1-2. Zvinyi zvatinosoona pa zuwa re rubhabhatidzo, uye munodikana kunyasa kurangarirei?

 IMWIMWI makamboona cikwata ce aya arikuda kubhabhatidzwa pa gungano re nharaunda kana kuti re mutanha here? Zvinoita kuona mazwiro aanonga anawo paanonga ecidaira mibvunzo miiri asati abhabhatidzwa. Imwimwi munoona hama no shamwari dzawo dzecipfara maningi. Paanonga ecibuda mu mvura imwimwi munooona anhu ecipondera nyara uye kupfara kaanonga eciita. Masumana ese, mamirionji e anhu arikuita matanho aya, ecigara Apupuri a Djehovha akadzipira uye akabhabhatidzwa.

² Uye zvakadini nemwi? Kana imwimwi mecirangarira kubhabhatidzwa, garai meciziya kuti muri munhu unokosha mu nyika ino inocidima “mecipsvaka Djehovha.” (Pis. 14:1, 2) Kudai muri mudjaha kana kuti macembera fundo ino yakagadzirirhwa imwimwi. Asi kudai makabhabhatidzwa fundo ino icamubetsera kuti murumbwe mecibambisa kuseenzera kenyu Djehovha nekusikaperi. Hino ngationgorore mafundo matatu atinawo ekuseenzera Djehovha.

3. Ngei aseenzi a Djehovha ecida cokwadi no unatsi? (Pisarema 119:128, 163)

³ Djehovha akabvunza anhu ake kuti “ade cokwadi.” (Zak. 8:19) Uye Djesu akabvunza ateeri ake kuti aseenze no simba pakupsvaka zviro zvino unatsi. (Mat. 5:6) Izvi zvinoda kubhuya kuti tinodikana kugara no cido cakabamba cokuita zvinobhuiwa na Djehovha kuti tigare anhu ano unatsi uye akanaka. Imwimwi munoda zviro zvakanaka uye unatsi here? Tino cokwadi cokuti honde. Imwimwi munozonda kunyepa uye no zviro zvese zvakashata. (Erengai Pisarema 119:128, 163.) Munhu wese unonyepa unoteedzera unhu wa Sathani, mutongi we nyika ino. (Juau 8:44; 12:31) Cimwe ce cinangwa ca Sathani ngecekusvipisa  zina cena ra Djehovha. Kubvira paakapanduka mu munda we Edheni, Sathani urikurumbwa ecibararisa manyepo ngezva Mwari. Sathani unoedza kuita kuti anhu arangarire kuti Djehovha mutongi anodzikudza asina unatsi uye anoramba zviro zvakanaka ku anhu. (Gen. 3:1, 4, 5) Manyepo anorekethwa ndi Sathani ngezva Djehovha anoshaisha marangariro ne mwoyo ye anhu. Anhu paanosanangura kutama “kuda cokwadi,” Sathani ungakwanisa kuapfuridzira eciita mushobo wese we zviro usina unatsi uye wakashata.—Aro. 1:25-31.

4. Djehovha anopangidza kudini kuti ndi “Mwari we cokwadi”? (Onai mufanikiso)

⁴ Djehovha ndi “Mwari we zvirokwazvo” ndiyo ndaa nge mushobo we unaki iyena unofundisa cokwadi aya anomuda. (Pis. 31:5) Ngekuita, kudaro Djehovha anoabetsera kuti asacengedzwe ngo manyepo a Sathani. Djehovha anoabetserawo kuti agare akagondeka uye ne unatsi. Izvona zvinobetsera ku aya anoda Djehovha kuti azwe rudo re zvirokwazvo uye runyararo. (Zvie. 13:5, 6) Imwimwi munorangarirawo izvona here kuti Djehovha wakamuitiraiwo izvona pamaifunda Bhaibheri? Imwimwi makafunda kuti mushobo unoita Djehovha zviro wakanaka maningi ku anhu ese uye kamuri imwimwi pacenyu. (Pis. 77:13) Ngokudaro imwimwi munoda kuita zviya zvinobhuiwa na Djehovha kuti zvino unatsi. (Mat. 6:33) Imwimwi munoda kudziirira cokwadi, uye kupangidza kuti zvinobhuiwa na Sathani ngezva  Mwari wedu ngezve manyepo. Imwimwi mungazviita kudini?

