MUSORO WE KUFUNDA 30
NGOMA 36 Tinongwarira Mwoyo Yedu
Tinofundei no Miezaniso ye Madzimambo e Israeri
“Imwimwi mucaona musiyano uripo pakati pe munhu munatsi no munhu wakashata, pe munhu unoseenzera Mwari no uya usikamuseenzeri.”—MARA. 3:18.
CINANGWA
Kuzwisisa maonero aiita Djehovha madzimambo e ku Israeri uye kuti Djehovha anoetserei ku anamati ake e mazuwa ano.
1-2. Bhaibheri rinobhuyei ngezve Madzimambo manganani e Israeri?
BHAIBHERI rinoreketa mazina e anarume anodarika 40 akatonga hinga madzimba ku Israeri. a Bhaibheri parinoreketa ngezve anarume aya irona rakatendeka uye rinoreketa zviro zvinoshamisa ngezve anganani awo. Ngo muezaniso, kunyazi madzimbambo akanaka akaitawo zviro zvakashata. Ndizvona zvakaitika na Mambo Dhavhidhi. Djehovha akati: “Museenzi wangu Dhavhidhi . . . wakanditeera no mwoyo wake wese, eciita zviro zvakanaka basi pamberi pangu.” (1 Mad. 14:8) Asi edzurirai kuti Dhavhidhi wakaita uhure no mwanakadzi wakawakwa uye wakaita kuti mwamuna wake auraiwe pa hondo.—2 Sam. 11:4, 14, 15.
2 Nge dii rimweni, Madzimambo akawanda asikazi kutendeka akaitawo zviro zvinganani zvakanaka. Onai muezaniso wa Robhoamu. Mu maonero a Djehovha, iyena “wakaita zviro zvakashata.” (2 Mak. 12:14) Kunyazi zvakadaro, Robhoamu wakatondowedza nhungamiriro ya Djehovha ye kutama kurhwisana no madzinza gumi e Israeri uye kuasiya kuti asanangure mambo umweni. Iyena wakaitawo kuti mathaundi akawanda agare akacengeteka kuti adziirire anhu a Mwari ku azondi awo.—1 Mad. 12:21-24; 2 Mak. 11:5-12.
3. Mubvunzo upi watingagara nawo, uye ticaonei mu fundo ino?
3 Patinoerenga ngezve ngano ye madzimambo e Israeri, tingagara no mubvunzo wakaita hingana uu: Sezvo madzimambo aiita zviro zvakanaka no zvakashata, Djehovha aiona kudini kuti mambo wainga akatendeka kana kuti haiwa mukuona Kake? Mhinduro we mubvunzo uu ungatibetsera kuona zvinodikana kuizwa no umwe na umwe wedu kuti tipfadze Djehovha. Mu fundo ino, ticaona zviro zvitatu zvekuti pamweni Djehovha akazviseenzesa pakuongorora madzimambo e Israeri: Zvainga zviri mu mwoyo mawo, kucinyuka kawo, uye kuti awona ainamata Djehovha ngo mushobo wakanaka here.
KUDA DJEHOVHA NO MWOYO WESE
4. Musiyano upi wainga uripo pakati pe madzimambo akatendeka no asikazi kutendeka?
4 Madzimambo akapfadza Djehovha akamunamata no mwoyo wese. b Mambo Djeosafati, uu wainga ari Mambo wakanaka “wakapsvaka Djehovha no mwoyo wese.” (2 Mak. 22:9) Parinoreketa ngezva Djosiya, Bhaibheri rinoti: “Apana mambo wakamutangira wainga akaezana naye wakahwirira kuna Djehovha no mwoyo wake wese.” (2 Mad. 23:25) Asi ngezva Soromoni wakaita zviro zvakashata paainga oda kufa, Bhaibheri rinoti: “Mwoyo wake wainga usikazi kuperera.” (1 Mad. 11:4) Uye ngezva Abhiramu, mambo umweni wainga asikazi kutendeka, Bhaibheri rinobhuyawo kuti: “Mwoyo wake wainga usikazi kuperera kuna Djehovha.”—1 Mad. 15:3.
5. Zvinoreyei kuseenzera Djehovha no mwoyo wakaperera?
5 Hino zvinoda kureyei kuseenzera Djehovha no mwoyo wakaperera? Munhu unoseenzera Djehovha no mwoyo wese aaiti izvona ngekubambidzirhwa. Pane kudaro, iyena unoseenzera Djehovha ngekuti unomuda uye unomureremedza maningi. Uye iyena unorumbwa ano mazwiro awona akabamba ke upenyu wake wese.
