1-2. Munhu unodikana kuitei asati abhabhatidzwa?

 MU MAKORE mashanu adarika, anhu anodarika mamiriyonji akabhabhatidzwa hinga Apupuri a Djehovha. Akawanda akhona akaita hinga mufundi Timoti wakafunda cokwadi kubvira “aciri mudoko.” (2 Ti. 3:14, 15) Amweni akafunda cokwadi paainga akura, amweniwo akafunda Bhaibheri aa acembera. Ngo muezaniso, mwanakadzi umweni waifunda Bhaibheri no Apupuri a Djehovha wakazobhabhatidzwa ano makore anokwana kuita 97!

² Kana imwimwi muri mufundi we Bhaibheri kana kuti abereki enyu ari Apupuri a Djehovha, muri kurangarira kubhabhatidzwa here? Ici i cinangwa cakanaka maningi! Asi musati mabhabhatidzwa, zvinodikana kuti imwimwi mutange kudzipira kuna Djehovha. Fundo ino icapanganidza kuti kudzipira ikona kunoreyei. Uye ticafundawo kuti ngei musikadikani kuthya kudzipira kana imwimwi magadzirira kuita izvona.

CINYI CINOZWI KUDZIPIRA?

3. Pasai miezaniso minganani dziri mu Bhaibheri dze anhu akadzipira kuna Djehovha.

³ Mu Bhaibheri, kudzipira kunoreya kusanangurhwa kuti museenzere Djehovha nge mushobo wakacena. Aisraeri ainga ari anhu akadzipira kuna Djehovha. Asi amweni awo ainga akadzipira nge mushobo wakasiyana. Ngo muezaniso, Aroni wainga ano “cipangidzo cicena ce kudzipira”—rezi inonyetukira ye oro pamberi pe dhuku rake. Rezi ii ye oro yaipangidza kuti iyena wainga akasanangurhwa kuti aseenzere Djehovha nge mushobo wakasiyana no amweni—hingana mupristi mukuru  we Israeri. (Rev. 8:9) Anaziri ainga akadzipirawo kuna Djehovha nge mushobo wakasiyana no amweni. Soko rokuti “Munaziri,” rinobva pa soko re Cihebheru nazir, rinoreya “Kusanangurhwa” uye “Kudzipira”. Anaziri aidikana kutondowedza mitemo imweni yainga iri mu Mutemo wa Mozesi—Num. 6:2-8.

4. (a) Cinyi cinobatanidzwa pa kudzipira kuna Djehovha? (b) Zvinoreyei “kudziramba”? (Onaiwo foto.)

⁴ Imwimwi pamunodzipira kuna Djehovha, munosanangura kugara mufundi wa Djesu uye kubvira pa nguwa iyona, kuita kuda ka Djehovha ndikona kunodikana kugara pa mbuto yokutanga mu upenyu. Asi cinyi cinobatanidzwa pa kudzipira ikona? Djesu akati: “Kana munhu ecida kunditeera, ngaadzirambe.” (Mat. 16:24) Soko re Cigrego rakaturikirhwa kuti “kudziramba,” rinoreyawo “kubhuya kuti haiwa imwimwi kamare pa cenyu.” Imwimwi pamunodzipira kuna Djehovha munodikana kuramba zviro zviya zvisikamupfadzi. (2 Ako. 5:14, 15) Izvona zvinobatanidza kuramba “mabasa e nyama” hingana uhure. (Aga. 5:19-21; 1 Ako. 6:18) Kodi kuzwira Djehovha kungaita kuti upenyu wenyu ushuphe here? Haiwa, kana imwimwi mecida Djehovha, uye kana muno rugondo rokuti mitemo yake yakanakira imwimwi kamare. (Pis. 119:97; Isa. 48:17, 18) Hama imweni inozwi Nicholas yakati: “Imwimwi mungaezanisa mitemo ya Djehovha no gradhi rekuti imwimwi amuna rusudzunuko rekuita ciro cipi haco here, kana kuti mungaezanisa mitemo ya Djehovha no gradhi rakafungira mhondoro inotidziirira pa ngozi yekurumwa.”

5. (a) Munhu anodzipira kudini kuna Djehovha? (b) I musiyano upi uripo pa kudzipira uye kubhabhatidzwa? (Onaiwo foto.)

