Nicolas na Céline akasongana no zvinetso zvakasiyana. Firiari yo França yaakacinja kuti aende ku ungano imweni. Awona anoti: “Pokutanga, isusu takapfara maningi. Asi mumasure mazvo, takatanga kusuwa shamwari dzedu. Isusu tainga tisati taita shamwari dzakawanda mu ungano ipsva.” a Pamunobatana no zvinetso hingana izvi, mungabudirira kudini pamunonga muri mu ungano ipsva? Amweni angaitei kuti abetsere? Uye makomborero api e kumwiya amungatambira uye amungapasawo amweni mu ungano ipsva?

ZVIRO ZVIRONGOMUNA ZVINGAMUBETSERAI KUTI MUDJAIRANE MU UNGANO IPSVA

1. Gondai Djehovha. (Pis. 37:5) Hanzvadzi imweni ye ku Japão inozwi Kazumi, yekuti yainga ino makore 20 iri mu ungano yayo, yakacinja ungano ngokuti mwamuna wayo wainga akacinjwa ku basa kuti aende kooseenza ku mbuto imweni. Iyona yakasiya kudini “Djehovha kuti atungamirire gwanza [rayo]”? Iyona inoti: “Ndakanamata kakawanda kuna Djehovha uye ndakamubvunza zvese zvandaizwa. Inini ndaithya, ndaizwa ndiri ndega, uye ndaidzirhya mwoyo. Asi pese paya pandainamata kuna Djehovha, iyena aindipasa simba randaida.”

Mungaitei kuti munyase kugonda Djehovha? Kuitawo hingana muti unoda mvura uye no zuwa kuti unyase kukura zvakanaka, kutenda kedu kunodikanawo kudirirhwa kuti kunyase kubamba. Nicolas, wamborekethwa pakutanga, wakabambisa rugondo rake pa kubetserhwa na Djehovha nge kunyasa kurangarira ngezve muezaniso wa Abrahamu, Djesu, uye muphostori Pauro, anarume e kuti akaita zviri zvese kuti aite kuda ka Mwari. Urongwa wakanaka we fundo ye munhu ega unomubetserai kuti mukwanisane no zvinetso zvamuri kusongana nazvo mu upenyu, uyewo mucafundira zviro zvamungaseenzesa kuti mubambisewo amweni mu ungano ipsva.

 2. Musaezanise. (Mup. 7:10) Jules wakacinja ecibva ku Benin, ku África ecienda ku Estados Unidos uye wakaona kuti tsika dzainga dzakasiyana maningi. Iyena unoti: “Inini ndairangarira kuti ndaidikana kubhuya ngezve upenyu wangu ku munhu wese wandaisongana naye.” Nge ndaa ye musiyano uu we tsika, iyena wakatanga kugara kure no hama dze mu ungano. Asi mumasure me kuziya hama, iyena wakacinja maonero ake. Iyena unoti: “Inini ndinotendera kuti azvinei no kupi katingararama mu nyika ino, tese isusu tiri anhu amwewo. Musiyano nge we kureketa mushobo wakasiyana basi. Cinokosha ngece kutendera munhu hinga mushobo waari.” Ndiyo ndaa, zvinokosha maningi kutama kuezanisa ungano ipsva no yokare. Mupionera umweni unozwi Anne-Lise, unoti: “Inini andizi kucinja ungano ndeciedza kuona zvandakasiya sure, asi ndakacinja kuti ndione zviro zvipsva.”

Akuru aadikaniwo kuezanisa ungano ipsva no yokare. Ngokuti hama mu ungano ipsva dziri kuita zviro nge mushobo wakasiyana, azvireyi kuti dziri kushaisha. Zvakanaka maningi kuziya mugariro we mbuto iyona tisati tapasa maonero. (Mup. 3:1, 7b) Ndiyo ndaa, zvakanaka maningi kufundisa hama nge muezaniso wakanaka, pane kudzibambidzira kuti dzirangarire hinga mushobo watinorangarira.—2 Ako. 1:24.

