1. Munozwa kudini ngo kufunda cokwadi?

 HINGA aseenzi a Djehovha, isusu tinoda cokwadi catinogumira mu Bhaibheri. Ndimo makatsamira kutenda kedu. (Aro. 10:17) Isusu tino cokwadi cekuti Djehovha akaumba ungano ye Cikristu kuti ‘ibetsere no kudziirira cokwadi.’ (1 Ti. 3:15) Tinopfara maningi kutsigira ‘aya anotitungamirira pakati pedu,’ ngokuti ndiwo anotipanganidzira zvokwadi zve Bhaibheri zvinotibetsera kuti tiite kuda ka Mwari.—Aheb. 13:17.

 2. Maererano na Tiyago 5:19, cinyi cingazoitika mumasure mekufunda cokwadi?

² Asi mumasure me kufunda cokwadi uye kutendera kuti tinodikana kutondoedza nhungamiriro dze sangnao ra Djehovha, tingakwanisa kugara pa ngozi ye kusiya cokwadi. (Erengai Tiyago 5:19.) Sathani waizopfara maningi ngekutiona tecisiya kugonda Bhaibheri no sangano ra Djehovha.—Aef. 4:14.

 3. Ngei tecidikana kurumbwa takagondeka ku cokwadi? (Aefeso 6:13, 14)

³ Erengai Aefeso 6:13, 14. Mbai-mbai pano Sathani ucabararisa manyepo uye ucaita kuti madzinza arhwise anhu a Djehovha. (Zvak. 16:13, 14) Asi tinoziyawo kuti Sathani ucaita zviri zvese kuti acengedzere anhu a Djehovha. (Zvak. 12:9) Ndiyo ndaa, zvinokosha maningi kuti tidzirowedze kubvira zvino kuti tikwanise kuona musiyano uripo pakati pe manyepo no cokwadi, uye kuti tikwanise kurumbwa tecizwira  cokwadi. (Aro. 6:17; 1 Ped. 1:22) Kuti tikwanise kupona pa dambudziko guru, zvicatsamira pa zviro izvi!

 4. Ticafundei mu fundo ino?

⁴ Mu fundo ino, ticaona mawara mairi atinodikana kugara nawo kana tecida kuona cokwadi ciri mu Bhaibheri uye kutungamirirhwa no sangano ra Djehovha. Pedzepo, ticaona zviro zvitatu zvatinodikana kuita kana tecida kurumbwa takabamba mu cokwadi.

MAWARA ATINODIKANA KUGARA NAWO KANA TECIDA KUZIYA COKWADI

 5. Kuthya Djehovha kucatibetsera kudini kuziya cokwadi?

⁵ Kuthya Djehovha. Kuthya Djehovha kunoreya kumuda maningi uye kusaita ciro cipi haco cinomusiya akatsukwara. Ndiyo ndaa tecida kunyasa kuziya musiyanio uripo pakati pe cakanaka no cakashata uye zvirokwazvo no manyepo, kana tecida kutenderhwa na Djehovha. (Zvie. 2:3-6; Aheb. 5:14) Ngekuti zviro zvinopfarirhwa no anhu kakawanda kakhona azvipfarirhwi na Djehovha, hino atidikani kutendera kuti kuthya katinoita anhu kupinde rudo ratinaro kuna Djehovha.