⁵ Mungadzipira kudini kuna Djehovha? Imwimwi munoita munamato uye pa munamato iwona imwimwi mucagondesa kuti mucanamata Djehovha basi. Uye kuti kuita kuda  ka Djehovha kucagara pa mbuto ye kutanga mu upenyu wenyu. Zvezvirokwazvo imwimwi mucagondesa Djehovha kuti “mucamuda no mwoyo wenyu wese no upenyu wenyu wese no ndangariro dzenyu dzese uye no simba renyu rese.” (Mark. 12:30) Kudzipira ikona kunoizwa imwimwi na Djehovha basi. Asi rubhabhatidzo rinoizwa pana anhu akawanda, rinopangidza kuti imwimwi madzipira kuna Djehovha. Kudzipira uku iciro cinokosha, ndiyo ndaa mucaita zviri zvese kuti mudzadzise zvamakagondesa uye Djehovha anoetsera kuti imwimwi muite izvona.—Mup. 5:4, 5.

NGEI MECIDIKANA KUDZIPIRA KUNA DJEHOVHA?

6. Ngei munhu ecisanangura kudzipira kuna Djehovha?

⁶ Cinangwa cikuru cinoita kuti imwimwi mudzipire kuna Djehovha i rudo renyu kaari. Asi rudo irona a rudopi rinopinda haro. Irona rinowakirhwa pa “ruziyo re zvirokwazvo” uye “kuzwisisa zviro zve kumwiya,” kana kuti zviro zvamakafunda nge zva Djehovha uye kuda kake. Izvona zvinoita kuti mutunhudzire kuda Djehovha zuwa no zuwa. (Ako. 1:9) Fundo ye Bhaibheri yakaita kuti imwimwi mugare no cokwadi cokuti: (1) Djehovha i munhu kamare, (2) Bhaibheri i Soko rake rakafemerhwa uye (3) Djehovha anoseenzesa sangano rake kuti aite kuda kake.

7. Cinyi cinodikana kuizwa munhu asati adzipira kuna Djehovha?

⁷ Aya anodzipira kuna Djehovha anodikana kuziya fundo dzekutanga uye anorarama maererano no mitemo ya Djehovha. Awona anopeta masimba kuti arekete no amweni zviya zvaanofunda mu Bhaibheri. (Mat. 28:19, 20) Rudo rawo na Djehovha ratunhudzira uye arikuda kunamata Djehovha no mwoyo  wawo wese. Imwimwi munozwawo kudaro here? Kana imwimwi muno rudo rakadaro na Djehovha, amuzobhabhatidzwi basi nge ndaa ye kuda kupfadza mufundisi wenyu we Bhaibheri kana kuti abereki enyu uye amuzoitiwo izvona nge ndaa yekuti shamwari dzenyu dzabhabhatidzwa.

8. Cinyi cingamubetserai kuti musanangure kudzipira kuna Djehovha? (Pisarema 116:12-14)

⁸ Pamunorangarira zviro zvese zvamakaizirhwa ndi Djehovha, imwimwi munomutenda maningi uye munotoda kudzipira upenyu wenyu kaari. (Erengai Pisarema 116:12-14.) Bhaibheri rinoti Djehovha ndiyena Anotipasa “cipo cese cakanaka uye cipo cese cakakwana.” (Tig. 1:17) Cipo cakakura kudarika zvese i cibairo co Mwana wake Djesu Kristu. Rangarirai zvinoteera! Rusudzunuro rakaita kuti imwimwi mugare no ushamwari wakabamba na Djehovha. Kupinda izvona, Djehovha anomupasai mukana we kurarama nokusikaperi. (1 Juau 4:9, 10, 19) Kudzipira kuna Djehovha i mushobo we kupangidza kuti munotenda haiwa basi no rusudzunuro asi no zvese zvaakamuitirai. (Dhe. 16:17; 2 Ako. 5:15) Ndizvona zvatinofunda pa fundo 46, ndima 4 ye bhuku ra Pfadzwai ne Upenyu Nokusikaperi! Ipona pano vhidhiyo yo miseswa mitatu ino musoro unoti: Kupasa Djehovha Zvipo Zvenyu.

IMWIMWI MAKAGADZIRIRA KUTI MUDZIPIRE UYE MUBHABHATIDZWE HERE?

