MUSORO WE KUFUNDA 8
NGOMA 130 Ngatirekererane
Mungateedzera Kudini Rurekerero ra Djehovha?
“Hinga zvamakarekererhwa no mwoyo wese na Djehovha, imwimwi munodikana kuitawo zvimwezvo.”—AKO. 3:13.
CINANGWA
Kuona zvatingaita kuti tirekerere uya unonga atishaishira.
1-2. (a) Migariro ipi ingatishupira kurekerera munhu? (b) Zvinyi zvakaizwa na Denise?
ZVINOMUSHUPHIRAI kurekerera amweni here? Akawanda anorangarira kuti azviripi nyore kurekerera munhu unonga waarhwadzisa. Kunyazi zvakadaro, tingakwanisa kukunda kurhwadziwa katinonga taita uye torekerera. Ngo muezaniso, onai zvakaitika no hanzvadzi imweni inozwi Denise. a Iyona yakakwanisa kurekerera nge mushobo unoshamisa. Mu 2017, Denise no mhuri yake ainga abva koovhakacira Sedhi Mundiyari yo Apupuri a Djehovha yainga yabva kudimurhwa. Paainga ecihwirira kumba, mutekenyi umweni we karu wakapondera pa karu yainga ina Denise no mhuri yake. Denise wakakomoka nge ndaa ye tsawana. Uye paakamuka, wakaona kuti ana ake ainga akakuwara maningi uye mwamuna wake Brian wainga atofa. Eciedzurira zvainga zvaitika, Denise wakati: “Inini ndakazwa ndakatsukwara uye ndainga ndisikazii zvokuita.” Pedzepo ndakaona kuti mutekenyiwo wainga asikazi kuraradza kana kuseenzesa mitombo inoraradzisa uye apana ciro cainga camukangaidza. Hino ndakaita munamato kuna Djehovha ndecikumbira runyararo.
2 Mutekenyiwo wakasungwa uye wakapumhwa kuti wainga auraya munhu nge tsawana. Kudai iyena akaoneka kuti uno ndaa waizoendeswa mu kadheya. Asi tribhunari yakabvunza Denise kuti kutongwa kake kaizotsamira pa zviya zvaizobhuiwa na Denise paaitongwa. Denise wakati: “Inini ndakazwa hingana kuti munhu wafunungura cironda cangu cakakura cainga cakasonwa pedzepo kakukhukha munyu, ngokuti ndaidikana kuedzurira zvese zvakaitika mu rimwe re zuwa rakashata maningi re mu upenyu wangu.” Mumasure me masumana manganani, Denise wainga ari ku tribhunari uye wainga akagadzirira kuti arekete no mwanarume wakaunzisa matambudziko akakura mu mhuri yake. Zvinyi zvaakabhuya? Denise wakabvunza mutongi kuti arekerere mwanarumewo. b Iyena paakapedza kupanganidza, mutongiwo wakatanga kucema. Iyena wakabhuya kuti: “Mukati me makore 25 ndecitonga mu tribhunari, andisati ndakamboona izvi zveciitika muno mu tribhunari. Andisati ndakambozwa mhuri yo aya ashaishirhwa yecikumbira kuti azwire usisi munhu uya wapumhwa. Andisati ndakambozwa masoko e rudo uye kurekerera.”
3. Cinyi cakaita kuti Denise arekerere?
3 Cinyi cakabetsera Denise kuti arekerere? Iyena wakarangarira ngezve kurekerera ka Djehovha. (Mik. 7:18) Patinopangidza kutenda nge mushobo watinorekererhwa na Djehovha, isusu tinokohomedzeswawo kuti tirekererewo amweni.
4. Djehovha anoda kuti isusu tiitei? (Aefeso 4:32)
4 Djehovha anoda kuti tirekerere amweni, hinga mushobo waanorekerera umwe na umwe wedu. (Erengai Aefeso 4:32.) Djehovha anoetsera kuti isusu tigare takagadzirira kurekerera aya anotiitira zvakashata. (Pis. 86:5; Ruka 17:4) Mu fundo ino, ticaona zviro zvitatu zvicatibetsera kuti tigare anhu anorekerera.
MUSAGARE HINGANA KUTI AMURIPI KURHWADZIWA
5. Maererano na Zvierengo 12:18, pamweni tingazwa kudini munhu paanotirhwadzisa?
5 Pamweni tingazwa kurhwadziwa ngezve zviro zvaizwa kana kurekethwa ngo munhu, maka-maka kana iri shamwari yedu ye padhuze kana kuti umwe we mu mhuri yedu. (Pis. 55:12-14) Nguwa dzimweni, kurhwadziwa katingazwa kungaita hingana kuti tabaiwa nge banga. (Erengai Zvierengo 12:18.) Pamweni tingaedza kuita hingana kuti apana caitika, uye torambira kutenda kuti tiri kurhwadziwa mu mwoyo. Asi kuita izvona zvinoita hingana kuti mumasure me kubaiwa no banga, tosiya bangero pa cirondepo. Nge mushobo umwewo, isusu atingaetseri kuti tingazwa zvirinani pa kurhwadziswa katinonga taizwa kana isusu tikapangidza hingana kuti apana caitika.