 6. Kuthya anhu kakaita kudini kuti Aisraeri gumi asarekete cokwadi?

⁶ Kana kuthya katinoita anhu kukadarika kuthya katinoita Djehovha, mugumisiro wakhona tingapedzesera nge kusiya cokwadi. Ngatione muezaniso we Aisraeri 12 akatumwa kuti aende koovhevha nyika yapikira Djehovha kupasa Aisraeri. 10 awo akasiya kuti kuthya kaaiita Akanani kuakunde kudarika rudo raainga anaro kuna Djehovha. Awona akati ku Aisraeri ese: “Atikwanisi kurhwisana no anhu aya, ngekuti ano simba kupinda isusu.” (Num. 13:27-31) Izvirokwazvo kuti mu maonero e anhu, Akanani ainga akabamba maningi kupinda Aisraeri. Asi kubhuya kuti Aisraeri ainga asikakwanisi  kukunda azondi awo, kainga kuri kusiya Djehovha pa muceto. Anarume aya 10 aidikana kukanda ndangariro dzawo pa zviro zvekuti Djehovha aida kuti Aisraeri aite. Uye awona aidikana kurangarira pa zviro zvaiinga aizirhwa na Djehovha. Ngekuaro, awona aizoedzurira kuti Akanani aciropi kana akaezaniswa na Djehovha we masimba ese. Kusiyana no anhu aya, Djoshuwa na Karebhi aida kutenderhwa na Djehovha. Awona akati ku anhu: “Kana Djehovha akatipfarira, acaita kuti tipinde mu nyika ii yaacatipasa.”—Num. 14:6-9.

 7. Tingabambisa kudini kuthya kedu cokwadi? (Onaiwo mufanikiso.)

⁷ Kuti tibambise kuthya kedu Djehovha, pese patinoita cisananguro, tinodikana kutanga tarangarira zviya zvinomupfadza. (Pis. 16:8) Pamunonga mecierenga ngano dze mu Bhaibheri, dzibvunzisei kuti: ‘Kudai ndainga ndiri pa mugariro uu, ndaizoita cisananguro cipi?’ Ngo muezaniso, Aisraeri 10 paakareketa masoko aya ekuthyisidzira, imwimwi maizozvitendera here uye mothya munhu, kana kuti rudo renyu kuna Djehovha raizotunhudzirika? Aisraeri aazi kutendera kuti Djoshuwa na Karebhi ainga ecireketa cokwadi. Nge ndaa yazvo, awona akaruza mukana we kupinda mu Nyika Yakapikirhwa.—Num. 14:10, 22, 23.

 8. I wara ripi ratinodikana kusakurira, uye ngei?

⁸ Kudzidodosa. Djehovha anopangidza cokwadi basi ku aya anodzidodosa. (Mat. 11:25) Uye isusu tecidzidodosa takatenda rubetso kuti tifunde cokwadi. (Zvii. 8:30, 31) Kunyazi zvakadaro isusu tinodikana kungwarira kuti tisagare anhu anodzikudza. Kana izvona zvikaitika tingatanga kurangarira kuti maonero edu anokosha kupinda cokwadi cisikacinji ciri mu Bhaibheri uye nhungamiriro dzatinopaswa no sangano ra Djehovha.

 9. Tingarumbwa kudini tiri anhu anodzidodosa?

⁹ Kana isusu tecida kurumbwa tecidzidodosa, tinodikana kuedzurira kuti, mukuezanisira na Djehovha isusu atiripi ciro. (Pis. 8:3, 4) Uye tingaitawo munamato kuna Djehovha tecikumbira kubetserhwa kugara anhu anodzidodosa uye kutenda kufundiswa. Djehovha anotifundisa marangariro ake eciseenzesa Bhaibheri uye sangano rake, uye iyena acatibetsera kunyasa kukoshesa izvona pane kukoshesa marangariro edu. Pamunoerenga Bhaibheri edzai kuona kuti Djehovha anoda kudini aya anodzidodosa uye kuti anozonda kudini aya anodzikudza. Uye petai masimba zvecibva pamwoyo kuti murumbwe mecidzidodosa kana mukatambira ubaba unoita kuti anhu amweni amupasei mbiri.

