1-2. (a) Pauro wainga ari pa mugariro upi paakatarira Aefeso tsamba? (b) Mibvunzo dzipi dzaticaona?

 KUNYAZI paainga akasungwa ku Roma, muphostori Pauro wakaita zvese zvaaikwanisa kuti abambise hama dzake. Ngokuti wainga asikakwanisi kuavhakacira, iyena wakatara tsamba. Uye imweni yakhona yakatarirhwa Aefeso mu gore ra 60 na 61 K.A.—Aef. 1:1; 4:1.

² Makore 10 ainga adarika, Pauro wainga akambopedza nguwa ku Efeso eciparidzira uye ecifundisa masoko akanaka. (Zvii. 19:1, 8-10; 20:20, 21) Iyena waida maningi hama idzi uye waida kudzibetsera kuti dzirumbwe dzakatendeka kuna Djehovha. Ngei Pauro wakatarira Akristu aya ecibhuya ngezve cidima uye ruvheneko? Uye tese isusu tinofundei no mazano aakapasa Akristu aya? Ngationei zvino mhinduro dze mibvunzo idzi.

KUBVA MU CIDIMA KUENDA MU RUVHENEKO

3. Masoko api akabhuiwa na Pauro pa tsamba yaakatarira Aefeso?

³ Pauro wakatarira Akristu e ku Efeso kuti: “Mainga muri cidima, asi zvino maaruvheneko.” (Aef. 5:8) Pauro apa wakaseenzesa cidima uye ruvheneko kuti apangidze kuti Aefeso ainga acinja zvakadini. Ngationei kuti ngei Pauro wakabhuya kuti Aefeso ainga ari mu “cidima.”

4. Aefeso ainga ari mu cidima ce kumwiya nge gwanza ripi?

⁴ Magereja e kunyepa. Asati agara Akristu, hama dze ku Efeso dzainga dziri aranda e fundiso dze magereja e kunyepa uye aitenda maninji. Ku thaundi re Efeso kainga kuno tempro yo Artemisi, akawanda aiona mbuto ii hingana imwe ye zvishamiso zvinomwe zve nyika. Anhu aienda ku tempro ii koonamata madzimwari awo. Uye kugadzirhwa no kutengeswa ke mifanikiso  ya Artemisi rainga riri bhizi raipasa mare. (Zvii. 19:23-27) Uye kusiya izvona, irona rainga riri thaundi raiziikanwa nge kuita zve cidhimoni.—Zvii. 19:19.

5. Aefeso ainga ari mu cidima pa maonero akanaka nge gwanza ripi?

⁵ Uhure. Anhu aigara ku Efeso aiita maningi uhure uye ainga asikapsveruki nge zviya zvaaiita. Kucedza ngezve zviro zvisikazi kucena zvainga zvakadjairika, haiwa basi mumateatro asiwo mumagereja. (Aef. 5:3) Aefeso akawanda ainga asiya “maitiro akanaka,” masoko aya angareya “kusama kuzwa marhwadzo.” (Aef. 4:17-19) Aefeso asati afunda ngezva Djehovha uye kuziya zvakanaka no zvakashata, hana dzawo dzainga dzisikaatongesi paaiita zvakashata uye awona ainga asina basa nokuti zvaaiita zvairhwadzisa Djehovha here kana kuti haiwa. Ndiyo ndaa, Pauro waakabvunza kuti “ainga ari mu cidima uye akaparadzaniswa no upenyu unopaswa na Mwari.”

6. Ngei Pauro wakabhuya kuti Aefeso zvino ainga ari “ruvheneko”?

⁶ Asi cinopfadza ngecekuti anganani e ku Efeso akasiya kuhamba mu cidima. Pauro wakabhuya kuti ‘zvino awona ainga ari mu ruvheneko mu rubatano na Tenzi.’ (Aef. 5:8) Awona akasanangura kurarama maererano no Soko ra Mwari, rakaita hingana ruvheneko raiatungamirira. (Pis. 119:105) Aefeso aya akasiya zvese zvainga zvakabatana no magereja e kunyepa uye uhure. Awona akagara “ateedzeri a Mwari” uye akaita zviri zvese kuti anamate Mwari no mwoyo wese uye amupfadze.—Aef. 5:1.

