1. Mharidzo yakaizwa pa gungano ra 1935 yakacinga kudini djaha rimweni?

DJAHA rainga rino makore 18 parakabhabhatidzwa mu gore ra 1926. Abereki ake ainga ari Afundi e Bhaibheri, zina raizikanwa no Apupuri a Djehovha pa nguwa iyona. Awona ainga ano ana atatu e anarume uye airi e anakadzi, aakakudza kuti aseenzere Djehovha uye ateedzere Djesu Kristu. Cokwadi ku Afundi e Bhaibhei pa nguwa iyona cainga cekuti, djaha iri rakagondeka rairhya pau no kumwa vhinyu makore ese paaizwa Cirangaridzo ce Kurarira ka Tenzi. Ngokudaro, upenyu wake wese wakacinja paakazwa mharidzo yainga ino musoro waiti “Cikwata Cikuru ce Anhu.” Mharidzo ii yakaizwa muna 1935 na J. F. Rutherford pa gungano rakaizwa ku Washington, D.C., U.S.A. Zvinyi zvakarekethwa pa gungano iri?

2. Cokwadi cipi cakabuda pamhene pa mharidzo yakaizwa na Hama Rutherford?

² Mu mharidzo ii, Hama Rutherford akabudisa pamhene aya aizoumba “cikwata cikuru ce anhu” (King James Version), kana kuti anhu asikaerengeki anorekethwa pana Zvakapangidzwa 7:9. Dakara ipona, cikwata ici ce anhu caionekwa hingana cikwata ce anhu acaenda kudenga asina kutenda kakabamba. Hama Rutherford akaseenzesa tsamba ii kuti apanganidze kuti cikwata cikuru ce anhu acizi kusanangurhwa kuti cirarame kudenga, asi ndi mabira amweni a Kristu acapona pa “kutambudzika kukuru” uye acararama nokusikaperi pasi pano. (Zva. 7:14) Djesu akagondesa eciti: “Ndino mabira amweni; asiripi e danga rino, uye acagara amwe basi uye no muushi umwe basi.” (Ju. 10:16) Aya akatodzana no  mabira ndi Apupuri a Djehovha akagondeka ano kariro ye kuzorarama nokusikaperi mu Paradhizo pasi pano. (Mt. 25:31-33, 46) Ngationei kuti kudjeka uku ke cokwadi kakacinja kudini upenyu we anhu akawanda a Djehovha.—Pis. 97:11; Zvie. 4:18.

3-4. Pa gungano ra 1935, mamirionji e anhu akaziyei nge zve kariro yawo uye ngei?

³ Zvinoshamisa zvakaitika pa mharidzo ii, ndipona pakaizwa mubvunzo no muitisi we mharidzo wekuti: “Anhu ese ano kariro yekuzorarama pasi pano nokusikaperi, ngaapurumuke?” Maererano no aya ainga aripo, anhu anokwana kuita 20 000 ainga aripo togura no pakati akapurumuka. Pedzepo Hama Rutherford akareketa eciti: “Onai! Cikwata cikuru ce anhu!” Pakaemberhwa nyara zvisikaiti. Anhu aya akarumbwa akaima akazwisisa kuti ainga asikazi kusanangurhwa kuti ararame kudenga. Aona akazwisisa kuti ainga asikazi kudzodzwa no mwiya mucena wa Mwari. Zuwa rocipiri re gungano, pakabhabhatidzwa Apupuri apsva anokwana kuita 840, akawanda akhona ainga ari e cikwata ce mabira.

⁴ Mumasure me gungano iri, djaha ratamboreketa riya pamwepo no mamirionji e anhu amweni akaima kurhya pau no kumwa vhinyu pa Cirangaridzo ce Kurarira ka Tenzi. Hama imweni, yecidzidodosa yakareketa mazwiro e anhu akawanda ainga aripo yeciti: “Cirangaridzo cakaizwa mu gore ra 1935, ndicona candakaima kurhya no kumwa pa Cirangaridzo ngokuti ndakazwisisa kuti ndainga ndisikazi kuipaswa na Djehovha eciseenzesa mwiya wake mucena, asi mukusiana nazvo, ndakagara no kariro yo kurarama nokusikaperi pa nyika ndeciitawo basa rekuita kuti nyika yese igare paradhizo.” (Aro. 8:16, 17; 2Ako. 1:21, 22) Kubvira panguwa iyona, cikwata cikuru ce anhu cakarumbwa ceciwanda uye ciri kuseenza pamwepo no simba no aya anganani asara. *