6. Mazwiro api atingagara nawo kana munhu akatirhwadzisa?
6 Kana munhu akatirhwadzisa, pamweni ciro cokutanga cingaitika i kugara no shungu. Bhaibheri rinopangidza kuti pa migariro imweni tingakwanisa kugara takanyangadzwa. Asi irona rinotikohomedzesa kuti mazwiro aya aadikani kutikunda. (Pis. 4:4; Aef. 4:26) Ngei? Ngokuti mazwiro edu angatiitisa kuti tiite ciito uye shungu adzititori kuita zviro zvakanaka. (Tig. 1:20) Kana pakaitika ciro cinotirhwadza isusu tinogara no shungu, asi kurumbwa tino shungu i cisananguro.
Kana pakaitika ciro cinotirhwadza isusu tinogara no shungu, asi kurumbwa tino shungu i cisananguro
7. Mazwiro apizve amweni akashata atingagara nawo munhu paanotirhwadzisa?
7 Kana munhu akatibata zvisikazi kunaka, tingakwanisa kuzwa mazwiro akashata. Nge muezaniso, hanzvadzi imweni inozwi Ann inobhuya kuti: “Pandainga ndiciri mwana mudoko, baba angu akaramba mai angu owaka mwanakadzi waiaseenzera pa kurera mwana. Ndakazwa hingana kuti ndasiiwa. Awona akazogara no ana uye inini ndakazwa hingana kuti ndatsiiwa. Ndakakura ndecizwa hingana kuti ndarambwa.” Hanzvadzi imweni inozwi Georgette inopanganidza zveyakazwa mwamuna wakhona paakawaka mukadzi umweni, iyona inoti: “Tainga tiri shamwari no shamwari kubvira tiri madjaha. Isusu taiseenza pamwepo mu basa ro upionero! Inini ndakanetseka maningi.” Hanzvadzi imweni inozwi Naomi inoti: “Ndainga ndisikazvirangariri kuti mwamuna wangu waizondirhwadzisa. Paakapupura kuti wainga ano musambo we kuona pornografiya ecindifisira, inini ndakazwa hingana ndatsotswa.”
8. (a) Zvikonzero zvipi zvimweni zvinoita kuti tirekerere amweni? (b) Ngei zvakanaka katiri kuti tigare anhu anorekerera? (Onai bhokisi rakazwi: “ Munodikana Kuitei Kana Munhu Akamurhwadzisai?”)
8 Isusu atingakwanisi kuonerera zvinobhuiwa no amweni kana kuti zvaanotiitira, asi isusu tingakwanisa kuonerera mushobo watingaita zviro. Uye kakawanda kakhona, ciro cakanaka catingaita ndi kurekerera. Ngei? Ngokuti isusu tinoda Djehovha uye iyena anoda kuti isusu tigare anhu anorekerera. Kana isusu tikarumbwa takanyangadzwa uye tisikarekereri, zvinonga zviri nyore kuti isusu tiite zvisananguro zvisikazi kunaka uye tinotopedzesera tatokanda pa ngozi uthongo wedu. (Zvie. 14:17, 29, 30) Onai muezaniso we hanzvadzi imweni inozwi Christine. Iyona inoti: “Inini andinyanyi kuseka pandinogara no shungu kana kuti pandinorhwadziswa. Inini andirhyi zvakanaka uye andiwati zvakakwana. Uye zvinondishupha kuonerera mazwiro angu uye izvona zvinopedzesera zvabata-bata mucato wangu uye ushamwari wangu no anhu amweni.”
9. Ngei tisikadikani kucengeta bundu?
9 Kunyazi munhu watirhwadzisa asikakumbiri rurekerero, isusu tingakwanisa kuita ciito kuti tikanganwe zviya zvaatishaishira. Tingazviitisa kudini? Georgette wambobhuiwa nge zvake, unoti: “Zvainga zvisiripi nyore asi no kuhamba ke nguwa ndakasiya kuzwa shungu dzo mwamuna wangu we kare. Mubairo wakhona ngewe kuti, inini ndakazwa runyararo rakakura.” Patinosiya kucengeta bundu, isusu atigari munhu wakashatirhwa uye izvona azvizobati-bati mushobo watinobata amweni. Paya patinosiya kucengeta bundu zvinoita hingana kuti tiri kudzipasa cipo isusu pacedu. Isusu tingakwanisa kuenderera mberi uye kugara no upenyu unopfadza. (Zvie. 11:17) Asi mungaitei kana imwimwi musati magadzirira kurekerera?
