1. Cinyi cinobetsera aseenzi a Mwari kuti arumbwe ecimuseenzera kunyazi no zvinetso zvakawanda?

 “NGUWA dzinonetsa, dzinoshupha kushingirira,” ndiwo mushobo unodainza Bhaibheri mazuwa atiri kurarama ano. (2 Ti. 3:1) Kusiya zvinetso zvese zviri kusongana no anhu mu nyika ino, aseenzi a Djehovha ari kusongana no kuteererhwa. Asi cinyi cinotibetsera kuti tirumbwe tecinamata Djehovha kunyazi tecisongana no zvinetso zvakawanda? Cimwe ce cikonzero cakhona ngecekuti tinoziya kuti Djehovha ndi “Mwari mupenyu.”—Djer. 10:10; 2 Ti. 1:12.

2. Cinyi catinoziya ngezva Djehovha cinotibambisa maningi?

² Djehovha ndi Munhu kamare, iyena anotibetsera nguwa dzese uye anoita zviri zvese kuti atibetsere. (2 Mak. 16:9; Pis. 23:4) Patinoedzurira kuti Mwari wedu anorangarira maningi ngezvedu uye anoda kutibetsera, zvinotipasa simba kuti tirhwisane no cinetso cipi haco. Ngationei kuti izvona zvakaitika kudini na Mambo Dhavhidhi uye aseenzi amweni a Djehovha.

3. Dhavhidhi waida kureyei paakabhuya kuti “Djehovha ndi mupenyu”?

³ Dhavhidhi wainyasa kuziya Djehovha uye waimugonda. Paaiteererhwa no azondi ake kutobatanidzawo Mambo Sauri, iyena wakanamata kuna Djehovha ecikumbira rubetso. (Pis. 18:6) Uyewo mumasure mekuti Djehovha adaira munamato wa Dhavhidhi uye amubetsera, Dhavhidhi wakati: “Djehovha ndi mupenyu!” (Pis. 18:46) Dhavhidhi waida kureyei no masoko aya? Bhuku rimweni rakabhuya kuti apa Dhavhidhi waipangidza rugondo rake rokuti Djehovha “ndiye ega Mwari we zvirokwazvo uye kuti nguwa dzese anobetsera aseenzi ake.” Dhavhidhi wakazvionera ega kuti Djehovha aiona zvese zvaiitika naye uye ainga akagadzirira kumubetsera, ndizvo zvakabetsera Dhavhidhi kuti arumbwe eciseenzera uye ecikudza Djehovha.—Pis. 18:28, 29, 49.

4. Ngei zvicikosha kugara no rugondo rokuti Djehovha ndiye Mwari mupenyu?

 ⁴ Kugara no rugondo rekuti Djehovha ndi Mwari mupenyu, kucatibetsera kuti tirumbwe tecimuseenzera uye tecishingaira. Uye zvicatibetsera kukunda muedzo upi hawo uyewo zvicatipasa simba rekuita zvese zvatinokwanisa pa kumuseenzera. Uye izvona zvicaitawo kuti tirumbwe tiri dhuze na Mwari wedu.

MWARI MUPENYU ACAMUBAMBISAI

5. Cinyi cingatunhudzira rugondo redu patinosongana no zvinetso? (Afiripi 4:13)

⁵ Isusu tingakwanisa kurhwisana no cinetso cipi haco, cidoko kana cikuru, kana tikaedzurira kuti Djehovha ndi Mwari mupenyu uye kuti nguwa dzese anonga akagadzirira kutibetsera. Cokwadi ngecekuti kuna Djehovha apana cinetso cakakura maningi, ngokuti iyena ndi Mwari we Masimba Ese uye angatipasa simba ratinoda. (Erengai Afiripi 4:13.) Hino isusu tingarhwisana no cinetso cipi haco no rugondo. Patinoona kuti Djehovha anotibetsera kunyazi pa zviro zvidoko, rugondo redu kaari rekuti iyena acatibetsera pa zviro zvikuru rinonyasa kubamba.

6. Cinyi cakaitika na Dhavhidhi paainga ari mudjaha cakaita kuti atunhudzire rugondo rake kuna Djehovha?

⁶ Onai migariro miiri yakaita kuti Dhavhidhi atunhudzire rugondo rake kuna Djehovha. Dhavhidhi paainga aciri muushi we cidjaha, pa migariro miiri yakasiyana mhondoro uye ursu zvakatora mabira a baba ake. Pa migariro yese miiri, Dhavhidhi wakateera zvinyamezvo uye wakanunura mabira aya. Asi Dhavhidhi wainga asikarangariri kuti wakakwanisa kuzviita no simba rake kamare. Iyena waizviziya kuti ndi Djehovha akamupasa ushingi uye simba rekuita izvona. (1 Sam. 17:34-37) Dhavhidhi aazi kukanganwa zviitiko zviiri izvi. Paaiedzurira zvakaitika, rugondo rake kuna Djehovha rainyasa kubamba, eciziya kuti Mwari mupenyu aizomubetsera pese paaizoda rubetso mune ramangwana.

