Mibvunzo Inobva Ku Aerengi
Ngei anhu amweni ecibhuya kuti Pisarema 12:7 iri kureya ngezve “Masoko a Djehovha,” ari pa (vhersikuro 6) uye mu Bhaibheri re Nyika Ipsva riri kureya ngezve “ari kutambudzika” pa (vhersikuro 5)?
Tsamba ii inopangidza kuti vhersikuro ii iri kureketa ngezve anhu.
Pana Pisarema 12:1-4, tinoerenga kuti: “Anhu akatendeka akangarangara pakati pe anhu.” Pedzepo pana Pisarema 12:5-7, iyena unoti:
“‘Nge ndaa ye kudzvinyirirhwa ke aya ari kutambudzika,
Nge ndaa ye kugomera ke arombo,
Inini ndicamuka kuti ndiite ciito, anodaro Djehovha.
‘Inini ndicaaponesa ku aya anoashora.’
Masoko a Djehovha akacena;
Akaita hingana prata yakanyunguruswa mu forno ye dongo yoceneswa kanomwe.
Djehovha imwimwi mucaacengetedza;
Mucadziirira umwe na umwe wawo pa mubarirhwana uu nokusikaperi.”
Vhersikuro 5 inobhuya zvicaizwa na Mwari kuti aponese “aya arikutambudzika.”
Vhersikuro 6 inobhuya kuti “masoko a Djehovha akacena,” ‘hingana prata yakanyunguruswa.’ Tese isusu ndizvo zvatinozwa panocokuita no Soko ra Mwari.—Pis. 18:30; 119:140.
Onai zvinobhuiwa pana Pisarema 12:7, ipona panoti: “Djehovha imwimwi mucaacegetedza, mucadzirira umwe na umwe wawo pa mubarirhwana uu nokusikaperi.” Soko rekuti “wawo” rinoreyei?
Sezvo vhersikuro 7 iri mberi ke vhersikuro inobhuya “masoko a Djehovha,” anhu amweni pamweni angarangarira kuti masoko ari pa vhersikuro 7 ngaa Mwari. Izvirokwazvo kuti Mwari akadziirira Soko rake, Bhaibheri kunyazi azondi akaedza kuritsakatisa kana kurambidza kuturikirhwa karo uye kukowaniswa karo.—Isa. 40:8; 1 Ped. 1:25.
Asi zvinobhuiwawo pa vhersikuro 5 i zvirokwazvo. Djehovha nguwa dzese anobetsera uye acarumbwa ecibetsera aya ari “kudzvinyirirhwa” uye ari “kutambudzika.”—Djobo 36:15; Pis. 6:4; 31:1, 2; 54:7; 145:20.
Hino “umwe na umwe wawo” anobhuiwa pa vhersikuro 7 ndiani?
Patinoongorora Pisarema kapituro 12 zvinogara pamhene kuti masoko ekuti “umwe na umwe wawo” ari kureya anhu.
Masoko ekutanga a Pisarema 12:1 Dhavhidhi unobhuya ngezve “anhu akatendeka” a Djehovha akacengedzwa no anhu akashata. Pedzepo tinoerenga kuti Djehovha acaita ciito ku aya anoreketa manyepo. Isusu tingagara no rugondo rekuti Djehovha acaita izvona ngokuti vhersikuro 6 inoti masoko a Djehovha akacena.
Hino vhersikuro 7 inobhuya kuti Djehovha acacengetedza uye acadziirira aya ari kutambudzwa kana kuti arikudzvinyirirhwa.
Masoko ekuti “umwe na umwe wawo” ari mu vhersikuro 7, akaseenzeswa kakawanda mu matarhwa akagondeka akatarhwa no nyara e Matarhwa e Cihebheru. Pa turikiro ye kutanga ye vhersikuro ii ye Cigrego, yakaseenzesa soko rekuti “isusu” kairi kese yecisiya pamhene kuti vhersikuro ii iri kureya ngezve aseenzi akatendeka a Mwari ari kutambudzika. Pakupedzesera, vhersikuro 7 inoti: “Umwe na umwe wawo” kana kuti akatendeka acadziirirhwa “pa mubarirhwana” we anhu anoita zviro zvakashata. (Pis. 12:7, 8) Turikiro ye Matarhwa e Cihebheru mu mureketero we Ciaramaiko pa vhersikuro 7 inoti: “Imwimwi TENZI, mucadziirira anatsi, imwimwi mucaacengetedza nokusikaperi pa mubarirhwana uu wakashata. Turikiro idzi, dzinopangidza pamhene kuti Pisarema 12:7 airipi kureya ngezve masoko akabhuiwa na Mwari.
Ngokudaro, Pisarema ii inotipasa kariro yekuti Mwari acaita ciito ecibetsera “anhu akatendeka.”