamboona kuti anhu akawanda mu nyika ino anorangarira kuti anodikana kubathwa ngo mushobo unokosha kana kuti kupaswa ubaba? Kunyazi paanobathwa ngo mushobo unokosha, awona anorangarira kuti izvona azvikwani. Anhu akadaro, ano umbau uye aapangidzi kutenda no zviya zvaanazvo uye Bhaibheri rinobhuya kuti mushobo uu we kurangarira waizooneka maningi mu mazuwa ekupedzesera.—2 Ti. 3:2.

Asi zviri pamhene kuti kunyanya kudzirangarira uye kudzikudza, azviro zvipsvapi katiri. Ngo muezaniso, Adhamu na Evha akada kusanangura pacawo zviya zvakanaka uye zvakashata, ngo ndaa yazvo tese isusu nyamasi uno tiri kushuphika. Makore akawanda akazoteera, Mambo Uziya weku Djudha wakarangarira kuti wainga unocitenderhwa cokupasa rusenzi mu tempro, asi iyena wainga asina citenderhwa icona. (2 Mak. 26:18, 19) Afarisi uye Asadhusi airangarira kuti kuna Mwari awona aikosha maningi ngokuti ainga ari o dzinza ra Abrahamu.—Mat. 3:9.

Isusu takatenderedzwa no anhu anodzikudza uye anonyanya kudzirangarira uye maitiro awo angakwanisa kutibata-bata. (Aga. 5:26) Isusu tingatanga kurangarira kuti tinodikana kupaswa ubaba, kubathwa no mushobo unokosha kana kuti zvimweniwo. Isusu tinodikana kuitei kuti tisabathwe_bathwe no mushobo uu we kurangarira? Cokutanga, tinodikana kuzwisisa kuti Djehovha anorangarirei ngezve nyaya iyona. Mu Bhaibheri muno zvokwadi zviiri zvisikacinji zvingatibetsera.

Djehovha ndiye anosanangura zvatinodikana kutambira. Onai miezaniso minganani.

• Djehovha akasanangura kuti mu mhuri, mwamuna anodikana kureremedzwa no mukadzi wake  uye mukadzi anodikana kuzwa kuti anodiwa no mwamuna wake. (Aef. 5:33) Munhu akacata anocitenderhwa cekuetsera kuti mwamuna kana mukadzi ade iyena basi. (1 Ako. 7:3) Abereki angakwanisa kubvunza ana awo kuti aazwire uye ana anosisira kutambira rudo uye rubetso ro abareki awo.—2 Ako. 12:14; Aef. 6:2.

• Djehovha anobhuya kuti akuru e ungano anodikana kureremedzwa nge ndaa yekuseenza no simba kaanoita. (1 Ate. 5:12) Asi awona aana citenderhwa cekuonerera zviya zvinoizwa no hama kana hanzvadzi.—1 Ped. 5:2, 3.

• Djehovha akapasa atungamiriri citenderhwa cekurongosa musoho uye kutambira rureremedzo re anhu.—Aro. 13:1, 6, 7.

Nge ndaa ye rudo, Djehovha anotipasa zvakawanda kudarika zviya zvatinosisira. Ngekuti tiri ashaishi ciro catinosisira ikufa. (Aro. 6:23) Kunyanzi zvakadaro, Djehovha anotipasa makomborero akawanda nge ndaa ye rudo rakagondeka raanaro katiri. (Pis. 103:10, 11) Makomborero kana kuti ubaba watinopaswa naye, zvinoitika nge ndaa ye nyasha dza Djehovha.—Aro. 12:6-8; Aef. 2:8.

Ngwarirai kuti musarangarire hinga mushobo unorangarirhwa no anhu mu nyika ya Sathani. Padoko no padoko tingazopedzesera taakurangarira kuti tinosisira zviro zvakawanda kudarika amweni. Zuwa rimweni, Djesu wakapanganidza ngezve muezaniso unopangidza kuti zviri nyore kutanga kurangarira kudaro. Iyena akabhuya ngezve aseenzi amweni ainga atenda kuseenza zuwa ro mutero kuti atambire dhenariyo rimwe. Pedzepo, uya wainga akaapinza basa wakazopinzawo anhu amweni uye pakupera ke zuwa ese akazotambira mare imweyo kunyazi aya ainga aseenza nguwa imwe basi. Asi aseenzi ainga atanga kuseenza pakutanga ke zuwa, airangarira kuti aidikana kutambira mare yakawanda kudarika amweni, ngokuti awona ainga aseenza zuwa rese ecipiswa no zuwa. (Mat. 20:1-16) No muezaniso uwona, Djesu akapangidza kuti ateeri ake aidikana kugutsikana no zviya zvaanopaswa na Mwari.

Garai munhu anotenda, haiwa anondoetsera kupaswa basi (1 Ate. 5:18) Tedzerai muezaniso we muphostori Pauro. Iyena aazi kukumbira zviro zvokurarama nazvo ku hama dzake dze ku Korinti, kunyazi hazvo iyena wainga anocitenderhwa cekuita izvona.  (1 Ako. 9:11-14) Tinodikana kutenda nge makomborero ese atinotambira, haiwa basi kuetsera kupaswa zviro no anhu.

Garai munhu anodzidodosa. Kana munhu akarangarira kuti anokosha kudarika amweni, kakawanda kakhona anotanga kurangarira kuti anosisira zvakawanda kudarika zviya zvaanazvo. Kudzidodosa, kungaseenza hinga mutombo kumarangariro aya anokuwadza.

Muphorofita Dhanyeri ndi muezaniso wakanaka we munhu wakadzidodosa. Iyena wainga ari we mu mhuri inokosha, wainga wakarungama, wainga ano uzii uye waikwanisa kuita zviro zvakawanda. Nge ndaa yazvo, iyena waizokwanisa kupedzesera watanga kurangarira kuti kubathwa kwese kakanaka kaaizwa uye ubaba wese wainga aanawo wainga wakausisira. (Dha. 1:3, 4, 19, 20) Asi Dhanyeri wakarumbwa ecidzidodosa uye wara iri rakaita kuti iyena agare munhu anokosha maningi kuna Djehovha.—Dha. 2:30; 10:11, 12.

Tinodikana kugara takashinga kudzidziirira pamaitiro e kunyanya kudzirangarira uye kudzikudza arikuoneka nyamasi uno. Kusiya izvona, tinoda kupfara no makomborero ese atinopaswa na Djehovha nge ndaa ye nyasha dzake.