3. Rumbwai makabatikana. (Afi. 1:27) Cinjo inoita kuti tipere simba uye tipedze nguwa yakawanda, asi zvinokosha maningi kuti tipinde misangano patinoguma mu ungano ipsva—uye zvakanaka maningi kuti tiite izvona tecionana hope no hope. Kana hama dze mu ungano ipsva dzikatama kutiona mu Nyumba ye Umambo, dzingatibetsera kudini? Hanzvadzi imweni inozwi Lucinda inogara ku África do Sul, yakacinga kuti iende ku thaundi guru no ana ayo airi. Iyona inoti: “Shamwari dzangu dzakandikohomedzesa kuti ndikande ndangariro dzangu pa kushamwaridzana no hama dzangu mu ungano ipsva, teciseenza pamwepo mu basa re kuparidzira uye kupinda misangano. Isusu takatenderawo kuti pa nyumba pedu paizwe misangano ye kubuda mu basa re kuparidzira.”

Zviro zvicamubetserai kuti “mubambe uye mubambisewo” amweni ndi kupeta masimba kuti “museenze makabatana” mu mabasa e ungano. Akuru e ungano ye hanzvadzi Anne-Lise, amborekethwa pekutanga akaikohomedzesa kuti ibude mu basa re kuparidzira no hama dzese. Ngaupi mugumisiro wakhona? Iyona inoti: “Apazi kutora nguwa yakareba, ndakazwisisa kuti kuita izvi wainga uri mushobo wakanaka we kuita dii ro ungano.” Kusiya izvona, kana imwimwi mukabatikanawo pa kuceneswa uye kugadziriswa ke Nyumba ye Umambo, mucapangidza kuti ungano ipsva zvino ya ungano yenyu. Kana mukagara makabatikana pa mabasa hingana aya, zvicagara nyore kuti hama dzizwe dzakasudzunuka kamuri uye imwimwi mucazwa hinga muri dii re mhuri ii ipsva ye kumwiya.

4. Itai shamwari dzipsva. (2 Ako. 6:11-13) Mushobo wakanaka we kuita shamwari, ngewe kupangidza kuti tinoda anhu. Ndiyo ndaa, munodikana kukasika kuguma ku Nyumba ye Umambo uye musakasike kubuda mumasure me kukhumuka, kuitira  kuti mucedze no hama uye munyase kudziziya. Petai masimba ari ese kuti muziye mazina o hama. Kana mukaedzurira mazina o hama, kugara munhu ano unaki uye unogumika, zvicaita kuti hama dzizwe dzakasudzunuka kumukhwedererai uye zvicaita nyore kuita shamwari dzakanaka.

Musanyanye kunetseka nge kuda kutenderhwa no hama, asi siyai kuti hama dzimuziyei hinga mushobo wamuri kamare. Itai hinga zvakaizwa na Lucinda. Iyena wakati: “Isusu tino ushamwari wakanaka no hama ngokuti tinotanga tisu kudzipika kuti dziuye kumba kedu.”

“TAMBIRANAI”

Amweni angazwa kuthya kupinda mu Nyumba ye Umambo makadzara no anhu aasikazii. Hino imwimwi mungabetsera kudini anhu apsva kuti adjairane mu ungano yenyu? Muphostori Pauro wakatikohomedzesa kuti ‘titambirane hinga kutambirhwa katakaizwa na Kristu.’ (Aro. 15:7) Akuru angabetserawo anhu apsva kuti azwe kutambirhwa zvakanaka. Nge kuita izvona, awona anonga eciteedzera muezaniso wa Djesu. (Onai bhokisi rakazwi: “ Mungaita Kudini kuti Kucinja Ungano Kugare Nyore.”) Hama dzese dze mu ungano, kutobatanidzawo ana, angabetserawo anhu apsva kuti azwe hinga ari kumba.

