1. Aseenzi a Djehovha pamweni paya angabatana no mazwiro api?

 ZVINONYARADZA maningi kuziya kuti Djehovha anotendera anhu ake hingana grupu. Bhaibheri rinoti: “Djehovha anopfarira anhu ake.” (Pis. 149:4) Asi nguwa dzimweni akawanda anodzirhya mwoyo otanga kurangarira kuti: ‘Kodi inini ndinokosha kuna Djehovha here?’ Aseenzi a Djehovha akawanda kunyazi e mu nguwa dze Bhaibheri akabatanawo no mazwiro akadaro.—1 Sam. 1:6-10; Djobo 29:2, 4; Pis. 51:11.

2. Ndiani angatenderhwa na Djehovha?

² Bhaibheri rinopangidza pamhene kuti anhu asikazi kukwana angapfadza Djehovha uye kutenderhwa naye. Angazviita kudini? Tinodikana kupangidza kuti tino kutenda muna Djesu uye kubhabhatidzwa. (Juau 3:16) Nge kuita kudaro tinopangidza pamhene kuti tacinyuka zvitema zvedu uye kuti tagondesa Djehovha kuti ticaita kuda kake. (Zvii. 2:38; 3:19) Djehovha anopfara maningi patinoita izvona kuti tikhwedere dhuze kaari. Patinoita zviri zvese kuti tidzadzise mhiko yedu Djehovha acatitendera uye otiona hinga shamwari dze padhuze.—Pis. 25:14.

3. Ticaonei mu fundo ino?

³ Hino ngei anhu amweni ecirangarira kuti Djehovha aaripi kuapfarira? Djehovha anoitei kuti apangidze kuti anotitendera? Uye isusu tingabambisa kudini rugondo redu rekuti Djehovha anotitendera?

NGEI ANHU AMWENI ECIRANGARIRA KUTI AATENDERHWI NA DJEHOVHA

4-5. Kunyazi mukagara no mazwiro ekudzionera pasi, mungagara no rugondo ripi?

⁴ Akawanda edu ano mazwiro ekudzionera pasi kubvira aciri adoko. (Pis. 88:15) Hama imweni inozwi Adrián inobhuya kuti:  “Inini ndaigara ndecirangarira kuti andikoshi. Cimwe ce zviro candiri kuedzurira ngece kuita munamato ndecikumbira kuti mhuri yangu ipinde mu Paraizo, asi inini ndainga ndisina rugondo rekuti ndaizopindawo imona.” Tony, hama imweni isikazi kurerhwa mu cokwadi inoti: “Abereki angu aambozi kundibvunza kuti aindida kana kuti aidada neni. Awona aibhuya kuti ndaikwanisa kuita zviro nge mushobo uri nani kudarika zvandaiita.”

⁵ Kana nguwa dzimweni mukazwa kuti amukoshi, edzurirai kuti Djehovha wene ndiye akamusanangurai kuti mumuseenzere. (Juau 6:44) Djehovha anoona zviya zvakanaka zvinoizwa na umwe no umwe wedu, iyena anoona mwoyo wedu uye mushobo waanotiona andiwopi watinodziona. (1 Sam. 16:7; 2 Mak. 6:30) Uye mungagara no rugondo rekuti Djehovha paanobhuya kuti munokosha kaari i zvirokwazvo.—1 Juau 3:19, 20.

6. Pauro waizwa kudini paairangarira ngezve zvishaishi zvake zve kare?

⁶ Tisati tafunda cokwadi amweni edu pamweni takaita zviro zviciri kuita kuti tidzipase ndaa. (1 Ped. 4:3) Uye amweni arikuseenzera Djehovha akatendeka kubvira kare, pamweni ari kurhwisana no mazwiro akashata. Zvakadini na imwimwi, pamweni paya munozwa hingana kuti Djehovha aazi kumurekererai here? Pa mugariro iwona, zvakanaka kurangarira kuti kunyazi aseenzi a Djehovha akagondeka akarhwisana no mazwiro akadaro. Ngo muezaniso, muphostori Pauro paairangarira ngezve zvishaishi zvake waitsukwara maningi. (Aro. 7:24) Zviri pamhene kuti Pauro wakacinyuka pa zvishaishi zvake uye wakabhabhatidzwa. Kunyazi zvakadaro, iyena waidziona hinga “mudoko pa aphostori ese” uye mushaishi “mukuru.”—1 Ako. 15:9; 1 Ti. 1:15.

