MUSORO WE KUFUNDA 29
Tsigirai Mutungamiriri Wedu Djesu
“Ndakapaswa masimba ese kudenga ne panyika.”—MAT. 28:18.
NGOMA 13 Kristu Muezaniso Wedu
ZVATICAFUNDA *
1. Ngacipi cido ca Djehovha?
CIDO ca Mwari nge cekuti masoko akanaka e Umambo aparidzirhwe mu pasi rese. (Mark. 13:10; 1 Ti. 2:3, 4) Iri i basa ra Djehovha, uye irona rinokosha maningi zvekutoti ayena akagadza Mwana wake kuti atungamirire basa irona. Tingakwanisa kugara no cokwadi cekuti na Djesu hingana mutungamiriri wedu, basa iri re kuparidzira ricanyasa kuizwa hinga mushobo waida Djehovha mugumo usati waguma.—Mat. 24:14.
2. Ticaonei mu fundo ino?
2 Mu fundo ino, ticaona kuti Djesu ari kuseenzesa kudini “muranda wakagondeka uye wakangwara” kuti apase zvekurhya zvekunamata afundi ake uye pa kuronga kampanya yakakura ye kuparidzira isati yakamboizwa kubvira kare. (Mat. 24:45) Uyewo, ticaona kuti ngazvipi zvatinodikana kuita kuti titsigire Djesu uye no muranda wakagondeka.
DJESU ARI KUTUNGAMIRIRA BASA RE KUPARIDZIRA
3. Djesu akapaswa simba ripi?
3 Tingagara kudini no rugondo rekuti Djesu ndiyena ari kutungamirira basa re kuparidzira? Asati akwira kudenga, Djesu akadzipangidzira ku afundi ake anganani akagondeka ku dunhu re Garireya. Ayena akati kaari: “Ndakapaswa masimba ese kudenga no panyika.” Onaizve masoko aakazoreketa: “Hino endai kune anhu e madzinza ese, afundisei kuti agare afundi angu.” (Mat. 28:18, 19) Hino simba rakapaswa Djesu, rinobatanidzawo kutungamirira basa re kuparidzira.
4. Ngei tingagara no cokwadi cekuti Djesu aciri kutungamirira basa rekuparidzira?
4 Djesu akagondesa kuti basa re kuparidzira uye rekuita afundi raizoizwa ku “madzinza ese” uye ayena akagondesa ateeri ake kuti aizonga nawo “mazuwa ese dakara pakuguma ke nyika.” (Mat. 28:20) Masoko aya, anonyasa kupangidza pamhene kamare kuti Djesu Kristu aizotungamirira basa re kuparidzira dakara mazuwa ano atiri kurarama.
5. Tingabatanidzwawo kudini pakudzadzika ke uphorofiti uri pana Pisarema 110:3?
5 Djesu ainga ano cokwadi cekuti mu mazuwa ekupedzesera kaizooneka anhu akawanda aizoita basa re kuparidzira. Izvona zvainga zvakaphorofithwa kare pana Pisarema 110:3, inoti: “Anhu ako acadzipira no mwoyo wese pa zuwa raunoenda ne cikwata cako ce anyahondo.” Djesu aiziya kuti uphorofiti uu waizodzadzika. Kana imwimwi muri kubatikanawo pa basa re kuparidzira, munonga mecitsigira Djesu pamwepo no muranda wakagondeka uye wakangwara uye munonga mecibatikanawo pakudzadzika ke uphorofiti uu. Basa iri riri kubudirira, asi pano zvitsinzwa.
6. Zvitsinzwa zvipi zvatiri kusongana nazvo nyamasi uno pakuparidzira masoko e Umambo?
6 Citsinzwa catingasongana naco ikuphikiswa. Anhu akapauka pakunamata, atungamiriri e magereja uye anyautongi, anoreketa manyepo nge zve basa redu. Uye zvingakwanisa kuita kuti anyaukama edu, adoni edu e kubasa no amweni atinoziya atendere manyepo awona uye awona angaedza kutiitisa kuti tisiye kuparidzira uye tisiyewo kuseenzera Djehovha. Mu nyika dzimweni, azondi edu anothyisidzira, anorhwisa uye anosunga hama no hanzvadzi dzedu. Asi izvona azvitishamisi. Djesu akatingwadza eciti: “Imwimwi mucazondwa nge madzinza ese nge ndaa ye zina rangu.” (Mat. 24:9) Zvezvirokwazvo, zviro zvese izvi zvinonyasa kupangidza pamhene kuti isusu tinotenderhwa na Djehovha. (Mat. 5:11, 12) Dhiyabhorosi ndiyena uri sure ke kuphikiswa kese uku. Asi Djesu ndiyena ano simba rakakura kupinda Sathani! Na Djesu kudii redu, masoko akanaka ari kuparidzwa ku anhu e madzinza ese. Ngationei zvipangidzo zvinganani.
