1-2. Ngazvipi zvikonzero zvakanaka zvatinazvo kuti tipangidzirane rudo rakagondeka?

TINO ZVIKONZERO zvakanaka zvekupangidza rudo rakagondeka ku amweni. Ngazvipi zvikonzero izvona? Onai kuti zvierengo zve Bhaibheri zvinoteera zvinodaira kudini mubvunzo uwona: “Usasiye rudo rakagondeka nekutendeka zvecikusiya. . . . Hino mucatenderhwa uye mucagara no uzii pa mberi pa Mwari ne anhu.” “Munhu uno rudo rakagondeka unoita zvinomubetsera.” “Munhu wese unoda kurumbwa eciita zvino unatsi uye ecipangidza rudo rakagondeka ucaona upenyu.”—Zvie. 3:3, 4; 11:17, masoko e pasi; 21:21.

² Zvierengo izvi zvinotipasa zvikonzero zvakanaka zvekupangidza rudo rakagondeka. Cekutanga, patinoita izvona tinogara anhu anokosha kuna Mwari. Cecipiri, kupangidza rudo rakagondeka kunobetsera isusu wene. Ngo muezaniso tinoumba ushamwari usikaperi. Cecitatu, kana tikapangidza rudo rakagondeka ticatambira makomborero, kubatanidzawo upenyu usikaperi. Zvezvirokwazvo tino zvikonzero zvakanaka zvekuti tizwire mutemo wa Djehovha unoti: “Pangidziranai rudo rakagondeka, mecizwirana usisi.”—Zak. 7:9.

3. Mibvunzo dzipi dzicadairhwa mu fundo ino?

³ Mu fundo ino ticada kuona mhinduro dze mibvunzo dzinokwana kuita murongomuna dzinoti: Tinodikana kupangidza rudo rakagondeka kunaani? Bhuku re mu Bhaibheri ra Rute rinotifundisei nge zve rudo rakagondeka? Tingapangidza kudini rudo rakagondeka nyamasi uno? Aya anopangidza rudo rakagondeka acatambira makomborero api?

4. Tingateedzera kudini Djehovha? (Marko 10:29, 30)

⁴ Hingana zvatakafunda mu fundo yakadarika, Djehovha anopangidza rudo rakagondeka—kana kuti mazwiro akanyasa  kubamba asikaperi —ku aya basi anomuda uye anomuseenzera. (Dha. 9:4) Tinoda kugara “ateedzeri a Mwari, hinga ana anodiwa.” (Aef. 5:1) Kuti tidaro tinodikana kusakurira kupangidza rudo rakagondeka ku hama no hazvadzi dzedu mukutenda—rudo rakanyasa kubamba uye risikaperi.—Erengai Marko 10:29, 30.

5-6. Kajinji anhu anorangarira kuti cinyi cinozwi “kugondeka”?

⁵ Zvezvirokwazvo, kana tikanyasa kuzwisisa kuti rudo rakagondeka ririkuda kubhuyei, ticakwanisa kupangidza wara irona ku hama no hazvadzi dzedu. Kuti tinyase kuzwisisa kuti cinyi cinozwi rudo rakagondeka, ngatione musiyano uripo pakati pe wara iri no zvinorekethwa no anhu nge ndaa ye zve wara irona. Onai muezaniso unoteera.

 ⁶ Kune anhu akawanda, munhu unoseenza pa empreza imweyo ke makore akawanda, anomuona hinga museenzi wakagondeka. Asi zvingaita kuti pamakore ese aaiseenza pa empreza iyona, musenziwo aazi kuziya zvitenderhwa zvake. Uye zvingaita kuti ainguwapi yese yaanotenderana no mitemo ye empresa iyona. Museenzi uu aadi empreseyo, asi unopfara ngekuti uno basa uye uno mare yaanotambira. Iyena ucarumbwa eciseenza dakara paacatambira phenjeni kana kuti paacaona basa rimweni rakanaka.

7-8. (a) Ngazvipi zvinoitisa kuti munhu apangidze rudo rakagondeka? (b) Ngei tecidikana kuti tione mavhersikuro manganani e mu bhuko re bhaibheri ra Rute?