7. Tinodikana kuedzurirei?

⁷ Djehovha anogondesa kuti kana tikacinyuka iyena acatirekerera. (Pis. 86:5) Hino, kana tikacinyukadi kamare pa zvishaishi zvatakaita, tingagara no rugondo rokuti Djehovha ari kubhuya cokwadi cekuti iyena atotirekerera.—Ako. 2:13.

8-9. Tingakunda kudini mazwiro ekuti atikwanisi kuita zvakawanda kuti tipfadze Djehovha?

⁸ Tese isusu tinoda kuseenzera Djehovha no mwoyo wese. Ngokudaro, amweni anorangarira kuti aazombokwanisi kuita zvakawanda kuti atenderhwe naye. Hanzvadzi imweni inozwi Amanda inoti: “Kakawanda kakhona inini ndinoona kuti kupasa Djehovha zvakanakisisa zvangu zvinoreya kuita zvakawanda kudarika zviya zvandiri kuita. Hino inini ndinoita zvakawanda kudarika zviya zvandinokwanisa kuita. ‘Pandisikakwanisi’ kuita izvona ndinotsukwara uye ndinorangarira kuti Djehovha atsukwarawo.”

⁹ Tingakunda kudini mazwiro ekuti atiripi kuita zvakawanda kuti tipfadze Djehovha? Edzurirai kuti Djehovha aatikumbiri zvakawanda uye aatiomeseri. Iyena aambotikumbiri zviya zvatisikakwanisi kumuitira. Iyena anokoshesha ciro cipi haco catinomuitira asi teciciita no mwoyo wese. Kusiya izvona, imwimwi munganyasa kurangarira ngezve miezaniso ye anhu e mu Bhaibheri akaseenzera Djehovha no mwoyo wese. Ngo muezaniso, rangarirai ngezva Pauro, iyena wakaseenza no simba ke makore akawanda. Wakaita rhwendo ke makirometro akawanda uye wakabetsera kuumba ungano dzakawanda. Asi mugariro we upenyu wake pawakacinja, iyena ainga asikacakwanisi kuparidza kakawanda hingana zvaaita kare. Hino Djehovha akasiya kukoshesa zvaiizwa ndi Pauro here? Haiwa. Pauro wakarumbwa eciita zvaaikwanisa uye Djehovha akamukomborera. (Zvii. 28:30, 31) Nge mushobo umwewo, zvatingaitira Djehovha zvingacinja no kuhamba ke nguwa. Asi zvinonyanya kukosha i zvikonzero zvinoita kuti timuseenzere. Ngatione zvino mishobo inopangidzwa na Djehovha kuti anotitendera.

 DJEHOVHA ANOPANGIDZA KUDINI KUTI ANOTITENDERA?

10. “Tingazwa” kudini izwi ra Djehovha ecititendera? (Juau 16:27)

¹⁰ Eciseenzesa Bhaibheri. Djehovha nguwa dzese anopsvaka mishobo ye kupangidza kuti anoda aseenzi ake uye kuti anopfara maningi no zvaanoita. Bhaibheri rinobhuya ngezve migariro miiri yekuti Djehovha akabvunza Djesu kuti iyena ainga ari Mwana Wake anodiwa uye anopfarirhwa. (Mat. 3:17; 17:5) Imwimwi maizopfarira here kuzwa Djehovha ecibhuya zviro zvakadai ngezvenyu? Nyamasi uno, Djehovha aabhuyi nesu hope no hope, asi iyena anoreketa na isusu eciseenzesa Bhaibheri. “Tingazwa” izwi ra Djehovha ecititendera patinoerenga masoko a Djesu mu Mavhangeri. (Erengai Juau 16:27.) Djesu akateedzera zvakakwana unhu wa Baba ake. Hino patinoerenga masoko e upfawi a Djesu aakabvunza anhu asikazi kukwana, tinodikana kuona kuti ndi Djehovha arikutibvunza masoko awona.—Juau 15:9, 15.

11. Ngei kusongana no zvinetso azvirei kuti tasiya kutenderhwa na Djehovha? (Tiyago 1:12)

¹¹ Eciseenzesa zvaanotiitira. Djehovha akagadzirira kutibetsera nguwa dzese. Ngo muezanso, nge kutipasa zviro zvatinoda zve kunyama. Nguwa dzimweni, Djehovha angatendera kuti tisongane no zvinetso, hingana zvakaitika na Djobo. (Djobo 1:8-11) Asi kubatana no zvinetso azvirei kuti aticiripi kutenderhwa na Djehovha. Asi kusiya izvona, iwona ndi mukana wekupangidza rudo redu kuna Mwari uye rugondo redu kaari. (Erengai Tiyago 1:12.) Uye isusu tingazwa rudo no rubetso ra Djehovha, patinoona kutibetsera kaanoita kuti tishingirire.