5. Mungapangidza kudini kuti murikutsigira cokwadi uye unatsi?

⁵ Imwimwi mungakwanisa kupangidza kuti munorarama nge mushobo unopangidza ku anhu ese kuti: ‘Imwimwi munozonda manyepo a Sathani, uye munotsigira cokwadi. Imwimwi munopangidza pamhene kuti munoda kutongwa na Djehovha uye kutsigira zviya zvaanoti zvakanaka.’ Imwimwi mungazviita kudini? Ngekuita munamato kuna Djehovha mecimugondesa kumuseenzera uye ngokudzipangidza pakubhabhatidzwa pano anhu akawanda. Rudo re cokwadi uye no unatsi ndizvo zvinotiitisa kuti tibhabhatidzwe.

6. Zvikonzero zvipi zviri pana Pisarema 45:4 zvinoita kuti tide Djesu Kristu?

⁶ Ngei imwimwi mecida Djesu Kristu? Tinozvikonzero zvakanaka zvekuti timude zviri pana Pisarema 45:4. (Erengai.) Djesu anoda cokwadi, anodzidodosa uye anounatsi,  zvakanaka maningi kuti imwimwi mude Djesu Kristu.  Izvirokwazvo kuti Djesu wakadziirira no ushingi cokwadi uye unatsi. (Juau 18:37) Asi, Djesu wakapangidza kudini kuti tinodikana kugara anhu anodzidodosa?

7. Djesu anoteedzera kudini Djehovha?

⁷ Djesu akatipasa muezaniso wekudzidodosa. Iyena nguwa dzese, anopasa rukudzo kuna Baba ake, haiwa iyena pacake. (Mark. 10:17, 18; Juau 5:19) Munozwa kudini pamunoona kudzidodosa ka Djesu? Kudzidodosa kakadaro akumuitisi kuti mude maningi Mwana wa Mwari uye mude kumuteedzera here? Zviri pamhene kuti honde. Asi Djesu anodzidodosa ngei? Ngekuti Djehovha anodzidodosa uye Djesu anoda uye anoteedzera muezaniso wa Baba ake. (Pis. 18:35; Aheb. 1:3) Izvi azvimuiti kuti mude kukhwedera dhuze na Djesu ngekuti iyena anonyasa kuteedzera mawara a Djehovha here?

8. Ngei tecida Djesu hinga Mambo wedu?

⁸ Isusu tinoda kuti Djesu agare Mambo wedu ngekuti iyena ndi Mutongi akasisira. Mwari pacake akafundisa Mwana wake uye akamugadza kuti atonge. (Isa. 50:4, 5) Rangariraiwo ngezve rudo rakakura raakatipangidzira. (Juau 13:1) Hinga Mambo wedu, Djesu akasisira rudo redu. Djesu akapanganidza kuti aya anomuda zvezvirokwazvo—aya aanodainzwa kuti i shamwari dzake, anopangidza kuti anomuda ngekutondowedza mitemo yake. (Juau 14:15; 15:14, 15) Makomborero akakura kugara shamwari ye Mwana wa Mwari!

9. Rubhabhatidzo redu rakaezana papi no ra Djesu?

⁹ Umwe we mutemo wa Djesu ngewekuti ateeri ake anodikana kubhabhatidzwa. (Mat. 28:19, 20) Uye iyena kamare akatopasa muezaniso wazvo. Rubhabhatidzo ra Djesu rakatosiyanawo no redu nge mushobo umweni. (Onai bhokisi rakazwi “ Rubhabhatidzo ra Djesu Rakasiyana Papi no Rubhabhatidzo re Ateeri Ake.”) Kunyazi zvakadaro, mishobo miiri ii ye kubhabhatidzwa pane payakaezana. Asi Djesu paakabhabhatidzwa, akadzipira kuti aite kuda ka Baba ake. (Aheb. 10:7) Nge mushobo umwewo, patinobhabhatidzwa tinonga tecipangidza pamhene kuti takadzipira kuna Baba edu Djehovha. Kubvira panguwa iyona ciro cinokosha katiri kuita kuda ka Djehovha, haiwa kuita cido cedu. Patinoita izvona tinonga teciteedzera muezaniso wa Tenzi wedu Djesu.

10. Cinyi cinodikana kumuitisa kuti mubhabhatidzwe?

¹⁰ Rangarirai padoko nge zviya zvamaakuziya ngezva Djesu. Imwimwi maakuziya kuti Djesu ndi Mwana wa Mwari wekutanga uye kuti iyena akasanangurhwa kuti atonge nyika hinga Mambo. Imwimwi munoona kuti Djesu anonyasa kuteedzera kudzidodosa ka Baba ake. Makafunda kuti Djesu akarhyisa anhu akawanda ainga ano nzara, akanyaradza ainga akaora mwoyo, uye akatorapa airhwara. (Mat. 14:14-21) Munokwanisa kuona kuti Djesu arikutungamirira kudini ungano nyamasi uno. (Mat. 23:10) Uye imwimwi munozviziyawo kuti hingana Mambo we Umambo wa Mwari, iyena acaita zviro zvakawanda mune ramangwana. Hino mumasure mekuti marangarira zvese izvi mungapangidza kudini kuti munoda Djesu? Ngekuteedzera muezaniso wake. (Juau 14:21) Ciro cekutanga camunodikana kuita ngecekudzipira kuna Djehovha uye mobhabhatidzwa.