KUKWANISANA NO MAZWIRO ENYU
10. Ngei zvecikosha kudzipasa nguwa ye kupora mu ndangariro? (Onaiwo mafoto.)
10 Zvinyi zvamungaita kuti musiye kugara no shungu kana kunyangadzwa? Ngo muezaniso, kana munhu akakuwara maningi unoda nguwa yakareba kuti apore. Nge mushobo umwewo, isusu tinoda nguwa yakareba kuti tipore mu ndangariro tisati tagadzirira kurekerera no mwoyo wese munhu watirhwadzisa.—Mup. 3:3; 1 Ped. 1:22.
Kana munhu akakuwara maningi unoda nguwa yakareba kuti tapore. Izvona zvinoitikawo panocokuita no mundangariro (Onai ndima 10)
11. Munamato unotibetsera kudini kurekerera?
11 Namatai mecikumbira Djehovha kuti amubetserei kugara munhu unorekerera. c Ann, unobhuya mushobo waakabetserhwa nge kuita munamato. Iyena wakati: “Inini ndakakumbira Djehovha kuti arekerere umwe na umwe we mu mhuri medu nge ndaa ye zviro zvakashata zvatakareketa kana kuti zvatakaita. Pedzepo inini ndakatarira kuna baba angu uye ku mukadzi wawo ndeciabvunza kuti ndainga ndaarekerera pa zviya zvaainga aita.” Ann unotendera kuti kuita izvona kainga kusiripi nyore. Asi iyena unoenderera eciti: “Nge ndaa ye kuteedzera kangu kurekerera ka Djehovha, kariro yangu ngeyekuetsera kuti baba angu no mukadzi wawo agare no cido ce kufunda zvakawanda ngezva Djehovha.”
12. Ngei tecidikana kugonda Djehovha pane kugonda mazwiro edu? (Zvierengo 3:5, 6)
12 Gondai kuti Djehovha anoita zvakanaka nguwa dzese, asi atingabhuyi zvimwezvo panocokuita no mazwiro edu. (Erengai Zvierengo 3:5, 6.) Nguwa dzese Djehovha anoziya zvakatinakira. (Isa. 55:8, 9) Uye iyena aazombotikumbiri kuti tiite ciro cingazotikuwadza. Hino, iyena paanotikohomedzesa kuti tigare anhu anorekererera, isusu tingagara no rugondo rokuti zvakatinakira. (Pis. 40:4; Isa. 48:17, 18) Nge dii rimweni, kana tikagonda basi no mazwiro edu, pamweni atizombokwanisi kurekerera. (Zvie. 14:12; Djer. 17:9) Naomi unoti: “Pakutanga, inini ndakarangarira kuti ndainga ndino citenderhwa ce kutama kurekerera mwamuna wangu, nge ndaa ye kuona pornografiya kaainga aita. Inini ndaithyira kuti iyena waizondirhwadzisazve kana kukanganwa mushobo waakandirhwadzisa. Uye inini ndaitodzibvunza kuti Djehovha anonyasa kuzwisisa mazwiro angu. Mumasure mazvo, inini ndakazozwisisa kuti kuzwisisa kunoita Djehovha mazwiro angu, akureyi kuti Djehovha anotenderana na inini. Djehovha anonyasa kuziya mushobo wandiri kuzwa uye kuti zvinotora nguwa kuti kurhwadziwa kangu kupere, asi iyena anodawo kuti inini ndigare munhu anorekerera.” d
TINGAGARA KUDINI NO MAZWIRO AKANAKA?
13. Maererano na Aroma 12:18-21, zvinyi zvatinodikana kuita?
13 Patinorekerera munhu unonga akatirhwadzisa maningi, isusu tinoda kuita zviro zvinodarika kutama kureketa basi ngezve zviya zvakaitika. Kana wakatirwhadzisa iri hama yedu, isusu tinoda kuita zviri zvese kuti tirumbwe tiri murunyararo, cinangwa cedu nge cekuita runyararo. (Mat. 5:23, 24) Isusu tinoda kutsiya shungu nge usisi, uye kutsiya kucengeta bundu nge kurekerera. (Erengai Aroma 12:18-21; 1 Ped. 3:9) Zvinyi zvingatibetsera kuti tiite izvona?
