MUSORO WE KUFUNDA 23
NGOMA 28 Ndiani angagara Shamwari ya Djehovha?
Djehovha Anotipika kuti Tigare Arendo Ake
“Tenda rangu ricagara pakati pawo uye inini ndicagara Mwari wawo.”—EZEK. 37:27.
CINANGWA
Kuti titunhudzire kutenda kedu mupiko wa Djehovha we kugara mu tenda rake rekuezanisira uye mushobo waanoticengeta nawo hingana Mutambiri wedu.
1-2. Djehovha anoita mupiko upi ku aseenzi ake akagondeka?
KANA munhu akamubvunzisai kuti Djehovha ndiani, maizodaira kudini? Pamweni maizodaira kuti ‘Djehovha ndi Baba angu, Mwari wangu uye Shamwari yangu.’ Uyewo pano mazina amweni no masoko angapanganidza ngezva Djehovha. Asi imwimwi makamboimawo morangarira kuti ndimwi murendo uye Djehova ndi Mutambiri wenyu?
2 Mambo Dhavhidhi ecireketa ngezve ushamwari na Djehovha, iyena wakaezanisa Djehovha no mutambiri we arendo uye aseenzi Ake hinga arendo. Iyena wakabvunzisa kuti: “Djehovha, ndiani angagara murendo mu tenda renyu? Ndiani angagara mu dunhu renyu cena?” (Pis. 15:1) Tsamba ii, inopangidza kuti isusu tingakwanisa kugara arendo mu tenda ra Djehovha kana kuti tingakwanisa kugara shamwari dzake. Amuoni kuti uu ndi mupiko wakanaka watinopaswa na Djehovha here?
DJEHOVHA ANOPIKA ARENDO AKE
3. Ndiani murendo wekutanga wa Djehovha uye ushamwari wawo wainga wakadini?
3 Djehovha paainga asati atanga kusika zviro zvese, iyena ainga ari ega. Asi iyena akasika Mwana wake we kutanga. Zvaiita hingana kuti Djehovha Mutambiri wedu, apika murendo we kutanga kuuya mu tenda rake uye iyena akapfara maningi nge kuita izvona. Bhaibheri rinopanganidza kuti Mwana wa Djehovha wainga ari “mupfaro mukuru kaari.” Nge dii rimweni, Mwana wake “waigara ecipfara nguwa dzese ari pa dii ra Djehovha.”—Zvie. 8:30.
4. Ndiani akagarazve arendo a Djehovha?
4 Pedzepo Djehovha akasika ngirozi, uye idzona ndi arendoo ake. Bhaibheri rinodainza ngirozi kuti “ana a Mwari” uye rinopangidza kuti idzona dzinopfara nge kugara na Djehovha. (Djobo 38:7; Dha. 7:10) Ke makore akawanda arendo a Djehovha ainga ari aya basi aigara kudenga. Asi no kuhamba ke nguwa Djehovha akazotunhudzira tenda rake kuti abatanidzewo anhu anogara pa nyika hinga arendo ake. Amweni akhona e arendo aya ainga ari Inoki, Nowa, Abrahamu uye Djobo. Bhaibheri rinobhuya kuti awona ainga ari shamwari dza Mwari, ngekuti akamuzwira uye akahamba “na Mwari we zvirokwazvo.”—Gen. 5:24; 6:9; Djobo 29:4; Isa. 41:8.
5. Tingafundei no uphorofiti wa Ezekiyeri 37:26, 27?
5 Ke mazana e makore, Djehovha ari kurumbwa ecipika aseenzi ake kuti agare arendo ake. (Erengai Ezekiyeri 37:26, 27.) Ngo muezaniso, pa uphorofita wa Ezekiyeri, isusu tinofunda kuti Djehovha anoda kuti aseenzi ake agare no ushamwari wakabamba naye. Iyena anogondesa kuita “citenderano ce runyararo nawo.” Uphorofiti uu, unobhuya ngezve nguwa yekuti aya ano kariro yekurarama kudenga uye aya ano kariro ye kurarama pa nyika, acagara ari pamwepo mu tenda ra Djehovha hingana “cikwata cimwe basi.” (Juau 10:16) Uphorofiti uu uri kudzadzika nyamasi uno!
