Djesu aiparidza masoko e runyararo. Pa nguwa imweni, ayena akabvunza aphostori ake kuti: “Musarangarire kuti ndauya kuzounzisa runyararo pa nyika; Andizi kuuya kuzounzisa runyararo, asi supada. Ngekuti ndakauya kooparadzanisa mwanarume na baba ake, mwana we musikana na mai ake, nyamwana na nyazani ake.” (Mat. 10:34, 35) Djesu aireyei?

Djesu ainga asikadi kuparadzanisa nhengo dze mhuri, asi aiziya kuti zvaaifundisa zvaizoita kuti mhuri dzimweni dziparadzane. Aya anoda kugara ateeri a Kristu uye obhabhatidzwa, anodikana kuziya migumisiro ye cisananguro cawo. Kana akazondhwa ne mukadzi kana mwamuna asikatendi kana nhengo imweni ye mu mhuri, zvaizoshupha kugara wakagondeka mukuona ka Djehovha.

Bhaibheri rinokohomedzesa Akristu kuti “agare mu runyararo ne anhu ese.” (Aro. 12:18) Asi zvaifundiswa na Djesu, zvingaita hingana “supada” mu mhuri dzimweni. Izvi zvinoitika kana umwe we nhengo ye mhuri akatendera zvinofundiswa na Djesu uye amweni oramba kana kuzonda. Pakadaropo, nhengo dze mu mhuri dzingagara “azondi” e munhu wiya arikufunda cokwadi.—Mat. 10:36.

Ateeri a Kristu anorarama mu mhuri dzino zvitendero zvakasiyana, nguwa dzimweni anosongana ne migariro inoedza kugondeka kawo kuna Djehovha na Djesu. Nge muezaniso, abereki asikatendi angaabambidzira kupemberera mazororo e zvitendero. Kana akaedzwa acapfadza ani? Djesu akati: “Munhu anoda maningi baba kana mai kudarika inini aazi kundisisira.” (Mat. 10:37) Zviri pamhene kuti ainga asikareketi kuti asisire ayena uye afundi ake ainga asikadikani kuda abereki. Pane kudaro ayena akati tinodikana kuona zviro nge mushobo uri pakati ne pakati. Kana nhengo dze mu mhuri dze cizonda masimba edu ekunamata Djehovha, tinorumbwa teciada, asi tinoziyawo kuti rudo redu kuna Mwari rinodikana kuuya pa mbuto yekutanga.

Zvezvirokwazvo, uzondi unobva mu mhuri unorhwadza. Kunyazi zvakadaro, afundi a Djesu anorangarira masoko ake anoti: “Uya asikatendi danda rake rokutambudzika osama kunditeera, aazi kusisira inini.” (Mat. 10:38) Nge masoko amweni, Akristu anoona uzondi we mu mhuri hinga dii re matambudziko akarekethwa na Djesu uye anoatambira nge mushobo wakanaka. Pa nguwa imwenyo, awona anoetsera kuti ne muhambiro wawo wakanaka ucaita kuti mhuri dzino anhu asikatendi adewo kuzwa masoko e mu Bhaibheri.—1 Pet. 3:1, 2.