1. Abereki anodei ku ana awo?

 ABEREKI imwimwi munoda kuti ana enyu ade uye aziye Djehovha. Asi Djehovha aaoneki. Hino abereki mungabetsera kudini ana enyu kuziya kuti zvinoita kukhwedera dhuze naye?—Tig. 4:8.

2. Abereki angafundisa kudini ana awo ngezve mawara a Djehovha?

² Mushobo wakanaka wekubetsera ana enyu kuti aziye Djehovha ngewekufunda nawo Bhaibheri. (2 Ti. 3:14-17) Asi Bhaibheri rinobhuyazve ngezve mushobo umweni ungabetsera madjaha kufunda ngezva Djehovha. Mu bhuku ra Zvierengo, baba anoedzurira mwana wawo kuti asakanganwe mawara a Djehovha, anonyasa kuoneka pamhene kubva ku zviro zvakasikwa. (Zvie. 3:19-21) Ngationei kuti abereki angaseenzesa kudini zviro zvakasikwa kuti afundise ana awo ngezve unhu wa Djehovha.

3. Abereki angabetsera kudini ana awo kuti aziye zviro zvakawanda ngezve mawara a Djehovha?

³ Bhaibheri rinoti: “Kunyazi hazvo Mwari asikaoneki kubvira paakasika nyika, anhu agara ecikwanisa kuziya simba rake risikaperi uye kugara kake Mwari, ngekuti anokwanisa kuzwisisa kubva pa zviro zvakasikwa.” (Aro. 1:20) Kakawanda kakhona abereki, anopfarira kupedza nguwa yakawanda no ana awo pa mbuto yakarungama. Panguwa iyona awona anokhorovhera mukana wekuenzanisa “mawara akanaka” a Djehovha no zviya zvaakasika. Ngationei kuti abereki angateedzera kudini muezaniso wa Djesu.

4. Djesu akaseenzesa kudini zviro zvakasikwa kuti afundise afundi ake? (Ruka 12:24, 27-30)

 ⁴ Onai kuti Djesu akaseenzesa kudini zviro zvakasikwa kuti afundise ateeri ake. Nguwa imweni, iyena akaabvunza kuti aongorore makunguwo uye maruwa. (Erengai Ruka 12:24, 27-30.) Djesu aitokwanisa kubhuya ngezve zvinyama kana maruwa, asi iyena akasanangura shiri kana kuti maruwa zvainyasa kuziikanwa no afundi ake. Zviri pamhene kuti panguwa iyona afundi ake aiona shiri dzecimburuka uye maruwa akaatenderedza. Zvinoita here kuti tirangaridze Djesu ecipangidzira afundi ake zviro izvona? Uye Djesu akaitei mumasure mekupanganidza muezaniso uu? Iyena akaafundisa ngezve nyasha uye rupo zva Baba edu ekudenga eciti: Djehovha acariritira aseenzi ake akagondeka hingana mushobo waanoita makunguwo no maruwa.

5. Abereki angaseenzesa zviro zvipi zvakasikwa kuti afundise ana awo ngezva Djehovha?

⁵ Abereki, mungateedzera kudini muezaniso wa Djesu pamunonga mecifundisa ana enyu? Imwimwi mungakwanisa kureketa ngezve ciro cimwe cakasikwa camunopfarira maningi, pamweni cinyama camunopfarira maningi kana kuti muti. Pamunoita izvona, panganidzai kuti zviro izvona zvinopangidza kudini mawara a Djehovha. Pedzepo mungabvunzisa mwana wenyu kuti cinyama cipi caunonyanya kupfarira uye kuti unonyanya kupfarira muti upi. Kana mukaseenzesa cimwe ce zviro zvakasikwa caanonyanya kupfarira zvinomuitira nyore kuti iyena apurutane pamunoezanisa zviro izvona no mawara a Djehovha.

