MUSORO WE KUFUNDA 29
NGOMA 121 Tinodikana Kudzibata
Ngwarirai Miedzo
“Rumbwai makarinda uye rumbwai mecinamata kuti musawire pa muedzo.”—MAT. 26:41.
CINANGWA
Kutibetsera kuzwisisa kukosha ke kutama kuita citema, uye zviro zvingatitiisa kuti tiite citema.
1-2. (a) Djesu akapasa ngwadzo ipi afundi ake? (b) Ngei afundi akasiya Djesu? (Onaiwo mifanikiso.)
DJESU akati: “Zvezvirokwazvo mwiya unoda, asi nyama aina simba.” a (Mat. 26:41b) Masoko aya anopangidza kuti Djesu ainyasa kuziya kuti isusu tiri anhu asikazi kukwana uye ticaita citema. Asi masoko aya angaseenzawo hinga ngwadzo katiri: Atidikani kunyanya kudzigonda. Asati areketa masoko aya pa usiku uwona kamare, afundi a Djesu ainga areketa kuti ainga asikazosii Djesu. (Mat. 26:35) Zvinangwa zvawo zvainga zvakanaka. Asi kunyazi zvakadaro, awona ainga asikazvizii kuti aizopera simba paaizobambidzirhwa, uye akapererhwa no cido ce kuda kuita zviro zvakanaka. Ndiyo ndaa, Djesu akaangwadza kuti: “Rumbwai makarinda uye rumbwai mecinamata kuti musawire pa muedzo.”—Mat. 26:41a.
2 Zvinotsukwarisa kuti afundi a Djesu aazi kurumbwa akarinda. Djesu paakasungwa, awona akarumbwa ari ku kudii rake kana kuti akatiza? Ngo kusama kawo kurumbwa akarinda, afundi a Djesu akazoita zviya kamare zvaainga abhuya kuti ainga asikazozviiti, awona akasiya Djesu.—Mat. 26:56.
Djesu akabvunza afundi ake kuti arumbwe akarinda uye asawire pa muedzo. Asi awona akamusiya (Onai mandima 1-2)
3. (a) Kuti tirumbwe takagondeka kuna Djehovha, ngei tinodikana kungwarira kuti tisanyanye kudzigonda? (b) Ticaonei mu fundo ino?
3 Isusu atidikani kudzigonda. Izvirokwazvo kuti isusu tinodikana kupeta masimba kuti tisasiye Djehovha akatsukwara. Asi isusu tiri anhu asikazi kukwana uye zvingagara nyore kuti tishaishire Djehovha. (Aro. 5:12; 7:21-23) Pa nguwa yatisikakariri, isusu tingaedzwa kuita zviro zvakashata. Kuti tirumbwe takagondeka kuna Djehovha uye ku Mwana wake, isusu tinodikana kuteerera ngwadzo yakapaswa na Djesu, ye kurumbwa takangwarira patinobatana no miedzo. Fundo ino icatibetsera kuita izvona. Pakutanga, ticaona kuti migariro ipi yatinodikana kunyasa kungwarira. Pedzepo, ticaona kuti tingadzidziirira kudini pa miedzo. Pakupedzesera, ticaona kuti tingarumbwa kudini takangwarira.
NGWARIRAI PAYA PAMAKAREMBERA
4-5. Ngei tinodikana kungwarira pa zvitema zvisikazi kukura?
4 Kunyazi zvitema zvisikazi kukura, zvingarembesa ukama wedu na Djehovha. Izvona zvingaitawo kuti tizoite citema cakakura.
5 Tese isusu tinobatana no miedzo inoita kuti tiite citema. Asi tese tinapo patakarembera, zvingadai kuda kuita citema cakakura, kuita zviro zvisikazi kucena, kana kuti kusiya kuti marangariro e nyika atipfuridzire. Ngo muezaniso, amweni pamweni ari kurhwisana no cido ce kuda kuita uhure. Amweniwo pamweni ari kurhwisana no cido ce kuda kuita zviro zvisikazi kucena, zvakadai hinga bonyora kana kuti kuona pornografiya. Uye amweni angarhwisana no kuthya munhu, kuda kudziimirira, ciimo cakashata, kana kuti zvimweniwo. hingana zvinorekethwa na Tiyago kuti: “Munhu umwe na umwe unoedzwa nge kusirira kake uye wotorhwa mwoyo nge zvido zvake.”—Tig. 1:14.
