MUSORO WE KUFUNDA 14
“Nge ndaa Yazvo Ese Acaziya kuti Muri Afundi Angu”
“Ngekudaro anhu ese acaziya kuti muri afundi angu—kana muno rudo pakati penyu.”—JUAU 13:35.
NGOMA 106 Sakurira Wara re Rudo
ZVATICAFUNDA a
Mugumisiro upi unooneka anhu akawanda paanoona rudorinopangidzwa no Apupuri a Djehovha? (Onai ndima 1)
1. Anhu akawanda anoonei paanopinda misangano yedu kekutanga? (Onai mufanikiso.)
RANGARIDZAI ngezve kazado imweni painopinda misangano ye Apupuri a Djehovha kekutanga. Iyona inoshamisika nge mushobo wainotambirhwa uye inoona rudo riripo pakati pedu. Painohwirira kumba, mukadzi unoti ku mwamuna: ‘Munoziya, Apupuri a Djehovha akasiyana maningi no anhu amweni, uye inini ndapfara maningi ngekupinda nawo musangano.’
2. Ngei amweni akasiya kuseenzera Djehovha?
2 Rudo riri pakati pe anhu a Djehovha rinokosha. Asi zviri pamhene kuti Apupuri a Djehovha anhuwo asikazi kukwana. (1 Juau 1:8) Patinonyasa kuziya hama dze mu ungano, zvinogara nyore kuona zvishaishi zvawo. (Aro. 3:23) Zvinotsukwarisa kuti amweni akatendera kuti kusama kukwana ke amweni kuite kuti asiye kuseenzera Djehovha.
3. Zvaizokwanisika kudini kuona ateeri a Djesu e zvirokwazvo? (Juau 13:34, 35)
3 Onaizve tsamba iri kutungamirira fundo ino. (Erengai Juau 13:34, 35.) Cinyi cinopangidza kuti aya ateeri a Djesu e zvirokwazvo? I rudo, haiwa kukwana. Onai kuti Djesu aazi kubhuya kuti: ‘Nge ndaa yazvo imwimwi mucaziya kuti muri afundi angu.’ Asi iyena akati: “Ngekudaro anhu ese acaziya kuti muri afundi angu.” Djesu akadjekesa pamhene kuti ateeri ake andiwopi basi aizoziya kuti pakati pe ungano pano rudo asi anhu amweni e kunze aizozvionawo.
4. Amweni angadzibvunzisei nge ndaa ye Akristu e zvirokwazvo?
4 Aya asiripi Apupuri a Djehovha pamweni angadzibvunzisa kuti: ‘Rudo rinopangidza kudini kuti uu muteeri wa Djesu? Djesu akapangidza rudo ku aphostori ake nge mushobo upi ? Uye zvinobvira kudini kuteedzera muezaniso wa Djesu mazuwa ano?’ Kunyazi hazvo tiri Apupuri a Djehovha akabhabhatidzwa tinodikanawo kurangarira mhinduro dze mibvunzo idzi. Kana tikaita kudaro zvicatiitira nyore kuti tipangidze rudo, kunyanya paya patinobatana no kusama kukwana ke amweni.—Aef. 5:2.
NGEI RUDO NDIWO MUSHOBO UMWE BASI WEKUZIYA NDIWO ATEERI A DJESU?
5. Masoko a Djesu ari pana Juau 15:12, 13 anoreyei?
5 Djesu akabhuya kuti afundi ake aizoda umwe na umwe nge mushobo wakanakisisa. (Erengai Juau 15:12, 13.) Onai mutemo waakapaswa ndi Djesu wekuti: “Dananai hinga mushobo wandakakudaiwo.” Izvona zvinoreyei? Djesu akapanganidzira ateeri ake kuti awona aidikana kuda amweni awo, kupida mushobo waanodziita, kana kuti awona anodikana kugara akadzipira kunyazi kutopasa upenyu wawo kana zvecibvira. b
6. Soko ra Mwari rinopangidza kudini kukosha ke rudo?
6 Bhaibheri Soko ra Mwari rinofundisa kuti rudo rinokosha maningi. Ngo muezaniso, tsamba ya 1 Juau 4:8 inoti: “Mwari rudo,” na Mateu 22:39 inoti: “Ida mudoni wako hingana mushobo waunodziita,” na 1 Pedru 4:8 inoti: “Rudo runofukidza zvitema zvakawanda,” uye na 1 Akorinti 13:8 inoti: “Rudo arimboperi” ndi dzimwe dze tsamba dzinonyanya kupfarirhwa no anhu akawanda. Uye tsamba idzi no dzimweni dzinopangidza pamhene kuti zvinokosha maningi kuti tipangidze wara iri rakanaka.
