1-2. Zadhoki wainga ari ani? (1 Makoronika 12:22, 26-28)

 RANGARIDZAI ciitiko cinoteera. Cikwata ce anarume anokwana 340 000 cakabatana pamwepo na Dhavhidhi paakagara mambo we dzinza re Aisraeri. Cikwata ici cakagara mazuwa matatu ciri mu matunhu dhuze no Hebroni. Awona ainga akapfara maningi, ecicedza, eciseka uye eciemba ngoma dze kukudza Djehovha. (1 Mak. 12:39) Mukati me cikwata ici cakakura, mainga muno djaha rinozwi Zadhoki. Asi Djehovha akaita kuti isusu tiziye kuti Zadhoki wainga ari mucikwatemo. (Erengai 1 Makoronika 12:22, 26-28.) Asi Zadhoki wainga ari ani?

² Zadhoki wainga ari mupristi waiseenza pamwepo no Mupristi Mukuru Abhiatari. Djehovha akapasa Zadhoki uzii uye ungwaru wakawanda kuti azwisise kuda kake. (2 Sam. 15:27) Anhu paaida mazano e ungwaru, awona aibvunzisa Zadhoki. Asi iyena waingawo ari mwanarume wakashinga. Mu fundo ino, ticafunda ngezve wara ra Zadhoki, ushingi.

 3. (a) Ngei tinodikana kugara no ushingi? (b) Ticafundei mu fundo ino?

³ Mu mazuwa ano ekupedzesera, Sathani uri kuita zvese zvaanokwanisa kuti arhwise aseenzi a Djehovha. (1 Ped. 5:8) Patinonga tecietsera Djehovha kuti atsakatise Sathani no nyika ino yakashata, isusu tinodikana kugara anhu akashinga. (Pis. 31:24) Zvino, ngationei mishobo mitatu yatingateedzera nayo ushingi wa Zadhoki.

TSIGIRAI UMAMBO WA MWARI

 4. Ngei anhu a Djehovha anodikana kugara no ushingi kuti atsigire Umambo wa Mwari? (Onaiwo foto.)

⁴ Hinga aseenzi a Djehovha, isusu tinotsigira Umambo wa Mwari no mwoyo wese. Asi kakawanda kakhona, tinodikana kugara no ushingi kuti tiite izvona. (Mat. 6:33) Ngo muezaniso, mu nyika ino yakashata isusu tinodikana kugara no ushingi kuti tizwire Djehovha uye tiparidzire masoko akanaka e Umambo.  (1 Ate. 2:2) Uyewo tinodawo ushingi kuti tirumbwe tisina dii ratinotsigira mu nyika ino iri kurumbwa yakaparadzana mune zvematongerhwe e nyika. (Juau 18:36) Aseenzi akawanda a Djehovha akaruza zviro zvawo, akatambudzwa uye akatosungwa nge kutama kupindira mune zvematongerhwe e nyika uye mu hondo.

 5. Ngei Zadhoki waidikana kugara no ushingi kuti atsigire Dhavhidhi?

⁵ Zadhoki aazi kuenda basi ku Hebroni kuti aoneke pa mutambo wakaizwa pa nguwa yekuti Dhavhidhi wakagara mambo. Iyena wakaenda ku Hebroni uye wainga wakagadzirira kurhwisa. (1 Mak. 12:38) Iyena wainga akagadzirira kutsigira Dhavhidhi kuti adziirire Aisraeri ku azondi awo. Pamweni Zadhoki wainga asiripi musurudado uno esperiensiya yakawanda, asi iyena wainga wakashinga.

 6. Dhavhidhi wakagara kudini muezaniso wakanaka we ushingi kuna Zadhoki? (Pisarema 138:3)

⁶ Zadhoki wakafundira kudini kugara no ushingi? Iyena wakararama no anarume akabamba uye ainga ano ushingi. Apana mubvunzo kuti iyena wakafundira no muezaniso wawo. Ngo muezaniso, Dhavhidhi ‘wainga ari mutungamiriri uye musurudado ano ushingi,’ ndiyo ndaa Aisraeri ese akamutsigira kuti agare mambo. (1 Mak. 11:1, 2) Dhavhidhi nguwa dzese akagonda na Djehovha kuti arhwisane no azondi ake. (Pis. 28:7; erengai Pisarema 138:3.) Asi Zadhoki wainga ano miezaniso imweni kuti ateedzere—anarume akaita hinga Djeoyadha uye mwana wake Bhenaya ainga ari masurudado kutobatanidzawo no atungamiriri 22 akatsigira Dhavhidhi. (1 Mak. 11:22-25; 12:26-28) Dhavhidhi wakagara mambo nge ndaa ye rubetso rakakura re anarume aya uye awona akaita zviri zvese kuti abudurire.