TINGABATISISA KUDINI COKWADI

10. Djehovha akaseenzesa ani kuti apase nhungamiriro uye afundise anhu ake?

¹⁰ Gondai sangano ra Djehovha. Kareko, Djehovha akaseenzesa Mozesi uye pedzepo akaseenzesa Djoshuwa kuti apase nhungamiriro Aisraeri. (Djs. 1:16, 17) Aisraeri aikomborerhwa paaiona anarume aya hinga aimiriri a Djehovha. Mazana e makore akazoteera, ungano ye Cikristu yakaumbwa uye aphostori 12 ndiwona ainga ootungamirira anhu a Mwari. (Zvii. 8:14, 15) Mumasure mazvo, grupu iri rakatunhudzirika kutobatanidzawo akuru e ku Djerusarema. Ngokutondowedza nhungamiriro dzaaitambira ku anarume aya akatendeka, “ungano dzaibambiswa mu kutenda uye dzairumbwa dzecikura zuwa no zuwa.” (Zvii. 16:4, 5) Asi munorangarira kuti Djehovha aizozwa kudini kana tikatama kuzwira uya waakasanangura kuti atitungamirire? Tingadaira mubvunzo  uu ngokuona zvakaitika no Aisraeri paainga ecienda ku Nyika Yakapikirhwa.

11. Cinyi cakaitika no aya asikazi kureremedza Djehovha uye aakasanangura kuti atungamirire anhu ake? (Onaiwo mufanikiso.)

¹¹ Zuwa rimweni Aisraeri paainga ecienda ku Nyika Yakapikirhwa, anarume ano mbiri akaphikisa Mozesi no basa raainga akapaswa ndi Djehovha. Awona akati: “Ungano yese, [haiwa Mozesi basi] i cena, awona ese, uye Djehovha ari pakati pawo.” (Num. 16:1-3) Kunyazi cainga ciri cokwadi cokuti kuna Djehovha “dzinza rese” rainga riri cena, Djehovha ainga akasanangura Mozesi basi kuti atungamirire. (Num. 16:28) Paaishora Mozesi, apanduki aya ainga ecitoshora Djehovha. Awona aazi kukanda ndangariro dzawo pa zviro zvaidiwa na Djehovha, asi akakanda ndangariro dzawo pa zviro zvaaida, zvakaita hingana simba uye mbiri. Djehovha akatsakatisa anarume aya no anarume amweni akatenderana nawo. (Num. 16:30-35, 41, 49) Ngo mushobo umwewo, mazuwa ano tinoziya kuti Djehovha aatenderi aya asikareremedzi nhungamiriro dze sangano rake.

12. Ngei zvecikosha kugonda sangano ra Djehovha nguwa dzese?

¹² Nguwa dzese isusu tingagonda sangano ra Djehovha. Pazvinobuda pamhene kuti panodikana kuizwa cinjo ye mazwisisiro ataiita cokwadi cimweni ce Bhaibheri kana kuti mushobo watinoseenzera Djehovha, aya anotungamirira aarangariri kairi katatu kuita cinjo idzona. (Zvie. 4:18) Awona anoita izvona ngekuti anoda kupfadza Djehovha kupinda zvese. Awona anopetawo masimba kuti aite zvisananguro zviiri izvi ecitsamira mu Soko ra Mwari, uye ndizvonawo zvinodikana kuizwa no aseenzi ese a Djehovha.

13. “Masoko anobetsera i cinyi,” uye tinodikana kuitei nawo?

¹³ “Rumbwa wakabatisisa muezaniso we masoko anobetsera.” (2 Ti. 1:13) “Muezaniso we  masoko anobetsera” anoreya fundiso dze Cikristu dzatinogumira mu Bhaibheri. (Juau 17:17) Zviro zvatinotenda zvinotsamira pa fundiso idzona. Sangano ra Djehovha rinotifundisa kuti tibatisise fundiso idzona. Kana tikadaro ticakomborerhwa.