⁷ Musiyano uripo pakati pe kugondeka kunorekethwa pa  ndima 6 no rudo rakagondeka, kunotsamira pa cikonzero ce munhu. Mu ngano dze Bhaibheri, cikonzero cipi caiitisa kuti aseenzi a Mwari apangidzirane rudo rakagondeka? Aya anopangidza rudo rakagondeka, anoita izvona haiwa ngekuti anodikana kuzviita, asi ngekuti anoda kuzviita. Onai muezaniso wa Dhavhidhi. Iyena waiziya kuti Sauro, baba a Djonatani aida kumuuraya. Kunyazi zvakadaro, mwoyo wa Dhavhidhi ndiwona waimuitisa kuti apangidze rudo rakagondeka ku shamwari yake yaaidisisa, Djonatani. Uye mumakore akazoteera, mumasure mekuti Djonatani afa, Dhavhidhi wakarumbwa ecipangidza mazwiro awona ku mwana wa Djonatani, Mefibhosete.—1Sa. 20:9, 14, 15; 2Sa. 4:4; 8:15; 9:1, 6, 7.

⁸ Isusu tingafundawo zvakawanda nge zve rudo rakagondeka ngekufunda mavhersikuro manganani atinogumira mu bhuku re Bhaibheri ra Rute. Tinofundei nge zve rudo rakagondeka rakapangidzwa no anhu anorekethwa mu bhuku iri? Tingaseenzesa kudini fundo idzona mu ungano yedu? *

9. Ngei Noemi wakaguma pakurangarira kuti Djehovha ainga amutsamwira?

⁹ Mu bhuku re Bhaibheri ra Rute, tinoerenga nge zve ngano ya Noemi, nyamwana wake waizwi Rute uye na Bhoazi nyaukama we mwamuna wa Noemi, uyo waida maningi Mwari. Nge ndaa ye nguwa ye nzara mu Israeri, Noemi, mwamuna wake no ana awo airi akafuruka oenda kogara ku Moabhi. Paainga ecigara ikona, mwamuna wa Noemi wakafa. Ana ake akawaka akadzi, asi zvinotsukwarisa kuti awona akazofawo. (Rut. 1:3-5; 2:1) Zvinetso zvese izvi, zvakaita kuti Noemi arhwadziwe maningi. Iyena wakaora mwoyo maningi zvekuti wakatoguma pakurangarira kuti Djehovha ainga amutsamwira. Onai zvaakareketa nge zve mazwiro ake: “Ngekuti muoko wa Djehovha urikundirhwisa.” “We Masimba Ese akaita kuti ndirhwadziwe maningi ne upenyu.” Iyena  wakareketazve eciti: “Djehovha akandirhwisa uye we Masimba ese akaita kuti ndiwirhwe ne matambudziko.”—Rut. 1:13, 20, 21.

10. Djehovha akaitei pa zviya zvakarekethwa na Noemi?

¹⁰ Djehovha akaitei pa zviya zvakarekethwa na Noemi? Ayena aazi kusiya mwanakadzi uu wainga ecinetseka. Kusiyana na izvona, ayena akamupangidzira usisi. Djehovha anoziya kuti “kudzvinyirirhwa kungaita kuti munhu uno ungwaru aite hinga benzi.” (Mup. 7:7) Asi Noemi waida rubetso kuti azwisise kuti Djehovha ainga ari kudii rake. Djehovha akamubetsera kudini? (1Sa. 2:8) Ayena akaita kuti Rute apangidze rudo rakagondeka kuna Noemi. Rute wainga akagadzirira kupangidza rudo rakagondeka kuna Noemi. No unaki wakamubetsera kuti asanetseke maningi uye aziye kuti Djehovha airumbwa ecimuda. Tinofundei no muezaniso wa Rute?