6. Tingarumbwa kudini tino mwoyo wakaperera? (Zvierengo 4:23; Mateu 5:29, 30)
6 Tingateedzera kudini madzimambo e Israeri uye kuseenzera Djehovha no mwoyo wakaperera? Atidikani kushamwaridzana no anhu anoita zvakashata, kana kuita ciro cipi haco cingarembesa rudo redu kuna Djehovha. Ngo muezaniso, tinodikana kungwarira zviro zvatinoona kana zvatinoita patinonga tecizorora. Tinodikanawo kungwarira shamwari dzatinosanangura kutamba nadzo uye kutanga kurangarira kuti mare uye upfumi ndizvo zviro zvinonyanya kukosha mu upenyu. Kana tikaona kuti ciro cipi haco caakutangisa kuthurudza rudo redu kuna Djehovha, tinodikana kuita ciito nokukasika.—Erengai Zvierengo 4:23; Mateu 5:29, 30.
7. Ngei zvecikosha kudzidziirira pa zviro zvinotipfuridzira kuita zvakashata?
7 Isusu atidikani kugara no mwoyo miiri. Kana tikatama kungwarira, tingadzicengedzera ngekurangarira teciti ngekuti tirikuita zviro zvakawanda zve ku mwiya, zviro zvakashata azvingakwanisi kutikuwadza. Rangarirai ngezve muezaniso unoteera. Rangaridzai riri zuwa rekuti kuri kuita dutu rakakura. Imwimwi munopukuta nokucenesa mumba menyu. Asi zvaizobetsera here kuita izvona uye mosiya musuwo wakafunukunga? Haiwa, ngekuti bukuta raizodzara mumba menyu. Tinofundei no muezaniso uu? Mu zviro zvinocokuita nokunamata, tinodikana kuita zvakawanda kudarika kurhya zvekurhya zve ku mwiya kuti tirumbwe tino ushamwari wedu na Djehovha. Nge masoko amweni, isusu tinodikanawo kufunga musuwo kuti tisapfuridzirhwe nge maitiro akashata. Ngekudaro, “mwiya” uno bukuta we nyika ino uye maitiro asikatenderhwi na Djehovha aazopindi mu mwoyo medu.—Aef. 2:2.
TINODIKANA KUCINYUKA PA ZVITEMA ZVEDU
8-9. Mambo Dhavhidhi na Mambo Ezekiya akaitei paakaziya kuti Djehovha ainga asikazi kupfara nge zviro zvaakaita? (Onai pa kapa.)
8 Hinga zvataona, Mambo Dhavhidhi wakaita zvitema zvakakura. Asi muphorofita Natani paakareketa naye ngezve mazwiro a Djehovha, ecidzidodosa, Dhavhidhi wakacinyuka. (2 Sam. 12:13) Isusu tinokwanisa kuona kuti Dhavhidhi wakacinyukadi zvezvirokwazvo nge masoko aakareketa pana Pisarema 51. Dhavhidhi aazi kuita zvekunyepedzera kuti wainga acinyukadi kuti acengedzere Natani uye kuti asaphanicwe.—Pis. 51:3, 4, 17, masoko e pamusoro.
9 Mambo Ezekiya wakashaishirawo Djehovha. Bhaibheri rinoti: “Mwoyo wake wakadzikudza, zvoita kuti iyena, no Djudha pamwepo no Djerusarema atsamwirhwe.” (2 Mak. 32:25) Asi ngei Ezekiya wakagara munhu unodzikudza? Pamweni iyena wakatanga kudziona hinga munhu unokosha maningi nge ndaa ye upfumi wake, ngekunyisa kaakaita Asiriya kana kuti ngekuporeswa nhenda yake nge cishamiso. Uye pamweni kudzikudza ikona ndiko kakaita kuti atange kupangidza upfumi wake wese Abhabhironi. Nge ndaa yazvo, muphorofita Isaya wakamubvunza kuti Djehovha ainga akamunyangadzirhwa maningi. (2 Mad. 20:12-18) Asi hingana Dhavhidhi, ecidzidodosa Ezekiya wakacinyukawo. (2 Mak. 32:26) Ndiyo ndaa mu maonero a Djehovha, Ezekiya wainga ari mambo wakatendeka “waiita zvakanaka.”—2 Mad. 18:3.