7. Ngazvipi zvinopangidza kuti uphorofiti uri pana Zvakapangidzwa 14:6, 7 uri kudzadzika?
7 Ngekuti mu nyika ino yatiri kugara munorekethwa mireketero yakawanda, kuparidzira anhu ese mu nyika dzese zvingashupha maningi. Djesu akabhuya kuti mumazuwa ano atiri kurarama, masoko akanaka aizoparidzirhwa kunyazi no zvitsinzwa izvona. (Erengai Zvakapangidzwa 14:6, 7.) Uphorofiti uu uri kudzadzika kudini? Tiri kupasa anhu akawanda mukana wekuti atambire masoko akanaka e Umambo. Nyamasi uno, basa redu rekuparidzira ririkuizwa mu nyika dzakawanda uye mumireketero yakasiyana-siyana. Ngo muezaniso, mu saiti yedu anhu ari mu pasi rese anokwanisa kuerenga mabhuku anoreketa nge zve Bhaibheri mumireketero inodarika 1000! Uye feramenta yedu huru yekufundisa anhu Bhaibheri, bhuku ra Pfadzwai ne Upenyu Nokusikaperi! ricaoneka mumireketero inodarika 700! Kupinda izvona, zvekurhya zvekunamata izvo zvinobudiswa peciseenzeswa mavhidhiyo, anoizirhwa anhu asikazwi uye mu ci braille anoizirhwa kuitira mapofo. Anhu “e mireketero yese ye madzinza” arikufundira kureketa “mureketero wakacena” kana kuti, cokwadi ciri mu Bhaibheri. (Zak. 8:23; Zef. 3:9) Uye isusu tino cikomborero cekuona uphorofiti uu wecidzadzika. Zvese izvi zviri kukwanisa kuitika ngekutungamirira ka Mambo wedu Djesu Kristu.
8. Basa rekuparidzira riri kugara no mubairo upi?
8 Nyamasi uno, anhu anokwana kuita 8000 000 e nyika dzinokwana kuita 240 inhengo dze sangano ra Djehovha, uye gore rimwe na rimwe mamirionji e anhu anobhabhatidzwa! Asi kuwanda ke anhu aya andikopi kunonyanya kukosha. Cinonyanya kukosha “ndi unhu upsva” uri kusakurirhwa no afundi aya. Nge masoko amweni, awona ano mawara e ku mwiya. (Ako. 3:8-10) Anhu akawanda akasiya kuita zviro zvisikazi kucena, zvecisimba, rusananguro uye kudada no nyika yawo. Uphorofiti uri pana Isaya 2:4 uri kudzadzika, anhu a Djehovha ‘aaciripizve kufundira hondo.’ Patinopeta masimba kuti tipfeke unhu upsva, tinobetsera kukweera anhu ku sangano ra Djehovha, uye tinopangidza kuti tiri kuteera mutungamiriri wedu Djesu Kristu. (Juau 13:35; 1 Ped. 2:12) Pa zviro zvese izvi, apana ciri kuitika cega. Djesu ari kutipasa rubetso rese ratinoda.
DJESU ANOGADZA MURANDA
9. Maererano na Mateu 24:45-47, Djesu akabhuya kuti cinyi caizoitika mu mazuwa ekupedzesera?
9 Erengai Mateu 24:45-47. Djesu akabhuya kuti mumazuwa ekupedzesera, waizogadza “muranda wakagondeka uye wakangwara” kuti apase anhu a Mwari zvekurhya zvekunamata. Hino nge zve kuetsera kuti muranda uu aoneke eciseenza maningi mumazuwa ano. Ndizvona kamare zviri kuitika. Mutungamiriri wedu Djesu arikuseenzesa cikwata cidoko ce akadzodzwa kuitira kuti apase zvekurhya zvekunamata “munguwa yakasisira” ku anhu a Mwari no aya ari kupangidza kupfarira. Anarume aya, aarangariri kuti ndiwona aridzi ekutenda ke amweni. (2 Ako. 1:24) Pano kudaro, awona anozviziya kuti Djesu Kristu ndiye “mutungamiriri uye mutongi” we anhu ake.—Isa. 55:4.