7. Dhavhidhi wakakanda ndagariro dzake pa cinyi uye izvona zvakamubetsera kudini kurhwisana na Goriyati?

⁷ Mumasure me kacinguwa, pa nguwa yekuti pamweni Dhavhidhi wainga aciri mudjaha, iyena wakaenda ku mbuto kainga kuno anyahondo e Israeri. Iyena wakoona kuti anyahondo e Israeri ainga ecithya maningi ngo ndaa yo mwanarume umweni wakakurisisa maningi waizwi Goriyati wainga ecida “kurhwisana no Aisraeri.” (1 Sam. 17:10, 11) Masurudado akathya ngokuti akakanda ndangariro dzawo pa kukura ka Goriyati uye pa zviya zvaaireketa. (1 Sam. 17:24, 25) Dhavhidhi wakakanda ndangariro dzake pa ciro cimweni, iyena waizviziya kuti Goriyati wainga asikarhwisi basi Aisraeri asi “airhwisa anyahondo a Mwari mupenyu.”(1 Sam. 17:26) Dhavhidhi wakagonda Djehovha. Iyena waizviziya kuti Mwari umweumwewo wakamubetsera paainga ari muushi waizomubetserawo pa mugariro uu. Dhavhidhi wainga ano rugondo rekuti waizobetserhwa na Djehovha, hino iyena wakaenda koorhwisana na Goriyati uye hingana zvatinoziya iyena wakawina!—1 Sam. 17:45-51.

8. Cinyi cingabambisa rugondo redu rokuti Djehovha acatibetsera nguwa dzese patinosongana no zvinetso? (Onaiwo foto.)

⁸ Isusuwo tingarhwisana no ciro cipi haco kana tikaedzurira kuti Mwari mupenyu akagadzirira kutibetsera. (Pis. 118:6) Patinoedzurira zvaakamboita kare, tinokwanisa kubambisa rugondo redu kuna Djehovha. Hino erengai ngano dze mu Bhaibheri dzinopangidza kuti Djehovha akambobetsera kudini aseenzi ake. (Isa. 37:17, 33-37) Kusiya izvona, imwimwi mungaerenga maesperiensiya e hama no hanzvadzi dzedu mu saiti yedu jw.org. Maesperiensiya awona anonyasa kupangidza pamhene kuti Djehovha anobetsera kudini anhu ake mazuwa ano. Uye imwimwi mungaedzurirawo  pamakabetserhwa na Djehovha. Nguwa dzimweni, azviropi zvinoshamisa zvakadai hinga kurhwisana no mhondoro uye ursu, asi cokwadi nge cekuti Djehovha ainga anemwi mu upenyu wenyu nguwa dzese! Iyena ndiye kamare akamukweyai kuti mugare shamwari yake. (Juau 6:44) Uyezve, rubetso ra Djehovha ndiro ririkuita kuti murumbwe makagondeka kaari. Hino zvakadini kunamata kuna Djehovha mecikumbira kuti amubetserei kuedzurira migariro yekuti iyena akadaira minamato yenyu, akamubetserai pa nguwa yamaida kana kuti akarumbwa anemwi pa cinetso camaisongana naco? Kurangarira ngezve zviro izvi kucaita kuti imwimwi mugare no cokwadi cokuti mungagonda Djehovha nguwa dzese.

9. Zvinyi zvatinodikana kuedzurira patinosongana no zvinetso? (Zvierengo 27:11)

⁹ Kuona Djehovha hinga Mwari mupenyu, zvicatibetsera kuti tione miedzo yedu no maonero akanaka. Tingazviita kudini? Patinosongana no cinetso tinodikana kuedzurira ciro cinonyanya kukosha. Sathani wakabhuya kuti kana tikasongana no zvinetso tinosiya Djehovha. Hino mushobo watinorhwisana no zvinetso zvedu zvinobata-batawo Djehovha. (Djobo 1:10, 11; erengai Zvierengo 27:11.) Hino patinorumbwa takagondeka kuna Djehovha kunyazi tecisongana no zvinetso, tinopangidza kuti tinomuda uye kuti Sathani ndi munyepi. Hino kuzotiwo imwimwi? Murikusongana no kuteererhwa no anyautongi, zvinetso zvo mare, kutama kubudirira mu basa re kuparidzira kana kuti zvinetso zvimweniwo here? Kana zviri izvona, edzurirai kuti zvamuri kusongana nazvo i mukana wekuti mupfadze Djehovha. Asi musakanganwe kuti Djehovha aazomusii pa mugariro unoshupha kudarika uya wamunokwanisa kushingirira. (1 Ako. 10:13) Iyena acamupasai simba ramunoda kuti mukwanise kuzvikunda nguwa dzese.

