MAKAMBOZWA hingana kuti maidikana kurhwisana no matambudziko enyu muri mwega here? Isusu tiri kurarama mu “nguwa dzinonetsa, dzinoshupha kushingirira” uye izvona zvingaita kuti tizwe tiri tega uye takaora mwoyo. (2 Ti. 3:1) Asi isusu, atidikani kukwanisana no matambudziko edu tiri tega. Bhaibheri rinotipangidza kuti shamwari dzo zvirokwazvo dzinokosha kudini pa “nguwa ye matambudziko.”—Zvie. 17:17.

Muphostori Pauro wakabetserhwa maningi no shamwari dzake dzaimuperekedza murhwendo rake re o misionariyo. (Ako. 4:7-11) Pauro paainga akasungwa ku Roma, shamwari dzake dzakamubetsera kuita zviro zvaainga asikazokwanisi kuita ari ega. Ngo muezaniso, Epafrodhito wakatora zviro zvinganani zvinokosha oenda koopasa Pauro. Zviro izvona zvainga zvatumirhwa no hama dzo ku Firipo. (Afi. 4:18) Uye Tikiko wakaendesa tsamba dzakawanda dza Pauro ku ungano dzakasiyana siyana. (Ako. 4:7) No rubetso ro shamwari dzake, Pauro wakakwanisa kuita basa rake re kuparidzira kunyazi paainga akasungwa kumba kana kuti paainga ari mu kadheya. Imwimwi mungagarawo kudini shamwari ye zvirokwazvo mazuwa ano?

Mazuwa ano, hama dzakawanda dzinopangidza no maitiro kuti shamwari dze zvirokwazvo dzingaitei kuti dzibetserane. Onai muezaniso we hanzvadzi imweni yakagara shamwari ye zvirokwazvo ku mu piyonera umweni we nguwa dzese ku Espanha unozwi Elizabete. Mai a Elizabete paakaoneka kuti ainga ano nhenda yo kankro isikacarapiki, hanzvadzi ii yakatumira Elizabete mesaji dzakawanda dzinobambisa dzainga dzino tsamba dzo Bhaibheri. Elizabete unoti: “Pandaiona mesaji dzake, inini ndaipfara maningi ngo kuziya kuti pane munhu arikundirangarirawo uye izvona zvaindipasa simba rokushingirira zuwa no zuwa.”—Zvie. 18:24.

Tingabambisa ushamwari wedu no hama dzedu nge kuabetsera kuenda kumusangano kana kuti mubasa re kuparidzira. Ngo muezaniso, imwimwi mungapasa bhureya here hama kana hanzvadzi yakura pathunga? Uyu ungagara mukana wekubambisana. (Aro. 1:12) Asi hama dzimweni adzikwanisi kubuda pa nyumba. Tingadzibetsera kudini?

Hama dzimweni adzikwanisi kupinda misangano dzecionana hope no hope no amweni nge ndaa ye cinetso ce uthongo kana kuti cinetso cimweni. Onai muezaniso wa David wakaonekwa kuti wainga ane kankro inozwi lifoma. Iyena wakaraphwa ke mwedzi inodarika mitanhatu eciseenzesa mutombo. Pa nguwa yese ii, iyena no mukadzi wake Lidia aipinda misangano ari pa nyumba eciseenzesa vhidhiyo shamadha.

Awona akabetserhwa kudini nge ungano? Mumasure me misangano imwe na imwe, hama dzinganani dzainga dziri ku nyumba ye Umambo dzaiafonera dzeciseenzesa vhidhiyo shamada kuti dzicedze nawo. Kusiya izvona, David na Lidia paaidaira mumasure me musangano hama dzaiatumira mesaji dzinobambisa. Izvona  zvakabetsera kudini David na Lidia? Awona akazwa kuti aidiwa uye aizwa ari dhuze no hama no hanzvadzi dzawo.