DJEHOVHA ANOTICENGETA NGUWA DZESE
6. Munhu angagara kudini murendo mu tenda ra Djehovha uye tenda irona riri kupi?
6 Mu nguwa yo kare, tenda rainga riri mbuto yekuti munhu waizorora imona uye waikwanisa kudzidziirira pa migariro ye kunza. Murendo waitambirhwa mu tenda wainga asikadikani kuthya ngekuti waiziya kuti waizocengethwa zvakanaka. Patinodzipira kuna Djehovha, isusu tinogara arendo mu tenda rake rekuezanisira. (Pis. 61:4) Mu tenda iri, isusu tino zvekunamata zve ku mwiya zvatinoda kuti tirumbwe takagondeka Kaari uyewo tino shamwari dzedu dzekuti idzona i arendo mu tenda ra Djehovha. Azvinei no katinogara, tese isusu tingakwanisa kugara arendo mu tenda ra Djehovha. Ngo muezaniso, pamweni makamboenda ku mbuto imweni, hingana ku gungano re nyika dzese uye makaziya anhu amweni ari kupfara nge kugara mu tenda ra Djehovha. Tenda ra Djehovha riri ku mbuto yese ino aseenzi ake.—Zvak. 21:3.
7. Ngei tingabhuya kuti aseenzi a Djehovha akafa kare aciri arendo mu tenda rake? (Onaiwo foto.)
7 Hino zvakadini no aseenzi a Mwari akafa kare, tingabhuya kuti awona i arendo mu tenda ra Djehovha here? Zvezvirokwazvo honde! Ngei tingabhuya kudaro? Ngokuti kuna Djehovha anhu awona aciri apenyu mu ndangariro dzake. Djesu akapanganidza kuti: “Panocokuita no kumutswa ke akafa, kunyazi Mozesi wakazvireketa paakabhuya ngezve pfiba re minzwa, paanodainza Djehovha kuti ‘Mwari wa Abrahamu, Mwari wa Izaki uye Mwari wa Djakobo.’ Iyena ndi Mwari, haiwa we akafa, asi we apenyu, ngokuti kaari ese awona ari apenyu.”—Ruka 20:37, 38.
Kunyazi aseenzi a Djehovha akatendeka akafa kare angagarawo arendo mu tenda ra Djehovha (Onai ndima 7)
MAKOMBORERO UYE BASA RATINARO
8. Arendo a Djehovha ano makomborero api nge kugara mu tenda rake?
8 Kuitawo hinga tenda kamare rekuzororera rinotidziirira pa mugariro we kunza, tenda ra Mwari rinodziirirawo arendo aro pa ciro cipi haco cingakwanisa kupedza ushamwari wawo na Djehovha uye rinoapasa kariro ye zvirokwazvo ye mune ramangwana. Kana tikagara dhuze na Djehovha, Sathani aakwanisi kuita ciro cipi haco cingatibata-bata nokusikaperi. (Pis. 31:23; 1 Juau 3:8) Uye mu nyika ipsva, Djehovha acarumbwa ecidziirira aseenzi ake akatendeka haiwa basi pa zviro zvekumwiya, asi pa rufu.—Zvak. 21:4.