MWARI MUPENYU ACAMUPASAI MUBAIRO

10. Mwari anogondesei ku aya akagondeka kaari?

¹⁰ Djehovha anopasa Mubairo nguwa dzese aya akagondeka kaari. (Aheb. 11:6) Iyena anotipasa runyararo uye mupfaro zvino uye acazotipasa  upenyu usikaperi mune ramangwana. Isusu tinonyasa kugonda Djehovha ngokuti tinozviziya kuti acatipasa mubairo uye ano simba rese kuti azviite. Ndiyo ndaa, tinorumbwa teciita zvakanakisisa zvedu pakumunamata kuita hinga aseenzi ake e kare. Timoti wakaitawo izvona.—Aheb. 6:10-12.

11. Ngei Timoti wakaita zvese zvaaikwanisa kuitira ungano? (1 Timoti 4:10)

¹¹ Erengai 1 Timoti 4:10. Timoti wainga ano kutenda muna Mwari mupenyu. Nge ndaa yazvo, iyena wakaita zvaaikwanisa pakuseenzera Djehovha uye hama dzake. Iyena wakazviita kudini? Muphostori Pauro wakakohomedzesa Timoti kuti agare mufundisi wakanaka, izvona zvaibatanidza mu ungano uye mu basa re kuparidzira. Pauro wakabhuya kuti Timoti waidikana kupasa muezaniso wakanaka ku madjaha uyewo ku hama dzakura. Timoti wakatambirawo mabasa manganani aishupha, aibatanidza kupasa mazano akananga asi ozviita no rudo ku aya aidikana kupaswa. (1 Ti. 4:11-16; 2 Ti. 4:1-5) Pamweni paya, amweni ainga asikazozwisisi basa raiizwa na Timoti uye amweni ainga asikazotendi nge basa irona raaiita. Asi Timoti waizviziya kuti munhu unonyanya kukosha aiziya basa rese raaiita uye aizomupasa mubairo.—Aro. 2:6, 7.

12. Ngei akuru eciita zvese zvaanokwanisa kuti abetsere ungano? (Onaiwo foto.)

¹² Nyamasi uno, akuru angagarawo no rugondo rokuti Djehovha anoona zvese zvaanoita uye anozvikoshesa maningi. Pane basi kuusha mabira, kufundisa uye kuparidzira, akuru akawanda anobetserawo pa maprojeto e kuwaka uye ajuda humanitária. Amweni anoseenza mu Cikwata ce Kuvhakacira Hama Dziri Muzvipitari kana kuti Comissão de Ligação com Hospitais. Akuru anodzipira kuita mabasa aya anozviziya kuti ungano ngeya Djehovha, haiwa yo munhu. Nge ndaa yazvo, awona anoita zvese zvaanokwanisa uye ano rugondo rekuti Djehovha acazoapasa mubairo nge zvese zvaari kuita.—Ako. 3:23, 24.

13. Djehovha anozwa kudini paanotiona tecipeta masimba pakumuseenzera?

 ¹³ Aa anhu esepi angaseenza hinga akuru. Asi tese isusu tino catingapasa Djehovha. Mwari wedu anopfara maningi paanotiona teciita zvese zvatinokwanisa pakumuseenzera. Iyena anoona mipiro yedu yatinoita kuti titsigire basa re mu nyika yese, kunyazi iyona painonga iri idoko. Djehovha anopfarawo maningi paanotiona tecipeta masimba kuti tikunde kupsveruka kedu uye tomutsa moko kuti tipase mhinduro pa misangano, uyewo iyena anodada nesu paanotiona kuti tasiya pamuceto cishaishi cataizirhwa uye tarekerera hama yedu. Kunyazi mecizwa hingana kuti amuripi kuitira Djehovha zvakawanda, garai no rugondo rekuti iyena anokoshesa maningi zviya zvamunokwanisa kuita. Iyena anomudai maningi, ndiyo ndaa, acamupasai mubairo.—Ruka 21:1-4.

