Mibvunzo Inobva ku Aerengi
“Mwanakadzi” unorekethwa pana Isaya 60:1 ndiani, uye “anomuka” osiya kuti “ciedza cake civheneke” nge mushobo upi?
Isaya 60:1 panoti: “Muka, Iwewe mwanakadzi, siya kuti ciedza cako civheneke, ngokuti ciedza cako cicauya. Rukudzo ra Djehovha riri kuvheneka pauri.” Masoko anobatanidzwepo anopangidza kuti “mwanakadzi” uu ndi Ziyoni, kana kuti Djerusarema, thaundi guru re pa nguwa iyona. a (Isa. 60:14; 62:1, 2) Djerusarema rinoimirira dzinza re Aisraeri. Hino, maererano no vherisikuro ii ticadaira mibvunzo miiri: Wokutanga, Djerusarema rakasiya kuti “ciedza” caro ce ku mwiya civheneke riini uye kudini? Wocipiri, masoko aya a Isaya aciri kudzadzika mazuwa edu ano here?
Djerusarema rakasiya kuti “ciedza” caro ce ku mwiya civheneke riini uye kudini? Ke makore anokwana 70 pa nguwa yekuti Adjudha ainga ari ku Bhabhironi, tempro mu Djerusarema yainga isikazi kugara zvakanaka. Asi mumasure mekuti Amedho no Apersiya anyisa Umambo we Bhabhironi, Aisraeri aizokwanisa kuhwirirazve ku nyika yawo, otangazve kunamata uye ohwirinza kunamata kakacena. (Esdra 1:1-4) Kutangisa mu gore ra 537 K.A.A., Adjudha anganani akatendeka ecibva ku madzinza 12 e Israeri akaita izvona. (Isa. 60:4) Awona akatangazve kupisira zvibairo kuna Djehovha, kupemberera mitambo yawo uyezve kugadzirisa tempro. (Esdra 3:1-4, 7-11; 6:16-22) Ngo mushobo uu, rukudzo ra Djehovha rakatangazve kuvhenekera Djerusarema kana kuti, rakatangazve kuvhenekera anhu ake. Uye mugumisiro wakhona, anhu a Djehovha akatanga kugara ciedza ku nyika dzese dzainga dzisikazii Djehovha.
Asi uphorofita uu wa Isaya, wakadzadzika ku Djerusarema padoko pawo. Aisraeri akawanda, aazi kurumbwa ecizwira Mwari. (Nee. 13:27; Mara. 1:6-8; 2:13, 14; Mat. 15:7-9) Mumakore akazoteera, anhu a Mwari akatoguma pa kuramba Mesiya, Djesu Kristu. (Mat. 27:1, 2) Mu gore ra 70 K.A., Djerusarema pamwepo no tempro yaro zvakatsakatiswa kociripi.
Djehovha ainga atobhuya kare kuti izvona zvaizoitika. (Dha. 9:24-27) Zviri pamhene kuti Djehovha paakaita uphorofita uri pana Isaya kapituro 60, iyena ainga asikaetseri kuti uwona unyase kudzadzika pa Djerusarema ro pasi pano.
Masoko aya a Isaya aciri kudzadzika mazuwa edu ano here? Honde, asi panobatanidzwa mwanakadzi umweni we kuezanisira—“Djerusarema re kumusoro.” Muphostori Pauro, wakabhuya kudai nge zvaro: “Irona ndirona mai edu.” (Aga. 4:26) Djerusarema re kumusoro, i dii re kudenga re sangano ra Djehovha rinoumbwa no zvisikwa zve kumwiya zvakagondeka. “Ana” e mwanakadzi uu we kumwiya anobatanidza Djesu Kristu pamwepo no Akristu akadzodzwa anokwana kuita 144 000, awo ano kariro ye kurarama kudenga kuitawo hingana Pauro. Akristu akadzodzwa anoumba “dzinza rakacena”—“Israeri ya Mwari.”—1 Ped. 2:9; Aga. 6:16.
Asi Djerusarema re kumusoro, “rinoima” kudini recisiya “ciedza caro cecivheneka”? Irona rinoita izvona reciseenzesa ana aro akadzodzwa pasi pano. Onai kuti uphorofita watinogumira pana Isaya 60 unoseenza kudini paari.
