1-2. (a) Ngei kazado dzabva kucata dzecidikana kugonda Djehovha? (Pisarema 37:3, 4) (b) Ticaonei mu fundo ino?

IMWIMWI murikuda kucata, kana kuti makabva kucata zvino here? Kana zviri izvona, imwimwi zvezvirokwazvo munoda kukhorovhera upenyu ku dii re munhu wamunodisa maningi. Zviri pamhene kuti mu mucato mune zvitsinzwa. Aya anonga abva kucata anodikana kuita zvisananguro zvinokosha, uye mushobo waanorhwisana no zvitsinzwa izvi uye no zvisananguro zvaanoita, zvingakwanisa kubata-bata mupfaro wawo kwenda no kwenda. Mwamuna no mukadzi paanogonda Djehovha, awona anoita zvisananguro zvakanaka, mucato wawo unorumbwa wakabamba uye anopfara maningi. Asi kazado isikapsvaki kuziya zvinorangarirhwa na Mwari nge zve nyaya, pamweni angabatana no matambudziko mu mucato mawo uye aazopfari.—Erengai Pisarema 37:3, 4.

² Fundo ino yakaizwa yecirangarirhwa maka-maka ku aya abva kucata, asi icareketa nge zve zvitsinzwa zvinobatana no makazado ese. Iyona icapangidza zvatingafunda kubva pa miezaniso ye anarume no anakadzi anorekethwa mu Bhaibheri. Miezaniso iyona icatifundisa mafundo atingaseenzesa mu upenyu uye mu mucato. Ticaonawo kuti tingafundei no maeshiperiensiya e makazado amweni e mazuwa ano.

3-4. Kazado yabva kucata ingabatana no zvitsinzwa zvipi?

³ Amweni angakohomedzesa abva kucata kuti agare no upenyu waanoti upenyu uri nani. Ngo muezaniso, abereki no  anyaukama amweni, angakwanisa kubambidzira kazado kuti ibare ana nokukasika. Zvingaitawo kuti shamwari kana hama dzino cido cakanaka dzingakohomedzesa abva kucata kuti atenge nyumba oidzadza no midziyo ye nyumba kuti irungame.

⁴ Kana kazadoyo ikatama kungwarira icapedzesera yaanomagaa. Hino ese ari airi mwamuna no mukadzi pamweni acadikana kuseenza no simba kuti aripe magaa. Pamweni awona acapedzesera asisina nguwa yekuita fundo ye munhu ega, kunamata ke mhuri uye kuparidzira. Pamweni awona acazotopedzesera aakutorovha ku misangano ngekuseenza maningi kuti agare no mare yakawanda kana kuti asaruze basa. Migumisiro yakhona, awona angaruza mikana yakakura yekuita zvakawanda pakuseenzera Djehovha.

5. Muezaniso wa Klaus na Marisa unotifundisei?

⁵ Eshiperiensiya yatabva kuona inopangidza kuti kana tikakanda mare uye zviro zvekunyama pa mbuto ye kutanga, atizogari no mupfaro wezvirokwazvo. Onai kuti kazado inozwi Klaus na Marisa yakafundei nge zve nyaya ii. * Pakutanga ke mucato wawo, awona ari airi aiseenza zuwa rese kuti agare no upenyu wakanyasa kunaka. Asi nokuhamba ke nguwa, awona akazwisisa kuti ainga asikapfari zvezvirokwazvo. Klaus unotendera eciti: “Isusu tainga tino zvakawanda kudarika zvataida pakurarama, asi tainga tisina zvinangwa zvekunamata. Kubhuya zvirokwazvo, upenyu wedu waishupha uye wainga usina mupfaro.” Pamweni imwimwi, makambozwisisawo kuti kukanda mare uye zviro zvekunyama pa mbuto yekutanga azviunzisi mupfaro wezvirokwazvo. Kana izvi zvirikuitika kamuri musaore mwoyo. Onai kuti miezaniso yakanaka ye amweni ingamubetsera kudini. Kutanga ngatione kuti amuna angafundei pa muezaniso wa Mambo Djeosafati.

