1-2. Ngei musikadikani kuora mwoyo kana musati magadzirira kubhabhatidzwa? (Onai foto ye pa kapa.)

 KANA imwimwi muri kurangarira kubhabhatidzwa, tinoti makorokoto ngekuti izvona zvakanaka. Imwimwi makagadzirira kuti mubhabhatidzwe here? Kana meciona kuti makagadzirira, uye akuru ecitenderana nemwi, mungabhabhatidzwa pa mukana unoteera wamunoona. Mungagara no rugondo rekuti kana mukadaro, mucagara no upenyu wakanakisisa pakuseenzera Djehovha.

² Asi zvakadini kana awona akamubvunza kuti munodikana kuita cinjo musati mabhabhatidzwa? Kana kuti pamweni imwimwi mainga maakutoziya ngezve cinjo iyona? Kana zviro izvona, musaore mwoyo. Pasinei no thunga renyu, imwimwi mungaita cinjo kuti mukwanise kubhabhatidzwa.

3. Mukuru-mukuru we ku Etiópia wakabvunzisei kuna Firipi, uye mubvunzo upi unomuka? (Zviito 8:36, 38)

³ Erengai Zviito 8:36, 38. Mukuru-mukuru we ku Etiópia wakabvunzisa Firipi muevhangeri kuti: “Cinyi cingandipingaidza kubhabhatidzwa?” Mwanarume uu we ku Etiópia waida kubhabhatidzwa, asi iyena wainga akagadzirira kuti abhabhatidzwe here?

4. Mwanarume we Etiópia wakapangidza kudini kuti waida kufunda zvakawanda?

⁴ Mwanarume we ku Etiópia “wainga aenda ku Djerusarema koonamata.” (Zvii. 8:27) Izvona zvinopangidza kuti iyena wainga atotenda gereja re Cidjudha. Ngekufunda kaainga akaita Matarhwa e Cihebheru, iyena wainga akafunda zvakawanda ngezva Djehovha. Asi iyena wainga ecindoda kufundazve. Zvezvirokwazvo, Firipi paakaona mwanarume uu mugwanza, iyena wainga ecierenga mupupuru we muphorofita Isaya. (Zvii. 8:28) Izvona zvainga zviri zvokwadi zvakadzika zvo Bhaibheri. Hino, mwanarume  uu we Etiópia wainga asikadi kundoziya basi fundo dzekutanga dze Bhaibheri, asi waida kuziya zvakawanda.

5. Mwanarume we ku Etiópia wakaseenzesa kudini zvaakafunda?

⁵ Mwanarume uu we ku Etiópia wainga ari mukuru-mukuru unokosha maningi wa Mambokadzi Kandase e ku Etiópia. Iyena wainga ari “muonereri we upfumi wake wese.” (Zvii. 8:27) Hino iyena wainga ari mwanarume wakabataikana maningi uye wainga ano mabasa akawanda. Kunyazi zvakadaro, iyena wakatora nguwa kuti anamate Djehovha. Iyena waida kuita zvakawanda pane kufunda basi cokwadi. Iyena waida kuseenzesa zvaaifunda. Hino iyena wakaita rhwendo, kubva ku Etiópia kuenda ku Djerusarema kuti akwanise kunamata Djehovha ari mu tempro. Rhwendo iri pamweni rakatora nguwa yakareba uye poseenzeswa mare yakawanda, asi mwanarume uu waida maningi kunamata Djehovha pasinei no zviro zvaizobatanidzwepo.

6-7. Cinyi caiita kuti rudo rainga no mwanarume we ku Etiópia kuna Djehovha rirumbwe recikura?

⁶ Firipi wakafundisa mwanarume we ku Etiópia ngezve zvokwadi zvinokosha kutobatanidzawo kuti Mesiya ainga ari ani. (Zvii. 8:34, 35) Mwanarume uu wakapfara maningi ngekuziya zvaakaizirhwa ndi Djesu. Asi iyena wakaitei mumasure mekufunda zviro izvi? Iyena wainga mwanarume waireremedzwa maningi mu gereja re Cidjudha uye iyena waikwanisa kurumbwa akadaro. Pane kudaro, rudo rake kuna Djehovha no ku Mwana Wake rakatunhudzira. Iyena wainga ashinga kuita cinjo yakakura mu upenyu yekubhabhatidzwa uye kugara muteeri wa Djesu Kristu. Firipi wakaona kuti mwanarume we ku Etiópia wainga akagadzirira ndiyo ndaa wakamubhabhatidza.