6. Tinofundei kubva pa muezaniso wa mai a Christopher?

⁶ Kodi abereki anodikana kupedza nguwa yakawanda ecipsvakisisa ngezve zvinyama kana kuti ngezve maruwa asati abetsera ana awo kuona kuti izvona zvinoafundisei ngezva Djehovha? Aadikani hawo kuita izvona. Djesu aazi kupedza nguwa ecipanganidza kuti makunguwo anodziriritira kudini kana kuti maruwa anokura kudini. Zviri pamhene kuti nguwa dzimweni ana enyu angada kuziya zvakawanda zvakaringana no zvisikwa zva Djehovha. Asi nguwa dzimweni kupanganidza zviro padoko kana kuita mubvunzo Djehovha anozviona kuti zvinokwanira mwana wenyu kuzwisisa zvamuri kuda kufundisa. Hama imweni inozwi Christopher inoedzurira zvinoteera ngezve udjaha wayo. Iyona inoti: “Mai angu aindifundisa zviro zvisikashuphi kuzwisisa kuitira kuti inini no hama dzangu tikoshese zviro zvakasikwa. Nge muezaniso, pataipinda no padhuze pe dunhu, awona aibhuya kuti: ‘Onai kukura kakaita dunhu iri irona rakanyasa kurungama! Djehovha akanaka maningi andizvopi?’ Kana kuti patainga tiri dhuze no bahari, awona aibhuya kuti: ‘Onai simba re mafungu aya! Mwari aana simba here?’” Christopher wakati: “Zviro zvaaibhuya zvainga zvisikashuphi kuzwisisa, asi zvaiita kuti tirangarire.”

7. Mungafundisa kudini ana enyu kuti arangarire zviro zvakasikwa?

⁷ Ana enyu paanokura, mungaarowedza kuti aone zviro zvakasikwa uye kuti aone kuti angafundei ngezve mawara a Djehovha. Hinga muezaniso, imwimwi mungakwanisa kusanangura ciro cimwe ce zviro zvakasikwa uye mobvunzisa ana enyu kuti: “Ici cinomufundisei ngezva Djehovha?” Imwimwi mungakwanisa kushamisika mecipfara maningi nge kuzwa zvaanorangarira.—Mat. 21:16.

8. Zvinyi zvaiizwa no abereki e Ciisraeri paaihamba “mumakwanza” kuti akhorovhere mukana wekufundisa ana awo ngezve zviro zvakasikwa?

⁸ Abereki e Ciisraeri aidikana kufundisa ana awo ngezve mutemo wa Djehovha paaihamba “mu gwanza.” (Dhe. 11:19) Mu nyika ye Aisraeri mainga muno makwanza akawanda. Uye  imona maikwanisa kuoneka mishobo yakasiyana-siyana yezvinyama, uye maruwa. Asi Aisraeri paaihamba mumakwanza no mhuri dzawo, awona ainga ano mukana wekufundisa ana awo ngezve zvisikwa zva Djehovha. Imwimwi abereki mungakwanisa kukhorovhera zviro zvakaita hingana izvi kuti mufundise ana enyu ngezve zviro zvakasikwa. Onai zvakaizwa no abereki amweni.

9. Mafundei kubva pa muezaniso wa Punitha na Katya?

⁹ Mai amweni anozwi Punitha, anogara ku thaundi guru re ku Índia, akati: “Hama dzedu dzimweni adzigari mu thaundi, hino patinoenda koavhakacira tinokhorovhera mukana iwona kuti tifundise ana edu ngezve zviro zvinoshamisa zva Djehovha. Uye ndinozwisisa kuti ana angu anokoshesa zvisikwa zva Djehovha paanonga ari kure no thaundi rakakura.” Zvinoshupha maningi kuti ana akanganwe mbuto yakarungama yaanoenda koovhakacira no abereki awo eciona zviro zvakasikwa. Katya hanzvadzi ye ku Moldávia, yakati: “Zviro zvandiri kuedzurira zvandakaona paudjaha wangu ngezve nguwa yendakaenda koovhakaca no abereki angu kure no thaundi. Inini ndinotenda maningi abereki angu ngekundifundisa kaakaita kubvira ndiciri mudjaha ngezve zviro zvakasikwa ndi Djehovha uye ndaakunyasa kumuziya zvakanaka kubva pazvisikwa.”

10. Ngazvipi zvingaizwa no abereki kana zveciashuphira kuita rhwendo rekwenda kure ke thaundi? (Onai bhokisi rakazwi: “ Rubetso ku Abereki.”)

¹⁰ Hino zvakadini kana zvecishuphira imwimwi no mhuri yenyu kuti muende kure no thaundi? Amol, hama imweni inogara ku Índia, yakati: “Kandinogara ndinopedza nguwa yakawanda ndeciseenza, uye kuita rhwendo rekwenda kure no thaundi zvinoda mare yakawanda. Kunyazi zvakadaro, tinokwanisa kuona zvisikwa zva Djehovha uye kubhuya ngezve mawara ake patinonga tiri ku parki kana padenga pe predhiyo.” Pamweni dhuze no kamunogara kuno  mbuto yamungakwanisa kupangidza ana enyu zvisikwa zva Djehovha. (Pis. 104:24) Munokwanisa kugumira miti, shiri no zvinyama zvakawanda. Karina we ku Alemanha, wakati: “Mai angu anopfarira maruwa, hino pandainga ndiri mwana mudoko, pese pataihamba awona aindipangidza maruwa aaipfarira.” Imwimwi abereki, mungakwanisawo kuseenzesa mavhidhiyo no mabhuku anobudiswa no sangano anoreketa ngezve zviro zvakasikwa kuti mukwanise kufundisa ana enyu. Azvinei no kamunogara, imwimwi mungakwanisa kubetsera ana enyu kuona zviro zvakasikwa na Djehovha. Ngationei mawara a Djehovha amungafundisa ana enyu kuongorora zvakasikwa.