6. Tinodikana kuziyei?
6 Imwimwi munoziya pamakarembera? Zvino ngozi kurangarira kuti apana patakarembera, pamweni torangarira kuti takanyasa kubamba kuti tikunde miedzo ipi hayo ingauya. (1 Juau 1:8) Edzurirai kuti, Pauro wakabhuya kuti kunyazi aya ano “zvikwaniriso zve ku mwiya” angaita citema kana akatama kurumbwa akangwarira. (Aga. 6:1) Hino tinodikana kutendeseka pacedu uye kuziya kuti tese hedu tino patakarembera.—2 Ako. 13:5.
7. Tinodikana kungwarirei? Pasai muezaniso.
7 Mumasure me kuona paya patakarembera, cinyi catinodikana kuita? Tinodikana kupeta masimba kuti tibambise cido cedu cekuti tisawire pa miedzo! Hinga muezaniso, mu nguwa ye Bhaibheri mbuto yainga iri nyore maningi pa muru we thaundi painga pari pa misuwo mikuru. Ndiyo ndaa, paikandwa arindiri akawanda kuti aonerere misuwo mikuru iyona. Nge mushobo umwewo, isusu tinodikana kungwarira muya matakarembera kuti tikunde miedzo ye kuita citema.—1 Ako. 9:27.
TINGARUMBWA KUDINI TAKARINDA
8-9. Mudjaha unorekethwa pana Zvierengo kapituro 7 waidikana kunzvenga kudini kuita citema cakakura? (Zvierengo 7:8, 9, 13, 14, 21)
8 Tingarumbwa kudini takarinda kuti tisapinde pa muedzo we kuita citema cakakura? Isusu tingafunda no muezaniso we mudjaha umweni unobhuiwa pa kapituro 7 ya Zvierengo. Iyena wakaita uhure no mwanakadzi umweni hure. Pa vhersikuro 22 panobhuya kuti mudjaha uu wakateera mwanakadziwo “ciriporipoco.” Nyaya ii inopangidza kuti zvakaita mudjaha uu, padoko no padoko zvakaita kuti apedzesere aita citema cakakura.
9 Cinyi cakaita kuti mudjaha uu awire mu citema? Cokutanga, nge cemadekoni, mudjaha uu “wakahamba nge gwanza rainga riri pa dhuze no pa nyumba yaigara [mwanakadzi uu hure].” Pedzepo, iyena wakahamba eiteera gwanza rinoenda kumba ke mwanakadzi uu. (Erengai Zvierengo 7:8, 9.) Hino, paakaona mwanakadzi uu, iyena aazi kutiza. Pane kudaro, iyena wakasiya mwanakadzi uu ecimukhwederera kuti amupsvode uye wakarumbwa ecizwa zvaaibhuya, iyena wakabhuya kuti wainga abva kutoita cibairo ce runyararo. Pamweni iyena waida kuti mudjaha uu arangarire kuti uu ndi mwanakadzi wakanaka. (Erengai Zvierengo 7:13, 14, 21.) Kudai asikazi kuita zvese izvi, mudjaha uu angadai asikazi kuita citema cakakura kudai.