7. Mugariro wedu wakatodzana kudini no we Akristu e ku Efeso?

⁷ Nge mushobo umwewo, tisati tafunda cokwadi isusu tainga tiri mu cidima pano cokuita no magereja uye maitiro akashata. Amweni edu taibatanidzwa mu maferiyadho e magereja e kunyepa uye amweni aiita uhure. Asi patakafundira zvinodiwa na Djehovha takaita cinjo uye takatanga kurarama nge mushobo unodiwa na Djehovha. Nge kudaro, izvona zvakatiunzisira zviro zvakawanda zvakanaka. (Isa. 48:17) Asi zvino tinombodikana kurhwisana no zviro zvinganani. Uye tinodikana kuita zviri zvese kuti tigare kure no dima  ratakasiya kure uye “kurumbwa tecihamba hingana ana e ruvheneko.” Asi tingazviita kudini?

TIZAI CIDIMA

8. Maererano na Aefeso 5:3-5, Akristu aidikana kutizei?

⁸ Erengai Aefeso 5:3-5. Kuti agare kure no cidima ce muhambiro wakashata, Akristu e ku Efeso aidikana kusiya zviro zvese zvisikapfadzi Djehovha. Izvona zvaibatanidza haiwa basi muhambiro wakashata wekuita uhure asiwo makani asikazi kucena. Pauro wakaedzurira Akristu e ku Efeso kuti awona aidikana kutiza zviro izvi kana ecida kupinda mu “Umambo wa Kristu no wa Mwari.”

9. Ngei tecidikana kutiza ciro cipi haco cakaringana no uhure?

⁹ Isusu tinodikana kungwarira kuti tisabatanidzwe “pa mabasa asikabetseri e cidima.” (Aef. 5:11) Cokwadi ngecekuti kana munhu akagara eciona, kunzwa uye kugara ecireketa ngezve zviro zvisikazi kucena, zvinoita nyore kuti apedzesere aakuita zviro zvakashata. (Gen. 3:6; Tig. 1:14, 15) Mu nyika imweni, hama “dzakawanda” dzakaumba cikwata pa internet kuti dzicedze. Pakutanga zvaaicedza zvainga zvakaringana no zvekunamata. Asi zvinotsukwarisa kuti no kuhamba ke nguwa makani awo ainga aakutoringana no uhure. Paa padarika nguwa, akawanda e hama idzi akazobhuya kuti zvaaicedza ndizvona zvakaita kuti aite uhure.

10. Sathani unoedza kudini kuticengedza? (Aefeso 5:6)

¹⁰ Nyika ya Sathani inoedza kuticengedzera kuti titendere kuti zvinobhuiwa na Djehovha ngezve kuita uhure uye kuita zviro zvisikazi kucena azvizi kushata. (2 Ped. 2:19) Izvona azvitishamisi! Ngekuti mushobo umwe unoseenzeswa na Sathani kubvira kare ngewekuita kuti anhu asakwanise kusiyanisa cakanaka no cakashata. (Isa. 5:20; 2 Ako. 4:4) Ndiyo ndaa, mafirme akawanda, urongwa unobuda mu materevhizau uye ma saiti anobhuya zviro zvisikaenderani no zvinodiwa na Djehovha! Sathani unoda kuti titendere kuti maitiro asikazi kucena uye kuita uhure i zviro zvakadjairika mazuwa ano, zvinotenderhwa uye azvitikuwadzi.—Erengai Aefeso 5:6.