11. Ngei hama no hanzvadzi dzino unaki dzinopeta masimba ari ese kuti dzibetsere aya akaora mwoyo?

¹¹ Rudo rakagondeka rinoita kuti tibetsere amweni. Kuita hingana Rute uyo wakarumbwa ari na Noemi, nyamasi uno hama no hanzvadzi dzino unaki dzinopeta masimba ari ese kuti dzibetsere aya akatsukwara uye akaora mwoyo ari mu ungano. Awona anoita izvona nge rudo uye anoda maningi kuita zvese zvaanokwanisa kuti aabetsere. (Zvie. 12:25, masoko e pasi; 24:10) Izvi zvinoenderana no zano re muphostori Pauro rinoti: “Nyaradzai aya akaora mwoyo, tsigirai asina simba, uye garai no mwoyo unononoka kutsamwa ne anhu ese.”—1Ate. 5:14.

12. Kajinji kakhona mushobo upi wakanaka wekubetsera munhu wakaora mwoyo mu ungano?

¹² Kajinji, mushobo wakanaka wekubetsera hama kana hanzvadzi yakaora mwoyo, ngewekunyasa kuapurutana uye kuagondesa kuti tinoada. Djehovha anotenda maningi aya anopangidza unaki kumabira ake anokosha. (Pis. 41:1) Zvierengo 19:17 inoti: “Uya unozwira usisi munhu murombo unonga ecifiarisi Djehovha, uye Ayena acamuripa nge zvaanoita.”

13. Zvisananguro zvipi zvakasiyana zvakaizwa na Rute uye na Orpa, uye ngei tecibhuya kuti cisananguro cakaizwa na Rute i cipangidzo ce rudo rakagondeka? (Onai foto ye pa kapa.)

¹³ Tingakwanisa kunyasa kuzwisisa kuti cinyi cinozwi rudo rakagondeka nge kufunda zviya zvakaitika kuna Noemi mu masure mekuti mwamuna wake uye ana ake airi afa. Noemi paakaziya kuti: “Djehovha ainga arangarira anhu ake ne kuapasa zvekurhya,” iyena wakasanangura kubuda ku Moabhi uye wakahwirira ku nyika yake. (Rut. 1:6) Anyamwana airi a Noemi akamuperekedza. Asi paainga ari mu gwanza, Noemi wakabvunza anakadzi aya katatu kese kuti ahwirire ku Moabhi. Cinyi cakaitika? Nganoyo inoreketa yeciti: “Orpa wakabhejari nyazani ake uye wakahwirira. Asi Rute wakaramba kuwasiya.” (Rut. 1:7-14) Paakasanangura kuhwirira ku Moabhi, Orpa wainga eciita zviya zvakarekethwa na Noemi. Iyena wakaita zviya zvaaietserhwa kuti aite. Asi kusiyana na izvona, Rute wakaita zvinopinda zviya zvaainga akumbirhwa na Noemi. Iyena wainga  akasudzunuka kuhwirira kumba kudai aida, asi nge ndaa ye rudo rakagondeka, iyena wakashinga kurumbwa ari pa dii ra Noemi kuti amubetsere. (Rut. 1:16, 17) Rute wakarumbwa ari pa dii ra Noemi haiwa ngekuti waidikana kuita izvona, asi ngekuti waida kuita izvona. Cisananguro cakaizwa na Rute i cipangidzo ce rudo rakagondeka re zvirokwazvo. Ngano ii inotifundisei?

14. (a) Hama no hanzvadzi nyamasi uno dzirikuteedzera kudini muezaniso wa Rute? (b) Maererano na Ahebheru 13:16, kudzipira kupi kunopfadza Mwari?

¹⁴ Rudo rakagondeka rinoita kuti tiite zvakawanda kupinda zviya zvatinoetserhwa kuti tiite. Kuita hingana mu nguwa yekare, hama no hanzvadzi dzakawanda nyamasi uno dzinosanangura kupangidza rudo rakagondeka ku aya aanonamata nawo, kunyazi asikanyasi kuaziya. Ngo muezaniso, paanoziya kuti kuno mbuto yaitika tsawana inoitika yoga, nokukasika awona anoedza kuona kuti angabetsera kudini. Kana hama ye mu ungano isina zvekurarama nazvo, awona anoibetsera nokukasika asikarangariri kairi katatu. Kuita hingana hama dze ku Masedhonia, dzemuzana re makore ekutanga, hama idzi dzinoita zvese zvaanokwanisa kudarika zviya zvaanoetserhwa kuita. Awona anodzipira uye anopeta masimba ari ese kuti abetsere hama no hanzvadzi dzirikukonerhwa zviro zvekurarama nazvo. (2Ako. 8:3) Zvezvirokwazvo, zvipangidzo izvi zve rudo rakagondeka zvinopfadza maningi Djehovha!—Erengai Ahebheru 13:16.

