Baba angu na mai angu ainamata gereja Catolica uye awona ainyasa kudzipira. Asi paakaziya kuti zina ra Mwari ndi Djehovha, awona akagara Apupuri a Djehovha ainyasa kushingaira. Baba angu ainga ari mutsetsi we matabwa awona akasiya kuita mufanikiso wa Djesu uye akatanga kuseenzesa uzii wawo nge mushobo wakanaka. Awona akaita kuti dii rimwe ro nyumba igare Nyumba yo Umambo yokutanga yo ku San Juan del Monte yaigara dhuze no Manila, capital das Filipinas.

Inini ndakabarhwa muna 1952. Abereki angu akatanga kundifundisa ngezva Djehovha hingana zvaiitawo no hama dzangu 4 uye hanzvadzi dzangu 3. Pandaikura baba angu akandikohomedzesa kuti ndi erenge kapituru imwe yo Bhaibheri pa zuwa uye akafunda na inini mabhuku akawanda akasiyana-siyana. Nguwa dzimweni baba angu aipika Mabheterita uye aonereri e nharaunda anganani kuti auye koogara mazuwa manganani kumba kedu. Kuzwa maesperiensiya e hama idzi zvaiita kuti tipfare uye zvaibambisa maningi mhuri yedu. Izvona zvakaitawo kuti kuparidzira kuite ciro cinokosha maningi mu upenyu medu.

Abereki angu akandipasa muezaniso wakanakisisa we kutenda. Muna 1971 mumasure mekuti mai angu afa ngo kurhwara, inini na baba angu takatanga kuseenza tese hingana mapionero. Asi muna 1973 pandainga ndino makore 20, baba angu akafawo. Kuruza abereki angu kakaita kuti ndizwe ndiri ndenga uye kuzwa cisuwo cakakura. Asi kariro yo mu Bhaibheri “yakaima zvakanaka uye yakabamba” yakaita kandiri hingana ciro cinodzimikidza uye yakandibetsera kuti ndirumbwe ndakabamba pa ndangariro uye pa zvekunamata. (Aheb. 6:19) Paapadarika nguwa doko mumasure me kuti baba angu afa, inini ndakatenda mupiko we kuseenza hingana pionero espesiyari mu citsuwa ciri kure cinodainzwa Coron ku província yo Palawan.

Inini ndakaguma ku citsuwa co Coron pa ndainga ndino makore 21. Ndakarererhwa mu thaundi, hino ndakashamisika maningi pandakaona kuti kandaizoseenzera kainga kusina magetsi, mvura yakasisira kuti ndimwe uyewo kainga kusina makaru akawanda no mamota. Izvirokwazvo kuti kainga kuno hama dzinganani dzaigara ikona, asi kainga kusina kunyazi  mupionero umwe hake kuti andiperekedze mu basa re kuparidzira uye inini kakawanda kakhona ndaibuda ndega. Mu mwedzi wekutanga inini ndakazwa cisuwo cakakura ku mhuri yangu uye shamwari dzangu. Cousiku, inini ndainangira kudenga kakadzara no nyeredzi uye ndaicema maningi. Inini ndakatsumba kusiya basero kuti ndihwirire kumba.

Pa nguwa yese iyona ya ndaizwa ndiri ndega, inini ndaidurura mwoyo wangu kuna Djehovha. Ndaiedza kuedzurira zviro zvandaierenga mu Bhaibheri uye mu mabhuku aindibambisa. Nguwa dzese ndairangarira ngezve Pisarema 19:14. Ndakazwisisa kuti kana ndikanyasa kurangarira zviro zvinopfadza Djehovha, mushobo wake we kuita zviro no mawara ake, iyena waizogara “Buwe rangu uye Muponesi wangu.” Artigu yo Murindiri inobhuya kuti: “Imwimwi Amuripi Mwega” a yakandibetsera maningi. Inini ndakaierenga kakawanda. Kubhuya zvazviri pandainga ndiri ndega inini ndaizwa kuti Djehovha ainga ari na inini uye uwona wainga uri mukana we kunamata, kufunda uye kunyasa kurangarira.

Pa nguwa doko pandakatanga kuguma ku Coron, inini ndakagadzwa hinga mukuru. Inini ndainga ndiri ndega mukuru ikona uye masumana ari ese ndaiitisa Cikora ce Basa re Kuparidzira Umambo, Musangano we Basa, Fundo ye Bhaibheri ye Ungano uye Fundo ye Murindiri. Inini ndaiitawo mharidzo masumana ari ese. Kubhuya zvazviri inini ndainga ndisina nguwa kuti ndizwe ndiri ndega!