7. Ngei Sathani asikazombokwanisi kubatanidza anhu mu rudo recokwadi?
7 Amweni anodzibvunzisa kuti: ‘Ndingaziya kudini gereja re zvirokwazvo? Magereja ese anobhuya kuti anofundisa cokwadi, asi rimwe na rimwe rinofundisa zvakasiyana-siyana ngezva Mwari.’ Sathani wakakwanisa kuvhiringidza anhu akawanda ngekuita kuti paoneke magereja akawanda e kunyepa. Asi iyena aangakwanisi kubatanidza anhu e nyika dzakawanda kuti aumbe mhuri ino anhu anodanana. Djehovha basi ndiye anokwanisa kuita zviro izvi. Izvona zvino musoro ngekuti rudo re zvirokwazvo rinobva kuna Djehovha uye aya basi ano mwiya mucena no makomborero a Djehovha ndiwo angakwanisa kugara no rudo re zvirokwazvo pakati pawo. (1 Juau 4:7) Azvitishamisi here kuona zvakabhuiwa na Djesu zvekuti rudo raizopangidza Akristu e zvirokwazvo?
8-9. Anhu akawanda anozwa kudini mumasure mekuona rudo rino Apupuri a Djehovha?
8 Hingana zvakabhuiwa na Djesu, anhu akawanda mazuwa ano anokwanisa kuziya kuti Akristu e zvirokwazvo ndiapi nge ndaa ye rudo raanopangidzirana. Ngo muezaniso, hama imweni inozwi Ian inoedzurira ciro cakaibaya mwoyo paakapinda gungano kekutanga. Gungano irona rakaizirhwa padhuze no panyumba payo pa mbuto imweyo yaainga amboona mutambo we bhora mu mwedzi dzainga dzadarika. Iyona inoti: “Migariro yainga yakasiyana. Apupuri a Djehovha ainga akarongeka, akapfeka zvakanaka, uye ana awo ainga ano tsika dzakanaka.” Iyona inotunhudzira yeciti: “Awona aiita hingana kuti ano runyararo mukati mawo uye izvi ndizvona zvandaida. Inini andicaedzuriri musoro upi hawo we mharidzo dzakaizwa zuwa irona, asi kurongeka ke Apupuri a Djehovha kakagara mundangariro dzangu.” c Zvakaonekwa ndi Ian pa zuwa irona zvinopangidza kuti apana ciro cimweni cinopinda rudo ratinaro ku umwe na umwe wedu. Kana tecida hama no hanzvadzi dzedu, tinodzibata no nyasha uye no rureremedzo.
9 Hama imweni inozwi John yakazwawo zvimwe-zvimwezvoo peyakatanga kupinda misangano pa Nyumba ye Umambo. Iyona inoti: “Ndakashamisika nge kubatana kaaiita . . . awona aiita hingana acena—rudo rawo rezvirokwazvo rakaita kuti ndigare nerugondo rekuti ndagumira cokwadi.” d Maeshiperiyesiya aya no amweni anoita kuti tigare no cokwandi cekuti Apupuri Djehovha Akristu e zvirokwazvo.
10. Ndipapi patinomukana wekupangidza kuti tinoda hama dzedu? (Onai masoko e pasi.)
10 Hingana zvataona pakutanga ke fundo ino, mu ungano amuna munhu wakakwana. Pamweni paya, hama dzedu dzingareketa kana kuita zviro zvingatitsamwisa. e (Tig. 3:2) Kana izvona zvikaitika tingapangidza rudo re Cikristu ku hama dzedu nge mushobo watinoita. Ciro cingatibetsera ngecekuona kuti ngacipi catingafunda kubva pa muezaniso wa Djesu?—Juau 13:15.
DJESU AKAPANGIDZA KUDINI KUTIAIDA APHOSTORI AKE?
Djesu akabata aphostori ake nge mushobo uno rudo kunyazi paaishaisha (Onai mandima 11-13)
11. Kodi muphostori Tiyago na Juau ainga ano maonero api akashata? (Onai mufanikiso.)
11 Djesu ainga asikaetseri kuti afundi ake agare akakwana. Pano kudaro, Djesu akaabetsera kuti abudirire pakusama kukwana kawo uye kuti atenderhwe ndi Djehovha. Zuwa rimweni, aphostori airi a Djesu, Tiyago na Juau, akabvunza mai awo kuti akumbire Djesu kuti apaswe mbuto yakakhwirira mu Umambo. (Mat. 20:20, 21) Zvakaizwa ndi Tiyago na Juau zvaipangidza maonero e kudzikudza ngekuti aidziona hingana anokosha maningi kupinda amweni.—Zvie. 16:18.