11. Muezaniso wa Angela unopangidza kudini kuti tinodikana kuseenzesa zviri pana Aefeso 5:7? (Onai foto.)

¹¹ Sathani unoda kuti shamwari dzedu dzigare anhu asikatikohomedzesi kuita kuda ka Mwari. Ndiyo ndaa, Pauro wakangwadza Aefeso kuti: ‘Musaitewo zvinoizwa no aya’ anoita zvakashata mumadziso a Djehovha. (Aef. 5:7) Uye mumazuwa edu ano tinodikana kutonyasa kungwarira kudarika mu nguwa ye hama dze ku Efeso. Ngokuti zvakadjairika kupedza nguwa no anhu, haiwa basi hope no hope asi no mu interneti, zvekuti zvainga zvisikaizwi no Aefeso e kare. Angela, a unogara ku Ásia, wakazoona kuti internet ingakwanisa kukuwadza. Iyena unoti: “Interneti yakaita hingana murau wamusikazwisisi kuti muri kubathwa ndiwo. Ndakatoguma pakushamwaridzana no anhu asikareremedzi zvokwadi zve Bhaibheri. Pakupedzesera ndakaona kuti painga pasina cakashata kugara no upenyu uu usikapfadzi Djehovha.” Zvinopfadza ngezvekuti akuru e ungano ano rudo uye akabetsera Angela kuti aite cinjo. Iyena unoenderera mberi eciti: “Zvino ndinodzadza ndangariro dzangu no zviro zve kumwiya, haiwa nge zviro zviri mu interneti.”

12. Cinyi cicatibetsera kuti tirumbwe takabatisisa zviya zvinobhuiwa na Djehovha kuti zvakanaka uye zvakashata?

¹² Tinodikana kurhwisana no marangariro e nyika e kuti uhure unotenderhwa. Asi tinozviziya  kuti awona ndi manyepo. (Aef. 4:19, 20) Zvakanaka kudzibvunzisa kuti: ‘Ndinongwarira here kuti ndisashamwaridzane zvisina basa no adoni e kucikora, e ku basa uyewo no amweni asikareremedzi zvokwadi zviri mu Bhaibheri? Ndino ushingi we kudziirira zvinozwi na Djehovha zvakanaka uye zvakashata kunyazi anhu amweni asikatenderani nazvo kana kundiona hingana ndisikareremedzi maonero awo here?’ Hingana zvinopangidzwa pana 2 Timoti 2:20-22, tinodikanawo kungwarira patinosanangura shamwari dzedu mu ungano. Zvakanaka kuedzurira kuti amweni mukati me ungano pamweni aatibetseri kuti tirumbwe takatendeka kuna Djehovha.

RUMBWAI MECIHAMBA “HINGA ANA E RUVHENEKO”

13. Zvinoreyei “kurumbwa tecihamba hinga ana e ruvheneko”? (Aefeso 5:7-9)

¹³ Pauro wakakohomedzesa Akristu e ku Efeso haiwa basi kuti abude mu cidima, asiwo “arumbwe ecihamba hinga ana e ruvheneko.” (Erengai Aefeso 5:7-9.) Asi izvona zvinoreyei? Nge mushobo uri nyore, zvinoreya kuti tinodikana kuita zviro hingana Mukristu pa migariro iri yese. Uye mushobo wekuita izvona ngewe kuerenga uye kufunda Bhaibheri nguwa dzese tecibetserhwa no mabhuku edu. Kusiya izvona, zvakanaka maningi kuteya nzee pa muezaniso uye fundiso dza Djesu Kristu, “ciedza co nyika.”—Juau 8:12; Zvie. 6:23.

14. Mwiya mucena unotibetsera kudini?

¹⁴ Kana tecida kurumbwa tecihamba hinga “ana e ruvheneko,” isusu tinodawo rubetso re mwiya mucena. Ngei? Ngekuti zvinoshupha kurumbwa takacena mu nyika ino isikazi kucena. (1 Ate. 4:3-5, 7, 8) Mwiya mucena ucatibetsera kuti tirhwisane no marangariro e nyika, awo anobatanidza ungwaru we nyika uye maonero asikapindirane no mushobo we kurangarira wa Mwari. Mwiya mucena ucatibetsera kuti tiitewo zvese “ngo mushobo wese we zviro zvakanaka zve unatsi.”—Aef. 5:9.

15. Tingatambira mwiya mucena nge mushobo upi? (Aefeso 5:19, 20)

¹⁵ Mushobo umweni we kutambira mwiya mucena ngewe kuita munanato. Djesu akati,  Djehovha ‘angatamawo here kupasa mwiya mucena ku aya anomukumbira?’ (Ruka 11:13) Kusiya izvona, patinokudza Djehovha pa musangano tinotambirawo mwiya mucena. (Erengai Aefeso 5:19, 20.) Mwiya mucena ndiwo ucatibetsera kuti tirarame nge mushobo unopfadza Djehovha.