⁷ Imwimwi mucakwanisa kugadzirira kubhabhatidzwa kana mukateedzera muezaniso we ku Etiópia. Mucabvunzisa no rugondo rese raainga naro kuti: “Cinyi cingandipingaidza kubhabhatidzwa?” Ngatiwone zvamungaita kuti muite zviro zvimwe-zvimwezvo zvakaizwa no mwanarume we ku Etiópia: Iyena wairumbwa ecifunda, waiseenzesa zvaaifunda, uye rudo rake kuna Djehovha rairumbwa recikura.

8. Juau 17:3 inobhuyei ngezve zviro zvamunodikana kuita?

⁸ Erengai Juau 17:3. Masoko aya a Djesu akamubetsera kuti mude kufunda Bhaibheri here? Izvi ndizvona zvakaitika kune akawanda edu. Asi masoko aya anotikohomedzesawo kuti tirumbwe tecifunda here? Honde. Isusu atizombosii kufunda no “kuziya . . . Mwari umwe basi wecokwadi.” (Mup. 3:11) Isusu tirambwa tecifunda ngezva Djehovha nokusikaperi. Uye patinorumbwa tecifunda ngezvake, tinorumbwawo tecikhwederawo dhuze naye.—Pis. 73:28.

9. Munodikana kuitei mumasure mekufunda fundo dzekutanga dze Bhaibheri?

⁹ Zviri pamhene kuti patinotanga kufunda  ngezva Djehovha, isusu tinotanga kufunda mafundo ekutanga e Bhaibheri. Mu tsamba yake ku Ahebheru muphostori Pauro wakabhuya kuti fundiso idzona dzinoezaniswa no “zviro zvekutanga.” Iyena wainga asikadi kubhuya kuti “fundiso dzekutanga idzi” dzainga dzisikakoshi, pano kudaro, iyena waida kubhuya kuti zviro izvona zvinoezaniswa no mukaka unopaswa mwana mudoko. (Aheb. 5:12; 6:1) Ndiyo ndaa iyena wakakohomedzesa kuti Akristu apsvake zvakawanda kudarika fundiso dzekutanga dze Bhaibheri uye afunde ngezve zviro zvakadzika zviri mu Soko ra Mwari. Zvezvirokwazvo, imwimwi munopfarira kufunda fundo dzekutanga dze Bhaibheri. Asi imwimwi makagadzirira kurumbwa mecibudirira uye mecifunda ngezva Djehovha no zvinangwa zvake here?

10. Ngei amweni eciona kuti kufunda kunoshupha?

¹⁰ Ku akawanda edu kufunda aciropi ciri nyore. Kuzoti kamuri kei? Kodi zvaimuitira nyore kufundira zviro uye maipfarira kufunda here? Kana kuti zvaimushuphira uye dakara nyamasi uno imwimwi amupfariri kufunda? Ajinji anozwa kudaro, asi Djehovha angamubetserai. Djehovha akakwana uye pa ese, iyena ndi Mufundisi mukuru.

