1. Djehovha anotikohomedzesa kuti tiitei?

DJEHOVHA anoda rudo rakagondeka. (Oze. 6:6) Ayena anokohomedzesawo aseenzi ake kuti azwewo zvimwezvo. Eciseenzesa muphorofita Mika, Mwari akati “ida rudo rakagondeka.” (Mik. 6:8, masoko e pasi) Asi zviri pamhene kuti tisati takwanisa kuita izvona, tinodikana kuziya kuti cinyi cinozwi rudo rakagondeka.

2. Mawara api manganani anopangidzwa nge rudo rakagondeka?

² Cinyi cinozwi rudo rakagondeka? Soko rekuti “rudo rakagondeka” mu Shanduro yeNyika Itsva yeMagwaro Matsvene rinoonekemo kanodarika 230. Maererano no “Tsanangudzo Yemashoko emuBhaibheri” rinooneka mu Bhaibheri irona, rinoreya “rudo runobva pakudzipira, kuperera, kugondeka, uye kudisa munhu. Kakawanda rinoseenzeswa recireya kuda kunoita Mwari anhu, asi anhu angakwanisawo kupangidza rudo irona.” Djehovha muezaniso wakanaka we munhu anopangidza rudo rakagondeka. Mu fundo ino, ticaona kuti Djehovha anopangidza kudini rudo rakagondeka ku anhu. Uye mu fundo inoteera, ticaona kuti tingateedzera kudini Djehovha uye kuti tingapangidza kudini rudo rakagondeka ku umwe na umwe wedu.

3. Ecireketa nge zvake kamare Djehovha akabvunzei Mozesi?

³ Mu masure mekuti Aisraeri abuda mu Edjipitu, Djehovha akabvunza Mozesi zvakaringana nge zve zina uye mawara Ake. Ayena akati: “Djehovha, Djehovha, Mwari ano nyasha no usisi, ano mwoyo unononoka kutsamwa uye akadzara ne rudo rakagondeka, no cokwadi, anopangidza rudo rakagondeka ku zviuru, anorekerera zvishaishi, kuposha uye citema.” (Eki. 34:6, 7) Pa masoko aya akanaka akaringana nge zve mawara Ake, Djehovha akapangidza Mozesi wara rinokosha re rudo Rake. Ngaripi?

4-5. (a) Djehovha akapanganidza kudini nge zvake kamare? (b) Ticaongorora mibvunzo dzipi?

 ⁴ Djehovha aazi kureketa basi kuti ayena ano rudo rakagondeka, asi akati “akadzara ne rudo rakagondeka.” Masoko aya anooneka mu Bhaibheri kanokwana katanhatu. (Nu. 14:18; Ne. 9:17; Pis. 86:15; 103:8; Joe. 2:13; Djon. 4:2) Kupanganidzwa kese kunoenda basi kuna Djehovha haiwa ku anhu. Azvishamisi here kuona kuti Djehovha kamare akaita nhamburiko yekureketa rudo rake rakagondeka? Zviripamhene kuti rudo rakagondeka rinokosha kaari. * Ndiyo ndaa Mambo Dhavhidhi wakatara eciti: “Haiwa Djehovha, rudo renyu rakagondeka rinoguma kumatenga . . . Rudo renyu rinokosha maningi, haiwa Mwari! Ana e anhu anotizira mu bvute remabaphiro enyu.” (Pis. 36:5, 7) Dhavhidhi waitenda maningi nge zve rudo rakagondeka ra Mwari. Asi isusu tinozwawo kudaro here?

⁵ Kuti tinyase kuzwisisa kuti cinyi cinozwi rudo rakagondeka, ngatidaire mibvunzo miiri inoteera: Djehovha anopangidza kunaani rudo rakagondeka? Uye rudo rakagondeka ra Djehovha rinotibetsera kudini?

6. Djehovha anopangidza rudo rakagondeka kunaani?

⁶ Djehovha anopangidzira kunaani rudo rakagondeka? Bhaibheri rinobhuya kuti isusu tinokwanisa kuda zviro zvakawanda, zvakaita hinga “kurima,” “vhinyu uye mafuta,” “mupango,” “ruziyo,” “ungwaru”—uye andizvopi basi. (2 Mak. 26:10; Zvie. 12:1; 21:17; 29:3) Ngekudaro, rudo rakagondeka aripangidzwi nge zviro asi zvinobvira kuzwa rudo rakagondeka ku anhu. Asi Djehovha aapangidzi rudo rakagondeka ku munhu wese wese. Ayena anozwa rudo rakagondeka ku aya basi ano ushamwari we pa dhuze naye. Mwari wedu ndi munhu akagondeka ku shamwari dzake. Ayena ano cinangwa cakanaka ku aseenzi ake ese, uye aazomboasii ari oga.