15-16. Rute wakapangidza kudini kuti waizorumbwa eciedza kubetsera?

¹⁵ Ngano ya Rute na Noemi inotifundisa fundo dzinokosha maningi. Ngatione dzinganani dzakhona.

¹⁶ Rumbwai meciedza kubetsera. Rute paakasanangura kuperekedza nyazani ake dakara ku Djudha, pakutanga Noemi aazi kuzvitendera. Asi Rute wakarumbwa eciedza kumubetsera. Zvakagumira papi? “Noemi paakaona kuti Rute wairumbwa ecida kuenda naye, aazi kurumbwa ecimubambidzira.”—Rut. 1:15-18.

17. Cinyi cicatibetsera kuti tisakasike kuremba?

¹⁷ Zvatinofunda: Kubetsera hama no hanzvadzi dzedu dzakaora mwoyo, kunoda mwoyo unononoka kutsamwa, asi izvona azvidikani kutiitisa kuti tiasiye. Pamweni, pano hanzvadzi inonga yecida rubetso. Kunyazi ikaramba rubetso * redu pakutanga, rudo rakagondeka ricaita kuti tirumbwe tiri pa dii rawo. (Aga. 6:2) Tinoetsera kuti pakupedzera icakwanisa kuzwisisa kuti tiri kudii rawo takagadzirira kuabetsera kuti akwanise kuprumuka.

18. Cinyi caizoita kuti Rute atsamwe?

¹⁸ Musakasike kutsamwa. Noemi na Rute paakaguma ku Bheterehema, Noemi wakasonganazve no anyacigarisano ake e kare. Iyena akati kaari: “Ndainga ndino zvakawanda pandakaenda, asi Djehovha akaita kuti ndihwirire ndisina ciro.” (Rut. 1:21) Rangarirai kuti Rute wakazwa kudini paakazwa masoko aya akarekethwa na Noemi! Rute wakaita zvese zvaaikwanisa kuti abetsere Noemi. Wakacema pamwepo naye, wakamunyaradza uye wakahamba naye ke mazuwa akawanda. Kunyazi nokupeta masimba kwese kakaizwa ndi Rute, Noemi wakati: “Djehovha akaita kuti ndihwirire ndisina ciro.” Masoko aya a Noemi anopangidza pamhene kuti iyena wainga asikambokoshesi rubetso rese raainga apaswa na Rute. Rute wainga ari pa dii ra Noemi iyena paakareketa masoko aya. Makamborangaridza here kurhwadziwa kaakaita ngekuzwa masoko aya!  Kunyazi zvakadaro, iyena wakarumbwa ari pa dii ra Noemi.

19. Cinyi cicatibetsera kuti tirumbwe tirikudii re munhu wakaora mwoyo?

¹⁹ Zvatinofunda: Pamweni hanzvadzi imweni yakaora mwoyo, ingakwanisa kureketa masoko angatirhwadzisa—kunyazi nokupeta masimba katinonga taita kuti tiibetsere. Hino atidikani kuora mwoyo. Asi tinodikana kurumbwa tirikudii rayo uye tokumbira Djehovha kuti tione kuti tingaibetsera kudini.—Zvie. 17:17.