6. Paaibatana no citsinzwa cakakura, Mambo Djeosafati akaseenzesa kudini tsamba ya Zvierengo 3:5, 6?

⁶ Amuna, munosozwa makaremba nguwa dzimweni nge ndaa ye ubaba wamunawo here? Kana zviri izvona, onai muezaniso wa Mambo Djeosafati. Ngekuti wainga ari mambo, Djeosafati wainga ano ubaba wekucengetedza kugarika kwe madzinza ese! Iyena wakabata kudini ubaba wake wakakura? Djeosafati wakaita zvese zvaaikwanisa kuti acengetedze anhu. Iyena wakawaka ma thaundi akabamba e Djudha uye wakaunganidza cikwata cakakura ce anyahondo cainga cino masurudado anodarika 1 160 000. (2 Mak. 17:12-19) Nokuhamba ke nguwa, Djeosafati wakasongana no citsinzwa cakakura. Cikwata cakakura ce anyahondo ce a Amoni, ce Amoabhi uye ce anarume e mutanha we matunhu we Seiri akasanangura kurhwisana naye, ecikanda upenyu wa Djeosafati, we mhuri yake uye we dzinza re Aisraeri pa ngozi. (2 Mak. 20:1, 2) Djeosafati wakaitei? Iyena wakapsvaka rubetso uye simba ra Djehovha. Izvi zvinoenderana no zano riri  pana Zvierengo 3:5, 6. (Erengai.) Munamato wekudzidodosa wa Djeosafati wakatarhwa pana 2 Makoronika 20:5-12, unopangidza kuti iyena waigonda maningi Baba ake ekudenga ano rudo. Djehovha akadaira kudini munamato wa Djeosafati?

7. Djehovha akadaira kudini munamato wa Djeosafati?

⁷ Djehovha akareketa na Djeosafati eciseenzesa murevhi unozwi Jazieri. Djehovha akati: “Garai mu mbuto dzenyu, morumbwa makaima uye onai kuponeswa kamucaizwa na Djehovha.” (2 Mak. 20:13-17) Nhungamiriro dzakapaswa Djeosafati dze hondo dzainga dzisikazi kudjairika! Asi idzona dzainga dzisikazi kubva ku munhuwo hake, asi kuna Djehovha kamare. Ecinyasa kugonda Mwari wake, Djeosafati wakatondowedza nhungamirirodzo. Iyena no dzinza re Aisraeri paakaenda koonana no azondi awo, iyena aazi kukanda mberi masurudado anonyasa kuziya kurhwa, asi wakakanda aembi asina cokurhwa naco. Djehovha aazi kutsukwarisa Djeosafati, ayena akanyisa cikwata ciya ce anyahondo.—2 Mak. 20:18-23.

8. Amuna angafundei no muezaniso wa Djeosafati?

⁸ Amuna, imwimwi mungafunda zvakawanda no muezaniso wa Djeosafati. Imwimwi muno ubaba wekugarika ke mhuri yenyu, ndiyo ndaa meciseenza no simba kuti muidziirire uye muitsigire. Pamunobatana no zvinetso pamweni mungarangarira kuti mucagadzirisa zvese muri mwega. Asi musagonde simba renyu. Pane kudaro, namatai kuna Djehovha pamunonga muri mwega uye namatai no mwoyo wese pamwepo no mukadzi wenyu. Psvakai nhungamiriro dza Djehovha mu Bhaibheri no mu mabhuku e sangano rake uye seenzesai mazano amunogumira. Pamweni, anhu amweni angatama kutenderana no zvisananguro zvamunoita zvinobva mu Bhaibheri uye angaguma pakubhuya kuti maakupenga. Awona angamubvunza kuti mare uye zviro zvekunyama ndizvo zvicadziirira mhuri yenyu. Asi edzurirai muezaniso wa Djeosafati. Iyena wakagonda na Djehovha uye wakazvipangidza nge zviito. Djehovha aazi kusiya mwanarume uya wakagondeka, ndiyo ndaa ayena aazomusiiwo. (Pis. 37:28; Ahe. 13:5) Makazado angaiteizve kuti agare no mupfaro we zvirokwazvo?