10. Maererano no mabhuku ari pafoto ii, ngaripi rakamubetserai kufunda cokwadi?
10 Kubvira muna 1919, muranda akagondeka unosobudisa mabhuku akawanda kuti abetsere aya anopangidza kupfarira kuti afundire nge zve Soko ra Mwari. Muna 1921, muranda wakagondeka wakabudisa bhuku rinozwi A Harpa de Deus uye irona rakabetsera anhu akawanda kuti afundire cokwadi ciri mu Bhaibheri. Nokuhamba ke nguwa, mabhuku amweni akabudiswa. I bhuku ripi rakamubetserai kuti muziye uye mude Djehovha? I bhuku “Seja Deus Verdadeiro,” A Verdade Que Conduz à Vida Eterna, Poderá Viver Para Sempre no Paraíso na Terra, Zivo Inotungamirira Kuupenyu Husingaperi, Bhaibheri Rinombodzidzisei Chaizvo? Kodi Bhaibheri Rinotifundisei? Kana kuti i bhuku ripsva, Pfadzwai ne Upenyu Nokusikaperi! Mabhuku ese aya akatibetsera kuti tifundise amweni cokwadi, uye bhuku rimwe na rimwe pa mabhuku aya rakabetsera pa nguwa yarakabudiswa.
11. Ngei zvakanaka kurumbwa tecidzirhisa ku mwiya?
11 Aanhupi apsva basi ari mucokwadi anoda zvekurhya zvekunamata. Tese isusu tinoda. Muphostori Pauro wakatara kuti: “Zvekurhya zvakakora nge zve anhu akuru.” Pauro wakapanganidza kuti kuseenzesa zvatinofunda mu Bhaibheri zvinotibetsera “kuziya cakashata no cakanaka.” (Aheb. 5:14) Kuita kuda ka Mwari nyamasi uno kunoshupha maningi, ngekuti anhu ari kubambirira kuita zviro zvisikazi kucena. Asi Djesu anonyasa kutibata zvakanaka uye anotipasa zvekurhya zvekunamata kuti kutenda kedu kurumbwe kakabamba. Ayena anoseenzesa muranda wakagondeka kuti agadzirire uye akoanise zvekurhya izvi zvinotsamira mu Bhaibheri.
12. Ngokuteerera Djesu, tingakudza kudini zina ra Mwari?
12 Isusu tinoteerera muezaniso wa Djesu uye tinopasa rukudzo rese rinosisira ku zina ra Mwari. (Juau 17:6, 26) Ngo muezaniso, muna 1931 isusu takatanga kuseenzesa zina re mu Bhaibheri rekuti Apupuri a Djehovha, uye takaita izvona ngekuti tinoda kuziikanwa nge zina ra Djehovha uye kumukudza. (Isa. 43:10-12) Kubvira mu Otubro mu gore irona, zina ra Mwari rinooneka pakapa ye Murindiri. Kusiya izvona, magereja ekunyepa paanobvisa zina ra Mwari muzviturikirhwa zvawo zve Bhaibheri, Shanduro yeNyika Itsva yeMagwaro Matsvene inoseenzesa zina ra Mwari mu mbuto dzese maraioneka mu Matarhwa ekutanga!
DJESU ANORONGA ATEERI AKE
13. Cinyi cinomupa rugondo rekuti Djesu arikuseenzesa “muranda wakagondeka uye wakangwara” mazuwa ano? (Juau 6:68)
13 Djesu arikuseenzesa “muranda wakagondeka uye wakangwara” kuti aumbe pa nyika pano sangano rinomutsidzira kunamata kakacena. Munozwa kudini ngekuita dii re sangano iri? Pamweni mungaedzurira masoko e muphostori Pedru, wakati: “Tenzi, tingaenda kunani? Ndimwi mune masoko e upenyu usikaperi.” (Juau 6:68) Dai musiripi dii re sangano ra Djehovha, munokwanisa kurangarira here kuti dai murikupi? Djesu anoseenzesa sangano kuti atipase zvekurhya zvekumwiya uye atirowedze mu basa rekuparidzira masoko akanaka. Kusiya izvona, ayena anotibetsera kuti tigare no “unhu upsva,” uye kuti tipfadze Djehovha.—Aef. 4:24.