11. Djehovha anopangidza kudini kuti “Mufundisi Mukuru”?

¹¹ Djehovha wene anoti iyena ndi “Mufundisi wenyu Mukuru.” (Isa. 30:20, 21) Iyena ndi Mufundisi ano mwoyo unononoka kutsamwa, ano nyasha uye anozwisisa. Iyena anopsvaka zviro zvakanaka ku afundi. (Pis. 130:3) Uye iyena aaetseri zviya zvatisikakwanisi kuita. Edzurirai kuti ndiyena akaita urozvi we munhu uye iwona icipo cakanakisisa. (Pis. 139:14) Tese isusu tino cido cekufundira zviro zvipsva. Musiki wedu anoda kuti tirumbwe tecifundira nokusikaperi, uye kuti tidakadzwe nazvo. Ndiyo ndaa waizonga uri ungwaru kusakurira no “cido cakakura” ce zvokwadi zve Bhaibheri kubvira zvino. (1 Ped. 2:2) Sanangurai zvinangwa zvekuti mungakwanisa kuzvidzadzisa, uye erengai nokufunda Bhaibheri mazuwa ese. (Djs. 1:8) No rubetso ra Djehovha imwimwi mucatanga kuda kuerenga Bhaibheri no mabhuku edu uye nokunyasa kurangarira zviya zvamunonga mafunda.

12. Ngei zvecikosha kuti tifunde ngezve upenyu uye basa rekuparidzira ra Djesu?

¹² Garai mecidzipasa nguwa yekunyasa kurangarira ngezve upenyu uye basa rekuparidzira ra Djesu. Kana tecida kuseenzera Djehovha ngo mushobo wakanaka, zvinokosha maningi kuti titeedzere muezaniso wa Djesu, maka-maka mu nguwa dzinoshupha. (1 Ped. 2:21) Zvezvirokwazvo, Djesu akabhuya cokwadi paakabhuya kuti ateeri ake aizosongana no zvinetso. (Ruka 14:27, 28) Kunyazi zvakadaro, iyena ainga ano cokwadi cekuti ateeri ake aizorumbwa akagondeka kuna Djehovha hingana iyena. (Juau 16:33) Nyasai kufunda ngezve kuti upenyu wa Djesu wainga wakadini uye sanangurai mafundo manganani amaizopfarira kumuteedzera zuwa no zuwa.

13. Tinodikana kukumbirei kuna Djehovha, uye ngei?

¹³ Izvirokwazvo kuti ruziyo rinokosha, asi andizvopi zvega. Ruziyo riseenza kuti imwimwi mufunde zvakawanda ngezva Djehovha uye kuti murumbwe mecitunhudzira rudo uye kutenda kaari. (1 Ako. 8:1-3) Pamunorumbwa mecifunda zvakawanda ngezva Djehovha, mukumbirei kuti amubetsere kutunhudzira kutenda kenyu. (Ruka 17:5) Iyena anodaira minamato ii nguwa dzese. Kana imwimwi muno kutenda kakabamba kakawakirhwa pa zviya zvamunofunda ngezva Djehovha, mucakwanisa kuseenzesa zviya zvamunofunda.—Tig. 2:26.

14. Muphostori Pedru wakapangidza kudini kukosha kazvinoita kuti tiseenzese zviya zvatinofunda? (Onai mufanikiso.)

¹⁴ Eciseenzesa muezaniso wa Nowa, muphostori Pedru wakapangidza kuti zvinokosha maningi kuti tirumbwe teciseenzesa zviya zvatinofunda.  Djehovha akabvunza Nowa kuti aizounzisa ndambi huru kuti aparadze anhu akashata e mu nguwa iyona. Ngokuziya basi kuti kaizouya ndambi huru kainga kusikakwani kuti Nowa no mhuri yake aponeswe. Onai kuti Pedru wakaseenzesa soko rekuti “arka payainga yeciwakwa” ecibhuya ngezve nguwa yekuti Ndambi huru yainga isati yauya. (1 Ped. 3:20) Izvi zvinopangidza kuti Nowa no mhuri yake akaita maererano no zviya zvainga zvakarekethwa na Mwari uye akawaka arka. (Aheb. 11:7) Pedru wainga eciezanisa zvakaizwa na Nowa no rubhabhatidzo. Iyena wakatara kuti: “Rubhabhatidzo, iro rakaezana no izvi ririkumuponesawo zvino.” (1 Ped. 3:21) Hino tingaezanisa kupeta masimba kamuri kuita kuti mugadzirire kubhabhatidzwa nokupeta masimba kakaita Nowa no mhuri yake ke makore akawanda kuti awake arka. Munodikana kuitei kuti mugadzirire kubhabhatidzwa?