9. Tinoziyei ngezve muphorofita Isaya no mukadzi wake?

⁹ Kuna muphorofita Isaya no mukadzi wake, basa ra Djehovha ndiro raikosha maningi mu upenyu wawo. Isaya wainga ari mu phorofita uye pamweni mukadzi wake wainga ano basa rakewo ngekuti mu Bhaibheri iyena unodaidzwa kuti “muphorofita kadzi.” (Isa. 8:1-4) Zviri pamhene kuti kazado ii yaikanda ndangariro dzawo pakuseenzera Djehovha. Awona ndi muezaniso wakanaka ku kazado dze mazuwa ano!

10. Kufunda uphorofita we Bhaibheri kungakwanisa kudini kubetsera makazado?

¹⁰ Makazado e mazuwa ano angakwanisa kuteedzera muezaniso wa Isaya no mukadzi wake ngekuita zvese zvaanokwanisa mu basa ra Djehovha. Awona angabambisa kugonda kawo Djehovha ngekufunda uphorofita uri mu Bhaibheri uye kuona kuti uwona unodzadzika nguwa dzese. * (Tit. 1:2) Zvakanaka maningi kuti awona arangarire kuti angabatanidzwawo kudini pakudzadzika ke uphorofita unganani. Ngo muezaniso, awona angakwanisa kubatanidzwawo pakudzadzika ke uphorofita wa Djesu wekuparidzira masoko akanaka mugumo usati wauya. (Mt. 24:14) Kana mwamuna no  mukadzi akafunda ese uphorofita we Bhaibheri uye akagara no rugondo rekuti uwona unodzadzika nguwa dzese, awona anonga ecibambisa cisananguro cawo cekuitira Djehovha zvakawanda.

11. Akira na Prisira akakwanisa kuitei, uye ngei?

¹¹ Kazado dzabva kucata dzingafunda zvakawanda no muezaniso wa Prisira na Akira, kazado yeciDjudha yaigara ku thaundi re Roma. Awona akafunda nge zve masoko akanaka nge zva Djesu uye akagara aKristu. Zvezvirokwazvo, awona aipfarira maningi upenyu waairarama. Asi upenyu wawo wakacinja ciriporipoco apo mukuru-mukuru waizwi Cláudio paakapasa mutemo wekuti a Djudha aidikana kubuda mu Roma. Onai kuti izvi zvakareyei kuna Akira na Prisira. Awona aidikana kusiya mbuto yawo yaaigara uye yaainyasa kuziya oenda koogara ku mbuto imweni, otangisazve pasva bhizi rawo rekugadzira matenda. Ku mbuto ipsva yaaigara ku Korinti, Akira na Prisira akabatana no ungano yekweneyo uye akaseenza no muphostori Pauro kuti abambise hama dze kweneyo. Mumasure mekacinguwa awona akafuruka ecienda ku mathaundi amweni aidikana aparidzi akawanda. (Zvi. 18:18-21; Aro. 16:3-5) Zvezvirokwazvo, upenyu wawo waishupha maningi asi wainga wakadzara nge makomborero! Pamweni imwimwi munonyasa kuziya ngano ya Akira na Prisira, asi makamboedza kurangarira kuti ngei awona akakwanisa kuita zvese izvi? Ngekuti kunyazi aisongana nokufuruka kainga kusikaetserhwi, awona akarumbwa ecikanda Umambo wa Mwari pa mbuto yekutanga.

