1. Tinodikana kuona kudini munamato?

 MUSIKI we Denga no Nyika akatipasa cipo cakakura maningi—kukhwedera kaari teciseenzesa munamato. Isusu tingafungura mwoyo wedu kuna Djehovha panguwa ipi hayo, mumureketero upi hawo, tisikadikani kumbozvironga. Uye tingagara no cokwadi cekuti Baba edu ano rudo anotipurutana, pasinei nekuti, tirikunamata takaradzikwa mu cipitari kana kuti mukaraboso. Isusu tinotenda maningi nge cikomborero icona.

2. Dhavhidhi wakapangidza kudini kuti waikoshesa maningi cikomborero cekuita munamato?

² Mambo Dhavhidhi, waikoshesa maningi cikomborero cekuita munamato. Iyena wakaembera Djehovha eciti: “Munamato wangu ngauite hingana rusenzi ragadzirirhwa pamberi penyu.” (Pis. 141:1, 2) Mumazuwa a Dhavhidhi, rusenzi rucena raiseenzeswa pakunamata no apristi rainyasa kugadzirirhwa. (Eki. 30:34, 35) Mushobo wainyasa kugadzirirhwa rusenzi wakaedzurira Dhavhidhi kuti aidikanawo kunyasa kusanangura masoko aaizoseenzesa pakunamata kuna Djehovha. Uye isusu tinoda kuteedzera Dhavhidhi, tinodawo kuti minamato yedu ipfadze Djehovha.

3. Tinodikana kugara no muitiro upi patinonamata kuna Djehovha, uye ngei?

³ Patinonamata kuna Djehovha tinodikana kupangidza rureremedzo. Cinborangarirai ngezve zviono zvinoshamisa zvakaoniwa na Isaya, Ezekiyeri, Dhanyeri, uye Juau. Zviono izvi zvainga zvakasiyana asi pane ciro cimwe cinozvitodzanisa. Zvese izvona zvaipangidza Djehovha hingana Mambo mukuru-kuru.  Isaya “wakaona Djehovha akagara pacigaro ce pamusorosoro uye cakakhwirira.” (Isa. 6:1-3) Ezekiyeri wakaona Djehovha akagara pa karu yake ye kudenga uye kumatii ake ese kainga “kakadjeka maningi . . . hinga arco-íris.” (Ezek. 1:26-28) Dhanyeri wakaona “Akacena Pamazuwa” akapfeka macira ekucena uye muriro wecibaka pacigaro cake ce Umambo. (Dan. 7:9, 10) Uye Juau wakaona Djehovha akagara pacigaro cake ce Umambo akatendererhwa no arco-íris, yakaita hingana buwe rinozwi Esmeralda. (Zvak. 4:2-4) Zviono izvi zvinopangidza kuti Djehovha ano simba rakakura uye rukudzo, ndiyo ndaa, tinokoshesa maningi cikomborero cekunamata kuna Djehovha uye tinoda kuzviita no rureremedzo rakakura. Asi tinganamata nge zvei?

4. Tinofundei kubva pa masoko ekutanga e munamato wekuezanisira uri pana Mateu 6:9, 10?

⁴ Erengai Mateu 6:9, 10. Pa Mharidzo ye Padunhu, Djesu akafundisa ateeri ake kuti anamate nge mushobo unopfadza Djehovha. Mumasure mekubhuya kuti “munodikana kunamata kudai,” Djesu akatanga kubhuya nge zve zviro zvinonyanya kukosha zvakaringana no cinangwa ca Djehovha zvakaita hingana: kuceneswa ke zina ra Mwari, kuuya ke Umambo ucatsakatisa azondi ese a Mwari, uye makomborero a Mwari ku anhu. Patinobatanidza zviro izvi pa minamato yedu tinopangidza kuti kuda ka Mwari kunokosha katiri.