5. Djehovha anoona kudini aya akasiya kurhya pau no kumwa vhinyu pa Cirangaridzo?

⁵ Djehovha akaona kudini aya akaima kurhya no kumwa pa Cirangaridzo kubvira mu gore ra 1935? Uye Djehovha anoonawo kudini kana Mupupuri wakabhabhatidzwa nyamasi uno unorhya pau no kumwa vhinyu pa Cirangaridzo ce Kurarira ka Tenzi asi pedzepo oziya kuti aazi kudzodzwa no mwiya mucena? (1Ako. 11:28) Amweni anorhya pa cirangaridzo nge ndaa yekuti aanyasi kuziya kariro yawo. Asi kana iwona akatendera kushaisha kawo no kugondeka, ayena acaakanda ku dii re mabira amweni. Kunyazi asikazorhyi pau no kumwa vhinyu, awona anorumbwa ecipinda Cirangaridzo ngekuti anotenda zvaakaizirhwa na Djehovha uye Djesu.

6. Djesu akabvunza ngirozi kuti dziitei?

⁶ Ngokuti kutambudzika kukuru kaa padhuze, zvakanaka maningi kuti tifundezve bhuku ra Zvakapangidzwa kapituro 7 nge zve aKristu akadzodzwa uye cikwata cikuru ce anhu e mabira amweni. Djesu ari kurumbwa ecibvunza ngirozi kuti dzirumbwe dzakabata matii marongomuna e mhepo icaparadza nyika. Ngirozi idzona adzidikani  kusiya mhepo ii kuti iparadze nyika dakara aKristu ese akadzodzwa adhindwa cidhindo ce kupedzesera, kana kuti, atenderhwa na Djehovha ke kupedzesera. (Zva. 7:1-4) Mubairo we kugondeka kawo, hama dza Kristu dzakadzodzwa dzicagara madzimambo no adiri na ayena kudenga. (Zva. 20:6) Ese aya anobatanidzwa pa mhuri ya Mwari ye kudenga anonga akaetsera no mwoyo wese apo akadzodzwa anokwana kuita 144 000 ecitambira mubairo wawo we kudenga.

7. Pana Zvakapangidzwa 7:9, 10, cinyi cakaonekwa ndi Juau, uye iwona aiita cinyi? (Onai mufanikiso uri pa kapa.)

⁷ Mumasure mekuona madzimambo ne adiri anokwana kuita 144 000 aya, Juau wakaona ciro cimweni cakadakadza maningi “cikwata cikuru ce anhu” awo acapona pa Amagedhoni. Kusiyana ne cikwata cekutanga, cikwata cecipiri ici cakakura uye numero yakhona aiziikanwi. (Erengai Zvakapangidzwa 7:9, 10.) Iwona “akapfeka macira ekucena,” ecipangidza kuti akarumbwa akacena pa nyika ya Sathani uye akarumbwa akagondeka kuna Mwari na Djesu. (Tg. 1:27) Iwona anodaidzira kuti akaponeswa ngokuda ke zviya zvakaizwa na Djehovha uye na Djesu, bira ra Mwari. Nguwa yese, iwona ainga akabata nhai dze micindwe, zvinopangidza kuti anotenda no mupfaro kuti Djesu akagadzwa hinga Mambo na Djehovha.—Ezanisai na Juau 12:12, 13.

8. Zvakapangidzwa 7:11, 12 inotibvunzei nge zve mhuri ya Djehovha ye kudenga?

⁸ Erengai Zvakapangidzwa 7:11, 12. Zvinyi zvakaitika kudenga? Juau wakaona mhuri ye kudenga ya Djehovha ino mupfaro wakakura paanoona cikwata cikuru ce anhu ciri pamberi uye cecirumbidza Djehovha. Mhuri ya Djehovha ye kudenga icapfara maningi paicaona kudzadzika ke cipangidzo ici uye cikwata cikuru ce anhu cecipona pa kutambudzika kukuru.

9. Maererano na Zvakapangidzwa 7:13-15, zvinyi zviri kuizwa no cikwata cikuru ce anhu nyamasi uno?

⁹ Erengai Zvakapangidzwa 7:13-15. Juau wakareketa kuti cikwata cikuru ce anhu “akaphadza nguwo dzawo dzakareba uye akadzicenesa no ngazi ye Bira.” Izvi zviri kuda kureya kuti awona ano hana yakacena uye akagondeka kuna Djehovha. (Isa. 1:18) Awona akadzipira, akabhabhatidzwa, uye akarumbwa ano kutenda kakabamba mu rusudzunuro ra Djesu ano ukama na Djehovha. (Ju. 3:36; 1Pe. 3:21) Hino, awona akasisira kuima pamberi pa cigaro ca Mwari kuti amuitire “basa rakacena usiku no masikati” mu ruanze re pasi pano re tempuro yake. Kunyazi zvino, no kugondeka kese awona ari kuita basa rakakura maningi re kuparidzira uye no re kuita kuti anhu agare afundi e Umambo, ecikanda Umambo wa Mwari pambuto ye kutanga kupinda zvido zvawo.—Mt. 6:33; 24:14; 28:19, 20.