10. Munhu ungaitawo kudini cishaishi cimweco hinga cakaizwa no mudjaha uu unorekethwa pana Zvierengo kapituro 7?
10 Nyaya ii inopangidza kuti izvi zvingakwanisa kuitika ku munamati wese wa Djehovha. Pamweni tingaita citema cakakura uye torangarira kuti izvi zvaitika pa nguwa “yatisikakariri.” Pamweni anhu amweni angatoreketa kuti: “Izvi zvatoitikawo basi.” Asi kana tikagara uye torangarira, tinoenda koona kuti citema ici cakakura cabva pa kuita cisananguro cakashata. Pamweni zvabva pa kusama kusanangura shamwari dzakanaka, waraidzo inopangidza zviito zve nyika, kana kupinda mu mbuto dzakashata, zvingaita hope no hope kana kuti mu interneti. Pamweni munhuwo aacaiti munamato, kuerenga Bhaibheri, kupinda misangano, uye kuenda mu basa re kuparidzira. Hinga zvakaitika no mudjaha unorekethwa pana Zvierengo, iyena pamweni aazi kuita citema “ciriporipoco.”
11. Kuti tisaite citema, zvinyi zvatisikadikani kuita?
11 Tinofundei? Isusu atidikani basi kunzvenga citema, asi tinodikanawo kunzvenga zviro zvinotiitisa kuti tiite citema. Soromoni wakabvisa pamhene paakareka pa zviya zvakaitika no mudjaha uya uye no mwanakadzi hure. Tecireketa ngezve mwanakadzi hure, Soromoni wakasiya ngwadzo ii: “Usapsveteke wecienda mu makwanza ake.” (Zvie. 7:25) Uye iyena wakatizve: “Gara kure naye; usakhwedere padhuze no pa musuwo we nyumba yake.” (Zvie. 5:3, 8) Izvona zvirokwazvo. Kuti tidzidziirire pa kuita citema, tinodikana kudzicengeta pa miitiro uye pa migariro ingaita kuti tiite zviro zvinonyangadza Djehovha. b Izvona zvinobatanidza kuita zviro zvisikazi kushata ku Akristu, asi zvingaita kuti tipinde pa muedzo we kuita zviro zvakashata.—Mat. 5:29, 30.
12. Djobo wainga wakashinga kuitei, uye izvi zvakamubetsera kudini kuti asawire pa kuita citema? (Djobo 31:1)
12 Kuti tidzidziirire pa zviro zvingatiitisa kuti tiite cishaishi, tinodikana kugara takagadzirira kuita zviro zvakanaka. Ndizvo zvakaizwa na Djobo. Iyena wakaita “citenderano no madziso [ake]” kuti asazonangise anakadzi amweni no cido ce kuda kuita upombwe. (Erengai Djobo 31:1.) Kuti aite maererano no zviya zvaainga atsidzira mu mwoyo make, iyena waidikana kugara kure no cido ce kuda kuita upombwe. Isusu tingakwanisawo kugara takagadzirira pa ciro cipi haco cingatiitisa kuti tipinde pa muedzo.
13. Ngei tinodikana kudziirira ndangariro dzedu? (Onaiwo mafoto.)
13 Isusu tinodawo kucengetedza marangariro edu. (Eki. 20:17) Amweni anorangarira kuti azvizi kushata kugara no murangariro we kuita zviro zvakashata, asi cinokosha ndi munhuwo kutama kuita zviro zvakashata. Asi mushobo uu we kurangarira uno ngozi. Kana munhu akagara ecirangarira kuti ecirangarira kuti zvaizodini kuita ciro cakashata, zvezvirokwazvo munhu iyena waizotunhudzira cido cake ce kuda kuita zviro zvakashata. Nge mushobo umweni, munhu uu uri kuzvibarira muedzo waanozodikana kuti ashingirire. Zvezvirokwazvo, nguwa dzimweni mu ndangariro medu mungauya marangariro akashata. Asi catinodikana kuita ngece kutobvisa ciriporipoco uye totsiya no ndangariro dzakanaka. Kana tikaita izvona, zvinoita kuti marangariro akashata asatunhudzirike uye tisagare no cido cakakura ce kuita zviro zvakashata, zvekuti zvingazotishuphira kurhwisana nazvo.—Afi. 4:8; Ako. 3:2; Tig. 1:13-15.