5. Zvinoita kuti tinamate nge zve nyaya dzedu kamare here?

⁵ Pakuenderera mberi ke munamato we kuezanisira, Djesu akapangidza kuti tinodikanawo kunamata nge zve nyaya dzedu kamare. Tingakumbira kuna Djehovha kuti atipase zvekurhya pazuwa irona, arekerere zvitema zvedu, atidziirire pamiedzo, uye atibetsere kupukunyuka kuna Sathani Dhiyabhurosi. (Mat. 6:11-13) Patinonamata kuna Djehovha tecikumbira zviro izvi tinopangidza kuti tinothemba ayena basi, uye kuti tinoda kuita zviri zvese kuti timupfadze.

6. Paminamato yedu, tinodikana kureketa zvakarekethwa pamunamato we kuezanisira basi here? Panganidzai.

⁶ Djesu ainga asikadi kuti aseenzi ake aseenzese masoko aya kamare ari pamunamato we kuezanisira. Paminamato imweni Djesu  akareketa nge zve nyaya dzakasiyana-siyana dzaidikanwa panguweyo (Mat. 26:39, 42; Juau 17:1-26) Ngo mushobo umwewo isusu tinganamata nge zve nyaya ipi hayo inokosha katiri. Ngo muezaniso, patinodikana kuita cisananguro cakakura, tinganamata tecikumbira ungwaru. (Pis. 119:33, 34) Kana tikapaswa basa ripsva tinganamata kuti tikwanise kunyasa kuita basero. (Zvie. 2:6) Abereki anganamatira ana awo, ana anganamatira abereki awo, uye tese isusu tinodikana kunamatira afundi edu e Bhaibheri no aya atinogumira mu basa rekuparidzira. Asi zviri pamhene kuti minamato yedu aidikani kugara zvikumbiro basi kuna Djehovha.

7. Ngei tecidikana kukudza Djehovha paminamato yedu?

⁷ Zvinokosha maningi kuedzurira kuti tinodikana kukudza Djehovha paminamato yedu. Apana munhu wakasisira kukudzwa uye kureremedzwa hingana Mwari wedu. Ayena “akanaka uye akagadzirira kurekerera.” Djehovha anopangidzawo “nyasha, usisi, kunonoka kutsamwa uye rudo rakagondeka.” (Pis. 86:5, 15) Isusu tino zvikonzero zvakawanda zvekuti tikudze Djehovha nge mawara ake ese uye nge zvese zvaanotiitira.

8. Tinotenda Djehovha nge zviro zvipi? (Pisarema 104:12-15, 24)

⁸ Pane kukudza basi Djehovha paminamato yedu, isusu tinodawo kumutenda nge zviro zvese zvaanotipasa. Tingatenda Djehovha, nge kori dzinoshamisa dzatinoona muzvisikwa, nge zvekurhya zvakasiyana-siyana zvaakasika, uye nge mupfaro wekugara no shamwari dzakanaka. Baba edu anorudo anotipasa izvi uye zvimweni zvakawanda ngekuti anoda kuti tipfare. (Erengai Pisarema 104:12-15, 24.) Uye cinonyanya kukosha, isusu tinotenda maningi Djehovha nge zvekurhya zvekunamata zvaanotipasa uye kariro yakanakisisa yatinayo mune ramangwana.

9. Cinyi cingatiedzurira kutenda Djehovha? (1 Atesaronika 5:17, 18)

⁹ Pamweni paya tingakanganwa kutenda Djehovha ngo zviro zvese zvaano tiitira. Mungaitei kuti musakanganwe kutenda Djehovha? Imwimwi mungaita mundandanda we zviro zvamakakumbira Djehovha pamunamato, no kuhamba ke nguwa mungaongorora  mundandandewo kuti muone kuti Djehovha akadaira kudini minamato yenyu. Pedzepo munganamata kuna Djehovha mecimutenda nge rubetso rake rese. (Erengai 1 Atesaronika 5:17, 18.) Cimborangarirai: Isusu tinopfara maningi kana munhu akatitenda nge ciro catakamuitira. Hino nge mushobo umwewo, Djehovha anopfarawo maningi kana tikamutenda nge zviro zvaanotiitira. (Ako. 3:15) Asi, pane cikonzero cimweni cinokosha maningi cingaita kuti titende Djehovha here?