12. Kodi Tiyago na Juau ndiwona ega akapangidza maitiro akashata here? Panganidzai.
12 Tiyago na Juau andiwopi ega akapangidza maonero akashata panguwa iyona. Onai kuti ngazvipi zvakaizwa nge aphostori amweni: “Afundi amweni gumi paakazvizwa, akanyangadzirhwa Tiyago na Juau.” (Mat. 20:24) Zvinoita kuti tirangaridze Tiyago na Juau, no aphostori amweni ecireketedzana. Pamweni awona aireketa zviro zvakaita hingana izvi: ‘Imwimwi munorangarira kuti muri ani munoda kupaswa mbuto yakakhwirira mu Umambo? Imwimwi andimwipi mwega makaseenza makagondeka pamwepo na Djesu. Isusu takasisirawo izvona!’ Pasinei no zvakaitika, aphostori akakanganwa kukosha ke kudanana uye kupangidzirana usisi.
13. Djesu akaitei paaibatana nokusama kukwana ke aphostori ake? (Mateu 20:25-28)
13 Pamugariro uu Djesu akaitei? Iyena akarumbwa ano mwoyo unononoka kutsamwa. Uye iyena aazi kubhuya kuti waizosanangura aphostori amweni akanaka, anodzidodosa uye ano rudo. Pane kudaro, Djesu akacedza nawo nge mushobo wakanaka ngekuti aiziya kuti aida kuita zvakanaka. (Erengai Mateu 20:25-28.) Aka kainga kusiripi kekutanga kana kekupedzesera. Aphostori akareketedzanazve ecida kuziya kuti ndiyani ainga ari mukuru pakati pawo, asi kunyazi zvakadaro Djesu akaapangidzira nyasha.—Mark. 9:34; Ruka 22:24.
14. Aphostori a Djesu akakurira mumigariro ipi?
14 Apana mubvunzo kuti Djesu airangarira ngezve tsika no marererhwo e aphostori ake. (Juau 2:24, 25) Awona akakurira mu mbuto yekuti akuru akuru e magereja aifundisa kuti munhu unokosha kana ano mbuto yakakhwirira. (Mat. 23:6; onai vhidhiyo yakazwi: Primeiros assentos na sinagoga pa masoko e pasi e kufunda a Mateu 23:6.) Atungamiriri e Cidjudha aidziona hingana akuru kupinda amweni. f (Ruka 18:9-12) Djesu aiziya kuti zvese izvi zvaikwanisa kubata-bata mushobo waidziona aphostori ake uye mushobo waaiona amweni. (Zvie. 19:11) Djesu aiziya kuti afundi ake aikwanisa kushaisha uye aiyapangidzira mwoyo unononoka kutsamwa. Iyena aiziya kuti afundi ake ainga ano mwoyo wakanaka, ngekudaro akadzipasa nguwa kuti afundise aphostori ake kuti agare anodzidodosa uye kuti apangidze rudo.
TINGATEEDZERA KUDINIMUEZANISO WA DJESU?
15. Tinofundei kubva pa zviro zvakaitika kuna Tiyago na Juau?
15 Tinokwanisa kufunda zviro zvakawanda kubva ku zvakaitika kuna Tiyago na Juau. Kukumbira mbuto yakakhwirira ye Umambo zvainga zviri zviro zvakashata. Asi aphostori amweni aingawo ano marangariro akashata ngekutendera kuti izvona zviaparadzanise. Asi Djesu, akabata aphostori ese 12 no unaki uye rudo. Ngazvipi zvatinofunda? Cinokosha azviropi zviya zvinoizwa no hama dzedu asi ndi zviya zvatinoita kana tikashaishirhwa. Ngazvipi zvingatibetsera? Patinonyangadzisana no hama imweni, tinodikana kudzibvunzisa kuti: ‘Ngei zvaaita zvandibata-bata maningi? Izvona zvinopangidza kuti paripo pandinoda kugadzirisa here? Kodi hama iyona iri kusongana no zvinetso? Kunyazi ndeciona kuti ndinocikonzero cakanaka cekuti nditsamwe, ndingakwanisa kupangidza rudo uye kutomurekerera?’ Patinobata amweni no rudo, tinopangidza kuti tiri ateeri a Djesu e zvirokwazvo.
16. Tingafundeizve ngezve muezaniso wa Djesu?
16 Muezaniso wa Djesu unotibetsera kuona kukosha kekuzwisisa hama dzedu. (Zvie. 20:5) Izvirokwazvo kuti Djesu anokwanisa kuona zviri mu mwoyo. Asi isusu atikwanisi. Kunyazi zvakadaro, isusu tinokwanisa kutendera kutama kukwana ke hama no hanzvadzi dzedu. (Aef. 4:1, 2; 1 Ped. 3:8) Ciro cingatibetsera kuita izvona kunyasa kuziya zvakanaka hama dzedu.