12. Tinofundei no muezaniso wa Dmitrii?

¹² Onai zvakaitika no hama imweni ye ku Ásia inozwi Dmitrii. Iyena wakapererhwa no basa uye wakatora mwedzi dzakawanda asikazi kuona basa. Hino iyena wakasanangura kuseenzesa nguwa iyona kuti atunhudzire basa rake kuti aite zvakawanda mu basa re kuparidzira, nge kuita kudaro wakapangidza kuti waigonda Djehovha. Pakadarika mwedzi dzakawanda uye iyena wainga asati aona basa. Pedzepo, iyena wakatanga kugara no zvinetso zve uthongo dakara abhashari ku cipitari. Hino waigara ecidzibvunzisa kuti pamweni aacatenderhwi na Djehovha. Pa usiku umweni mwana wawo wakaenda pakama pawo uye wakaaendesera phepha rino tsamba ya Isaya 30:15 iyona inoti: “Simba renyu ricabva pakurumbwa makaterama uye pakugonda  neni.” Mwanewo wakabhuya kuti: “Baba mukatama kuzwa zvakanaka edzurirai ngezve tsamba ii.” Dmitrii wakazwisisa kuti no rubetso ra Djehovha mhuri yake yainga ino zvekurhya zvinokwana, macira uye mbuto ye kugara. Iyena unoti: “Ciro candaidikana kuita basi i kugara ndakaterama uye kurumbwa ndecigonda Mwari wangu.” Kana imwimwi muri kubatana no matambudziko akaezana, gondai kuti Djehovha acamucengetai uye acamubetserai kuti mushingirire.

13. Djehovha anoseenzesa ani kuti atipangidze kuti anotitendera?

¹³ Eciseenzesa hama dzedu. Djehovha angaseenzesa hama no hanzvadzi dzedu kuti atipangidzire kuti anotitendera. Ngo muezaniso, iyena angaseenzesa munhu kuti atibvunze masoko anobambisa pa nguwa yakasisira. Ndizvona zvakaitika no hanzvadzi imweni ye ku Ásia payaibatana no mugariro unoshupha. Iyona yakaruza basa uye yakarhwara maningi. Pedzepo mwamuna wayo wakaita citema cakakura uye wakasiya kugara mukuru. Iyena unoti: “Inini ndainga ndisikazwizii kuti ngei izvona zvaiitika. Ndakatanga kurangarira kuti pamweni ndainga ndaita ciro cakashata uye kuti Djehovha ainga akatsukwara neni.” Hanzvadzi ii yakaita munamato kuna Djehovha yecikumbira kuti Djehovha apangidze kuti aiada. Djehovha akaitei? Iyona inoenderera mberi yeciti: “Akuru e mu ungano akacedza na inini uye akandigondesa kuti Djehovha aindida maningi.” Paa padarika nguwa, iyona yakakumbirazve rubetso kuna Djehovha. Iyona inobhuyazve kuti: “Zuwa rimwe rimwero randakaita munamato kuna Djehovha inini ndakatambira tsamba yaibva ku hama dze mu ungano. Pandaierenga tsamba iya inonyaradza inini ndakazwa kuti Djehovha ainga andizwa.” Zvezvirokwazvo kakawanda kakhona Djehovha anopangidza kuti anotitendera eciseenzesa masoko e unaki e amweni.—Pis. 10:17.

14. Mushobo upi umweni unopangidzwa na Djehovha kuti anotitendera?

 ¹⁴ Djehovha anotipangidzirawo kuti anotitendera nge kuseenzesa hama kuti atipase mazano patinoda. Ngo muezaniso, Djehovha akaseenzesa muphostori Pauro kuti atarire ungano tsamba dzakafemerhwa dzinokwana kuita 14. Mu tsamba idzona, Pauro wakatara mazano akananga uye ano rudo. Asi ngei Djehovha akafemera Pauro kuti atare mazano iwona? Ngekuti Djehovha ndi Baba akanaka uye anopangira “mwana waanoda.” (Zvie. 3:11, 12) Hino patinopaswa mazano anobva mu Bhaibheri izvona azvirei kuti aticatenderhwi na Djehovha. Kusiya izvona, zvinopangidza kuti iyena anotida. (Aheb. 12:6) Mishobo ipi imweni inopangidzwa na Djehovha kuti anotitendera?