Inini ndakapfara maningi pandakaona kubudirira kandaiita mu basa re kuparidzira ku Coron—amweni e afundi angu no kuhamba ke nguwa akabhabhatidzwa. Asiwo ndakabatana no zvitsinzwa. Nguwa dzimweni ndaidikana kuhamba dakara pakati pe zuwa kuti ndi gume ku ndima ye kuparidzira, ndisikazii kandaizodikana kuwata kana ndagumeyo. Ndima ye kuparidzira ye ungano iyona yaibatanidzawo zvitsuwa zvidoko. Kuti ndi gume ikona kakawanda kakhona ndaikwira bharko uye ndecisongana no kucinja ke kunza kakadai hingana madutu kunyazi ndisikakwanisi kudhibha. Pa zvisinzwa zvese izvona, Djehovha akandidziirira uye akandicengeta. Inini ndakazozwisisa kuti Djehovha ainga ecindigadzirira kuti ndizokwanise kuzobatana no zvitsinzwa zvakakura pa basa ripsva.

Muna 1978, inini ndakagadzwa ku Papua-Nova Guiné, nyika yaigara kakutsi ko Australia. Nyika iyona yainga yakadzara no matunhu uye yakada kuezana no Espanha. Inini ndakashamisika maningi nge kuziya kuti anhu anoda kukwana três milhões aireketa mireketero inodarika 800. Cinopfadza ngece kuti akawanda akhona aireketa mureketero unozwi Tok Pisin.

Pakutanga ndakagadzwa mu ungano ye mureketero we Cingezi mu kapitari inodainzwa kuti Port Moresby. Asi mumasure mazvo inini ndakaenda mu ungano ye mureketero we Tok Pisin uye ndakatanga kufundira mureketero uwona. Zviya zvandaifunda ndizvona zvandaiseenzesa mu basa re kuparidzira. Izvona zvakandibetsera kuti ndi fundire mureketero we Tok Pisin no kukasika. Mu nguwa doko basi inini ndainga ndookwanisa kuita mharidzo mu mureketero we Tok Pisin. Kubvira ipona, pasati padarika gore pandakaguma ku Papua-Nova Guiné inini ndakatambira basa rakandisiya ndakashamisika. Ndakagadzwa kuti ndiseenze hinga Muonereri we Nharaunda mu ungano dze mireketero we Tok Pisin. Ndima iyona yaibatanidza mbuto yakakura maningi.

Ngokuti ungano dzainga dziri kure no kure, inini ndaidikana kugadzirira magungano e nharaunda uye kuvhakaca kakawanda. Pakutangisa inini ndaizwa ndiri ndega ngokuti zvese zvainga zviri zvipsva kandiri,  ngokuti yainga iri nyika ipsva, mureketero upsva uye tsika yakasiyana. Nge ndaa ye matunhu, zvainga zvisikaiti kuti ndivhakacire ungano ndeciseenzesa makwanza, hino inini ndaidikana kuvhakacira ungano ndeciseenzesa ndeka masuma ese. Nguwa dzimweni inini ndainga ndiri ndega mu ndeka yekuti yainga ino zvitsinzwa zvakawanda. Rhwendo irona, nguwa dzese raindisiya ndecithya azvinei kuti ndaiseenzesa ndeka kana kuti bharko!

Anhu padoko basi ndiwo ainga ano materefoni, hino inini ndaiseenzesa tsamba kuti ndibvunze ungano ngezve kuavhakacira. Kakawanda kakhona, inini ndini ndaitanga kuguma tsamba dzangu dzisati dzaguma. Uye ndaidikana kupsvaka kuti hama dzinogara papi. Asi pese pandaigumira hama, awona ainyasa kunditambira zvakanaka. Kutenda kaaita uye rudo rawo zvaindiedzurira ngezve cikonzero co kuoneka ndiri ipona. Inini ndaizwa kuti Djehovha aindibetsera nge mishobo yakawanda uye ushamwari wangu naye wainyasa kubamba.

Pa musangano wangu we kutanga mu citsuwa co Bougainville, kazado imweni yakandikhwederera yeciseka uye yakandibvunzisa kuti: “Iwewe uciri kutiedzurira here?” Inini ndiri kuedzurira kuti ndakaaparidzira mumasure me kuguma Port Moresby. Inini ndainga ndakatanga kuafundisa Bhaibheri uye mumusure mazvo ndakapasa hama imweni inogara ikona kuti ienderere yeciafundisa. Parizvino awona ainga abhabhatidzwa! Aya akagara makomborero andakagara nawo mu makore matatu ese andakaseenza ku Papua-Nova Guiné.