 7. (a) Miezaniso ipi ye mazuwa ano inotibetsera kuti tigare no ushingi? (b) Hinga zvapanganidzwa mu vhidhiyo Mafundei no muezaniso wa Hama Nsilu?

⁷ Isusu tingagarawo no ushingi kana tikafunda ngezve miezaniso ye aseenzi amweni a Djehovha ainga ano ushingi uye akatsigira  Umambo akagondeka. Mambo wedu, Djesu Kristu, akaramba kuita dii re zvematongerhwe e nyika ya Sathani. (Mat. 4:8-11; Juau 6:14, 15) Iyena nguwa dzese akagonda Djehovha kuti agare no ushingi uye simba rinodiwa kuti aite zviya zvainga zvakanaka. Uye mazuwa ano, isusu tino miezaniso ye anarume uye madjaha akaramba basa re kuenda ku hondo kana kuti mabasa e zvematongerhwe e nyika. Zvakadini kuerenga ngezve maesperiensiya e madjaha aya mu saiti ye jw.org? a

BETSERAI HAMA DZENYU

 8. Migariro ipi yekuti akuru pamweni anodikana kugara no ushingi kuti abetsere hama no hanzvadzi?

⁸ Isusu hinga anhu a Djehovha tinoda maningi kubetsera amweni. (2 Ako. 8:4) Asi nguwa dzimweni, kuti tiite izvona tinodikana kugara no ushingi. Ngo muezaniso, pa nguwa ye hondo akuru anodikana kubambisa hama dze mu ungano, eciapasa rubetso pa nyaya ye kumwiya, uye pamweni paya pa nyaya ye zvinodiwa zvawo zve kunyama. Akuru anoda maningi mabira a Djehovha, ndiyo ndaa, awona akagadzirira kubatana no ngozi ipi hayo kuti abetsere hama pa zviya zvaanoda. (Juau 15:12, 13) Akuru paanoita izvona, tingabhuya kuti awona ari kuteedzera muezaniso wa Zadhoki.

 9. Maererano na 2 Samueri 15:27-29, Dhavhidhi wakakumbira kuti Zadhoki aitei? (Onaiwo mufanikiso.)

⁹ Upenyu wa Dhavhidhi wainga uri pa ngozi, mwana wake Absaromi waida kumuuraya kuti agare mambo. (2 Sam. 15:12, 13) Dhavhidhi waidikana kutiza mu Djerusarema nokukasika! Iyena wakati ku aseenzi ake: “Mukai titize, ngekuti tese tingauraiwa na Absaromi!” (2 Sam. 15:14) Aseenzi ake paaitiza, Dhavhidhi wakaona kuti paidikana kusara munhu ku Djerusarema kuti aziye zviya zvaiizwa na Absaromi uye abvunze Dhavhidhi. Ndiyo ndaa, iyena wakatuma Zadhoki no apristi amweni ku thaundi kuti akwanise kumupasa masoko. (Erengai 2 Samueri 15:27-29.) Asi awona aidikana kungwarira maningi ngokuti zvaakakumbirhwa na Dhavhidhi  zvaiakanda pa ngozi. Rangaridzai ngezva Absaromi, mwanarume wairangarira zvakamunakira basi, uno bvinga, uye mucengedzi, zvaaizoita na Zadhoki pamwepo no apristi kudai akaziya kuti awona ainga ari anhu aiuya kuzotora masoko uye aidziirira Dhavhidhi!

10. Zadhoki no amweni akadziirira kudini Dhavhidhi?

¹⁰ Dhavhidhi wainga ano zano, asi kuti zano irona ribudirire, iyena waida rubetso ra Zadhoki uye no shamwari imweni yakatendeka, Uzai. (2 Sam. 15:32-37) Uzai wakanyepedzera kuti waibetsera Absaromi uye wakapasa zano ngezve mushobo waizorhwisa Dhavhidhi, asi izvona zvezvirokwazvo zvaizopasa Dhavhidhi nguwa kuti agadzirire pa kurhwisana. Absaromi paakasanangura kuteerera zano ra Uzai, Uzai wakabvunza Zadhoki uye Abhiyatari zano riya rinocokuita no kurhwisa Dhavhidhi. (2 Sam. 17:8-16) Pedzepo awona akakwanisa kutumira masoko kuna Dhavhidhi, ecimupanganidzira zviya zvaizoizwa na Absaromi. (2 Sam. 17:17) No rubetso ra Djehovha, Zadhoki no apristi amweni akakwanisa kudziirira upenyu wa Dhavhidhi.—2 Sam. 17:21, 22.