7. Djehovha akapangidza kudini rudo ku anhu ese?

⁷ Djehovha akapangidza rudo ku anhu ese. Djesu akabvunza mwanarume waizwi Nikodhemo kuti: “Ngokuti Mwari akada maningi nyika, zvekuti akapasa Mwana wake umwe ega, kuitira kuti munhu wese anomutenda asaparadzwe, asi aone upenyu usikaperi.”—Ju. 3:1, 16; Mt. 5:44, 45.

8-9. (a) Ngei Djehovha anopangidzira rudo rakagondeka ku aseenzi ake? (b) Ticaonei zvino?

⁸ Hinga zvamborekethwa, Djehovha anopangidza rudo rake rakagondeka ku aya basi  ano ushamwari we padhuze naye—aseenzi ake. Izvi zvinooneka pa masoko akatarhwa na Mambo Dhavhidhi uye ne muphorofita Dhanyeri. Ngo muezaniso, Dhavhidhi wakati: “Rumbwai mecipangidza rudo renyu rakagondeka ku aya anomuziya.” “Rudo rakagondeka ra Djehovha ririyo dakara nokusikaperi kune aya anomutya.” Uye Dhanyeri wakareketawo kuti: “Haiwa Djehovha Mwari we cokwadi, anopangidza rudo rakagondeka ku aya anomuda uye anocengeta mitemo yake.” (Pis. 36:10; 103:17; Dha. 9:4) Maererano no tsamba idzi dze Bhaibheri, Djehovha anopangidza rudo rakagondeka ku aseenzi ake, ngekuti awona anomuziya, anomutya, anomuda uye anocengeta mitemo yake. Rudo rakagondeka i wara rinopangidzwa na Djehovha ku anhu ake basi kana kuti anamati ake basi ecokwadi.

⁹ Tisati taseenzera Djehovha, ayena aitipangidzira rudo rimwero raanopangidzira anhu ese. (Pis. 104:14) Asi petakagara anamati ake, Djehovha akatanga kutipangidzira rudo rakagondeka. Zvezvirokwazvo, Djehovha anogondesa aseenzi ake kuti: “Rudo rangu rakagondeka arizobviswi pauri.” (Isa. 54:10) Uye Dhavhidhi wakazvionera ega kuti ici icokwadi. Iyena wakati: “Djehovha acakudza munhu wakagondeka kaari.” (Pis. 4:3) Ngekuti Djehovha anobata anhu nge mushobo unokosha, izvona zvinotikohomedzesa kuti tiitei? Mutari we Pisarema wakatara kuti: “Munhu wese uno ungwaru ucaona zviro izvi uye ucanyasa kurangarira mabasa a Djehovha anopangidza rudo rakagondeka.” (Pis. 107:43) Tecirangarira nge zve zano iri re Bhaibheri, ngatione zvino mishobo mitatu yekuti aseenzi a Djehovha anobetsereka kudini no rudo rakagondeka raanopangidzirhwa naye.

10. Tinobetsereka kudini ngekuziya kuti rudo rakagondeka ra Mwari rinogara nokusikaperi? (Pisarema 31:7)

¹⁰ Rudo rakagondeka ra Mwari rinogara nokusikaperi. Rudo iri rakagondeka rinorekethwa kanokwana 26 mu bhuku ra Pisarema 136. Mu vhersikuro yekutanga tinoerenga kuti: “Tendai Djehovha, ngekuti akanaka; rudo rake rakagondeka rinogara nekusikaperi.” (Pis. 136:1) Mu mavhersikuro 2 dakara  26, tinoerenga masoko anoti, “ngekuti rudo rake rakagondeka rinogara nekusikaperi.” Patinorumbwa tecierenga mavhersikuro amweni e pisarema irona, tinoshamiswa ngekuona mishobo yakasiyana-siyana yekuti Djehovha anopangidza rudo rakagondeka— ayena anorumbwa ecizviita. Masoko “ngekuti rudo rake rakagondeka rinogara nekusikaperi” irugondo rekuti rudo rakagondeka ra Mwari ku anhu ake arizombocinji. Zvakanaka maningi kuziya kuti Djehovha aasii nokukasika anhu ake, kusiyana na izvona, ayena anonyasa kubatisisa aya anoda kumuseenzera uye anogara kudii rawo, nyanye-nyanye pa nguwa dzematambudziko. Tinobetsereka kudini: Kuziya kuti Djehovha anotibatisisa, zvinotipasa mupfaro uye simba ratinoda kuti tikwanisane ne matambudziko uye kuti tirumbwe tecihamba mu gwanza re upenyu.—Erengai Pisarema 31:7.