Ndisati ndaenda ku Coron muna 1978, ndakaziyana na Adel. Hanzvadzi yainyasa kushingaira uye yainga yakarungama maningi. Iyona yainga ino ana airi, Samuel na Shirley uyewo yaiseenza hingana mupionero we nguwa dzese. Kusiya izvona, iyona yaicengeta mai ainga akura pa thunga. Muna Mayo ya 1981, inini ndakahwirira ku Filipinas uye ndakacata nayo. Mumasure me mucato takariritira pamwepo mhuri yedu uyewo takaseenza pamwepo hingana mapionero e nguwa dzese.

Mu gore ra 1983, kunyazi ndainga ndino mhuri, inini ndakahwirira kugara mupioneiro espesiyari uye ndakagadzwa kuti ndiende ku citsuwa ce Linapacan ku nharaunda ye Palawan. Isusu pamwepo no mhuri yedu takafuruka kuti tiyende ku mbuto iyona kekuti kainga kusina kunyazi hama imwe. Gore rakazoteera mai a Adel akafa. Ciro cakatibetsera kuti tikwanisane no kufirhwa ikhona kubatikana ke taiita mu basa re kuparidzira. Isusu takatangisa kuitisa fundo dzinobudirira dze Bhaibheri mu citsuwa icona zvekuti pa nguwa idoko basi takatangisa kuda Nyumba ye Umambo. Hino isusu kamare takawaka Nyumba ye Umambo idoko. Isusu takapfara maningi nge kuona kuti ke makore matatu basi mu masure me kuguma kedu, anhu anokwana kuita 110 akakwanisa kupinda cirangaridzo. No kuhamba ke nguwa akawanda akhona akabudirira uye akabhabhatidzwa.

Muna 1986, inini ndakagadzwa kuti ndiende ku citsuwa co Culion, uye ikona kainga kuno anhu ano mapere. Mu nguwa iyona, Adel wakagadzwawo hingana mupionero especiyari. Pakutanga isusu takambothya kuparidzira anhu aya ainga akadzara no mapere. Asi aparidzi e ikona akatibvunza kuti anhu aya ainga apaswa mutombo uye mutombo uwona waiita kuti awona asapase amweni mapere aya. Anhu anganani ekuti ainga ano mapere akatanga kupinda misangano mu nyumba ye hanzvadzi imweni. Paapadarika nguwa doko isusu takazwawo  takasudzunuka kuti tiaparidzire. Kubhuya zvazviri, zvainga zvecipfadza kubhuya ngezve kariro ye mu Bhaibheri ku anhu aya aizwa asikadiwi na Mwari uye no anhu. Isusuwo, takapfara maningi nge kuona mupfaro wawo paakafundira kuti raizoguma zuwa rokuti aizogara no mupfaro wakakwana.—Ruka 5:12, 13.

Ana edu akadjairana kudini no upenyu ku Culion? Inini na Adel takapika madjaha mairi e ku Coron kuti agare na isusu ku Culion. Ngokudaro ana edu aizogara no shamwari dzakanaka. Samuel, uye Shirley, no hanzvadzi dziya mbiri akagara no mupfaro wo kubetsera ana amweni kufundira cokwadi. Awona aifundisa fundo dze Bhaibheri ku ana akawanda. Inini na Adel taifunda no abereki awo. Yakazoguma nguwa yokuti tainga tooitisa fundo dzo Bhaibheri ku mhuri dzinokwana kuita 11. Mu nguwa doko isusu takazogara no fundo dzo Bhaibheri no anhu anobudirira uye takazogara no mukana we kuumba ungano ipsva!

Pa kutanga, ndini basi ndainga ndiri mukuru we ungano mu nharaunda iyona. Hino Bheteri, rakandikumbira kuti masumana ari ese ndiitise musangano ku aparidzi anokwana kuita 8 eku Culion, mumasure mazvo, ndaidikana kuita zvimwe-zvimwezvo ku aparidzi anokwana kuita 9 eku nharaunda inodainzwa kuti Marily, kekuti ndaidikana kuhamba ke nguwa dzinokwana kuita 3 no bharko kubuda ku mbuto yandaigara. Mumasure me musangano ikona, mhuri yedu yaihamba ke nguwa yakareba mu matunhu kuti tiitise fundo dzo Bhaibheri ku nharaunda inodainzwa kuti Halsey.

No kuhamba ke nguwa, isusu takaona anhu akawanda ecifunda cokwadi ku Marily uye ku Halsey. Izvona zvakaita kuti tiwake Nyumba dze Umambo mu mbuto idzona. Hingana mushobo wakaitika ku Linapacan, hama uye anhu aipfarira, akabetsera no zviro zvakawanda zvaidikanwa pakuwaka Nyumba dze Umambo. Nyumba ye Umambo ye ku Marily yainga ino mbuto yakakura yaikwana anhu 200 uye yaikwanisa kuseenzeswa pakuitira magungano.