9. Ngei munhu asikadikani kuzwa hingana kuti ari kubambidzirhwa kudzipira kuna Djehovha?

⁹ Pamweni imwimwi mungazwa hingana kuti amusati magadzirira kuti mudzipire kuna Djehovha uye mubhabhatidzwe. Pamweni imwimwi munodikana kuita cinjo mu upenyu wenyu kuti mutondoedze mitemo ya Djehovha kana kuti pamweni munotoda kacinguwa kuti mubambise kutenda kenyu. (Ako. 2:6, 7) Mufundi umwe na umwe unobudirira nge mushobo wakasiyana-siyana uye aesepi madjaha anobhabhatidzwa no thunga rakaezana. Zvinokosha maningi kuti mudzione kuti icinjo dzipi dzamunodikana kuita pedzepo petai masimba kuti muite cinjo idzona musikadziezanisi no amweni.—Aga. 6:4, 5.

10. Imwimwi mungaitei kana mukaona kuti amusati magadzirira kuti mudzipire kuna Djehovha uye mubhabhatidzwe? (Onaiwo bhokisi rakazwi “ Imwimwi Muri Kurerhwa mu Cokwadi Here?”)

¹⁰ Kunyazi imwimwi mukaona kuti amusati magadzirira kuti mudzipire kuna Djehovha, rumbwai muno cinangwa icona. Kumbirai Djehovha rubetso kuti mukwanise kuita cinjo dzamunodikana kuita. (Afi. 2:13; 3:16) Imwimwi mungagonda kuti Djehovha acadaira minamato yenyu uye acamubetsai.—1 Juau 5:14.

NGEI AMWENI ASIKASANANGURI KUDZIPIRA UYE KUBHABHATIDZWA

11. Djehovha acatibetsera kudini kuti tirumbwe takatendeka kaari?

¹¹ Anhu amweni aakuita kudzipira uye kubhabhatidzwa anokana-kana kuti oita izvona here kana kuti haiwa. Pamweni imwimwi mungadzibvundzisa kuti: ‘Zvakadini mumasure me kubhabhatidzwa inini ndoita citema cakakura uye ndodzingwa?’ Kana imwimwi mecithya kuita izvona garai no rugondo rokuti Djehovha acamupasai zvese zvamunoda “kuti muhambe zvinoenderana no zina rake, kuitira kuti munyase kumupfadza.” (Ako. 1:10) Iyena acamupasaiwo simba riya ramunoda kuti muite zviro zvakanaka. Djehovha akabetsera anhu akawanda kuti amuzwire. (1 Ako. 10:13) Ndiyo ndaa anhu padoko basi ndiwona anodzingwa mu ungano. Djehovha anotipasa zvese zvatinoda kuti tirumbwe takatendeka kaari.

12. Cinyi cicamubetsai kuti musaite citema cakakura?

¹² Tese isusu tinoedzwa kuti tiite zviro zvakashata. (Tig. 1:14) Asi imwimwi mungakwanisa  kusanangura zvekuita kana mukaedzwa. Cokwadi ngece kuti pakupedzesera imwimwi ndimwi munoziya zvamucaita mu upenyu wenyu. Anhu amweni anobhuya kuti zvinoshupha maningi kuti tionerere mazwiro edu uye zvatinoita, asi izvona azvirokwazvopi. Imwimwi mungakwanisa honde kuonerera maitiro enyu akashata. Ndiyo ndaa, pese pamunoedzwa imwimwi mungasanangura kutama kuita zviro zvakashata. Kuti izvona zviitike zviripo zvingamubetsai. Ngo muezaniso, itai munamato kuna Djehovha mazuwa ese. Garai no urongwa wakanaka we kufunda Soko ra Mwari. Pindai misangano yese, khorovherai mikana yese kuti mubhuye no amweni ngezve kutenda kenyu. Kana imwimwi mukaita zviro zvese izvi imwimwi mucagara muno simba rokuti murumbwe makatendeka kuna Djehovha uye musakanganwe kuti Djehovha acamubetsai kuti muite izvona.—Aga. 5:16.

13. Zuzee wakatisira muezaniso upi wakanaka?

¹³ Zvicagara nyore kuti murumbwe makagondeka kuna Djehovha, kana imwimwi mukagara makagadzirira kare zviya zvamucaita musati maedzwa. Bhaibheri rinobhuya ngezve anhu akawanda akaita izvona. Kuitawo hinga isusu, awona ainga ari anhu asikazi kukwana. Ngo muezaniso, mukadzi wa Potifari paakaedza kakawanda kese kuda kuwata na Zuzee iyena wainga aakuziya zvekuita. Bhaibheri rinoti: “Iyena wairamba,” Zuzee kamare wakati: “Ngei ndaizoitira Mwari citema cakadaro?” (Gen. 39:8-10) Zviri pamhene kuti Zuzee waitoziya kamare zvaaidikana kuita asati aedzwa no mukadzi wa Potifari. Ndiyo ndaa iyena wakakwanisa kuita zviro zvakanaka paakaedzwa.

