BUWE rakatarhwa mu makore 700-600 K.A.A., riri mu muzeu wa Bible Lands in Jerusalem. Buwe iri rainga riri mubako raiigwa anhu akafa riri pa dhuze no Hebrom, ku Israeri. Masoko akatarhwepo anoti: “Ngaatukwe Hagaf, mwana wa Hagav, na Yahweh Sabaot.” Zvakatarhwa izvi zvinotsigira kudini Bhaibheri? Izvi zvinopangidza kuti zina ra Mwari Djehovha, rinotarhwa YHWH mu masoko e kare e ciHebheru, raiziikanwa uye raiseenzeswa mu mazuwa iwona. Zvezvirokwazvo zvitarhwa zvimweni zve mu mapako zvinopangidza kuti aya aiyaseenzesa hingana mbuto yekufindarira kajinji kakhona aitara zina ra Mwari, pamwepo no ma zina anobatanidza matarirhwe e zina ra Mwari, pa madziro.

Ecireketa nge zvakatarhwa izvi, Dr. Rachel Nabulsi we ku Univesidade Georgia wakati: “Kuseenzeswa kairi-kairi ke zina YHWH kaikosha maningi. . . . Tsamba uye zvakatarhwa izvi zvinopangidza kukosha ke YHWH mu upenyu we aIsraeri uye aDjuda.” Izvi zvinotsigira Bhaibheri, umo makatarhwa zina ra Mwari, YHWH mu ciHebheru, rinooneka kajinji. Kajinji kakhona, mabhii aya aibatanidzawo zina ra Mwari.

Masoko e kuti “Yahweh Sabaot,” akatarhwa pa buwe anoda kureya kuti “Djehovha we hondo.” Izvi zvinoita hingana zvirikupangidza kuti haiwa zina ra Mwari basi, asiwo soko rekuti “Djehovha we hondo” rainyanya kuseenzeswa mu nguwa ye Bhaibheri. Izviwo zvinotsigira kuseenzesa ke Bhaibheri pa soko rekuti “Djehovha we hondo” rinoonekwa kanokwana kuita 283 mu ci Hebheru, kajinji mu bhuku ra Isaya, Djeremiya, uye Zakariya.