Mambo Dhavhidhi na Mambo Ezekiya akacinyuka ecidzidodosa paakaziya kuti Djehovha akazwa kudini nge zvitema zvaakaita (Onai mandima 8-9)
10. Mambo Amaziya wakaitei paakasumururhwa?
10 Nge dii rimweni, Mambo Amaziya we Djudha wakaita zvakanaka “asi wainga asikazviiti no mwoyo wese.” (2 Mak. 25:2) Iyena wakaitei? Mumasure mekuti Djehovha amubetsera kurhwisana no Adhomita, Amaziya wakanamata madzimwari awo. c Uye muphorofita wa Djehovha paakareketa naye ngezve zviro zvaainga aiita, mambo aazi kumupurutana uye wakamudzingira.—2 Mak. 25:14-16.
11. Maererano na 2 Akorinti 7:9, 11, tinodikana kuitei kuti tirekererhwe na Djehovha? (Onaiwo mafoto.)
11 Tinofundei no miezaniso ii? Tinodikana kucinyuka pa zvishaishi zvedu uye toita zviri zvese kuti tisahwirire kuita zvishaishi zvimwezvo. Asi zvakadini kana akuru e mu ungano akatipasa zano, uye pamweni nge ndaa ye ciro cidokodoko? Atidi kurangarira kuti Djehovha aacatidi kana kuti akuru aacatipfariri. Kunyazi madzimambo e Israeri akatodikanawo kupaswa mazano uye kusumururhwa. (Aheb. 12:6) Patinosumururhwa tinodikana (1) kutendera tecidzidodosa, (2) kuita cinjo dzinodikanwa, uye (3) kurumbwa tecienderera mberi teciseenzera Djehovha no mwoyo wese. Patinocinyuka pa zvitema zvedu, Djehovha anotirekereradi zvezvirokwazvo.—Erengai 2 Akorinti 7:9, 11.
Isusu patinosumururhwa tinodikana (1) kutendera tecidzidodosa, (2) kuita cinjo dzinodikanwa, uye (3) kurumbwa tecienderera mberi teciseenzera Djehovha no mwoyo wese (Onai ndima 11) f
KUNAMATA DJEHOVHA NGE MUSHOBO WAKANAKA
12. Cinyi caiita kuti madzimambo akatendeka asiyane no madzimambo ainga asikazi kutendeka?
12 Madzimambo aioniwa ndi Djehovha hinga akatendeka, aimunamata nge mushobo waaida kuti amunamate. Uye awona aibetserawo anhu a Djehovha kuti aitewo zvimwezvo. Hinga zvataona, zviri pamhene kuti awona aishaishawo. Asi awona ainga akadzipira no mwoyo wese kuna Djehovha uye akatoseenza no simba kuti apedze kunamathwa ke zvidhori. d
13. Ngei Djehovha akaona Mambo Akabhi hinga munhu usikazi kutendeka?
13 Asi ngei Djehovha akaona madzimambo amweni hinga anhu asikazi kutendeka? Zviri pamhene kuti azviro zvesepi zvaakaita zvainga zvakashata. Kunyazi Mambo Akabhi wainga akashata maningi wakatopangidzawo kudzidodosa uye kucinyuka panocokuita no kuuraiwa ka Nabhoti. (1 Mad. 21:27-29) Iyena wakawaka mathaundi uye wakawinawo kuitira Aisraeri. (1 Mad. 20:21, 29; 22:39) Asi Akabhi wakaita ciro cakashata maningi nge ndaa ye kupfuridzirhwa ne mukadzi wake, iyena wakamutsidzira kunamathwa ke madzimwari e kunyepa uye zvidhori uye iyena aazi kumbocinyuka pakuita zviro izvi.—1 Mad. 21:25, 26.
14. (a) Ngei Djehovha akaona Mambo Robhoamu hinga munhu usikazi kutendeka? (b) Zviro zvipi zvakashata zvakaizwa no madzimambo akawanda asikazi kutendeka?
