Ngei mwanarume unozwi no Bhaibheri kuti “Ngana” wakabhuya kuti “waizoparadza” nhaka yake kudai aizowaka Rute? (Rute 4:1, 6)

Mu nguwa ye kare, kana mwanarume akafa asati aano ana, paizogara no mibvunzo dzakawanda dzinoti: Cinyi caizoitika no munda wake? Zina re mhuri yake raizokanganika zvacose here? Mutemo wa Mozesi waidaira mibvunzo idzona.

Cinyi caizoitika no munda kana muridzi akafa, kana kuti cinyi caizoitika kana akatengesa munda ngekuti wainga agara murombo? Hama yake kana kuti e mhuri yake aizokwanisa kuutenga. Nge mushobo umwewo, munda uu waizorumbwa uri we mhuri yake.—Rev. 25:23-28; Num. 27:8-11.

Asi cinyi caizogondesa kuti zina re mhuri ye mwanarume wakafa raizorumbwa riripo? Ngekuwakana na mwaramu. Ndizvo zvakaitikawo na Rute. Mwanarume waidikana kuwakana no mufirhwakadzi we hama yake kuti abare ana. Mwana uu pane kuti agare nhaka ye munda basi we mwanarume uu wakafa, iyena waizorumbwa eciseenzesawo zina re mhuri yake. Uu wainga uri urongwa we rudo waicengetedzawo mufirhwakadzi.—Dhe. 25:5-7; Mat. 22:23-28.

Onai muezaniso wa Noemi. Iyena wainga akawakwa no mwanarume waizwi Erimereki. Erimereki no ana ake airi paakafa, Noemi wakasara asina anomucengeta. (Rute 1:1-5) Noemi paakahwirira ku Djudha, iyena wakabvunza nyamwana wake Rute kuti akumbire Bhoazi kuti atengezve kana kuti asudzunure munda. Bhoazi wainga ari hama ye padhuze ya Erimereki. (Rute 2:1, 19, 20; 3:1-4) Asi Bhoazi wakaedzurira kuti kainga kuno mwanarume umweni unozwi nge Bhaibheri kuti: “Ngana,” wainga ari hama ye padhuze kamare. Izvona zvinoreya kuti iyena ndiye wainga ano citenderhwa ce kusudzunura munda.—Rute 3:9, 12, 13.

Pakutanga “Ngana” wainga akagadzirira kubetsera. (Rute 4:1-4) Kunyazi zvaizoita kuti iyena aruze zviro zvakawanda, iyena waizwisisa kuti Noemi wainga asikazobari mwana waizogara nhaka ye munda wa Erimereki. Hino, munda waizogara wa Ngana, uye izvona zvaizoita kuti aone mare yakawanda.

Asi Ngana wakacinja marangariro paakaziya kuti waidikana kuwaka Rute. Iyena wakati: “Andikwanisi kuusudzunura, ngekuti ndingaparadza nhaka yangu.” (Rute 4:5, 6) Ngei iyena wakacinja marangariro?

Kudai Ngana kana kuti mwanarume umweni akawakana na Rute uye awona obara mwana, mwanewo ndiyena waizogara nhaka ye munda wa Erimereki. Asi izvona “zvaizoparadza nhaka” ya Ngana ngo mushobo upi? Bhaibheri aribhuyi ciro ngezve nyaya iyona, asi tingarangarira zviro zvimweni zvingakwanisa kuitika.

• Cekutanga, iyena waizoruza mare ngekutenga munda wa Erimereki, ngekuti raizoguma zuwa rekuti mundewo waizogara we mwana wa Rute.

• Cecipiri, iyena waizogara no ubaba wekucengeta Noemi na Rute pa zviro zvekurarama nazvo.

• Cecitatu, kudai Rute waizobara ana na Ngana, anewo aizogarawo ano citenderhwa cekugara nhaka ye munda wa Ngana, pamwepo no ana aainga ambobara.

• Cecirongomuna, kudai Ngana wainga asati aano mwana, mwana waaizobara na Rute waizogara ano citenderhwa cekugara nhaka ye minda dza Erimereki, pamwepo no dzake. Ngana paaizofa, munda wake waizogara we mwana asikadaidzwi no zina rake, asi no zina ra Erimereki. Ngana wainga asikazi kudzipira kuti aruze nhaka yake kuti abetsere Noemi. Iyena wakatendera kuti hama yecipiri ye pa dhuze yaizwi Bhoazi atendere ubaba iwona. Uye Bhoazi wakaita izvona ngekuti waida “kuhwirinza zina re mwanarume uyu wakafa pa nhaka yake.”—Rute 4:10.

Zviri pamhene kuti Ngana waida maningi kucengetedza zina rake no nhaka yake. Iyena waindorangarira ngezvake basi. Ngana waida maningi kucengetedza zina rake, asi zvakazosiyana no zvakaitika. Dakara nyamasi uno, apana unoziya zina rake. Iyena wakaruza makomborero akanaka akapaswa Bhoazi. Iyena wakagara umwe we madzitsekuru a Mesiya, Djesu Kristu. Ngano i inopangidza mugumisiro we aya anondorangarira basi ngo zvawo uye asikadi kubetsera amweni!—Mat. 1:5; Ruka 3:23, 32.