Tinodikana kungwarira pa ciro cipi haco cingatiitisa kuti tipinde pa muedzo (Onai ndima 13)
14. Cinyizve cingatibetsera kuti tisaite citema?
14 Tinodikana kuiteizve kuti tidzidziirire pa muedzo we kutama kuita citema? Isusu tinodikana kugara no cokwadi cokuti kuteerera mitemo ya Djehovha nguwa dzese, zvakatinakira. Zvingaita kuti nguwa dzimweni zvitishuphire kuita kuti ndangariro dzedu uye zvido zvedu zvienderane no zvinodiwa na Djehovha. Asi kana isusu tikapeta masimba kuita izvona, ticagara no ndangariro yakacena uye kupeta kedu masimba kucabetsera.
15. Ngei zvakanaka kusakurira zvido zvakanaka kuti tisaite citema?
15 Isusu tinodikana kusakurira zvido zvakanaka. Kana isusu tikafundira ‘kuzonda zvakashata uye toda zvakanaka,’ tinonga tecibambisa cido cedu ce kuita zvakanaka uye tecidzidziirira pa miitiro inotiita kuti tiite zvakashata. (Amo. 5:15) Zvido zvakanaka zvinotibetserawo kuti tirumbwe takaima paya patinobatana no muedzo watisikakariri.
16. Mabasa e kumwiya angatibetsera kudini kuti tirumbwe takarinda? (Onaiwo mafoto.)
16 Tingasakurira kudini zvido zvakanaka? Tingaita izvona nge kurumbwa takabatikana pa zviro zve kunamata. Kana isusu tikapinda musangano uye tobuda mu basa re kuparidzira, tinonga tecibambisa cido cedu ce kupfadza Djehovha, uye tinonga tisikaedzwi kuti tiite zviro zvakashata. (Mat. 28:19, 20; Aheb. 10:24, 25) Kana isusu tikaerenga, tofunda Bhaibheri uye tonyasa kuzvirangarira, tinobambisa rudo redu ku zviro zvakanaka uye kuzonda zviro zvakashata. (Djs. 1:8; Pis. 1:2, 3; 119:97, 101) Edzurirai zvakabhuiwa na Djesu ku afundi ake. Iyena akati: “Rumbwai mecinamata kuti musawire pa muedzo.” (Mat. 26:41) Kana tikapedza nguwa teciita munamato kuna Baba edu e kudenga, tinonga tecipasa mukana Djehovha kuti atibetsere pa cido ce kumupfadza.—Tig. 4:8.
Urongwa wakanaka we zve kunamata ucatibetsera kuti tikunde muedzo (Onai ndima 16) c
RUMBWAI MAKARINDA
17. Kuremba kupi kakarumbwa kuri cinetso kuna Pedru?
17 Izvirokwazvo kuti tingakwanisa kubvisa zvacose maitiro amweni asikazi kunaka. Asi pamweni tinotodikana kurumbwa tecirhwisana no kutama kuremba kumweni ke nguwa yakareba. Onai zvakaitika no muphostori Pedru. Iyena paakaramba Djesu katatu kese, wakapangidza kuti wainga ecithya anhu. (Mat. 26:69-75) Asi nokuhamba ke nguwa, iyena wakapangidza ushingi paakapasa upupuri pamberi pe Sinedriyo, zvecipangidza hingana kuti iyena wainga akunda kuthya munhu. (Zvii. 5:27-29) Asi makore manganani akazoteera, Pedru wakaima kurhya no Akristu ekuti ainga asiripi Adjudha “ngo kuthya aya akaizwa ucekeri.” (Aga. 2:11, 12) Pedru wakahwirirazve kuthya anhu. Zvingaita kuti Pedru aazi kusiya zvacose kuremba kake.
18. Kana isusu tino patakarembera, cinyi cingaitika?
18 Zviro zvakaita hingana izvi zvingaitikawo katiri. Nge mushobo upi? Pamweni pano patakarembera uye torangarira kuti takurira dambudzikoro. Ngo muezaniso, hama imweni yakati: “Ke makore anokwana kuita 10 ndainga ndisikacaonizve pornografiya uye ndainga ndino rugondo rokuti ndainga ndisisinazve cinetso ici. Asi cinetso ici cainga ciciripo, cecietsera mukana kuti citangezve.” Zvinopfadza nge zvekuti hama ii aizi kuremba. Iyona yakaona kuti zvainga zvecikosha kurumbwa yecirhwisana no cinetso ici zuwa no zuwa, pamweni kuenda no kuenda mu mugariro uno we zviro. No rubetso ro mukadzi wayo uye no akuru e ungano, iri kukwanisa kungwarira uye kugara kure no pornografiya.