16. Cinyi cicatibetsera kuti tiite zvisananguro zvakanaka? (Aefeso 5:10, 17)

¹⁶ Kana tecida kuita cisananguro cinokosha “tinodikana kuzwisisa zvinoda Djehovha” uye toita zvinoenderana nazvo. (Erengai Aefeso 5:10, 17.) Nge kuziya zvokwadi zviri mu Bhaibheri zvinopindirana no mingariro yedu, zvinoita hinga tagumira zvinorangarirhwa na Djehovha ngezve nyaya iyona. Pedzepo patinoseenzesa zvokwadi zvisikacinji zviri mu Bhaibheri tinoita zvisananguro zvakanaka.

17. Tingaseenzesa kudini nguwa yedu zvakanaka? (Aefeso 5:15, 16) (Onaiwo mufanikiso.)

¹⁷ Pauro wakabetsera hama dzake dze ku Efeso kuti dziseenzese zvakanaka nguwa yadzo. (Erengai Aefeso 5:15, 16.) Sathani “muzondi wedu,” unoda kuti tigare takabatikana nge zviro zve nyika ino uye pakupedzesera, togara tisina nguwa ye kuseenzera Djehovha. (1 Juau 5:19) Asikazwisisi, Mukristu ungatanga kukanda ndangariro dzake pa mare, pa kufunda uye pa basa pane kuseenzesa mukana iwona pakuseenzera Djehovha. Kana izvona zvikaitika zvinonga zvecipangidza pamhene kuti iyena watanga kurangarira hinga anhu e nyika. Zviri pamhene kuti mare, kufunda uye zviro zvekurarama nazvo azvizi kushata. Asi izvona azvimbodikani kugara pa mbuto ye kutanga mu upenyu wedu. Kana tecida kurumbwa tecihamba hinga “ana e ruvheneko,” tinodikana “kuseenzesa nguwa yedu nge mushobo wakanaka,” tecikanda nzero dzedu pa zviro zviya zvinokosha.

18. Donald wakaitei kuti aseenzese zvakanaka nguwa yake?

¹⁸ Ngwarirai mukana wese kuti mutunhudzire basa ramunoitira Djehovha. Ndizvona zvakaizwa  na Donald unogara ku África do Sul. Iyena unoti: “Inini ndakaima kuti ndione kuti ndaiitei no upenyu wangu. Pedzepo, ndakaita munamato kuna Djehovha no mwoyo wangu wese, ndecikumbira kuti andibetsere kuti ndiite zvakawanda mu basa re kuparidzira. Inini ndakakumbirazve kuti ndione basa rinondipasa nguwa ye kuparidzira. No rubetso ra Djehovha ndizvona zvakaitika. Pedzepo, inini no mukadzi wangu takatanga kuseenza pamwepo mu basa re nguwa yakadzara.”

19. Tingarumbwa kudini tecihamba hinga “ana e ruvheneko”?

¹⁹ Tsamba yakatarhwa ndi Pauro ku Aefeso, yakaabetsera kuti arumbwe akatendeka kuna Djehovha. Uye tsamba ii yakafemerhwa, ingakwanisawo kutibetsera. Hingana zvataona ingakwanisa kutibetsera pakusanangura zvakanaka shamwari dzedu uye waraidzo. Tsamba idzi dzinotibetserawo kuti tirumbwe tecifunda Bhaibheri kuti ruvheneko re cokwadi rirumbwe recitungamirira upenyu wedu. Uyewo dzinobhuya ngezve kukosha ke mwiya mucena, unotibetsera kuti tigare no mawara akanaka. Kuseenzesa zvakatarhwa na Pauro kucatibetsera kuti tiite zvisananguro zvakanaka, zvinopindirana no zvinodiwa na Djehovha. Kuita zviro izvi kucatibetsera kuti tibude mu cidima ce nyika uye torumbwa tiri mu ruvheneko!