14. Nhungamiriro dzatakapaswa no sangano ra Djehovha pakati pe nhenda ye COVID-19 dziri kutibetsera kudini?
14 Djesu anopasa nhungamiriro dzatinoda mu nguwa inoshupha. Izvona zvakanyasa kuoneka nhenda ye COVID-19 payakatanga. Pa nguwa yekuti anhu akawanda ainga asikazii zvekuita, Djesu akatipasa nhungamiriro dzakadjeka eciseenzesa sangano ra Djehovha. Isusu takakohomedzeswa kupfeka maskara pa mbuto dzakadzara anhu uye kugarirana kure no kure. Akuru akaedzurirhwa kuti aidikana kurumbwa ecibambisa aparidzi e mu ungano uye aziye zvinodikanwa zvawo zvekunyama uye zvekunamata. (Isa. 32:1, 2) Takatambirazve nhungamiriro dzimweni uye kubambiswa nge zviziiso zve Dare Rinotungamirira.
15. Inhungamiriro dzipi dzatakatambira pa nguwa ye nhenda ye korona vhiru dzinocokuita no misangano uye basa rekuparidzira, uye migumisiro yakhona ngaipi?
15 Panguwa ye nhenda ye korona vhiru, isusu takatambirawo nhungamiriro dzakadjeka dzinocokuita no mishobo yekupinda misangano uye kuita basa redu rekuparidzira. Ciriporipoco, isusu takatanga kupinda misangano no magugano teciseenzesa vhidhiyo konferensiya. Takatanga kunyanya kuparidzira teciseenzesa karta uye thurufunu. Uye Djehovha ari kukomborera maningi kupeta masimba katiri kuita. Mafiriyari akawanda ari kureketa kuti numero ye aparidzi iri kutunhudzirika maningi. Hama dzakawanda dziri kugara no maeshiperiensiya anopfadza pa nguwa ye nhenda ye korona vhiru.—Onai bhokisi rakazwi “ Djehovha Anokomborera Basa Redu Rekuparidzira.”
16. Isusu tingagara no rugondo rei?
16 Pamweni anhu amweni ari kurangarira kuti sangano riri kunyanyisa no nhungamiriro dzinocokuita nokudzidziirira pa nhenda ye korona vhiru. Asi zviri kunyasa kubuda pamnhene kuti sangano riri kutipasa nhungamiriro dzakanakisisa. (Mat. 11:19) Uye tikanyasa kurangarira mushobo uri kutungamirira Djesu anhu ake no rudo, isusu tigagonda hedu kuti pasinei no zvicaitika mune ramangwana, Djehovha na Djesu anonga ari kudii redu.—Erengai Ahebheru 13:5, 6.
17. Kuziya kuti Djesu ndi mutungamiriri wenyu kunoita kuti muzwe kudini?
17 Isusu tinopfara maningi ngekuti Djesu ndi mutungamiriri wedu! Tiri nhengo ye sangano risikaparadzaniswi nge madzinza, nyika uye mireketero. Tiri kunyasa kupaswa zvekurhya zvekunamata uye tiri kupaswa rowedzo rese ratinoda kuti tiite basa rekuparidzira. Umwe na umwe wedu uri kufundiswa kuti agare no unhu upsva, uye tiri kufundirawo kudanana. Zvezvirokwazvo, tino zvikonzero zvakawanda zvekuti tidade ngekuti Djesu ndi mutungamiriri wedu!
NGOMA 16 Kudzai Djehovha nge Mwana Wake, Mudzodziwa
^ Mamiriyonji e anarume, anakadzi uye ana adoko, ari kupeta masimba ari ese pa kuparidzira masoko akanaka. Kana imwimwi mecibatanidzwawo pa anhu aya, muri kuseenza mecitungamirirhwa na Tenzi wedu Djesu Kristu. Mu fundo ino, ticaona zviro zvinopangidza pamhene kamare kuti Djesu ndiyena ari kutungamirira basa re kuparidzira nyamasi uno. Kunyasa kurangarira izvona, kucatibetsera kuti tirumbwe takashinga pa kuseenzera Djehovha tecitungamirirhwa na Djesu Kristu.