19. Zvinyi zvatingaita kana tino cinetso catisati takwanisa kukunda?
19 Kana pano cinetso cimweni catiri kukonerhwa kusiya, cinyi catinodikana kuita kuti tisaite citema? Tinodikana kuteerera nhungamiriro ya Djesu, yekuti: “Rumbwai makarinda.” Kunyazi makabamba, tizai migariro ingamukandai pa ngozi. (1 Ako. 10:12) Edzurirai zvamakamboita kuti mukunde miedzo uye rumbwai meciita izvona. Zvierengo 28:14 inoti: “Anopfara munhu anorumbwa akarinda.”—2 Ped. 3:14.
MUBAIRO WE KURUMBWA TAKARINDA
20-21. (a) Makomborero api atingaona kana tikarumbwa takarinda pa muedzo? (b) Kana tikaita dii redu, Djehovha acatibetsera kudini? (2 Akorinti 4:7)
20 Tingagara no rugondo rokuti kupeta masimba kedu kuti tisawire pa muedzo we kuita citema, kunokosha maningi. Kunyazi kuita citema keciunza “mupfaro we nguwa doko,” tinoziya kuti mupfaro we zvirokwazvo unobva pa kuseenzera Djehovha. (Aheb. 11:25; Pis. 19:8) Izvi zvinoitika ngokuti Djehovha akatisika kuti titeerere nhungamiriro dzake. (Gen. 1:27) Nge mushobo uu, isusu tingagara no hana yakacena uye no mupfaro we kumuseenzera nokusikaperi.—1 Ti. 6:12; 2 Ti. 1:3; Djud. 20, 21.
21 Izvirokwazvo kuti, “nyama yakaremba.” Asi azvidi kureya kuti atidikani kuita ciro ngezve kuremba kedu. Djehovha akagadzirira kutipasa simba ratinoda. (Erengai 2 Akorinti 4:7.) Asi edzurirai kuti Djehovha anopasa simba rakakura rinodarika riya ratinaro. Zvecida kureya kuti kupeta masimba katinodikana kuita mazuwa ese kuti tikunde miedzo zvinotsamira katiri. Kana isusu tikaita dii redu, tingagara no rugondo rekuti Djehovha acadaira minamato yedu kuti tirhwisane no patakarembera. (1 Ako. 10:13) Honde, no rubetso ra Djehovha, ticarumbwa takarinda uye kukunda miedzo.
NGOMA 47 Namatai kuna Djehovha Mazuwa Ese
a NYASAI KUZWISISA: Soko rokuti “mwiya” riri pana Mateu 26:41 rinoreya simba rinobva mu mwoyo we kuezanisira we munhu uye rinomuitisa kuti arekete no kuita zviro nge mushobo umweni. “Nyama” inoimirira mugariro wedu hinga anhu asikazi kukwana uye ano zvitema. Ngokudaro, pamweni isusu tingatoda kuita zviro zvakanaka, asi kana tikatama kungwarira, tingawira pa muedzo we kuita zviro zviya zvinorekethwa no Bhaibheri kuti zvakashata.
b Uya aita citema cakakura ungagumira rubetso mu bhuku ra Pfadzwai ne Upenyu Nokusikaperi!, fundo 57 ndima 1-3 uye mu fundo yakazwi: “‘Onai Ramangwana’ Riri Mberi” mu Murindiri wa Novembro wa 2020, mapaji. 27-29, mandi. 12-17.
c KUPANGANIDZWA KE MIFANIKISO PA: Hama yecierenga tsamba ye zuwa ce macibesi, inoerenga Bhaibheri pa nguwa ye kusvusvura, uye inopinda musangano we pakati pe sumana ce madekoni.