15. Mungapangidza kudini kuti makacinyuka zvezvirokwazvo?

¹⁵ Ciro cekutanga catinodikana kuita ngecekucinyuka no mwoyo wese pa zvitema zvedu. (Zvii. 2:37, 38) Isusu tinondokwanisa basi kuita cinjo dzinodiikanwa kana tikacinyuka zvezvirokwazvo. Imwimwi makakwanisa kusiya zviro zviya zvisikapfadzi Djehovha hingana kuita uhure, kubhema uye kureketa masoko anopsverusa here? (1 Ako. 6:9, 10; 2 Ako. 7:1; Aef. 4:29) Kana imwimwi musati makwanisa kusiya zviro izvona, musarembe, rumbwai meciedza. Kumbirai rubetso mufundisi wenyu we Bhaibheri kana kuti ku mukuru we ungano. Kana imwimwi muri djaha uye mecigara no abereki enyu, kumbirai rubetso rawo kuti mukwanise kusiya miitiro yese yakashata inomupingaidzai kuti musabhabhatidzwe.

16. Cinyi catinodikana kuita kuti tirumbwe tino urongwa wakanaka wekunamata?

¹⁶ Ciro cimweni cinokosha maningi ngecekugara no urongwa wakanaka wekunamata. Izvona zvinobatanidza kupinda misangano uye kupasawo mhinduro. (Aheb. 10:24, 25) Uye pamucatanga kubuda mu basa rekuparidzira, itai izvona nguwa dzese. Pamunorumbwa meciita basa iri rinoponesa upenyu, imwimwi mucanyasa kuripfarira. (2 Ti. 4:5) Kana imwimwi muri djaha uye muciri kugara no abereki enyu, dzibvunzisei kuti: ‘Kodi abereki angu anodikana kugara ecindiedzurira kuti ndinodikana kuenda ku misangano uye kubuda mu basa rekuparidzira here? Kana kuti inini wene ndinototanga kuita izvona?’ Kusama kuimira kubvunzwa kunopangidza  kuti imwimwi muno kutenda, munoda Djehovha uye munotenda ngo zviro zvese zvaanomuitirai. Hinga zvinorekethwa no Bhaibheri, imwimwi murikuita “mabasa okudzipira” kana kuti, zvinoita hingana kuti murikupasa cipo kuna Djehovha. (2 Ped. 3:11; Aheb. 13:15) Zvese zvatinopasa Djehovha no mwoyo wedu wese uye no cido cedu zvinopfadza Mwari wedu. (Ezanisirai na 2 Akorinti 9:7.) Katiri ndi mupfaro mukuru kupasa Djehovha zvakanakisisa zvedu.

17-18. Ciro cipi cinokosha cingamubetserai kuti mubudirire dakara pakubhabhatidzwa, uye ngei? (Zvierengo 3:3-6)

¹⁷ Pamunonga mecigadzirira kubhabhatidzwa, imwimwi mucasonganawo no zvitsinzwa zvakawanda. Anhu amweni acamusekai ngo zviya zvamunotenda uye amweni acamuzondai. (2 Ti. 3:12) Kusiya izvona, pamweni imwimwi mungahwirirazve kuita zviro zvamaipeta masimba kuti musiyane nazvo. Kana kuti nguwa dzimweni mungadzirhya mwoyo uye mosama kugara no mwoyo unononoka kutsamwa mecirangarira kuti imwimwi amuzombokwanisi kudzadzisa zvinangwa zvenyu. Kana zviri izvona, cinyi cingamubetserai kuti musarembe? Ciro cinokosha maningi—irudo renyu kuna Djehovha.

¹⁸ Kuda kamunoita Djehovha iciro cinokosha maningi uye ndi mazwiro akanaka amungagara nawo. (Erengai Zvierengo 3:3-6.) Rudo rakabamba kuna Djehovha ricamubetsera kurumbwa makagondeka. Kana mecida Djehovha, amuzorekeri kumuseenzera kunyazi mecibatana no matambudziko. Kakawanda kakhona, Bhaibheri rinobhuya ngezve rudo rakagondeka rina Djehovha ku aseenzi ake. Izvi zvinoreya kuti Djehovha aazombosii aseenzi ake kana kuti aazombosii kuada. (Pis. 100:5) Edzurirai kuti imwimwi makaizwa no mufanikiso wa Mwari. (Gen. 1:26) Hino mungapangidzawo kudini rudo rakagondeka?