12. Ngei kazado yecidikana kugara no zvinangwa zvekunamata?

¹² Kazado dze nyamasi uno dzingakwanisa kuteedzera muezaniso wa Akira na Prisira ngekukanda Umambo wa Mwari pa mbuto yekutanga. Nguwa yakanaka yekuti makazado acedze nge zve zvinangwa zvawo, i nguwa yaanonga ecinamorari. Zvakanaka maningi kuti kazado iite zvisananguro ese uye opeta masimba ari ese kuti adzadzise zvinangwa zvawo zvekunamata ari pamwepo, izvona zvicaabetsera kuona nyara ya Djehovha mu upenyu wawo. (Mup. 4:9, 12) Onai muezaniso wa Russell na Elizabeth. Russell unoti: “Panguwa yatainamorari, taicedza maningi nge zve  zvinangwa zvedu zvekunamata.” Elizabeth unoti, “Taicedza nge zvazvo kuitira kuti kana ikaguma nguwa yekuita zvisananguro, apana ciro caizotipingaidza pakudzadzisa zvinangwa zvedu.” Migariro ye zviro ya Russell na Elizabeth yakaatendera kuti awona afuruke ecienda ku Micronésia kaidikana aparidzi akawanda.

13. Maererano na Pisarema 28:7, ngaupi migumisiro kana tikagonda na Djehovha?

¹³ Kuita hinga Russell na Elizabeth, kazado dzakawanda nyamasi uno dzinosanangura kugara no upenyu usina zvakawanda kuti akwanise kuita zvakawanda mu basa rekuparidzira uye rekufundisa. Kana kazado ikagara no zvinangwa zvekuitira Djehovha zvakawanda oseenza pamwepo kuti azvidzadzise, awona acazogara no migumisiro yakanaka maningi. Mwamuna no mukadzi angakwanisa kuona kuti Djehovha arikuariritira kudini. Migumisiro yakona, rugondo rawo kuna Djehovha rinotunhudzirika uye awona anogara nomupfaro we zvirokwazvo.—Erengai Pisarema 28:7.

14. Muphostori Pedru no mukadzi wake akapangidza kudini kuti aigonda pa cipikirhwa cakatarhwa pana Mateu 6:25, 31-34?

¹⁴ Kazado dzingakwanisawo kufunda no muezaniso we muphostori Pedru no mukadzi wake. Pakati pegore rimwe no mwedzi mitanhatu mu masure mekusongana na Djesu kekutanga, Pedru waidikana kuita cisananguro cinokosha maningi. Iyena wairarama no bhizi rekubata howe. Hino, Djesu akamupika kuti amuteere ke nguwa yakadzara. Cisananguro icona cainga cisiripi nyore kuna Pedru, ngekuti iyena waidikana kurangarira nge zve magarire e mhuri yake. (Ru. 5:1-11) Asi Pedru wakasanangura kuhamba na Djesu mu basa rake rekuparidzira. Cisananguro icona cainga cakanaka! Uye tino zvikonzero zvakanaka zvekuti titendere kuti mukadzi wa Pedru wakatsigira cisananguro cakaizwa naye. Bhaibheri rinopangidza kuti mumasure mekuti Djesu amutswa, iyena wakahamba na pedru mu vhiyaje dzake ke nguwa yakareba. (1Ako. 9:5) Zvezvirokwazvo, nge ndaa ye muezaniso we mukadzi wake, Pedru wakapasa mazano akanaka ku amuna no akadzi e ciKristu no hana yakacena. (1Pe. 3:1-7) Djehovha ainga apikira kuti aizoriritira aya anokanda Umambo pa mbuto yekutanga. Tino rugondo rekuti Pedru no mukadzi wake akagonda pacipikirhwa ici.—Erengai Mateu 6:25, 31-34.