10. Cikwata ce mabira amweni anogondeswei, uye acaona rugondeso ripi recidzadzika?

¹⁰ Cikwata cikuru ce anhu awo acapona pa kutambudzika kukuru acadziirirhwa nokusikaperi na Mwari, ngokuti “Uya anonga akagara pa cigaro acatambaradza tenda riri paari.” Rugondeso ririkuetserhwa no mwoyo wese nge rekuti: “[Mwari] acapukuta misodzi yese pa madziso awo, uye akuzoonekizve rufu, kana kucema.”—Zva. 21:3, 4.

11-12. (a) Hingana zvinorekethwa pana Zvakapangidzwa 7:16, 17, makomborero api acapaswa cikwata cikuru ce anhu? (b) Anhu e mabira amweni angaitei pa Cirangaridzo ce Kurarira ka Tenzi uye ngei?

¹¹ Erengai Zvakapangidzwa 7:16, 17. Parizvino, anhu anganani a Djehovha ari kunetseka no nhenda no kushomeka ke  zvekurhya nge ndaa ye kukonerhwa mare, kuteererhwa uye hondo. Amweni ari kupinzwa mu karaboso. Ngokudaro, cikwata ce mabira amweni cinobambiswa nge kuziya kuti, acapona pacaparadzwa nyika ino yakashata, awona acarumbwa ano zvekurhya zvakawanda zve kunyama uye zve kumwiya. Asi pacaparadzwa nyika ino ya Sathani, cikwata cikuru ce anhu acadziirirhwa pa “kupisa” ke shungu dza Djehovha dzaacaduririra madzinza ese e anhu. Mumasure me kutambudzika kukuru, Djesu acatungamirira aya acapona pa nyika pano ku “mvura ye upenyu [usikaperi].” Rangarirai izvi: Cikwata cikuru ce anhu ano kariro imweyo. Mamiriyonji e aya acapona, awona aacazofizve!—Ju. 11:26.

¹² Mabira amweni ano kariro inoshamisa yekuti anotenda Djehovha uye na Djesu! Aona aazi kusanangurhwa kuti ararame kudenga, asi azvidi kubhuya kuti awona aana basa kana kuti aakoshi kuna Djehovha. Anhu ese, pasinei no kariro yawo awona anokudza Mwari na Tenzi. Awona anoita izvi nge kupinda Cirangaridzo ce Kurarira ka Tenzi.

13-14. Ngei anhu ese ecidikana kupinda Cirangaridzo ce rufu ra Kristu?

¹³ Mumakore akadarika, munhu 1 pa anhu anokwana kuita 1000 anopinda Cirangaridzo, pangaoneka umwe basi unorhya pau no kumwa vhinyu. Ungano dzakawanda amuna anorhya pau no kumwa vhinyu. Izvi zvinopangidza kuti anhu akawanda anopinda Cirangaridzo ano kariro yo kurarama pa nyika pano. Hino, ngei awona ecipinda Cirangaridzo ce Kurarira ka Tenzi? Awona anopinda Cirangaridzo ce Kurarira ka Tenzi hingana zvinoizwawo no anhu anoenda ku mucato we shamwari. Awona anopinda ngokuti anoda kupangidzira rudo uye rubetso kuno aya anonga ari kucata. Zvimwezvoo, mabira amweni anopinda Cirangaridzo ngokuti anoda kupangidza rudo rawo, pa kutsigira kawo Kristu uye akadzodzwa. E mabira amweni anopinda Cirangaridzo kuti apangidze kuti anokoshesa rusudzunuro ratinoedzurira, rusudzunuro ricaita kuti awona akwanise kurarama nokusikaperi pasi pano.

¹⁴ Cikonzero cimweni cinoita kuti awona  apinde Cirangaridzo ngece kuda kuzwira mutemo wa Djesu. Djesu paakapedza kurarira uku no afundi ake, ayena akati kaari: “Rumbwai meciita izvi mecindirangarira.” (1Ako. 11:23-26) Hino, awona anorumbwa ecipinda Cirangaridzo ce Kurarira ka Tenzi, dakara paya pekuti akadzodzwa anonga aciri pasi pano. Ngokudaro, mabira amweni anopikawo anhu ese kuti apinde Cirangaridzo pamwepo nawo.