19. Mungapangidzazve kudini kuti munotenda ngo zvese zvamunoizirhwa na Djehovha? (Agaratiya 2:20)

¹⁹ Ciro cekutanga catinodikana kuita kuti tigare no rudo rakagondeka ndikutenda. (1 Ate. 5:18) Garai mecidzibvunzisa kuti: ‘Djehovha anosopangidza kudini kuti anondida?’ Pedzepo pamunonga meciita munamato, tendai Djehovha mecibhuya maka-maka ngezve ciro caakamuitira. Djehovha anomuda maningi uye anosomuitira zviro zvakanaka. Edzai kuona zviro izvi hinga zvakaizwa ndi muphostori Pauro. (Erengai Agaratiya 2:20.) Dzibvunzisei kuti: ‘Inini ndinoda kupangidza Djehovha kuti ndinomudawo here?’ Rudo ramunaro kuna Djehovha  ndirona ricamubetsera kuti mushingirire miyedzo uye matambudziko amunosongana nawo. Rudo irona ndirona ricamubetsera kuti mubatikane pa zviro zvekunamata uye kuti mupangidze mazuwa ese kuna Djehovha kuti munomuda maningi.

20. Cinyi cinobatanidzwa pakudzipira kenyu kuna Djehovha, uye cisananguro icona cinokosha here?

²⁰ Nokuhamba ke nguwa, nge ndaa ye rudo ramunaro kuna Djehovha, imwimwi mucazwa cido cekuda kuita munamato unokosha kaari. Pamunamato uu imwimwi mucadzipira kuna Djehovha hinga museenzi wakadzipira wa Djehovha. Imwimwi muno kariro yakazonakisisa yokumuseenzera nokusikaperi. Pamunodzipira imwimwi munomugondesa kumuseenzera pazvinonga zvakanaka uye pazvinonga zvakashata mu upenyu wenyu. Imwimwi munodzipira kamwe basi pakudzipira kamunonga maita ke upenyu wese. Zvezvirokwazvo, ici cisananguro cinokosha camunonga maita mu upenyu wenyu. Asi rangarirai zvinoteera. Pa zvisananguro zvese zvamucaita mu upenyu wenyu, ici cinonga ciri ciro cinokosha. (Pis. 50:14) Sathani ucaedza kurembesa rudo ramunaro kuna Djehovha. Iyena unoda kuti musiye kugondeka kuna Djehovha. Asi musasiye Sathani ecimukunda! (Djobo 27:5) Kana rudo renyu kuna Djehovha rakabamba, imwimwi mucakwanisa kudzadzisa mhiko yamakaita kaari pamakadzipira, uye mucanyasa kukhwedera dhuze na Baba enyu e kudenga Djehovha.

21. Ngei teciti kubhabhatidzwa kunonga kusiripi mugumo, asi kuti kunonga kuri kutangisa?

²¹ Mumasure mekudzipira kuna Djehovha, cedzai no akuru e mu ungano enyu kuti muite danho rinoteera. Asi garai meciedzurira kuti amudikani kugumira basi pakubhabhatidzwa meciti zvapera. Kubvira pa nguwa yamunobhabhatidzwa, imwimwi munonga mecitotanga upenyu wekuseenzera Djehovha nokusikaperi. Ndiyo ndaa bambisai rudo renyu na Djehovha kubvira zvino. Garai no zvinangwa kuti rudo rudo renyu kuna Djehovha rirumbwe recikura zuwa no zuwa. Kuita izvona kucaita kuti mugume pakubhabhatidzwa, zuwa rinokosha mu upenyu wenyu. Asi edzurirai kuti kuita izvona, munonga mecitotangisa. Tinoetsera kuti rudo ramunaro kuna Djehovha no ku Mwana wake ricarumbwa recikura nokusikaperi!