Mu makore aikwana kuita 670 K.A.A., Asiriya wainga uri umambo uno simba we nyika yese. Blog re Museu we ku Britânico rinoti: “Mbuto yaro yaitangira kumabvazuwa ke Chipre dakara kumadokero ke Irã; uye pa nguwa imweni yakaguma pakutobatanidza Edjipitu.” Guta guru rayo Ninivhi, rainga riri thaundi rakakura re nyika yese. Irona raidada nge kugara no zviwakwa zve kare zvinoshamisa, maruwa aipfadza, nyumba dzakakurisisa, dzakarungama uye no mabhibhiriyoteka akakura. Zvitarhwa zve kare zve pa madziro zve Ninivhi, zvinopangidza kuti mambo Assurbanipal, kuita hingana madzimambo amweni e Asiriya, iyena waidzidaidza “mambo we nyika yese.” Pa nguwa iyona, zvaiita hingana kuti Asiriya uye Ninivhi, ainga ari mathaundi ainga asikazoparadzwi.

Asi, panguwa yekuti Asiriya yainyasa kubudirira, muphorofita wa Djehovha, Zefaniya, wakaphorofita eciti: “[Djehovha] acaparadza Asiriya, acaita kuti Ninivhi igare mathuku, mbuto isikanai.” Uyewo muphorofita Naumi wakaphorofitawo eciti: “Torai prata, torai ouro! . . . Thaundi racona arisisina ciro, zviro zvese zvatorhwa, zvaparadzwa! . . . Ese acakuona acakutiza uye acabhuya eciti: ‘Ninivhi raparadzwa!’” (Zef. 2:13; Na. 2:9, 10; 3:7) Anhu paaizwa masoko aya, pamweni aikwanisa kudzibvunzisa kuti: ‘Uripodi mukana kamare wekuti izvi zviitike? Ricagumadi kamare zuwa rekuti thaundi rino simba re Asiriya ricazoparadzwa?’ Zvaioneka hingana kuti azvikwanisiki.

Kunyazi zvakadaro, zviro zvaioneka hingana zvisikazoitiki, zvakaitika! Mu makore aikwana kuita 600 K.A.A., Asiriya yakaparadzwa no Abhabhironi uye Amedho. Pakupedzesera, Ninivhi rakagara mathuku uye rakaguma pakukanganika! Maererano no artigu yakabudiswa no Museu Metropolitano de Arte de Nova York, yakati: “Mu makore e pakati no pakati, anhu akasiya kurarama mu Ninivhi uye na nyamasi uno, anhu aiziya kuti kainga kuno Ninivhi, nge zviya zvinorekethwa mu Bhaibheri.” Site inozwi Sociedade de Arqueologia Bíblica yakabhuya yeciti, mukutanga ke makore e 1800, “apana kana umwe hake waiziya kuti thaundi guru re Asiriya rainga ririyodi kamare here.” Asi muna 1845, arqueólogo unozwi Austen Henry Layard akatanga kucera pa mbuto yainga ino thaundi re Ninivhi. Zviro zvakaoneka ipona zvakapangidza kuti Ninivhi rainga riri thaundi rino simba.

Uphorofiti wese wakareketa nge zve Ninivhi wakanyasa kudzadzika uye izvona zvinobambisa rugondo redu rekuti uphorofiti wese uri mu Bhaibheri unoreketa nge zve utongi wa nyamasi uno ucazodzadzikawo.—Dha. 2:44; Zva. 19:15, 19-21.