14 Onai muezaniso we mambo umweni usikazi kutendeka—Robhoamu. Hinga zvataona iyena wakaita zviro zvakawanda zvakanaka paaitonga. Asi zviro pazvaimuhambira zvakanaka uye ogara mambo uno simba, iyena wakasiya Mutemo wa Djehovha uye wakatanga kunamata madzimwari e kunyepa. (2 Mak. 12:1) Kubvira ipona iyena wainamata Djehovha uye nge dii rimweni ecinamata madzimwari e kunyepa. (1 Mad. 14:21-24) Robhoamu na Akabhi andiopi basi madzimambo akapauka pakunamata ke cokwadi. Zvezvirokwazvo, cinetso cainga cino madzimambo akawanda ainga asikazi kutendeka cainga ciri cekutsigira kunamata ke kunyepa. Zviri pamhene kuti mu maonero a Djehovha, kumunamata nge mushobo wakanaka cainga ciri ciro cinokosha kuti aone kuti mambo wainga akanaka here kana kuti haiwa.
15. Ngei kunamata ke cokwadi kunokosha maningi kuna Djehovha?
15 Ngei nyaya inocokuita no kunamata yaikosha maningi kuna Djehovha? Ngekuti madzimambo ndiwo ainga ano ubaba wekutungamirira anhu a Mwari pakunamata ke cokwadi. Kusiya izvona, kunamata ke kunyepa kaiita kuti munhu aite zvitema zvimweni zvakakura uye aite zviro zvisina unatsi. (Oze. 4:1, 2) Cimweni nge cekuti madzimambo uye no Aisraeri ese ainga ari anhu akatodzipira kuna Djehovha. Ndiyo ndaa Bhaibheri reciezanisa kunamata ke kunyepa nokuita upombwe. (Djer. 3:8, 9) Munhu paanoita upombwe unosiya kutendeka ku munhu waaidikana kunyanya kutendeka, zvingaita mwamuna kana mukadzi. Upombwe unorhwadzisa maningi munhu unonga wasiiwa. Ngo mushobo umwewo, museenzi wakadzipira kuna Djehovha paanobatanidzwa pakunamata ke kunyepa, iyena unonga ecitoitira Djehovha citema cakakura uye zvinoita kuti iyena arhwadziwe maningi. e—Dhe. 4:23, 24.
16. Mu maonero a Djehovha, musiyano upi uripo pakati pe munhu uno unatsi no wakashata?
16 Tinofundei? Zviri pamhene kuti tinodikana kushinga kutama kubatanidzwa pa ciro cipi haco cinocokuita no kunamata ke kunyepa. Asi tinodikanawo kurumbwa tecinamata Djehovha nge mushobo waanoda uye kurumbwa takabatikana pa basa rake. Muphorofita Marakiya wakanyasa kupanganidza ngezve musiyano uripo pakati pe munhu wakanaka no usikazi kunaka mu maonero a Djehovha. Iyena wakatara kuti: “Imwimwi mucaona musiyano uripo pakati pe munhu munatsi no munhu wakashata, munhu unoseenzera Mwari no uya usikamuseenzeri.” (Mara. 3:18) Nge kudaro, atidikani kutendera kuti ciro cipi haco, kana kuti zvishaishi zvedu zvitiodze mwoyo dakara pakusiya kuseenzera Mwari. Kusiya kuseenzera Djehovha i citema cakakura maningi.
17. Ngei mecidikana kungwarira pamunosanangura munhu we kuwakana naye?
17 Kana imwimwi musati mawaka kana kuwakwa uye muri kupsvaka munhu wekuwakana naye, muri kukwanisa kuona kuti masoko aya a Marakiya anobatana kudini no mucato? Munhu ungagara no mawara akawanda akanaka, asi kana iyena asikaseenzeri Mwari we zvirokwazvo, ungagara munhu wakanaka uye uno unatsi mu maonero a Djehovha here? (2 Ako. 6:14) Kana mukawakana no munhuwo, iyena ucamupfuridzira kuita zviro zvakanaka zvinocokuita no kunamata here? Rangarirai zvinoteera: Akadzi a Mambo Soromoni ainga asikaseenzeri Djehovha pamweni ainga ano mawara akanaka. Asi ngekuti ainga asikaseenzeri Djehovha, awona akaita kuti Soromoni atange kunamata madzimwari e kunyepa.—1 Mad. 11:1, 4.