11. Tingateedzera kudini ushingi wa Zadhoki pa kubetsera hama dzedu?

¹¹ Kana hama dze mu ungano medu dzikabatana no migariro inonga iri pa ngozi uye dzikada rubetso redu, tingateedzera kudini muezaniso wa Zadhoki nge kugara no ushingi? (1) Teererai nhungamiriro. Pa migariro ino ngozi, zvinokosha kugara takabatana uyewo zvinokosha kuteerera nhungamiriro inobva ku Bheteri. (Aheb. 13:17) Akuru anodikana kuedzurira nguwa dzese nhungamiriro dze sangano nge zvekuti angagara akagadzirira kudini tsaona dzinoitika dzoga. (1 Ako. 14:33, 40) (2) Garai makashinga, asi makangwarira. (Zvie. 22:3) Nyasai kurangarira musati maita ciro. Musadzikande pa ngozi musina cikonzero cakakwana. (3) Gondai na Djehovha. Edzurirai kuti Djehovha anoda zvakamunakirai uye zvakanakirawo hama dzenyu. Djehovha angamubetserai kuti imwimwi mubetsere hama makacengeteka.

12-13. Imwimwi mafundei no esperiensiya ya Viktor na Vitalii? (Onaiwo foto.)

 ¹² Onai muezaniso we hama mbiri dzinozwi Viktor na Vitalii. Idzona dzakabetsera pa kukoanisa zvokurhya uye mvura ku hama dzo ku Ucrânia. Viktor unoti: “Isusu taipsvaka zvokurhya ku mbuto dzese uye pataihamba kakawanda kakhona taizwa kurira ke pfuti. Hama imweni yainga ino roja yakakura yakadzipira pa kupasa zvokurhya. Zvokurhya zvayakapasa zvakabetsera hama dzakawanda kuti dzikwanise kupona ke kacinguwa. Patainga tecithwara no karu yedu zvokurhya zvatainga tapaswa, bhomba rakambwera padhuze no patainga tiri pa mukuwo unokwana mametru 20. Pa zuwa irona, inini ndaideketerera Djehovha ndecikumbira kuti andipase ushingi kuitira kuti ndikwanise kurumbwa ndecibetsera hama dzangu.”

¹³ Vitalii unoti: “Paidikana ushingi wakakura. Rhwendo rekutanga rakapedza nguwa inokwana 12. Inini ndaiita munamato kuna Djehovha nguwa dzese.” Vitalii wakapangidza ushingi, asi iyena wakaitawo zviro ecingwarira. Iyena unoti: “Inini ndakakumbira Djehovha kuti andipase ungwaru uye kuti ndigare no maonero ari pakati no pakati. Inini ndaihamba no karu mu makwanza aya basi aitenderhwa no anyautongi. Kutenda kangu kakanyasa kubamba pandakaona mushobo waiseenza hama dziri pamwepo. Idzona dzakabetsera kubvisa zviya zvaipingaidza mu gwanza, dzakaunganidza no kuunzisa macira no zvokurhya uye dzakabetsera kuzvikwidza mu karu, uye dzakatipasa zvokurhya no pokugara pa nguwa yataiita rhwendo.”

RUMBWAI MAKAGONDEKA KUNA DJEHOVHA

14. Tinozwa kudini kana munhu watinoda akasiya Djehovha?

¹⁴ Umwe we muedzo unoshupha maningi kushingirira nge wekuti kana umwe we mu mhuri medu kana kuti shamwari yatinoda maningi ikasiya Djehovha. (Pis. 78:40; Zvie. 24:10) Rudo redu rikakura ku anhu, zvinozotishuphira kushingirira mugariro uwona. Kana imwimwi muri kubatana no esperiensiya yakadai, muezaniso wa Zadhoki we kugondeka ungakwanisa kumubambisai.

15. Ngei Zadhoki waida ushingi kuti arumbwe akagondeka kuna Djehovha? (1 Madzimambo 1:5-8)

¹⁵ Zadhoki wakarumbwa akagondeka kuna Djehovha kunyazi shamwari yake Abhiyatari payakasanangura kusama kugondeka. Izvona zvakaitika padhuze no mugumo we utongi wa Dhavhidhi. Dhavhidhi paainga aadhuze kuda kufa, mwana wake Adhoniya wakaedza kuda kuzogara mambo waizoteera kunyazi Djehovha ainga agondesa umambo kuna Soromoni. (1 Mak. 22:9, 10) Abhiyatari wakasanangura kutsigira Adhoniya. (Erengai 1 Madzimambo 1:5-8.) Ngo kuita kudaro, Abhiyatari wakapangidza kutama kugondeka haiwa basi kuna Dhavhidhi, asiwo kuna Djehovha! Imwimwi munokwanisa kurangarira kuti Zadhoki wakarhwadziwa zvakadini uye kunetseka? Awona ainga akaseenza ese ke makore anodarika 40 hinga apristi. (2 Sam. 8:17) Awona ainga akambothwara ese “Arka ya Mwari we zvirokwazvo.” (2 Sam. 15:29) Awona ari airi, akatsigira Dhavhidhi hinga mambo uye akaita zviro zvakawanda mu basa ra Djehovha.—2 Sam. 19:11-14.