9. Djehovha anoetsera kuti arendo ake agare no maitiro api?
9 Izvirokwazvo kuti makomborero akakura kugara arendo a Djehovha uye kugara no ushamwari wakabamba unorumbwa uriyo nokusikaperi. Asi kana tiri arendo ake, tinodikana kugara no maitiro akadini? Kana imwimwi mukapikwa ku nyumba ke munhu, mucaetsera kuti munhuwo arekete zviya zvamunodikana kuita. Ngo muezaniso, muridzi we nyumba angada kuti mubvise bhutsu musati mapinda mumba, zvezvirokwazvo maizotendera kuita izvona. Ngo mushobo umwewo, isusu tinoda kuziya kuti Djehovha anoda kuti aya anorumbwa ari arendo mu tenda rake aitei. Rudo redu na Djehovha rinotikohomedzesa kuti tiite zvese zvatinokwanisa ‘kuitira tinyase kumupfadza.’ (Ako. 1:10) Djehovha akaita hingana shamwari katiri, asi tinodikanawo kuedzurira kuti iyena ndi Mwari uye Baba. (Pis. 25:14) Ndiyo ndaa, isusu tinodikana kumureremedza. Atidikani kukanganwa kuti iyena ndiani. Kurangarira kudaro, kucatibetsera kuti tisaite ciro cipi haco cisikapfadzi Djehovha. Apana mubvunzo kuti isusu tinoda “kugara pakati no pakati” patinohamba na Mwari wedu.—Mik. 6:8.
DJEHOVHA AKAPANGIDZA KUTI AASANANGURI KU AISRAERI
10-11. Mushobo wakabata Djehovha Aisraeri ku renje re Sinai unopangidza kudini kuti aasananguri?
10 Djehovha anopangidza kuti aasananguri nge mushobo waanobata arendo ake. (Aro. 2:11) Isusu tingakwanisa kunyasa kuzwisisa kutama kusanangura ka Djehovha nge kuona mushobo waakabata Aisraeri paainga ari ku renje ro Sinai.
11 Mumasure me kusudzunura Aisraeri pa uranda ku Edjipitu, Djehovha akagadza apristi kuti aseenze mu tabhernakuro. Arevhi akasanangurhwa kuti aite mabasa amweni anocokuita no mbuto ii cena. Kodi aya aiseenza mu tabhernakuro kana kuti ainga ari dhuze no mbuto iyona, aicengethwa zvakanaka na Djehovha kudarika amweni here? Haiwa! Ngokuti kuna Djehovha anhu ese akaezana.
12. Djehovha akapangidza kudini kuti kaari Aisraeri ainga akaezana? (Ekisodho 40:38) (Onaiwo mufanikiso.)
12 Zvainga zvisina basa kuti tenda rawo rainga riri dhuze here kana kuti kure no tabhernakuro. Ngo muezaniso, Djehovha akaita kuti dzinza rese rikwanise kuona gore uye murazvi we muriro zvaigara padenga po tabhernakuro. (Erengai Ekisodho 40:38.) Gore paraicinja kuenda ku mbuto imweni, kunyazi aya ainga ari kure no tabherankuro aikwanisa kuzviona. Ngokudaro, mhuri yaikwanisa kuunganidza zviro zvawo, kurongedza matenda uye kuenda pamwepo no dzinza rese. (Num. 9:15-23) Kusiya izvona, anhu ese aikwanisa kuzwa kurira ke matropito mairi e prata aiziisa kuti anhu ese abude pa mbuto yaainga ari. (Num. 10:2) Kugara dhuze no tabhernakuro, zvainga zvisikareyi kuti munhu waizogara no ushamwari wakabamba na Djehovha kudarika aya aigara kure. Asi ese ainga akadzipira kuna Djehovha pa dzinza irona, aikwanisa kugara arendo mu tenda Rake, kupaswa nhungamiriro Naye uye kudziirirhwa. Nge mushobo umwewo, nyamasi uno azvinei no katinogara tingakwanisa kuzwa rudo ra Djehovha, kudziirirhwa naye uye kucengethwa naye.
