Mary no mwamuna wake unozwi John, a anogara ku nyika yokuti anokwanisa kuparidzira anhu akawanda akafuruka kaaigara kwenda ku Filipinas nge ndaa ye basa. Pa nguwa yakaitika nhenda ye COVID-19, Mary wakatangisa fundo dzo Bhaibheri haiwa basi mu nyika yaaigara, asiwo mu mbuto dzimweni dze nyika. Iyena wakazviita kudini?

Mary waibvunzisa ku afundi ake e Bhaibheri kuti: “Imwimwi munoziyawo munhu unoda kufunda Bhaibheri here?” Kudai aizodaira kuti honde, iyena waizokumbira kuti apangidzirhwe anhuwo. Kakawanda kakhona patinoita mubvunzo uu uri nyore, zvinopasa mugumisiro wakanaka. Ngei? Ngekuti anhu anopfarira zvaanofunda zvinobva mu Bhaibheri, kakawanda kakhona awona anoda kuti anyaukama awo uye shamwari dzifundewo. Mumasure mekuti Mary apasa mubvunzo ii cinyi cakaitika?

Umwe we mufundi wa Mary unozwi Jasmin wakabhuya kuti wainga ano anhu anokwana kuita arongomuna anodawo kufunda Bhaibheri. Umwe wawo unodainzwa kuti Kristine, waipfarira maningi zvaaifunda uye wakakumbira kuti afunde kairi pa sumana. Mary wakabvunzisa Kristine kuti pano munhu here waanoziya waida kufunda Bhaibheri? Kristine wakadaira eciti: “Honde ndinomuziya. Ndicamupangidzira shamwari dzangu.” Pakadarika masumana manganani, Kristine wakapangidza shamwari dzake dzinokwana kuita arongomuna dzaida kufunda Bhaibheri. Pa nguwa yakazoteera, Kristine wakamupangidzirazve shamwari dzimweni uye anganani awo akareketa kuti kuno anhu amweni arikudawo kufunda Bhaibheri.

Kristine waidawo kuti mhuri yake iri ku Filipinas ifundewo ngezve Bhaibheri, hino iyena wakareketa no mwana wake unozwi Andrea. Pakutanga, Andrea wairangarira kuti ‘Apupuri a Djehovha cainga ciri cikwata cekuti acitendi muna Djesu, uye caiseenzesa Testamento ye Kare.’ Mumasure mekufunda, iyena wakazwisisa kuti wainga wakatsveteka. Pese paifunda zviro zvipsva pa fundo yake ye Bhaibheri, iyena waibhuya kuti: “Kana Bhaibheri recibhuya izvi zvingagara cokwadi!”

Nekuhamba ke nguwa, Andrea wakapangidza shamwari dzake mbiri uye mudoni wake we kubasa kuna Mary uye awona akatanga kufunda. Kusiya izvona, Andrea wainga ano titiya ake anodainzwa kuti Angela , ainga ari bofu. Mary wainga asikarangariri kuti Angela waigara ecipurutana paainga ecifunda na Andrea. Pa zuwa rimweni, Angela wakabvunza Andrea kuti waidawo kufunda Bhaibheri na Mary. Angela waipfarira zviya zvaaifunda. Asikazi kutora mwedzi umwe, iyena wakakanda mu musoro tsamba dzo Bhaibheri  dzakawanda uye wakakumbira kufunda karongomuna pasumana! No rubetso ra Andrea, Angela wakatanga kupinda musangano mazuwa ese eciseenzesa vhidhiyo konferensiya.

Mary paakaziya kuti mwamuna wa Kristine, Joshua, waigara padhuzepo paaifunda, iyena wakamubvunzisa kuti waidawo kufunda here. Joshua wakadaira eciti: “Inini ndicagara decipurutana basi, asi usandiite mibvunzo, kana ukandiita mibvunzo ndicabuda pano.” Pamiseswa mishano dze fundo, iyena wakaita mibvunzo dzakawanda kudarika Kristine uye pakupedzesera iyena wakabhuyawo kuti waakuda kufunda Bhaibheri.

Mubvunzo uya uri nyore wa mary, wakaita kuti agare no fundo dzakawanda dzo Bhaibheri. Iyena wakapasa fundo dzakawanda ku hama dzimweni. Mary wakakwanisa kuitisa fundo dzinokwana 28 dze Bhaibheri mu nyika murongomuna dzakasiyana.

Jasmin, mufundi wekutanga wamborekethwa ngezvake, iyena wakabhabhatidzwa muna Abriri ya 2021. Kristine wakabhabhatidzwa muna Mayo ya 2022 uye wakahwirira ku Filipinas kuti agare padhuze no mhuri yake. Mumwedzi wakazoteera, Angela wakazobhabhatidzwa uye zvino waakuseenza hinga mupiyonera we nguwa dzese. Afundi airi ekuti Kristine ainga apangidzira Mary akabhabhatidzwawo. Akawanda e afundi kutobatanidzawo Joshua uye Andrea ari kuhambira mberi.

Mu zana re makore re kutanga, masoko akanaka akabararika nokukasika pakati pe anhu e padhuze, akaita hinga anyaukama uye shamwari. (Juau 1:41, 42a; Zvii. 10:24, 27, 48; 16:25-33) Munoonawo kudini kuita mubvunzo uyu ku afundi enyu e Bhaibheri uye ku amweni apfarira kuti: “Imwimwi munoziyawo munhu unoda kufunda Bhaibheri here?” Cimborangarirai fundo dzatingagara nadzo kana tikaita mubvunzo uyu uri nyore.