11. Abereki angabetsera kudini ana awo kuti azwisise rudo rina Djehovha katiri?

¹¹ Imwimwi mungabetsera ana enyu kuona rudo ra Djehovha, ngekuapangidza kuti zvinyama zvinocengeta kudini zviana zvazvo. (Mat. 23:37) Uyewo mungaapangidzirawo kuti zviro zvese zvakasiyana-siyana zvakasikwa na Djehovha kuti tipfare. Karina, wamborekethwa nge zvake wakati: “Pandaibuda na mai angu, awona aindikohomedzesa kuti ndimboima uye ndoona kuti ruwa rimwe na rimwe rakasiyana kudini no amweni uye kuti kurungama karo kunopangidza kudini rudo ra Djehovha. Dakara nyamasi inini ndinomboima kuti ndiringire kusiyana-siyana ke maruwa, mushobo waakaita uye no kori yaanayo. Izvona zvinoita kuti ndirumbwe ndeciedzurira kuti Djehovha anotida zvakadini.”

12. Abereki angabetsera kudini ana awo kuti azwisise kuti Djehovha ano ungwaru? (Pisarema 139:14) (Onai mufanikiso.)

¹² Betserai ana enyu kuti aziye kuti Djehovha ano ungwaru wakadini. Djehovha ano ungwaru kupinda anhu ese. (Aro. 11:33) Nge muezaniso, munokwanisa kubhuya ngezvekuti mvura inoita kudini kuti izoita makuta uye makute oenda ku mbuto iri kure padoko no padoko. (Djobo 38:36, 37) Imwimwi mungakwanisawo kubhuya kuti Djehovha akaita kudini mwiri wedu nge mushobo unoshamisa. (Erengai Pisarema 139:14.) Baba amweni anozwi Vladimir akati: “Zuwa rimweni mwana wedu wakambhwera no bhasikoro uye wakakuwadzika. Mumasure me mazuwa manganani, paya painga pakuwadzika pakapora. Inini no mukadzi wangu takapanganidzira mwana wedu kuti Djehovha akatisika no maserura anokwanisa kuita kuti mwiri  wedu uhwirirezve kugara zvakanaka mumasure mecinguwa. Uye isusu takamupanganidzira kuti izvona azviitiki kuno zviro zvakagadzirhwa nge anhu. Nge muezaniso karu aikwanisi kudzigadzirisa yega mumasure mekuti yaita tsawana. Izvona zvakabetsera mwana wedu kuziya kuti Djehovha ano ungwaru pakusika kaakaita anhu.”

13. Abereki angabetsera kudini ana awo kuti azwisise simba rina Djehovha? (Isaya 40:26)

¹³ Djehovha anotipika kuti tiringise kudenga uye tinyase kurangarira ngezve simba rinoshamisa rinoita kuti nyika igare yakarongeka. (Erengai Isaya 40:26.) Imwimwi mungakwanisa kukohomedzesa ana enyu kuti aringise kudenga uye kuti adzipase nguwa kuti anyase kurangarira zviya zvaanoona. Onai hanzvadzi imweni ye ku Taiwan, inozwi Tingting. Iyona inoedzurira kuti: “Zuwa rimweni mai angu akanditora kuenda ku mbuto yaizwi kampal. Ngekuti tainga tiri kure no maruju e mu thaundi, izvona zvakaita kuti ndikwanise kuona nyeredzi ce usiku. Iyi yainga iri nguwa yekuti ku cikora ndaibambidzirhwa kuita zvakashata uye ndainga ndisikazii kuti ndaizorumbwa ndeciseenzera Djehovha ndakagondeka. Mai angu akakhorovhera mukana iwona kuti andipangidzire simba ra Djehovha kuti asike nyeredzi dzese dziri kudenga uyewo Iyena waizokwanisa kundibetsera kuti ndikunde zvinetso zvandaisongana nazvo. Mumasure me rhwendo irona rekuona zviro zvakasikwa inini ndakahwirira ndabambiswa, uye ndadzipira kuseenzera Djehovha nokusikaperi.”