Tabhernakuro yaigara pakati pe musasa, cainga ciri cipangidzo cekuti Djehovha aasananguri (Onai ndima 12)
MIEZANISO YE MAZUWA ANO INOPANGIDZA KUTI DJEHOVHA AASANANGURI
13. Mazuwa ano, Djehovha anopangidza kudini kuti aasananguri?
13 Aseenzi amweni a Mwari mazuwa ano, anogara dhuze no Sedhi Mundiyari kana ku Bheteri. Uye amweni anotogara pa Bheteripo kana pa Sedhi Mundiyari. Ndiyo ndaa, akawanda awo anokwanisa kuita mabasa akasiyana-siyana anooneka ipona uye kutogara pamwepo no aya ari kutungamirira sangano. Uyewo amweni anoseenza hinga aonereri e nharaunda uye amweni anoita mabasa akasiyana-siyana e mu nguwa yakadzara. Asi kana musikagari ku mbuto idzona uye kana musikaiti mabasa aya, mungagara no rugondo rekuti Mutambiri wenyu Djehovha anoda arendo ake ese, kutobatanidzawo imwimwi. Uye iyena acamupasai zvese zvamunoda. (1 Ped. 5:7) Ese anoita dii re anhu a Mwari anotambira zvekurhya zvekumwiya, nhungamiriro uye kudziirirhwa kaanoda.
14. Muezaniso upizve watinawo mazuwa ano unopangidza kuti Djehovha aasananguri?
14 Muezaniso umweni unopangidza kuti Djehovha ndi Mutambiri akanaka, nge wekuti iyena anoita kuti anhu ese ari mu nyika yese nyamasi uno agare no Bhaibheri. Matarhwa Macena akatanga kutarhwa peciseenzeswa mireketero mitatu: Cihebheru, Ciaramaiko uye Cigrego. Kodi aya anokwanisa kuerenga mireketero dziya kamare dzakatarhwa Bhaibheri, ano ushamwari wakabamba na Djehovha kudarika anhu asikareketi mireketero idzona here? Haiwa, andizvopi.—Mat. 11:25.
15. Cipangidzo cipi catinaco cekuti Djehovha aasananguri? (Onaiwo foto.)
15 Kuti tigare shamwari dza Djehovha azvidi kugara anhu akafunda maningi kana kugara anhu anoziya mireketero dzakawanda. Djehovha anoda kugara shamwari ye anhu ese uye anopasa uzii anhu ese ari pa nyika, haiwa basi akafunda maningi. Soko ra Mwari rakafemerhwa Bhaibheri, raakuoneka mu mireketero yakawanda maningi. Ngo mushobo uwona, anhu ese mu nyika anokwanisa kuona kuti ngei zvakanaka kutondowedza zvese zvaanofundiswa na Mwari uye kugara shamwari dzake.—2 Ti. 3:16, 17.
Ngei kuturikirhwa ke Bhaibheri mu mireketero yakawanda i cipangidzo cekuti Djehovha aasananguri? (Onai ndima 15)
RUMBWAI MURI “ARENDO” A DJEHOVHA
16. Maererano na Zviito 10:34, 35, cinyi catinodikana kuita kuti tirumbwe tiri arendo a Djehovha?
16 I makomborero akakura kupikwa na Djehovha kuti tigare arendo mu tenda rake. Djehovha ndi Mutambiri ano unaki, rudo uye anotambira arendo zvakanaka. Kuna Djehovha anhu ese akaezana, iyena anopika anhu ese azvinei no kaanogara, mushobo waakarerhwa, kufunda kaakaita, mureketero, dzinza, thunga uye kuti muri mwanarume here kana mwanakadzi. Asi aya basi anorumbwa ecizwira Djehovha ndiwona anotenderhwa kugara arendo ake.—Erengai Zviito 10:34, 35.
17. Tingagumirazve kupi masoko anocokuita no kugara arendo mu tenda ra Djehovha?
17 Hinga zviri pana Pisarema 15:1, Dhavhidhi wakabvunzisa kuti: “Djehovha, ndiani angagara murendo mu tenda renyu? Ndiani angagara mu dunhu renyu cena?” Uye Djehovha akaseenzesa Dhavhidhi kamare kuti adaire mibvunzo idzi. Mu fundo inoteera, ticaona zvatinodikana kuita kuti tirumbwe tecigara mu tenda ra Djehovha.
NGOMA 32 Tsigirai Djehovha!