ZVIPANGIDZO ZVIMWENI ZVINOPANGIDZA KUTI DJEHOVHA ANOTITENDERA

15. Djehovha anopasa ani mwiya mucena uye izvona zvinotipasa rugondo rei?

¹⁵ Djehovha anopasa mwiya mucena ku aya aanotendera. (Mat. 12:18) Tingadzibvunzisa kuti: ‘Kodi ndinokwanisa kupangidza wara re zvibereko zve mwiya mucena mu upenyu wangu here?’ Murikukwanisa kuona kuti zvino maano mwoyo unononoka kutsamwa kudarika paya pamakatanga kugara Mupupuri wa Djehovha here? Pamunotunhudzira kusakurira mawara akanaka e mwiya mucena wa Mwari, mucanyasa kugara no rugondo rekuti Djehovha anomutenderai!—Onai bhokisi rakazwi “ Zvibereko zve Mwiya ndi Izvi . . . ”

16. Djehovha anoseenzesa ani kuti aparidze masoko akanaka uye imwimwi munozwa kudini nge kuziya izvona? (1 Atesaronika 2:4)

¹⁶ Djehovha anopasa aya aanotendera kuti aite basa re kuparidza masoko akanaka. (Erengai 1 Atesaronika 2:4.) Onai kuti hanzvadzi imweni inozwi Jocelyn yakabetsereka kudini nge kuparidzira. Zuwa rimweni, Jocelyn wakamuka akaora mwoyo. Iyena unoti: “Inini ndaizwa ndisina simba uye ndisikakoshi. Asi ndainga ndiri piyonero uye rainga riri zuwa rangu re kubuda mu basa re kuparidzira. Hino ndakaita munamato ndoenda kooparidzira.” Pa zuwa irona ce macibesi, Jocelyn wakaziya Mary mwanakadzi wakanaka uye wakatendera fundo ye Bhaibheri. Paa padarika mwedzi minganani, Mary wakabhuya kuti wainamata ecikumbira rubetso kuna Mwari Jocelyn paakagogodza musuwo wake. Jocelyn wakafundei no esperiensiya ii? Iyena unotizve: “Inini ndakazwa hingana Djehovha ecibhuya kuti ‘ndinokutendera.’” I zvirokwazvo  kuti aanhu esepi acatenda zvatinoparidzira. Asi tingagara no rugondo rekuti Djehovha anopfara maningi patinopeta masimba kuti tibhuye no amweni masoko akanaka.

17. Mafundei no zvakabhuiwa na Vicky ngezve rusudzunuro? (Pisarema 5:12)

¹⁷ Djehovha anoseenzesa kukosha ke rusudzunuro kuti abetsere aya aanotendera. (1 Ti. 2:5, 6) Asi zvakadini kana imwimwi musikagondi kuti Djehovha anomutenderai, kunyazi muno kutenda mu rusudzuro uye makabhabhatidzwa? Edzurirai kuti atikwanisi kugonda mazwiro edu nguwa dzese, asi tingagonda Djehovha. Iyena anoona aya anotenda mu rusudzuro hinga anatsi uye anogondesa kuti acaakomborera. (Erengai Pisarema 5:12; Aro. 3:26) Kunyasa kurangarira ngezve rusudzunuro kakabetsera Vicky. Zuwa rimweni, mumasure mekunyasa kurangarira ngezve kukosha ke rusudzunuro, iyena unoti: “Ndakaona kuti Djehovha ainga ecindipangidzira mwoyo unononoka kutsamwa ke nguwa yakareba. . . . Asi zvezvirokwazvo, inini ndainga ndecimubvunza kuti: ‘Rudo renyu arizi kukura zvekuti rinokwanisa kuguma kandiri. Cibairo ce Mwana wenyu acikwani kuti cifukidze zvitema zvangu.’” Vicky paakanyasa kurangarira ngezve cipo ce rusudzunuro, iyena wakatanga kuzwa kuti anodiwa na Djehovha. Isusuwo tingazwa kuti tinodiwa na Djehovha uye kutenderhwa naye kana tikanyasa kurangarira ngezve rusudzunuro.

18. Tingagara no rugondo ripi kana tikarumbwa tecida Baba edu e kudenga?

¹⁸ I zvirokwazvo kuti kunyazi mecipeta masimba kuti museenzese zvese zvatafunda mufundo ino, zvingaita kuti pamweni paya imwimwi mungadzirhya mwoyo uye kurangarira kuti Djehovha aamutenderi. Kana izvona zvikaitika, edzurirai kuti Djehovha anotendera “aya anorumbwa Ecimuda.” (Tig. 1:12) Hino rumbwai mecikhwedera dhuze na Djehovha uye onai mishobo yese yaanopangidzira kuti anomutenderai. Uye musambokanganwe kuti Djehovha ‘aaripi kure ke umwe na umwe wedu.’—Zvii. 17:27.