11. Ngacipi cikonzero catinaco cinonyanya kukosha cinotiita kuti tibhabhatidzwe, uye ngei?

¹¹ Cikozero cipi cinonyanya kukosha catinaco cinotiitisa kuti tibhabhatidzwe? Djesu akapasa mhinduro paakabhuya kuti ngaupi mutemo unonyanya kukosha watakapaswa na Djehovha. Iyena wakati: “Ida Djehovha Mwari wako no mwoyo wako wese no mwiya wako wese no ndangariro dzako dzese uye no simba rako rese.” (Mark. 12:30) Masoko aya anopangidza kuda kamunoita Djehovha here?

12. Ngei imwimwi mecida Djehovha? (Onai mufanikiso.)

¹² Pano zvikonzero zvakawanda zvinoita kuti  tide Djehovha. Ngo muezaniso, imwimwi makafunda kuti iyena ndi “manyuku e upenyu” uye ndiye Mupi we “zviro zvakanaka uye we zviro zvese zvakakwana.” (Pis. 36:9; Tig. 1:17) Djehovha Mwari wedu ano rupo uye ano rudo, akatipasa zvese zviya zvatinazvo mu upenyu.

13. Ngei rusudzunuro ciri cipo cinonyanya kukosha?

¹³ Cibairo ca Djesu Kristu cipo cakanaka catakapaswa na Djehovha. Ngei tecibhuya kudaro? Ngo muezaniso onai kuti Djehovha na Djesu ano ushamwari wakakura kudini. Djesu wakati: “Baba anondida” uye “Inini Ndinowada.” (Juau 10:17; 14:31) Djehovha na Djesu akagara ese ke mabhirionji e makore. Ndiyo ndaa ushamwari wawo wakakura maningi. (Zvie. 8:22, 23, 30) Hino cimbonyasai kurangarira kurhwadziwa kakaita Djehovha paakatendera kuti Mwana wake arhwadziwe dakara kufa. Djehovha anoda anhu—kutobatanidzawo na imwimwi—zvekutoti wakatipasa Mwana wake anodiwa hinga cibairo kuti atipase mukana wekurarama nokusikaperi. (Juau 3:16; Aga. 2:20) Rusudzunuro cipo cikuru catinaco cokuti tide Mwari.

14. Cinangwa cipi cakanakisisa mu upenyu camungagara naco?

¹⁴ Rudo renyu na Djehovha rakarumbwa recikura panguwa yamairumbwa mecifunda ngezvake. Zvezvirokwazvo imwimwi munoda kurumbwa mecikhwedera dhuze naye nokusikaperi. Izvona zvinokwanisika. Djehovha  anomukumbirai kuti mupfadze mwoyo wake. (Zvie. 23:15, 16) Imwimwi munokwanisa kuita izvi haiwa basi ngekubhuya asi ngezviito. Ngemushobo wamunorarama zvicapangidza kuti imwimwi munoda Djehovha. (1 Juau 5:3) Ici cinangwa cakanaka camucakwanisa kugara naco mu upenyu.

15. Imwimwi mungapangidza kudini kuti munoda Djehovha?

¹⁵ Mungapangidza kudini rudo renyu kuna Djehovha? Cokutanga, itai munamato unokosha kuna Mwari mecimugondesa kumuseenzera. (Pis. 40:8) Pedzepo, pangidzai cisananguro cenyu ngekubhabhatidzwa. Hingana zvatawona mu fundo ino, rubhabhatidzo i danho rinokosha mu upenyu wedu. Munonga mecitangisa upenyu upsva wamusikadziraramiri pacenyu, asi meciraramira Djehovha. (Aro. 14:8; 1 Ped. 4:1, 2) Ici cinoita hingana kuti idanho rakakura, uye idanho rakatokuradi. Asi danho iri rinofungura musuwo we upenyu wakanaka. Hino mungazviita kudini?