Muna 1993 mumasure mekuti ana edu akura, inini na Adel takagadzwa kuti tiseenze hingana aonereri e nharaunda ku Filipinas. Pedzepo muna 2000, inini ndakakursari Escola de Treinamento Ministerial uye ndakakwaniriswa kuti ndigare mufundisi we cikora icona. Inini ndaizwa hingana kuti andizi kusisira kuti ndiite basa irona, asi Adel nguwa dzese waindibambisa. Iyena waibhuya kuti Djehovha aizondipasa simba randaida kuti  ndiriite. (Afi. 4:13) Uye Adel waiziya kuti izvona i zvirokwazvo ngokuti kunyazi ecibatana no cinetso co uthongo iyena waikwanisa kuita basa rake.

Muna 2006 pandaiseenza hingana mufundisi, Adel wakaonekwa kuti wainga uno nhenda inozwi mal de Parkinson. Izvona zvakaita kuti titsukware maningi. Pandakabhuya kuti ndaidikana kusiya basa rangu kuti ndimucengete, Adel wakati: “Haiwa mwamuna wangu usasiye, psvaka medhiko kuti andibetsere pa nhenda iyona ii, inini ndinozviziya kuti Djehovha acatibetsera kuti tirumbwe tiri pa basa.” Mu makore 6 akazoteera, Adel wakazorumbwa ecipasa zvakanakisisa zvake asikagurunguti. Paainga asikacakwanisizve kuhamba, iyena waiparidza akagara pa kadera ye marodha uye paainga asikacakwanisizve kureketa iyena waidaira no soko rimwe kana mairi pa musangano. Dakara paakafa mu gore ra 2013, hama dzakawanda dzaitumira tsamba kuna Adel dzecipangidza kuti dzaikoshesa maningi muezaniso wake we kushingaira. Ndakapedza makore anodarika 30 ndina Adel, hino paakafa, ndakazwa ndakatsukwara uye ndiri ndega.

Adel waida kuti inini ndirumbwe ndiri mu nguwa yakadzara uye ndizvona zvandakaita. Inini ndakarumbwa ndakabatikana mu basa ra Djehovha uye izvona zvaindibetsera kuti ndisanyanye kuzva ndiri ndega. Kubvira mu 2014 dakara 2017, inini ndakagadzwa kuti ndi vhakacire ungano dzinoreketa mureketero Tagalo mu nyika yekuti basa redu rainga rakarambidzwa. Mumasure mazvo inini ndakavhakacira ungano dzo mureketero we Tagalo ku Taiwan ku Estados Unidos uye ku Canadá. Mu 2019 inini ndainga ndiri mufundisi we Cikora ce Aziisi e Umambo mu mureketero we Cingezi ku Índia uye ku Tailândia. Mabasa aya andaiita aindipasa mupfaro wakakura. Nguwa yandinozwa ndecipfara ndi iya yekuti ndakanyasa kubatikana mu basa ra Djehovha.

Pa basa rese ripsva randinopaswa, inini ndinofundira kuda hama ne hanzvadzi dzandinoziya, ndiyo ndaa kuasiya azviripi nyore. Nguwa dzese ndinozwa ndakacengethwa na Djehovha uye izvona zvinondibetsera kutenda no mwoyo wese cinjo yese inoitika mu upenyu mangu. Pari zvino inini ndiri kuseenza hingana mupionero especial ku Filipinas. Ndiri kuzwa mupfaro wakakura mu ungano yangu ipsva yekuti i mhuri yangu inonditsigira uye inondicengeta. Inini ndinodada maningi na Samuel uye Shirley ngokuti awona ari kuteedzera muezaniso wakanaka we kutenda wa mai awo.—3 Juau 4.

Hino inini ndakabatana no matambudziko akawanda mu upenyu, kutobatanidzawo kuona mukadzi wangu ecitambudzika no nhenda uye kufa. Inini ndaitodikana kudjairana no migariro yakawanda ipsva, asi ndakaona kuti Djehovha “asiripi kure ke umwe na umwe wedu.” (Zvii. 17:27) Nyara ya Djehovha “aizi kufupika” zvekuti aikwanisi kubetsera uye kubambisa aseenzi ake kunyazi aya anorarama ku mbuto iri kure. (Isa. 59:1) Djehovha i Buwe rangu, iyena akagara neni pa upenyu wangu wese inini ndinomutenda maningi. Zvezvirokwazvo inini anditozi kugara ndiri ndega.