Akristu akadzodzwa nge gwanza re kuezanisira, awona aidikana “kumuka” ngokuti ainga ari mu cidima pa zviro zvinocokuita no zvekunamata, fundiso dze kunyepa padzakabararika mumasure me kufa ke muphostori we kupedzesera. (Mat. 13:37-43) Pa nguwa iyona, awona ainga ari pasi pe Bhabhironi Guru, iro rinoimirira magereja ese e kunyepa. Akadzodzwa aya, akarumbwa akaita hingana asungwa dakara pa “kupera ko nyika” ino, kakatanga mu gore ra 1914. (Mat. 13:39, 40) Mumasure mazvo, mu gore ra 1919, Akristu aya akasudzunurhwa uye akatanga kuita kuti ciedza cawo civheneke nge kuparidzisa masoko akanaka e Umambo. b No kuhamba ke makore, anhu e madzinza ese akakweiwa no ciedza ici, kutobatanidzawo no “madzimambo” anorekethwa pana Isaya 60:3, kana kuti akadzodzwa amweni akatanga kugara dii re Umambo wa Mwari.—Zvak. 5:9, 10.
Mu nguwa ye mberi, Akristu akadzodzwa acasiya kuti ciedza cawo civheneke nge mushobo unoshamisa. Acazviita kudini? Paacandomutswa basi kuti ararame upenyu wawo we kudenga, awona anogara dii re “Djerusarema Ripsva,” kana kuti mwanakadzi ari kuda kucata wa Kristu anoumbwa no 144 000, madzimambo uye apristi.—Zvak. 14:1; 21:1, 2, 24; 22:3-5.
Djerusarema Ripsva ricange rino basa rinokosha pa kudzadzika ka Isaya 60:1. (Ezanisai na Isaya 60:1, 3, 5, 11, 19, 20 uye Zvakapangidzwa 21:2, 9-11, 22-26.) Sezvo Djerusarema rainga riri thaundi raiimirira utongi we Aisraeri e kare, nge mushobo umwewo, Djerusarema Ripsva na Kristu, ricange riri utongi mu nyika ipsva. Asi Djerusarema Ripsva “[ricauya] recibva kudenga kuna Mwari” nge mushobo upi? Nge mushobo wekuti irona rinonga recinyasa kuonerera nyika. Anhu akatendeka a Mwari e madzinza ese “acahamba mu ciedza caro.” Awona acasunungurhwa pa citema uye rufu. (Zvak. 21:3, 4, 24) Izvona zvicaita kuti “zviro zvese zvigadziriswe zvogara zvipsva,” hingana zvakabhuiwa no muphorofita Isaya uye no amweniwo. (Zvii. 3:21) Kugadzirisa ikona kakatanga Djesu paakagara Mambo uye kucazopera mu kupera ke Kutonga kake ke Makore Ciuru.
a Pana Isaya 60:1, Bhaibheri re Nyika Ipsva rinoseenzesa soko rekuti “mwanakadzi” pane kuseenzesa soko rekuti “Ziyoni,” kana kuti “Djerusarema,” ngokuti kududzwa ke masoko e Cihebheru ekuti “kumuka” kana kuti “kusiya kuti ciedza cidjeke” akatarhwa ecibhuya ngezve mwanakadzi.
b Kuhwirinzwa ke kunamata kakacena kunopanganidzwa pana Ezekiyeri 37:1-14 uye pana Zvakapangidzwa 11:7-12, kakaizwa mu gore ra 1919. Ezekiyeri wakaphorofita kuti ke nguwa yakareba ye cidima ce kumwiya, Akristu ese akadzodzwa aizodjekerhwa no cokwadi. Asi uphorofita uri muna Zvakapangidzwa, unobhuya ngezve kubarhwa ke kumwiya ke cikwata cidoko ce Akristu akadzodzwa aizotungamirira mumasure me kacinguwa cidoko asikacaiti basa nge ndaa ye kuteererhwa kusina unatsi. Mu gore ra 1919, hama idzi dzakagadzwa hinga “muranda wakatendeka uye akangwara.”—Mat. 24:45; onai bhuku rinoti: Jehovha Anodzorera Kunamata Kwakachena!, paji. 118, mu ciShona.