16. Maererano na Pisarema 41:12, Djehovha acakomborera kudini aya anodzipira kaari?

¹⁶ Djehovha munhu ano rudo kupinda ese. Pasinei no zvatinomupasa Djehovha nguwa dzese unotipasa zviro zvakawanda. (Mark. 10:29, 30) Iyena ucatipasa upenyu uno cinangwa, uye wakanaka uripo kunyazi mu nyika ino yakashata yaakuda kupera. Uku kutanga hako basi. Upenyu wamucada kurarama mumasure mekubhabhatidzwa ungagara nokusikaperi. Imwimwi mungarumbwa meciseezera Baba enyu ano rudo ekudenga nekusikaperi. Rudo renyu kuna Djehovha ringarumbwa recikura, uye mucararama nekusikaperi pamwepo naye.—Erengai Pisarema 41:12.

17. Zviro zvipi zvamungapasa Djehovha?

¹⁷ Pamunodzipira upenyu wenyu kuna Mwari mobhabhatidzwa, imwimwi munogara no makomborero ekupasa zviro zvinokosha kuna Djehovha. Zviro zvese zvakanaka zvamunazvo, nguwa yenyu yamunayo, icipo cakabva kuna Djehovha. Imwimwi mungapasa Muridzi we denga no nyika, kugondeka kaari uye kumuseenzera no mwoyo wese. (Djobo 1:8; 41:11; Zvie. 27:11) Tingaseenzesa kudini upenyu wedu nge mushobo wakanaka? Zviri pamhene kuti rudo ramunaro  kuna Djehovha cikonzero cakanaka cinoita kuti mubhabhatidzwe.

18. Mibvunzo dzipi dzamunodikana kudziita?

¹⁸ Imwimwi munoda kubhabhatidzwa here? Ndimwi mungakwanisa kudaira mubvunzo uu. Asi zvakanakawo kudzibvunzisa kuti: ‘Ndirikuetserei?’ (Zvii. 8:36) Edzurirai ngezve zvinangwa zvitatu zvataona mu fundo ino. Cekutanga, imwimwi munoda zviro zvakanaka uye zvino unatsi. Cimbodzibvunzisei kuti: ‘Inini ndinoda kurarama mu nyika mekuti anhu ese anoreketa cokwadi uye ano unatsi here?’ Cecipiri, imwimwi munoda Djesu Kristu. Dzibvunzisei kuti: ‘Inini ndinoda kuti Mwana wa Mwari agare Mambo wangu uye ndinoda kuteedzera muezaniso wake here?’ Cecitatu cinopinda zvese ngecekuti imwimwi munoda Djehovha. Cimbodzibvunziseizve kuti: ‘Inini ndinoda kupfadza mwoyo wa Djehovha ngekumuseenzera here?’ Kana mhiduro yenyu iri yekuti honde pa mibvunzo dzese idzi, hino ngei musikabhabhatidzwi? Murikuetserei?—Zvii. 16:33.

19. Panganidzai kuti ngei musikadikani kupsveruka kubhabhatidzwa? (Juau 4:34)

¹⁹ Kana imwimwi mecipsveruka kubhabhatidzwa, onai muezaniso wakarekethwa na Djesu. (Erengai Juau 4:34.) Djesu akaezanisa kuita kuda ka Mwari ne zvekurhya. Ngei? Ngekuti zvekurhya zvakanaka katiri. Djesu aizviziya kuti zvese zvatinokumbirhwa na Djehovha kuti tiite zvakatinakirawo. Djehovha aadi kuti tiite zviro zvinotikuwadza. Asi rubhabhatidzo rinoitawo dii rekuda ka Mwari here? Honde. (Zvii. 2:38) Hino mungagara henyu no cokwadi cekuti kuteerera mutemo wekubhabhatidzwa kucamubetserai. Imwimwi mainga musikazodiwo kupsveruka kurhya zvekurhya zvakanaka andizvopi, hino ngei mecipsveruka kubhabhatidzwa?

20. Ticaonei mu fundo inoteera?

²⁰ Murikuetserei? Anhu akawanda anodaira mubvunzo uu eciti: “Andisati ndagadzirira.” Cisananguro cekudzipira kuna Djehovha uye kubhabhatidzwa zvezvirokwazvo cisananguro cinokosha camungaita mu upenyu wenyu. Hino zvingaita kuti munodikana kunyasa kurangarira ngezve cisananguro ici, pamweni zvinoda kutora nguwa, kupeta masimba kuti muzozvikwanise. Kana imwimwi mecida kubhabhatidzwa, ngazvipi zvamunodikana kuita kuti mugadzirire? Ticaona mhinduro we mubvunzo uu mu fundo inoteera.