RUMBWAI MURI DHUZE NA MWARI MUPENYU

14. Ushamwari wakabamba na Djehovha unotibetsera kudini kurumbwa takatendeka kaari? (Onaiwo foto.)

¹⁴ Zvicagara nyore maningi kurumbwa takatendeka kuna Djehovha kana tikamuona hingana munhu kamare katiri. Ndizvo zvakaitika na Zuzee. Iyena wakaramba kuita uhure ngekuti waizviziya kuti izvona zvaizorhwadzisa maningi Djehovha. (Gen. 39:9) Kana tecida kuti Djehovha agare hinga munhu kamare katiri, tinodikana kutora nguwa ye kucedza naye uye kufunda Soko rake. Kana tikadaro, ushamwari wedu naye ucarumbwa wecikura mazuwa ese. Uye kuitawo hingana Zuzee, kana tikagara no ushamwari wakabamba na Djehovha, atizomboiti ciro cipi haco cingarhwadzisa mwoyo Wake.—Tig. 4:8.

15. Tingafundei no zvakaitika no Aisraeri paainga ari ku renje? (Ahebheru 3:12)

¹⁵ Aya anokanganwa kuti Djehovha i munhu kamare, anowira pa ngozi ye kuguma pa kugara kure naye. Onai zvakaitika no Aisraeri paainga ari ku renje. Awona aizviziya kuti Djehovha ariyo, asi akazotanga kukana-kana kuti Djehovha aizoariritiradi kamare here. Hino akazoguma pakudzibvunzisa kuti: “Djehovha ari pakati pedu here kana kuti haiwa?”  (Eki. 17:2, 7) Mugumisiro wakhona nge wekuti awona akazopandukira Mwari. Isusu atidi kuita zvaakaita uye totama kuzwira Djehovha.—Erengai Ahebheru 3:12.

16. Kutenda kedu kungaedzwa kudini?

¹⁶ Azviripi nyore kurumbwa tecikhwedera dhuze na Djehovha mu nyika ino yatiri kurarama. Anhu akawanda anotobhuya kuti Mwari akuna. Uye zvinoita hingana kuti anhu aya asina basa na Mwari ano upenyu wakanaka. Patinoona izvona zveciitika kutenda kedu kungakwanisa kuedzwa, pamweni atingazogumi hedu pakubhuya kuti Djehovha akuna, asi tingakwanisa kutanga kudzibvunzisa kuti iyena acatibetseradi here. Mutari we Pisarema 73 wakasonganawo no mugariro iwona. Anhu ainga akamutenderedza ainga asina basa no mitemo ya Mwari uye aitorarama upenyu wawo nge mushobo waaida. Nge ndaa yazvo, iyena wakatanga kukana-kana kuti zvaibetseradi here kurumbwa eciseenzera Mwari.—Pis. 73:11-13.

17. Cinyi cicatibetsera kurumbwa tiri dhuze na Djehovha?

¹⁷ Cinyi cakabetsera mutari we Pisarema kuti acinje maonero ake? Iyena wakanyasa kurangarira zviya zvaizoitikira aya aizokanganwa Djehovha. (Pis. 73:18, 19, 27) Iyena wakatorawo nguwa kuti arangarire ngezve makomborero ese anobva pakuseenzera Djehovha. (Pis. 73:24) Isusuwo tingarangarira ngezve makomborero atakapaswa na Djehovha. Edzai kurangarira kuti upenyu wenyu waizogara wakadini kudai musikaseenzeri Djehovha. Kuedzurira zviro izvi, kunotibetsera kuti tirumbwe takagondeka kuna Djehovha uye kuitawo hingana mutari we Pisarema tingazokwanisa kubhuya kuti: “Kandiri, zvakanaka maningi kukhwedera dhuze na Mwari.”—Pis. 73:28.

18. Ngei tisikadikani kuthya zviro zvicaitika mune ramangwana?

¹⁸ Isusu tingarhwisana no zvinetso zvipi hazvo zvicabuda mu gwanza iri ratiri kuhamba patinonga tiri mu mazuwa ano ekupedzesera, ngokuti tiri “aranda a Mwari mupenyu uye we zvirokwazvo.” (1 Ate. 1:9) Djehovha i Munhu kamare uye nguwa dzese anonga akagadzirira kutibetsera. Iyena akagara pa dii re aseenzi ake e kare nguwa dzese uye acaitawo zvimwezvo na isusu nyamasi uno. Mbai-mbai pano, isusu ticasongana no kutambudzika kukuru. Asi tinonga tisiripi tega, Djehovha anonga ari pa dii redu. (Isa. 41:10) Hino, tese isusu tingagara “takadzara no ushingi uye toti: ‘Djehovha ndiye mubetseri wangu; andizothyi.’”—Aheb. 13:5, 6.