11. Maererano na Pisarema 86:5, cinyi cinoita kuti Djehovha agare munhu anorekerera?

¹¹ Rudo rakagondeka ra Mwari rinotikohomedzesa kuti tigare anhu anorekerera amweni. Djehovha anoona kana mushaishi akacinyuka uye osiya kuita zvitema. Pa migariro yakadai, rudo rakagondeka rinotikohomedzesa kuti tirekererewo amweni. Mutari we Pisarema Dhavhidhi wakareketa nge zva Djehovha kuti: “Ayena aatibati maererano no zvitema zvedu, uye aatihwirinziri maererano no zvishaishi zvedu.” (Pis. 103:8-11) Dhavhidhi waiziya nge eshiperiensiya yake kamare kurhwadza kunoita kugara no hana inorema. Asi iyena waiziyawo kuti Djehovha “akagadzirira kurekerera.” Cinyi cinoita kuti Djehovha agare munhu anorekerera? Mhinduro iri pana Pisarema 86:5. (Erengai.) Ndizvona kamare zvakarekethwa na Dhavhidhi pamunamato, Djehovha anorekerera ngekuti akadzara ne rudo rakagondeka ku ese anokumbira kurekererhwa ndiye.

12-13. Cinyi cingatibetsera kana tikanyanya kudzipasa ndaa nge zvishaishi zvetakaita kare?

¹² Kana tikaita citema, zvakasisira uye zvakatonaka kumbozwa kutsumba. Izvi zvinoita kuti ticinyuke uye titore matanho anodikanwa kuti tigadzirise zvishaishi zvedu. Kunyazi zvakadaro, aseenzi amweni a Mwari anonyanya kudzipasa ndaa nge zvishaishi zvaakaita kare. Awona anorangarira kuti Djehovha  aazomboarekereri—pasinei nokucinyuka kaanonga aita. Makambozwawo kudaro here? Kana zviri izvona, edzurirai kuti Mwari akagadzirira kupangidza rudo rakagondeka ku aseenzi ake.

¹³ Tingabetsereka kudini: Kunyazi tisikazi kukwana, tingapfara ngekuseenzera Djehovha tino hana yakacena. Izvona zvinobvira ngekuti “ngazi ya Djesu Mwana we rume wake inoticenesa pa zvitema zvese.” (1Ju. 1:7) Kana mukaora mwoyo nge ndaa yekusama kukwana, edzurirai kuti Djehovha aazi kugadzirira kurekerera basi aya anocinyuka, asi ayena anodawo kuzviita. Onai mubatano wakaizwa na Dhavhidhi pakati pe rudo rakagondeka nekurekerera. Iyena wakatara kuti: “Kukhwirira kakaita matenga kudarika nyika, ndikonawo kukura kakaita rudo rake rakagondeka raanopangidza aya anomutya. Hinga kure kakaita kumabvazuwa kubva kumadokero, anokandawo zvishaishi zvedu kure naisusu.” (Pis. 103:11, 12) Zviri pamhene kuti Djehovha akagadzirira ‘kutirekerera.’—Isa. 55:7.

14. Dhavhidhi wakapanganidza kudini nge zve kudziirirhwa katinoizwa nge rudo rakagondeka ra Djehovha?

¹⁴ Rudo rakagondeka ra Mwari rinotidziirira pakunamata. Paiita munamato, Dhavhidhi wakareketa nge zva Djehovha eciti: “Muri mbuto yangu yekufindara, mucandidziirira pakutambudzika. Mucanditenderera nekukhuwa ke mupfaro wekununurhwa . . . Uya unogonda na Djehovha unotenderedzwa nge rudo rake rakagondeka.” (Pis. 32:7, 10) Mu nguwa dze Bhaibheri, kajinji mathaundi ainga akatenderedzwa ne muru waidziirira anhu ku azondi awo. Ngo mushobo umwewo, rudo rakagondeka ra Djehovha rakaita hinga muru unotidziirira ku ciro cipi haco caizokuwadza ushamwari wedu na Djehovha. Kupinda izvona, rudo rakagondeka ra Djehovha rinotikweera kaari.—Dje. 31:3.