17. Muonereri we nharaunda wakabetsereka kudini ngekunyasa kuziya hama imweni?
17 Muonereri umweni we nharaunda unoseenza ku África Oriental unoedzurira hama imweni yainga ino maitiro aiita hingana anoshupa kushingirira. Ngacipi cakaizwa nge muonereri we nharaunda? Iyena wakati: “Pano kuti ndizonde hama iyona, inini ndakasanangura kunyasa kuiziya.” Paakaita izvona iyena wakakwanisa kuona kuti mushobo wakarerhwa hama ii wainga usiripi nyore uye izvona zvaibata-bata mushobo waaibatawo amweni. Muonoreri we nharaunda unoenderera mberi eciti: “Pandakazwisisa kuti zvaishupha kudini kuti hama ii iite cinjo kuti igarisane no amweni zvakanaka uye kuti i cinjo dzipi dzaainga aita, inini ndakashamisika uye isusu takagara shamwari dzakanaka.” Paya patinokwanisa, kuita zvese kuti tizwisise hama dzedu mushobo wadzinozwa zvinogara nyore kudzida.
18. Mibvunzo dzipi dzatinodikana kudziita kana hama ikatishaishira? (Zvierengo 26:20)
18 Nguwa dzimweni, tinozwa tecida kucedza no hama yedu inonga yakatishaishira kuti tigadzirise nyaya yakhona. Asi zvakanaka kutanga tadzibvunzisa kuti: ‘Inini ndinonyasa kuziya zvese zvakaitika here?’ (Zvie. 18:13) ‘Kodi iyena wakaita izvona ngekuda kake here?’ (Mup. 7:20) ‘Kodi inini ndakamboita cishaishi hingana icona?’ (Mup. 7:21, 22) ‘Kana inini ndikacedza naye, nyaya yandiri kuda kuedza kugadzirisa ingabambirira here?’ (Erengai Zvierengo 26:20.) Kana tikatora nguwa kuti tirangarire ngezve mibvunzo idzi, tinoguma pakuziya kuti cinonyaya kukosha kupangidza rudo uye kusiya nyaya yakhona yakadaro.
19. Imwimwi mashinga kuitei?
19 Apupuri a Djehovha anopangidza kuti afundi a Djesu e zvirokwazvo ngekuti anopangidza rudo ku hama no hanzvadzi dzawo pasinei nokutama kukwana kawo. Uye umwe na umwe wedu anopangidza kuti muteeri wa Djesu paanopangidza rudo rezvirokwazvo ku hama no hanzvadzi. Patinoita izvona amweni anokwanisa kuzwisisa kuti isusu tiri sangano rezvirokwazvo uye acadawo kunamata Mwari wedu ano rudo Djehovha. Hino tasanangura kurumbwa tecipangidza rudo rinopangidza kuti tiri Akristu e zvirokwazvo.
NGOMA 17 “Ndinoda”
a Anhu akawanda anoda kufunda cokwadi nge ndaa ye rudo raanoona pakati pedu. Asi isusu tiri anhu asikazi kukwana, pamweni paya zvingatishuphira kuti tipangidzire rudo kuno amweni edu. Ndiyo ndaa ticaona kuti ngei rudo recikosha uye tingateedzera kudini muezaniso wa Djesu patinobatana nokusama kukwana ke amweni.
b Onai bhuku rakazwi: “Uya Uve Muteveri Wangu,” fundo 17, mandi. 10-11, mu ciShona.
c Onai fundo inoti: “Upenyu hwangu hwava nechinangwa,” mu Murindiri wa 1 ya Novembro ya 2012, mapaji. 13-14, mu ciShona.
d Onai fundo yakazwi: “Zvaiita sokuti upenyu hwangu hwaingondifambira zvakanaka,” mu Murindiri wa 1 ya Mayo ya 2012, mapaji. 18-19, mu ciShona.
e Ngekudaro atiripi kubhuya citema cakakura cinodikana kugadziriswa nge akuru e ungano hingana zvinobhuiwa pana 1 Akorinti 6:9, 10.
f Pano zvinopangidza kuti mumakore akazoteera mu rabhi umweni wakati: “Mu nyika muno anhu akagondeka asikagumi 30 akaita hingana Abrahamu. Pakaoneka anhu anokwana kuita 30, inini no mwana wangu tiri airi akhona; kana ari 10, inini no mwana wangu tiri airi akhona; kana ari 5, inini no mwana wangu tiri airi akhona; kana ari 2, ndini no mwana wangu; asi kana ari 1, ndini basi.”