Kubvunza amweni kuti mauya-mauya ndi mushobo umweni we kutambira zvakanaka uye zvinobatanidzawo kubetsera. Ngo muezaniso, hanzvadzi imweni yakabetsera hanzvadzi yabva kuguma mu ungano, nge kuibetsera kuipangidza mushobo wakaita thaundi uye mbuto dzinopakirhwa makaru. Hanzvadzi yainga yabva kuguma yakashamisika maningi no zvayakaizirhwa no hanzvadzi iya, uye izvona zvakaibetsera kuti idjairane no ungano ipsva.

MUKANA WAKANAKA WE KUKURA PA KUNAMATA

Kuti gwiza rikwanisa kufungura mabaphiro aro uye romburuka, irona rinodikana kucinja ganda raro kakawanda. Nge mushobo umwewo, kana imwimwi mukacinja kuenda ku ungano ipsva, imwimwi mucadikana kusiya kuthya kupi hako kamunako kunosomupingaidzai kufungura mabaphiro enyu kuti mumburuke pa kuseenzera Djehovha. Nicolas na Céline, ambobhuiwa nge zvawo, anoti: “Kucinja  ungano i rowedzo yakanaka. Kuti tikwanise kudjairana no mbuto ipsva uye no hama dzakasiyana-siyana, isusu taidikana kusakurira mawara mapsva.” Jean-Charles, wambobhuiwa nge zvake, unopanganidza kuti iyena no mhuri yake akabetsereka kudini. Iyena unoti: “Mu ungano yedu ipsva, ana edu akakura pa kunamata, uye akasakurira ushamwari wakabamba na Djehovha. Mumasure me mwedzi minganani basi, mwana wedu we mwanakadzi wakatanga kuita matii pa musangano we pakati pe sumana uye mwana wedu we mwanarume wakagara muparidzi asati abhabhatidzwa.”

Hino ngatimboti kuti imwimwi muri kuda kuenda ku mbuto inodiwa aparidzi akawanda, asi mugariro wenyu autenderi kuita izvona. Zvinyi zvamungaita? Pa nyaya ii, imwimwi mungakwanisa kuseenzesa mazano e mu fundo ino mu ungano yenyu yamuri zvino. Nge kuita izvona, imwimwi munozwa hingana kuti muri kucinja kuenda ku ungano ipsva. Hino gondai Djehovha uye batikanai mu mabasa e mu ungano nge kuseenza mu basa re kuparidzira no hama dzakawanda kana zvikabvira uye nge kupsvaka shamwari dzipsva no kubambisa dziya dzamunadzo. Imwimwi mungabetserawo anhu apsva ngo zviito kana kuti kubetsera aya anonga ecida rubetso. Nge kuita izvona, zvicaita kuti imwimwi munyase kukura pa kunamata, ngokuti rudo i wara re Akristu e zvirokwazvo. (Juau 13:35) Garai no rugondo rokuti “Mwari anopfadzwa maningi nge zvibairo zvakadaro.”—Aheb. 13:16.

Kunyazi no zvinetso, hama dzakawanda dzakakwanisa kudjairana zvakanaka no ungano ipsva uye imwimwi mucakwanisawo kuzviita! Anne-Lise unobhuya kuti: “Kucinja ungano zvakandibetsera kuti ndigare no shamwari dzipsva.” Kazumi waano rugondo rokuti kucinja ungano kaakaita kakamubetsera kuti azwe “rubetso ra Djehovha hinga mushobo waainga asati ambozwa.” Hino zvakadiniwo kuna Jules? Iyena unoti: “Shamwari dzandakaita dzandibetsera kuti ndizwe hinga ndiri pa nyumba. Uye zvino ndaakuzwa hinga dii re mu ungano ipsva; zvaizoshupha maningi kuti ndibude mu ungano ino.”