20. Rute wakagara kudini no simba rekurumbwa ecibetsera Noemi?

²⁰ Bambisai aya anoda kubambiswa. Rute wainga apangidza rudo rakagondeka kuna Noemi, asi iyena waidawo kubambiswa. Ndiyo ndaa Djehovha akaita kuti Bhoazi arekete masoko aizomubambisa. Bhoazi akati kuna Rute: “Djehovha ngaakupase mubairo nge zvaunoita, uye ngapaoneke mubairo wako wakakwana unobva kuna Djehovha Mwari we Israeri, ane mabaphiro e wauya kuzofindara pasi pawo.” Masoko aya anobambisa akabaya mwoyo wa Rute. Iyena wakadaira Bhoazi eciti: “Tenzi wangu . . . mandinyaradza uye zvemareketa zvabambisa museenzi wenyu.” (Rut. 2:12, 13) Bhoazi wakabambisa Rute no masoko aaida kuzwa, ngekudaro, iyena wakagara no simba rekuti arumbwe ecibetsera Noemi.

21. Maererano no zvinorekethwa pana Isaya 32:1, 2, ngazvipi zvinoizwa no akuru ano runako?

²¹ Zvatinofunda: Aya anobata amweni no rudo rakagondeka pamweni paya anodawo kubambiswa. Hinga zvataona, Bhoazi wakagondesa Rute kuti runako rake rainga recionekwa no anhu ese. Ngo mushobo umwewo nyamasi uno, akuru anonyasa kuona anotenda rubetso rinopaswa nge hama no hanzvadzi dzino rudo. Hama dzedu dzinodawo kusimbwa. Uye padzinosimbwa dzinoonawo simba raanoda kuti dzirumbwe dzecibetserawo amweni.—Erengai Isaya 32:1, 2.

22-23. Icinjo ipi ye miitiro yakaitika na Noemi uye ngei? (Pisarema 136:23, 26)

²² Mumasure mecinguwa, Bhoazi wakapasa Rute na Noemi zvekurhya zvakawanda. (Rut. 2:14-18) Noemi wakazwa kudini? Iyena wakati: “Ngaakomborerhwe na Djehovha, uyo asikazi kusiya kupangidza rudo rakagondeka ku apenyu ne akafa.” (Rut. 2:20a) Muitiro wa Noemi wakacinja kamare! Iyena wainga akatomboreketa akaora mwoyo eciti: “Djehovha akandirhwisa,” asi zvino iyena wakareketa no mupfaro kuti: “Djehovha . . . aazi kusiya kupangidza rudo rakagondeka.” Cinyi cakaita kuti Noemi acinje muitiro?

²³ Pakupedzera Noemi wakakwanisa kuona nyara ya Djehovha mu upenyu wake. Djehovha akaseenzesa Rute kuti apase Noemi rubetso rese raaida paakahwirira ku Djudha. (Rut. 1:16) Noemi wakakwanisawo kuona nyara ya Djehovha apo Bhoazi umwe we “musudzunuri,” wawo paakapasa iyena na Rute zvese zvaaida. * (Rut. 2:19, 20b) Noemi waikwanisa kurangarira eciti: ‘Zvino ndaakukwanisa kuona kuti Djehovha aazi kumbondisiya. Ayena akarumbwa aneni pa nguwa yese ii!’ (Erengai Pisarema 136:23, 26.) Pamweni iyena wakatenda maningi ngekuti Rute na Bhoazi aazi kumbomusiya! Zviri pamhene kuti cinjo ii yakaitika kuna Noemi yakaunzisa mupfaro wakakura ku ese ari atatu.

24. Ngei tecida kurumbwa tecipangidza rudo rakagondeka ku hama dzedu?

²⁴ Bhuku re mu Bhaibheri ra Rute rinotifundisei nge zve rudo rakagondeka? Rudo rakagondeka rinoita kuti isusu tisasiye kubetsera hama no hanzvadzi dzedu dzirikusongana no matambudziko. Irona rinotikohomedzesawo kuti tipete masimba ari ese kuti tiabetsere. Munhu unopangidza rudo rakagondeka ku amweni unodikana kubambiswawo no akuru. Tinopfara maningi patinoona hama no hanzvadzi dzedu dzecigarazve no mupfaro uye ne simba pakuseenzera Djehovha. (Zvi. 20:35) Asi ngacipi cikonzero cakakura cinoita kuti tirumbwe tecipangidza rudo rakagondeka? Cikonzero ngecekuti tinoda kuteedzera uye kupfadza Djehovha “akadzara ne rudo rakagondeka.”—Eki. 34:6; Pis. 33:22.