14. Abereki angabetsera kudini ana awo eciseenzesa zviro zvakasikwa kuti apangidze kuti Djehovha ndi Mwari anopfara?

¹⁴ Zvisikwa zva Djehovha zvinopangidza kuti iyena ndi Mwari ano mupfaro mukuru. Masiyentista akaona kuti zvinyama zvinopfarira maningi kutamba, kutobatanidza shiri uye howe. (Djobo 40:20) Imwimwi makamboona mwana wenyu paanoona zvinyama zvecitamba? Pamweni munoona cibishawo cecitamba no bhora kana kuti zvituhwa zvecirumana nzee. Pamunozoona mwana wenyu ecitanga kuseka no zvinyama, madini ku khorovhera mukana iwona kuti mumuedzurire kuti tinoseenzera Mwari anopfara?—1 Ti. 1:11.

15. Cinyi cingabetsera abereki kuti aziye zviya zviri kurangarirhwa no ana awo? (Zvierengo 20:5) (Onai mufanikiso.)

¹⁵ Pamweni paya, abereki angashuphirhwa kuita kuti ana awo arekete ngezve matambudziko aarikusongana nawo. Pamweni imwimwi mungafunungura mukana kuti ana enyu azwe akasudzunuka kubhuya zvaari kurangarira. (Erengai Zvierengo 20:5.) Abereki amweni anoona kuti kugara no ana awo pa mbuto yakarungama uye ino zviro zvakasikwa zvinobetsera maningi. Ngei? Ngekuti nguwa iyona abereki no ana anozwa akasudzunuka uye pasina ciro cinoavhiringidza. Baba amweni e ku Taiwan anozwi Masahiko anoti: “Inini no mukadzi wangu pamwepo no ana edu—patinonga tiri pa mbuto yakanaka uye ino zviro zvakasikwa tecihamba pa mbuto isina ciro pa matunhu—awona anozwa akasudzunuka. Ngekudaro zvinoita nyore kucedza nawo uye kuziya zviya zvaari kurangarira.” Katya wamborekethwa ngezvake unoti: “Kakawanda kakhona pandaibuda ku cikora, mai angu ainditora kuti tiende ku parki yainga iri dhuze no pataigara. Iyona yainga iri mbuto yakanaka uye paidakadza. Inini ndaitozwa ndakasudzunuka kuti ndiapanganidzire zvese zvaiitika ku cikora uye zviya zvaindishupha.”

16. Mhuri dzingakhorovhera kudini zvisikwa zva Djehovha kuti dzipfadzwe uye dzizwe dzakasudzunuka?

¹⁶ Kana mhuri ikadzipasa nguwa kuti inyase kuona zviro zvakasikwa, anhu ese anogara akasudzunuka uye ecipfara uye izvona zvinobambisa kubatana ke mhuri. Hingana zvinobhuiwa no Bhaibheri pano “nguwa ye kuseka” uye “nguwa ye kutamba.” (Mup. 3:1, 4, masoko e pasi) Djehovha akasika mbuto dzakarungama pa nyika kuti tikwanise kugogoma, kudhibha, kutamba uye kuita zvese zvatinoda. Mhuri dzakawanda dzinopfarira kupedza nguwa dziri pamwepo mu mbuto isina anhu akawanda, mumatunhu, kana kuti mumabahari. Ana akawanda anopfarira kugogoma, kutamba muma parki, kuona zvinyama kana kudhibha mumurambo, muzvikadwa kana kuti mu bahari. Pano mikana yakawanda yekuti tikhorovhere zviro zvese zvakasikwa!

17. Ngei abereki ecidikana kubetsera ana awo kuti apfadzwe nge zvisikwa zva Djehovha?

¹⁷ Mu nyika ipsva, ana no abereki acakwanisa kukhorovhera zvisikwa zva Djehovha zvaasati amboita. Imona, atizothyi zvinyama uye izvona azvizothyiwo anhu. (Isa. 11:6-9) Ticararama nokusikaperi tecidakadzwa no zvisikwa zva Djehovha. (Pis. 22:26) Asi zvinokosha maningi kuti abereki abetsere ana awo kuti apfadzwe nge zvisikwa zva Djehovha kubvira zvino. Abereki paanoseenzesa zviro zvakasikwa kuti afundise ana awo ngezva Djehovha, pamweni awona angatenderana no masoko akabhuiwa ndi Mambo Dhavhidhi paakati: “Haiwa Djehovha, akuna mabasa akaezana no enyu.”—Pis. 86:8.