16. Cinyi cekuti pamweni cakabetsera Zadhoki kuti arumbwe akagondeka?

¹⁶ Zadhoki wakarumbwa akagondeka kuna Djehovha kunyazi Abhiyatari wakasanangura kusama kugondeka kuna Djehovha uye wakacengedzera Dhavhidhi. Dhavhidhi waiziya kuti nguwa dzese waizokwanisa kugonda Zadhoki. Paakaziya kucengedzera ka Adhoniya, Dhavhidhi wakasanangura Zadhoki, Natani, uye Bhenaya kuti adzodze Soromoni hinga mambo. (1 Mad. 1:32-34) Apana mubvunzo kuti Zadhoki  wakabambiswa maningi no muezaniso wa Natani uye no we aseenzi amweni a Djehovha akarumbwa akagondeka uye akabetsera Mambo Dhavhidhi. (1 Mad. 1:38, 39) Soromoni paakagara mambo, iyena “wakagadza Zadhoki kuti agare mupristi pa mbuto ya Abhiyatari.”—1 Mad. 2:35.

17. Imwimwi mungateedzera kudini Zadhoki kana munhu wamunoda akasiya Djehovha?

¹⁷ Imwimwi mungateedzera kudini Zadhoki? Kana munhu wamunoda akasanangura kusiya Djehovha, pangidzai kuna Djehovha kuti imwimwi makasanangura kurumbwa makagondeka kaari. (Djs. 24:15) Djehovha acamupasai ushingi unodiikanwa kuti murumbwe meciita zvinodiwa. Namatai kuna Djehovha uye rumbwai muri shamwari yo aya akagondeka kuna Mwari wedu. Djehovha anokoshesa maningi kugondeka kedu, uye acatikomborera nge ndaa yazvo.—2 Sam. 22:26.

18. Mafundei no esperiensiya ya Marco uye Sidse?

¹⁸ Onai zvakaitika na Marco uye no mukadzi wake, Sidse. Ana ake airi ainga akura, akasanangura kusiya cokwadi. Marco unoti: “Kubvira zuwa rekuti ana anobarhwa, imwimwi munozwa rudo rakakura kaari. Imwimwi maizoita zviri zvese kuti muadziirire pa ngozi ipi hayo. Ndiyo ndaa, awona paanosanangura kusiya Djehovha, izvona zvinorhwadza maningi mu mwoyo.” Iyena unoenderera eciti: “Asi Djehovha nguwa dzese anotibetsera kuti tishingirire. Inini pandinonga ndakaremba, mukadzi wangu unonga akabamba, uye iyena paanonga akaremba, inini ndinonga ndecizwa ndakabamba.” Sidse unoti: “Isusu tainga tisikazokwanisi kushingirira mugariro uwona kudai Djehovha asikazi kutipasa simba. Inini ndakatsukwara maningi uye ndairangarira kuti ana edu ainga asiya cokwadi nge ndaa yangu. Inini ndakapanganidzira Djehovha izvona nge munamato. Paapadarika cinguwa, hanzvadzi imweni yandainga ndaano makore akawanda ndisikaonani nayo yakauya kuzocedza na inini, yakandibata pa phewa rangu, yoringisa mu madziso angu, uye yakati: ‘Edzurira izvi Sidse, zvakaitika andaapi yako!’ No rubetso ra Djehovha, ndiri kurumbwa ndino mupfaro ndecimuseenzera.”

19. Mashinga kuitei?

¹⁹ Djehovha anoda kuti anamati ake ese agare no ushingi hingana zvakaizwa na Zadhoki. (2 Ti. 1:7) Asi Djehovha aadi kuti isusu tigonde simba redu pacedu. Pane kudaro, iyena anoda kuti ususu tigonde simba raanotipasa. Asi kana imwimwi mukabatana no mugariro unoda kuti mupangidze ushingi, kumbirai rubetso ra Djehovha. Imwimwi mungagara no rugondo rokuti iyena acaita kuti mugare no ushingi hinga Zadhoki!—1 Ped. 5:10.