18. Abereki anodikana kufundisei ana awo?
18 Abereki angaseenzesa ngano dze madzimambo e Israeri kuti abetsere ana awo kusakurira cido cakakura ce kuseenzera Djehovha. Betserai ana enyu kuona kuti mumaonero a Djehovha, kunaka ke munhu kana kuti haiwa kunotsamira pa mushobo waanomunamata. Pangidzai no masoko uye muezaniso wenyu kuti zviro zvinocokuita no kunamata zvakaita hingana kufunda Bhaibheri, kupinda misangano uye kubuda mu basa re kuparidzira i zviro zvinokosha maningi mu upenyu wedu. (Mat. 6:33) Kana mukatama kuita kudaro, ana enyu angatanga kunamata Djehovha haiwa ngekuda kawo, asi ngekuti i “gereja rinophindwa nge abereki awo.” Nge ndaa yazvo, awona angatanga kukanda kunamata ke cokwadi pa mbuto yecipiri kana kutoima kuseenzera Djehovha.
19. Kana munhu wakaima kuseenzera Djehovha, zvinoreya kuti iyena aacazombogarizve shamwari yake here? (Onai bhokisi rakazwi: “ Imwimwi Mungahwirira Kuna Djehovha!”)
19 Kana munhu wakasiya kuseenzera Djehovha, zvinoreya kuti iyena aacazombogarizve shamwari yake here? Zviri pamhene kuti haiwa. Iyena ungacinyuka uye wohwirirazve pa kunamata Djehovha ngo mushobo wakanaka. Kuti aite izvona, munhuwo pamweni unodikana kusiya kudzikudza uye wotendera rubetso re akuru e mu ungano. (Tig. 5:14) Asi zviri pamhene kuti kupeta masimba kupi hako kuti munhu ahwirire pa kutenderhwazve na Djehovha kunokosha maningi!
20. Djehovha acationa kudini kana tikateedzera muezaniso we madzimambo akatendeka e Israeri?
20 Mu cigwagwa, tinofundei no muezaniso we madzimambo e Israeri? Tingagara hinga madzimambo akatendeka e Israeri kana tikarumbwa takadzipira kuna Djehovha no mwoyo wese, tofunda no zvishaishi zvedu, tocinyuka uye toita cinjo dzinodikanwa. Uye nguwa dzese, toedzurira kukosha kazvinoita kuti tinamate Djehovha nge mushobo waanoda. Kana imwimwi mukarumbwa makatendeka kuna Djehovha ngo mushobo uu, iyena acamuona hinga munhu wakanaka mu maonero ake.
NGOMA 45 Kunyasa Kurangarira ke Mwoyo Wangu
a Masoko okuti “madzimambo e Israeri” anoda kureya madzimambo ese akatonga anhu a Djehovha, kutobatanidzawo madzinza mairi e Djudha uye madzinza gumi e Israeri, kana kuti madzinza ese 12.
b NYASAI KUZWISISA: Kakawanda kakhona Bhaibheri rinoseenzesa soko rekuti “mwoyo” recida kupanganidza zvakaita munhu nge cemukati. Izvona zvinobatanidza zvido zvake, marangariro ake, maitiro ake, zvikonzero zvinoita kuti iyena aite zviro uye zvinangwa zvaari kuda kudzadzisa.
c Kareko, zvinoita hingana kuti zvainga zvakadjairika kuti madzimambo atange kunamata madzimwari e nyika dzimweni dzaainga akapamba.
d Mambo Aza wakaita zvishaishi zvakakura maningi. (2 Mak. 16:7, 10) Kunyazi zvakadaro, Bhaibheri rinobhuya kuti Aza wakaita zvakanaka pamberi pa Djehovha. Kunyazi pakutanga iyena asikazi kutendera kusumururhwa, zvinoita hingana kuti nokuhamba ke nguwa iyena wakazocinyuka. Ngekudaro, Djehovha akaona zviro zvakawanda zvakanaka zvaakaita kudarika zvakashata. Cinonyanya kukosha nge cekuti Aza wakanamata Djehovha basi, uye wakapeta masimba kuti apedze kunamathwa ke zvidhori paaitonga.—1 Mad. 15:11-13; 2 Mak. 14:2-5.
e Zviri pamhene kuti kunamata i ciro cinokosha maningi kuna Djehovha ngekuti mitemo miiri yekutanga ye Mutemo wa Mozesi yairambidza kunamata munhu upi hake kana ciro kusiya Djehovha basi.—Eki. 20:1-6.
f KUPANGANIDZWA KE MUFANIKISO WE PA: Mukuru we cidjaha unocedza no hama imweni, ecipangidza kuti uri kunetseka nge kuwanda ke doro uye mazuwa aanopedza ecimwa. Hama iyona inotendera mupango yecidzidodosa, inoita cinjo dzinodikanwa uye inorumbwa yeciseenzera Djehovha yakatendeka.