15. Muezaniso wa Tiyago na Esteri unotifundisei?

¹⁵ Kana imwimwi maano makore akawanda macata mungarumbwa kudini mecisakurira cido cenyu cekuita zvakawanda mu basa rekuparidzira? Mushobo wakanaka wekuzviita, ngewekufundira no maeshiperiensiya e makazado amweni. Ngo muezaniso, mungakwanisa kuerenga mundandanda ye misoro inooneka mu Murindiri ino musoro unoti, “Vakazvipa Nemwoyo Unoda.” Misoro iyona yakabetsera kazado imweni yeku Brasil inozwi Tiyago na Esteri, kuti asakurire cido cawo cekuseenzera kunodiwa aparidzi akawanda. Tiyago unopanganidza eciti: “Kuerenga kuti Djehovha akabetsera kudini aseenzi ake e mazuwa ano, kakatiitisa kuti tide kuzwawo nyara ya Djehovha yecititungamirira uye yecitiriritirawo.” Tiyago na Esteri akafuruka oenda ku Paraguai, kweneyo aona anoseenza mu ndima inorekethwa ciPutukezi kubvira mu 2014. Esteri unoti: “Tsamba yatinonyanya kupfarira, ngeya Aefeso 3:20. Tinoona masoko awona ecidzadzika nguwa dzese mu basa redu ratinoitira Djehovha.” Mu tsamba iyona ku Aefeso, Pauro wakagondesa kuti Djehovha aizoita kudarika zviya zvatinomukumbira. Uye izvona i zvirokwazvodi kamare!

16. Kana kazado yecirangarira kudzadzisa zvinangwa zvawo mu upenyu, inodikana kukumbira mazano kunaani?

 ¹⁶ Kazado dzabva kucata dzingabetsereka no maeshiperiensiya e anhu amweni akafundira kugonda Djehovha. Kazado dzimweni dzirikuseenza mu nguwa yakadzara ke makore akawanda. Kana imwimwi murikurangarira kudzadzisa zvinangwa zvenyu, madini kukumbira mazano ku kazado idzona? iwona ndi umwe we mishobo yakanaka yekupangidza kuti munogonda Djehovha. (Zvie. 22:17, 19) Akuru angabetserawo aya abva kucata kuti agare no zvinangwa uye adzadzise zvinangwa zvawo zvekunamata.

17. Cinyi cakaitika kuna Klaus na Marisa, uye muezaniso wawo unotifundisei?

¹⁷ Pamweni paya, patinosanangura kuitira Djehovha zvakawanda, zviro zvingatama kuhamba nge mushobo wataida. Onai muezaniso wa Klaus na Marisa amborekethwa panotangira fundo ino. Mu masure memakore matatu e mucato wawo, awona akafuruka oenda ku Finlândia kuti abetsere pa basa rekuwaka firiari re nyika iyona. Asi awona akaziya kuti aizobuda kweneyo mu masure me mwedzi mitanhatu. Pakutanga awona akatsukwara maningi. Asi zviro zvakazocinja uye awona akapikwa kuti aite kursu yemireketero yeci Árabe. Nyamasi uno, awona arikuseenza ecipfara mu mureketero weci Árabe ku nyika imweni. Ecirangarira zvakaitika sure, Marisa unoti: “Zvinotyisa kubuda ku mbuto yawadjaira ino zvese zvaunoda uye wonyasa kugonda na Djehovha. Asi ndakaona kuti Djehovha akatibetsera nge mushobo watainga tisikakariri. Mu masure mekuitika zvese izvi, rugondo rangu kuna Djehovha rakanyasa kubamba.” Hingana zvinopangidzwa no muezaniso uu, imwimwi mungagara no rugondo rekuti Djehovha acarumbwa ecimukomborera kana mukanyasa kumugonda.

18. Kazado dzinodikana kuitei kuti dzirumbwe dzecikanda basa ra Djehovha pa mbuto yekutanga mu upenyu wawo?

¹⁸ Mucato i cipo ca Djehovha. (Mt. 19:5, 6) Ayena anoda kuti makazado apfadzwe nge cipo ici. (Zvie. 5:18) Imwimwi mabva kucata makamboima here monyasa kurangarira kuti murikuseenzesa kudini upenyu wenyu? Murikupeta masimba ari ese here kuti mupangidze Djehovha kuti munotenda nge zvese zvaarikumuitira? Cedzai na Djehovha meciseenzesa munamato. Psvakai mu Bhaibheri nhungamiriro dzinonyasa kuseenza pa mugariro wenyu we zviro. Pedzepo, seenzesai mazano a Djehovha mu upenyu wenyu. Kana mukazviita, garai no rugondo rekuti mucagara no upenyu unopfadza uye unomakomborero akawanda ngekuti munonga mecikanda basa ra Djehovha pa mbuto yekutanga mu upenyu wenyu!