Madini kuitawo urongwa kuti mubude mu basa re kuparidzira no hama kana hanzvadzi dzisikakwanisi kubuda pa nyumba? Pamweni mungaita cinjo pa urongwa wenyu we zuwa kuti mukwanise kubuda mu basa re kuparidzira no hama idzi. Nge kuita kudaro, awona acakwanisa kuona kuti anodiwa. (Zvie. 3:27) Pamweni imwimwi mungakwanisa kupsvaka nguwa kuti mutare nawo tsamba uye muparidzire meciseenzesa terefoni. Uye akuru angakwanisa kuita kuti misangano ye kubuda mu basa re kuparidzira iizwewo peciseenzeswa vhidhiyo konferensiya. David na Lidia akatenda maningi ungano yawo paakaita izvona. David anopanganidza eciti: “Kundopinda basi mu misangano we kubuda mu basa re kuparidzira pamwepo no cikwata cedu uye kuzwa munamato zvakatibambisa maningi.” Kusiya izvona, kana zvecibvira nguwa dzimweni imwimwi mungatora mufundi wenyu moenda naye kumba ke muparidzi usikakwanisi kubuda pa nyumba.

Patinoseenza no hama idzi dzisikakwanisi kubuda pa nyumba tinogara no mukana we kuona no padhuze mawara awo akanaka uye kubambisa ushamwari wedu nawo. Ngo mezaniso, kana imwimwi mukabuda mu basa re kuparidzira no hama idzi dzikakwanisi kubuda pa nyumba uye moona kukwanisa kawo kuseenzesa Bhaibheri kuti abaye mwoyo ye anhu, pamweni imwimwi mungatunhudzira kushamisika kazvo. Kusiya izvona, mucagara no shamwari dzakawanda dzipsva pamunobetsera hama no hanzvadzi idzi kuti dzibude mu basa re kuparidzira uye apinde misangano.—2 Ako. 6:13.

Pauro paakabatana no matambudziko shamwari yake Tito yakaenda kaari uye izvona zvakabetsera Pauro kuti azwe zvirinani. (2 Ako. 7:5-7) Zvakanaka maningi kubvundza hama no hanzvadzi dzedu masoko anobambisa, asi muezaniso wa Tito unopangidzawo kuti tinganyaradzawo hama dzedu ngekupedza nguwa tinawo uye kuita zviro zvinoabetsera.—1 Juau 3:18.

Hama no hanzvadzi dzedu dzeku Rússia dzinopasa muezaniso wakanaka wekuti tingabetserana kudini. Onai zvakaitika no hama imweni inozwi Sergey no mukadzi wayo anozwi Tatyana mumasure mekuti nyumba yawo yaceswa no mapurisiya. Awona akatorhwa kuti aende koobvunziswa. Tatyana ndiye wakatanga kusiiwa uye wakahwirira kumba. Hama Sergey inoti: “[Tatyana] paakandoguma kumba, hanzvadzi imweni ino ushingi yakauya panyumbepo. Hama dzimweni dzakauyawo kotibetsera kucenesa uye kurongedza nyumba yedu.”

Sergey unopanganidzazve kuti: “Inini ndinopfarira tsamba ya Zvierengo 17:17 inoti: ‘Shamwari ye zvirokwazvo ino rudo nguwa dzese uye i hama inotibetsera pa nguwa ye matambudziko.’ Masoko aya akandibetsera maningi pandaiteererhwa ngokuti ndainga ndisikakwanisi kukwanisana no dambudziko iri ndiri ndega. Djehovha akandipasa shamwari dzisikathyi kugara ku dii rangu.” a

No kuhamba ke nguwa ticabatana no migariro inoshupa maningi, ndiyo ndaa, ticada shamwari dzatingakwanisa kugonda. Uye pakutambudzika kukuru ticada maningi shamwari idzi. Hino ii ndiyo nguwa yekupeta masimba akakura kuti tigare shamwari ye zvirokwazvo!—1 Ped. 4:7, 8.