14. Tinodikana kupeta masimba pakuitei uye ngei?
14 Isusu tinodikana kupeta masimba kuti tione munhu watirhwadzisa nge mushobo waanooniwa na Djehovha. Djehovha anopsvaka kuona zvakanaka ku anhu. (2 Mak. 16:9; Pis. 130:3) Kajinji kakhona, munhu unopsvaka zviro ku anhu amweni unozviona, zvingadai zviri zviro zvakanaka kana zvakashata. Patinopsvaka mawara akanaka ku amweni, zvicaita nyore kuarekerera. Nge muezaniso, hama imweni inozwi Jarrod inoti: “Kandiri zviri nyore kurekerera hama pandinorangarira zviro zvakawanda zvakanaka zvainoita, pane kurangarira zviro zvakashata zvaakandiitira.”
15. Ngei zvecikosha kubvunza munhu wamurhwadzisai kuti ndakurekerera?
15 Ciro cimweni cinonyanya kukosha camungaita ikureketa ku munhuwo kuti imwimwi makamurekerera. Ngei? Onai zvakaizwa na Naomi wamborekethwa pa ndima dzadarika, iyena unoti: “Mwamuna wangu wakandibvunzisa kuti, ‘Iwewe wandirekerera here?’ Pandainga ndooda kureketa kuti, ‘Honde,’ inini andizi kukwanisa kumudaira uye ndakaona kuti ndainga ndisikazi kurekerera mwamuna wangu zvecibva pa mwoyo. Asi no kuhamba ke nguwa ndakakwanisa kureketa masoko aya ano simba, ekuti: ‘Inini ndamurekererai.’ Pandakarekerera mwamuna wangu, iyena wakatanga kucema. Inini ndakashamisika maningi nge mushobo wakarerukirhwa mwamuna wangu. Mumasure mazvo, inini ndakazwawo runyararo, ndakafundira kumugonda. Uye pari zvino taashamwari no shamwarizve.”
16. Zvinyi zvamafunda ngezve kurekerera?
16 Djehovha anoda kuti tigare anhu anorekerera. (Ako. 3:13) Asi cokwadi nge cekuti kuita izvona azviripi nyore. Isusu tingakwanisa kurekerera kana tikatama kugara hingana kuti atiripi kurhwadziwa uye kana tikapeta masimba kuti tisagare no shungu. Mumasure mazvo, isusu tinokwanisa kusakurira mazwiro akanaka.—Onai bhokisi rakazwi: “ Mazano Matatu Anotibetsera kuti Tirekerere.”
RANGARIRAI NGEZVE MUGUMISIRO WE KUREKERERA
17. Zvikonzero zvipi zvatinazvo zvinotiitisa kuti tirekerere?
17 Onai zvikonzero zvinganani zvinotiitisa kuti tirekerere amweni. Cokutanga, patinorekerera tinonga teciteedzera Baba edu Djehovha uye izvona zvinomupfadza maningi. (Ruka 6:36) Cocipiri, tinopangidzawo kutenda kedu nge mushobo unopangidza Djehovha unaki paanotirekerera. (Mat. 6:12) Uye cocitatu, kurekerera kunoita kuti tigare no uthongo wakanaka uye ushamwari wedu no amweni unonyasa kubamba.
18-19. Zvinyi zvingaitika patinosanangura kurekerera amweni?
18 Kana tikarekerera, zviro zvakanaka zvatisikakariri zvingakwanisa kuitika. Ngo muezaniso, onai zvakaitika na Denise. Paainga ari ku tribhunari, iyena wainga asikarangaridzi kuti mwanarume wakonzera tsawana wairangarira kudzitsungira mumasure me kutongwa. Asi mwanarume uu akazwa kupfara maningi nge kuona kurekererhwa kaakaizwa na Denise zvekuti akasanangura kutanga kufunda Bhaibheri no Apupuri a Djehovha.
19 Tingakwanisa kurangarira hingana kuti kurekerera iciro cinoshupha maningi kuita. Asi cingakwanisa kugara cimwe ce zvisananguro zvinopfadza maningi. (Mat. 5:7) Ngokudaro, ngatiite zvese zatinokwanisa kuti titeedzere kurekerera ka Djehovha.
NGOMA 125 “Anorupfawi Anopfara!”
a Mazina amweni akacinjwa.
b Pamugariro wakaita hingana uu, Mukristu umwe na umwe unodikana kudzisanangurira ega zvekuita.
c Onai ngoma dzo vhidhiyo dzakazwi: “Kanganwiranai,” “Regerera Nemwoyo Wese,” uye “Tava Shamwari Zvakare” mu.pr418.com, mu ciShona.
d Kunyazi hazvo kuona pornografiya kuri kuita citema uye kecikuwadza, ici acikonzeropi cinoita kuti munhu asina ndaa ku anhu akawakana arambane maererano no zvinobhuiwa no Bhaibheri.