15. Ngei rudo rakagondeka ra Djehovha ringakwanisa kuezaniswa no citiziro uye ne simba?

¹⁵ Dhavhidhi wakapasa muezaniso umweni kuti apangidze kudziirira kunoita Djehovha aseenzi ake. Iyena wakatara kuti: “Mwari ndiye mbuto yangu yekutizira, Mwari anondipangidza rudo rakagondeka.” Dhavhidhi wakatarawo ngezva Djehovha eciti: “Ndiyena rudo rangu rakagondeka uye simba rangu, mbuto yangu yekutizira uye mununuri wangu, civhikhiro cangu uye ndiyena wandinotizira.” (Pis. 59:17; 144:2) Ngei Dhavhidhi wakaezanisa rudo rakagondeka ra Djehovha no citiziro uye no simba? Pasinei nekatinogara pasi pano, kana tikagara tiri aseenzi a Djehovha ayena anogondesa kudziirira ushamwari wedu unokosha naye. Rugondeso rimwe-rimwero rinoonekawo pana Pisarema 91. Mutari we Pisarema wakapanganidza kuti: “Ndicati kuna Djehovha: ‘Ndimwi mbuto yangu yekutizira uye simba rangu.’”(Pis. 91:1-3, 9, 14) Mozesi wakaezanisawo Djehovha no citiziro. (Pis. 90:1, masoko e pasi.) Uye nokuhamba ke nguwa, mu masure mekuti asati afa, Mozesi wakatunhudzira masoko amweni akanaka maningi. Iyena wakatara kuti: “Mwari imbuto yekutizira kubvira kare-kare, Muwoko dzake dzisina mugumu dziri pasi pako.” (Dhe. 33:27) Onai kuti soko rekuti “muwoko dzake dzisina mugumu dziri pasi pako” Izvona zvinotifundisei nge zva Djehovha?

16. Makomborero api mairi atinawo? (Pisarema 136:23)

¹⁶ Patinoona Djehovha hingana citiziro cedu, tinozwa takacengeteka. Kunyazi zvakadaro, pano mazuwa atingarhwadziwa maningi zvekutokonerhwa simba. Pa nguwa dzakadaro, Djehovha angatibetsera kudini? (Erengai Pisarema 136:23.) Ayena anokanda muwoko dzake pasi pedu uye anotibetsera kuti timukezve. (Pis. 28:9; 94:18) Tinobetsereka kudini: Kuziya kuti tingagonda no  rubetso ra Mwari nguwa dzese, kunotiedzurira nge zve makomborero mairi. Cikomborero cekutanga, tino citiziro cakacengeteka pasinei nekatinogara. Cikomborero cecipiri, Baba edu ekudenga ano rudo anorangarira nge zve umwe na umwe wedu.

17. Rugondeso ripi ratingagara naro nge ndaa ye rudo rakagondeka ra Mwari? (Pisarema 33:18-22)

¹⁷ Hinga zvataona, tingagara no rugondo rekuti patinonga tecisongana no zvinetso, Djehovha acagara ku dii redu uye acatipasa rubetso ratinoda kuti tirumbwe takagondeka kaari. (2Ako. 4:7-9) Muphorofita Djeremiya wakati: “Rudo rakagondeka ra Djehovha ndiro rakaita kuti tisaparadzwe, ngekuti usisi wake aumboperi.” (Mari. 3:22) Tingakwanisa kugonda kuti rudo rakagondeka ra Djehovha ricagara patiri ngekuti mutari we pisarema wakatigondesa kuti, “madziso a Djehovha ari pane aya anomutya, aya anoetsera rudo rake rakagondeka.”—Erengai Pisarema 33:18-22.

18-19. (a) Tinodikana kurumbwa teciedzurirei? (b) Ticaonei mu fundo inoteera?

¹⁸ Tinodikana kuedzurirei? patainga tisati taseenzera Djehovha, ayena aitipangidzira rudo rimwero raanopangidzira anhu ese. Asi patakagara aseenzi ake Djehovha akatanga kutipangidzira rudo rakagondeka. Rudo irona rinoita kuti Djehovha atidziirire. Ayena acarumbwa ecitikanda pa dhuze naye uye acadzadzisa zvipikirhwa zvese zvaarikutipikira. Ayena anoda kuti isusu tibudirire! (Pis. 46:1, 2, 7) Ndiyo ndaa, pasinei nematambudziko atirikusongana nawo, Djehovha acatipasa simba ratinoda kuti tirumbwe takagondeka.

¹⁹ Dakara zvino, taona kuti Djehovha anopangidza kudini rudo rake rakagondeka ku aseenzi ake. Uye ayena anoda kuti tipangidzirewo rudo rakagondeka ku umwe na umwe wedu. Tingazviita kudini? Fundo inoteera icareketa nge zve nyaya iyona inokosha.