14. Tingafundira kudini kuramba kuita zviro zvakashata?

¹⁴ Mungateedzera kudini Zuzee uye morumbwa makatendeka kuna Mwari paya pamunoedzwa? Imwimwi mungasanangura zvino zvamungaita kuitira paya pamunozoedzwa. Musarangarire kairi katatu kubhuya haiwa zviya zvinozondwa na Djehovha uye musarumbwe mecirangarira zviro izvona. (Pis. 97:10; 119:165) Kana imwimwi mukaita izvona, mucakwanisa kukunda miedzo. Imwimwi munonga mooziya zviya zvamucaita.

15. Munhu angapangidza kudini kuti ari “kupsvaka Djehovha no mwoyo wese”? (Ahebheru 11:6)

¹⁵ Zvingaita kuti imwimwi maano rugondo rokuti magumira cokwadi uye munoda kuseenzera Djehovha no mwoyo wese. Asi, pamweni munozwa hingana musikazi kugadzirira kuti mudzipire kuna Djehovha uye mobhabhatidzwa.  Pakadaro imwimwi mungakwanisa kuita zviro zvimwezvo zvakaizwa na Mambo Dhavhidhi. Iyena wakadeketera kuna Djehovha kuti: “Ndiongororei, Ndapota Mwari uye ziyai mwoyo wangu. Ndiedzurirei muziye zviri kundinetsa mu mwoyo. Onai kana ndino marangariro akashata, uye nditungamirirei mu gwanza re unatsi.” (Pis. 139:23, 24) Djehovha anokomborera aya “anomupsvaka no mwoyo wese.” Kupeta kenyu masimba kuti mudzadzise cinangwa cenyu ce kudzipira kuna Djehovha uye kubhabhatidzwa kunopangidza kuti imwimwi muri kuita izvona kamare.—Erengai Ahebheru 11:6.

RUMBWAI MECIKHWEDERA DHUZE NA DJEHOVHA

16-17. Aya ari kurerhwa mu cokwadi angakwedera kudini dhuze na Djehovha? (Juau 6:44)

¹⁶ Djesu akati afundi ake anokweiwa ndi Djehovha. (Erengai Juau 6:44.) Rangarirai kuti izvona zvakanaka kudini uye zvinomubatabatai kudini. Djehovha anoona zviro zvakanaka ku munhu umwe na umwe waanokweya kuti auye ku cokwadi. Iyena anoona munhu umwe na umwe hinga “pfuma yaanokoshesa.” (Dhe. 7:6) Djehovha anomuonai kudaro kamare.

¹⁷ Zvingaita kuti imwimwi muri mudjaha uri kurerhwa mu cokwadi nge abereki enyu. Uye pamweni mungazwa hingana muri kunamata Djehovha ngekuti abereki enyu ari kuita izvona, haiwa ngekuti Djehovha amusanangurai. Asi Bhaibheri rinoti: “Khwederai dhuze na Mwari, uye iyena acakhwedera kamuri.” (Tig. 4:8; 1 Mak. 28:9) Kana mukatanga ndimwi kukhwedera kuna Djehovha, iyena anoita dii rake re kukhwedera kamuri. Kuna Djehovha imwimwi munokosha maningi. Djehovha anokhwedera ku munhu umwe na umwe pacake, kunyazi ku aya ari kurerhwa mu cokwadi. Kana munhu akatanga ndiyena kukhwedera kuna Djehovha, Iyena unoita zviri pana Tiyago 4:8.—Ezanisai na 2 Atesaronika 2:13.

18. Ticaonei mu fundo inoteera? (Pisarema 40:8)

¹⁸ Pamunodzipira uye mobhabhatidzwa imwimwi munonga meciteedzera Djesu. Nge kuda kake kamare, Djesu ainga akagadzirira kuita zviro zvipi hazvo zvaaikumbirhwa na Baba ake. (Erengai Pisarema 40:8; Aheb. 10:7) Mufundo inoteera ticaona kuti cinyi cingamubetserai kuti murumbwe meciseenzera Djehovha makagondeka mumasure me kubhabhatidzwa.