10. Maererano na 1 Pedru 2:21, tino zvikonzero zvipi zvekuti titende Djehovha nge kutuma mwana wake pasi pano?

¹⁰ Erengai 1 Pedru 2:21. Isusu tinotenda maningi Djehovha nge kutuma Mwana wake kuti atifundise cokwadi. Apana mubvunzo kuti patinofunda nge zve upenyu wa Djesu, tinoziya zvakawanda nge zva Djehovha uye kuti tingamupfadza kudini. Kana tikatenda mucibairo ca Djesu, ticagara no ushamwari we padhuze na Mwari wedu uye ticagara murunyararo naye.—Aro. 5:1.

11. Ngei tecinamata muzina ra Djesu?

¹¹ Tinotenda maningi Djehovha, ngekuti tingakhwedera kaari teciseenzesa munamato peciseenzeswa Mwana wake. Eciseenzesa Djesu, Djehovha anotipasa zvatinokumbira pa munamato. Djehovha anozwa uye anodaira minamato inoizwa muzina ra Djesu. Ndizvo kamare zvakarekethwa na Djesu, ayena akati: “Zvese zvamunokumbira kuna Baba muzina rangu, inini ndicazviita kuti Baba akudzwe peciseenzeswa Mwana.”—Juau 14:13, 14.

12. Zvikonzero zvipi zvimweni zvatinazvo kuti titende Djehovha nge kutuma Mwana wake?

¹² Djehovha anorekerera zvitema zvedu nge ndaa ye cibairo cakaizwa na Djesu. Bhaibheri rinoreketa nge zva Djesu reciti “mupristi wedu [akagara] kudii remuoko kwawo wecigaro ce umambo wa Cangamire kudenga.” (Aheb. 8:1) Djesu ndi “mubetseri wedu kuna Baba.” (1 Juau 2:1) Tinotenda maningi Djehovha nge kutipasa Mupristi Mukuru anozwisisa kutama kukwana kedu, patakarembera uye “anokumbirira katiri”! (Aro. 8:34; Heb. 4:15) Nge kuti tiri anhu asikazi kukwana, tainga tisikazokwanisi kuguma dhuze na Djehovha teciseenzesa munamato kudai Djesu asikazi kuita cibairo cake katiri. Zviri pamhene kuti cibairo ca Djesu i cipo ca Djehovha katiri, uye isusu atizokwanisi kutenda Djehovha nge cipo ici cinokosha!

13. Usiko asati afa Djesu akapangidza kudini kuti aida afundi ake?

¹³ Usiko asati afa, Djesu akaita munamato wakareba kuna Djehovha ecimukumbira kuti “aonerere afundi ake nge ndaa ya Dhiyabhurosi.” (Juau 17:15) Nge kuita izvona, Djesu akapangidza rudo! Djesu aizviziya kuti paishota padoko kuti ayena abatane ne muedzo wakakura, kunyazi zvakadaro ayena akanetseka nge ndaa ye aphostori ake.

14. Tingapangidza kudini kuti tinoda hama no hanzvadzi dzedu?

¹⁴ Kuita hingana Djesu isusu atirangariri nge zvedu basi patinoita munamato. Kusiya izvona isusu, tinonamatira hama no hanzvadzi dzedu kakawanda. Patinoita izvona, tinopangidza kuti tinoteerera mutemo wa Djesu wekuti, dananai, uye tinopangidza Djehovha kuda katinoita hama no hanzvadzi dzedu. (Juau 13:34) Kunamatira hama no hanzvadzi dzedu akupedzapi nguwa. Bhaibheri rinoti “kudeketera ke munhu munatsi kune simba.”—Tig. 5:16.

15. Ngei hama dzedu dzecida minamato yedu?

 ¹⁵ Hama dzedu dzinoda minamato yedu ngekuti dzinosongana no zvinetso zvakawanda. Tinganamata kuna Djehovha tecikumbira kuti aabetsere kukunda nhenda, tsawana dzinoitika dzega, kuteererhwa uye zvinetso zvimweni. Uye tinganamatirawo hama dzinodzipira kuti dzibetsere hama dziri kusongana no zvinetso. Pamweni imwimwi munoziya munhu uri kusongana no cinetso cakakura. Zvakadini kumunamatira meciseenzesa zina rake pamunamato? Isusu tinopangidza rudo redu ku hama dzedu nge kukumbira kuti Djehovha adzibetsere.