15. Umwe na umwe ungakudza kudini Mwari uye na Kristu pa Cirangaridzo?

¹⁵ Pa Cirangaridzo, tino mukana we kukudza Mwari uye na Kristu teciseenzesa ngoma uye no munamato. Mharidzo icaizwa gore rino ino musoro unoti: “Pangidzai kuti Munoreremedza Zvamakaizirhwa na Mwari uye na Kristu!” Izvi zvicamubetserai kuti mutunhudzire rukudzo ramuinaro kuna Djehovha uye na Kristu. Pa nguwa icahambiswa pau no vhinyu, ese aya anonga aripo anonga eciedzurirhwa kuti pau no vhinyu zvinoimirira—mwiri uye no ngazi ya Djesu. Tinonga teciedzurirawo kuti Djehovha akatendera kuti Mwana wake atifire kuitira kuti tikwanise kuona upenyu usikaperi. (Mt. 20:28) Wese unoda Baba wedu we kudenga uye no Mwana wake unodikana kupinda Cirangaridzo.

16. Akadzodzwa no mabira amweni akaezana papi?

¹⁶ Kusiyana kunoita akadzodzwa no mabira amweni andizvopi zvinoita kuti Mwari aareremedze. Ese hawo ano mutengo wakakura kaari. Tikada kuona, ayena akaaripa no mutengo we upenyu we Mwana wake waanodisa, kuti atenge akadzodzwa uye no mabira amweni. Musiyano uripo pa magrupu mairi aya nge ye kariro basi. Ese hawo anodikana kurumbwa akagondeka kuna Mwari uyewo kuna Kristu. (Pis. 31:23) Uye edzurirai kuti, mwiya mucena wa Mwari unokwanisa kupangidza simba rimwero ku anhu ese. Izvi zviri kuda kureya kuti, Djehovha anopasa mwiya mucena wake ku umwe na umwe maererano no zvaanoda.

17. Zvinyi zviri kuetserhwa no akadzodzwa anganani asara?

¹⁷ AKristu akadzodzwa aabarhwi no kario yo kudenga. Mwari ndiyena anoikanda mu mwoyo mawo. Awona anorangarira nge zve kariro yawo, anonamata nge zvayo uye anoetsera no mwoyo wese kutambira mubairo wawo we kudenga. Awona aakwanisi kuziya nge zve mwiri wawo we mwiya. (Afi. 3:20, 21; 1Ju. 3:2) Kunyazi zvakadaro, awona anoetsera kuona Djehovha, Djesu, ngirozi, uye no akadzodzwa amweni. Awona anoetsera kugara  pamwepo nawo pa mipando ye Umambo we kudenga.

18. Zvinyi zviri kuetserhwa no mabira amweni?

¹⁸ Mabira amweni anotenda kariro yekuti anhu ese akasikwa anokariro ye kurarama nokusikaperi pasi pano. (Mup. 3:11) Awona anoetserawo no mwoyo wese zuwa no zuwa paacabetsera kucinja nyika ino kuti igare paradhizo. Anoetsera no mwoyo wese zuwa raacagadzira nyumba dzawo, paacasima maruwa awo, uye paacakudza ana awo no uthongo wakanaka. (Isa. 65:21-23) Anoetsera kunyasa kuona nyika—matunhu, makwasha, mabahari—uye kunyasa kuziya nge zve zvisikwa zva Djehovha. Kupinda izvi, awona anoshamiswa nge kuziya kuti rudo rawo na Djehovha ricanyasa kubamba.

19. Cirangaridzo cinotipasa mukana upi uye gore rino Cirangaridzo cicaizwa rini?

¹⁹ Djehovha akapasa museenzi wake umwe na umwe kariro yakagondeka ye nguwa yo mberi. (Dje. 29:11) Cirangaridzo ce rufu ra Kristu cinopasa mukana umwe na umwe wedu we kukudza Mwari uye na Kristu nge zviya zvaakatiitira, kuti tikwanise kupfadzwa no upenyu usikaperi. Cirangaridzo i ciitiko cinopinda zvese ku aKristu e zvirokwazvo kuti aungane. Cicaizwa kubira ke zuwa mu Sabudu, 27 ya Nyaonga ya 2021. Gore rino, akawanda acapinda ciitiko ici no rusununguko rakakwana. Asi amweniwo acapinda kunyazi no kuteererhwa. Amweni acasongana no cinetso cakakura kuti apinde ciitiko ici nge ndaa yekuti ari mukaraboso. Djehovha, Djesu uye no mhuri yese ya Mwari yo kudenga inonga yeciona, kuti ungano yese, magrupu uye no amweni anonga apinda Cirangaridzo!