14. Kodi Akristu amweni e kare akasiya kudini kuteerera “masoko anobetsera”?

¹⁴ Cinyi cingaitika kana tikasama kuteerera “muezaniso we masoko anobetsera”? Onai muezaniso. Muzana re makore re kutanga Akristu anganani aibararisa masoko e kunyepa ekuti zuwa ra Djehovha rainga raguma. Zvinoita hingana kuti pamweni awona akatambira tsamba yaiita hingana kuti yakatarhwa ndi muphostori Pauro ecireketa nge zvazvo. Asi asikazi kupsvakisisa masoko akadzara, Akristu angani e Kutesaronika akatendera masoko awona uye akatangawo kuabararisawo kuamweni. Kudai awona akaedzurira zvaakafundiswa ndi Pauro paainga anawo, awona ainga asikazocengedzerhwi. (2 Ate. 2:1-5) Pauro wainga akabvunza hama idzi kuti asazotendere masoko ese-ese aaizozwa. Uye kuti aabetsere pa migariro yaizoteera, Pauro wakapedzesa kutara tsamba yake yecipiri ku Atesaronika eciti: “Uu ndiwo mucungamidzo wangu inini Pauro, wandatara ngo nyara dzangu, unogara hinga cipangidzo mu tsamba dzangu dzese; aya ndiwona matariro andinoita.”—2 Ate. 3:17.

15. Tingadzidziirira kudini pa masoko anoita hingana kuti ngee cokwadi? Pasai muezaniso. (Onaiwo mafoto.)

¹⁵ Tingafundei no zvakarekethwa na Pauro ku Atesaronika? Patinozwa ciro cisikapindirani no zviya zvatakafunda mu Bhaibheri kana kuti tikaziya ngezve nyaya inoshamisa, tinodikana kupangidza ungwaru. Zuwa rimweni ku União Soviética yo kare, azondi edu akapasa hama dzedu tsamba yaiita hingana kuti yaibva ku sedhe mundiyari. Tsamba iyona yaikohomedzesa hama dzedu kuti dziumbe sangano rinodziimirira. Tsambeyo yaiita hingana kuti ngeye zvirokwazvo, asi hama dzakagondeka adzizi kuwira pamurau uwona. Awona akaona kuti zvairekethwa  no tsambeyo zvainga zvisikapindirani no zviya zvaainga akafunda. Nge mushobo umwewo mazuwa ano, aya anozonda cokwadi nguwa dzimweni anoseenzesa interneti no maredhi sosiyari kuti aedze kutibviringidza uye atiparadzanise. Pane “kuruza nokukasika marangariro [edu] akanaka,” tinodikana kunyasa kurangarira kuti zvatazwa kana zvataerenga zvinopindirana here kana kuti haiwa no zvatakafunda.—2 Ate. 2:2; 1 Juau 4:1.

16. Maererano na Aroma 16:17, 18, cinyi catinodikana kuita kana munhu akapauka pa cokwadi?

¹⁶ Rumbwai makabatana no aya akagondeka kuna Djehovha. Djehovha anoda kuti timunamate takabatana no hama dzedu. Tingakwanisa kuita izvona kana tikarumbwa takabatisisa cokwadi. Munhu unobararisa masoko asikapindirani no cokwadi unoita kuti ungano iparadzane. Ndiyo ndaa, Djehovha anotibvunza kuti ‘tisiyane nawo.’ Kana tikasama kuita izvona, tingatanga kutendera manyepo uye tosama kugondeka kuna Djehovha.—Erengai Aroma 16:17, 18.

17. Makomborero api atinawo nge kuziya cokwadi uye kunyasa kucibatisisa?

¹⁷ Patinoziya cokwadi uye tocibatisisa no simba rese, ticakwanisa kugara dhuze na Djehovha uye ticaita kuti kutenda kedu kugare kakabamba. (Aef. 4:15, 16) Kusiya izvona, atizocengedzerhwi no fundiso dze kunyepa dza Sathani uye ticakwanisa kurumbwa takacengeteka no rubetso ra Djehovha pa kutambudzika kukuru. Hino, batisisai cokwadi “uye Mwari we runyararo acagara na imwimwi.”—Afi. 4:8, 9.