16. Ngei tecidikana kunamatira aya anoseenza no simba kuti ariritire ungano?

¹⁶ Akuru no abati anoseenzera, anotenda maningi patinoanamatira ngekuti izvona zvinoabetsera maningi. Muphostori Pauro wakakumbira kuti hama dzimunamatire. Iyena wakati: “Ndinamatireiwo, kuti ndione masoko pandicafungura muromo, kuti ndikwanise kureketa no ushingi pandicadusa pamhene zvakaigwa zvicena zve masoko akanaka.” (Aef. 6:19) Kuita hingana muphostori Pauro, nyamasi uno kuno hama dzakawanda dzinoseenza no simba kuti dziriritire ungano. Kunamata kuna Djehovha tecikumbira kuti abetsere hama idzi, zvinopangidza kuti tinodzida.

17-18. Tingakumbirhwa kuti tiite munamato mumigariro ipi?

¹⁷ Pamweni paya, munhu angatikumbira kuti tiite munamato teciimirira anhu amweni. Ngo muezaniso, hanzvadzi iri kuitisa fundo ye Bhaibheri ingakumbira kuti hanzvadzi iri kuiperekedza iite munamato. Hanzvadzi iyona pamweni ainyasi kuziya mufundiwo, ndiyo ndaa, ingada kuzoita munamato wekupedzesera. Ngekudaro iyona inganyasa kuziya zviri kuitika no mufundiwo, uye yoreketa ngezvazvo pamunamato.

¹⁸ Kana pakakumbirhwa kuti hama iite munamato pa musangano kana kuti pa musangano we basa rekuparidzira. Iyona inodikana kuedzurira cinangwa ce musangano iwona. Minamato aidikani kuseenzeswa kuti tipase zano ku ungano, kana kuti tiite ciziiso. Kajinji pamisangano yedu, miseswa mishanu inokandwa pa dii kuti iseenzeswe pakuemba  no kuita munamato, ndiyo ndaa hama inoita munamato aidikani kuseenzesa “masoko akawanda” maka-maka painonga yeciita munamato wekutanga.—Mat. 6:7.

19. Cinyi cicatibetsera kugara takagadzirira zuwa rekutonga ka Djehovha?

¹⁹ Tinodikana kurumbwa teciita munamato ngekuti zuwa rekutonga ka Djehovha riri kukhwedera. Ndiyo ndaa Djesu akati: “Hino rumbwai makamuka, uye rumbwai meciita minamato yokudeketera kuti mukwanise kupukunyuka pa zvese izvi zvinodikana kuitika.” (Ruka 21:36) Kana tikarumbwa teciita munamato kutenda kedu kucagara kakabamba uye tinonga takagazirira mugumo we nyika ino.

20. Minamato yedu ingagara hingana rusenzi rinonuhwirira nge mushobo upi?

²⁰ Mu fundo ino taona kuti munamato i cikomborero cakakura maningi. Uye taonawo kuti minamato inodikana kutsamira pa zviya zvinocekuita no kuda ka Djehovha. Taonawo kuti ngei zvinokosha kutenda Djesu nge cibairo caakaita uye nge kugara Mambo wedu, taedzurirawo kuti ngei zvinokosha kunamatira hama no hanzvadzi dzedu uye kunamatawo nge zve zvinetso zvedu zvekunyama uye zvekumwiya. Zviri pamhene kuti tinokoshesa maningi cikomborero cekunamata, ndiyo ndaa, tinoda kunyasa kurangarira masoko aticaseenzesa patinonga tecireketa na Djehovha. Nge kudaro masoko edu acaita ingana rusenzi rinonuhwirira kuna Djehovha—“zviro zvinomupfadza.”—Zvie. 15:8.