1. Mishobo ipi inopangidza kutamika ke rudo mazuwa ano?

BHAIBHERI rakareketa kare kuti mu mazuwa ekupedzesera, anhu aizogara asina “rudo ku mhuri dzawo.” (2Ti. 3:1, 3) Tirikuona kuti uphorofiti uu uri kudzadzika mu mazuwa ano. Ngo muezaniso, ma mirionji e mhuri dzakaparadzana zvecisiya abereki ano shungu uye ana ecizwa hingana asikadiwi. Kunyazi mhuri dzinogara pa nyumba imweyo dzingasama kugarisana zvakanaka. “Baba, mai, uye ana akaparadzana, umwe na umwe asi anogara shamwari ye komputadhori, thabhureti, simartfoni, kana kuti vhidhiyo gemi,” unodaro cipanga mazano ce mhuri. “Kunyazi mhuri idzi dzecirarama pa nyumba imweyo, awona aatomboziani.”

2-3. (a) Maererano na Aroma 12:10, tinodikana kupangidzira rudo rikuru kuna ani? (b) Ticaonei mu fundo ino?

² Isusu atidi kuumbwa nge mwiya we nyika isina rudo. (Aro. 12:2) Tinoda kufundira kugara no rudo ku mhuri yedu, uye ku hama no hanzvadzi dzedu dziri mu ungano. (Erengai Aroma 12:10.) Cinyi cinozwi rudo rikuru? Soko iri rinoda kureya ushamwari we mu mhuri. Iri ndiro rudo ratinodikana kusakurira ku hama dze ciKristu. Patinopangidzira rudo, tinonga tecibetsera ungano yese kuti iseenzere Djehovha yakabatana uye yecipfara.—Mik. 2:12.

³ Kuti tibetsereke pa kusakurira uye kupangidza rudo rikuru, onai kuti tingafundei no miezaniso ye mu Bhaibheri.

4. Tsamba ya Tiyago 5:11 inotibetsera kudini kuona rudo ra Djehovha?

⁴ Bhaibheri rinoreketa nge zve mawara akanaka a Djehovha. Ngo muezaniso, Bhaibheri rinoti “Mwari i rudo.”  (1Ju. 4:8) Patinofunda nge zva Djehovha tinogara shamwari yake. Asi Bhaibheri rinoti Djehovha “akadzara ne rudo rikuru.” (Erengai Tiyago 5:11.) Zvezvirokwazvo Djehovha ano rudo rikuru!

5. Djehovha anopangidza kudini usisi, uye tingamuteedzera kudini?

⁵ Onai kuti Tiyago 5:11 inobatanidza rudo rikuru ra Djehovha ne wara rimweni raanotikwededza dhuze naye—usisi. (Eki. 34:6) Mushobo unoseenzeswa na Djehovha pakupangidza usisi ngewe kutirekerera patinoshaisha. (Pis. 51:1) Mu Bhaibheri, usisi unobatanidza kurekerera zvishaishi. Usisi unobva mu mwoyo, panoona munhu ari pa ngozi unozwa cido cekubetsera. Djehovha anopanganidza cido cake caanaco cekutibetsa ne muzwire wa mai ku mwana wawo. (Isa. 49:15) Patinonga takatsukwara, usisi wa Djehovha unomuita kuti atibetsere. (Pis. 37:39; 1Ako. 10:13) Tingakwanisa kupangidzira usisi ku hama no hanzvadzi dzedu ngekudzirekerera, haiwa kuiga bundu paanotitira zviro zvakashata. (Aef. 4:32) Asi gwanza ratingapangidza naro kuti tino usisi, ngere kubetsera hama no hanzvadzi dzedu paanobatana no zvineso. Rudo parinotitora kuti tipangidzire usisi, tinoteedzera Djehovha, muezaniso mukuru we rudo.—Aef. 5:1.

6. Djonatani na Dhavidhi akapangidzirana kudini rudo rikuru?

⁶ Bhaibheri rinoreketa nge zve ngano dze anhu asikazi kukwana asi akapangidza rudo risikaperi. Onai muezaniso wa Djonatani na Dhavhidhi. Bhaibheri rinoti: “Djonatani na Dhavhidhi akagara shamwari tsika ndi tsikewo, uye Djonatani wakatanga kuda Dhavhidhi hingana iyena wene kamare.” (1Sa. 18:1) Dhavhidhi wakadzodzwa kuti azogare mambo masure ma Sauro. Mumasure mazvo, Sauro wakatsamwira no kuzonda  Dhavhidhi dakara pakuda kumuuraya. Asi mwana wa Sauro, Djonatani aazi kubatana na baba ake pakuzonda Dhavhidhi. Djonatani na Dhavhidhi akagondesana kurumbwa ari shamwari uye kugara ecitsigirana.—1Sa. 20:42.

7. Cinyi caikwanisa kupingaidza kuti Djonatani na Dhavhidhi asashamwaridzane?

⁷ Kudanana kukuru kainga kuri pakati pa Djonatani na Dhavhidhi kunonyanya kuoneka patinoongorora zviro zvimweni zvingadaro zvakapingaidza kuti azogare shamwari. Ngo muezaniso, Djonatani wainga ano makore 30 kudarika Dhavhidhi. Djonatani zvaiita kutoreketa kuti apana candingabetserhwa nge djaha iri. Asi panokudaro, Djonatani wainga asikaoni Dhavhidhi hingana munhu wakaterera.

8. Ngei mecirangarira kuti Djonatani wainga shanwari yakanaka kuna Dhavhidhi?

⁸ Djonatani waikwanisa kuitira shanje Dhavhidhi. Hingana mwana wa Mambo Sauro, Djonatani hingana waida kureketa kuti ndiye waizogara nhaka pa cigaro ca baba wake. (1Sa. 20:31) Asi Djonatani waidzidodosa, uye wainga akagondeka kuna Djehovha. Ndiyo ndaa, wakatsigira maningi Dhavhidhi paakasanangurhwa kuita mambo. Wainga akagondeka kuna Dhavhidhi kunyazi izvi pezvaimutsa hasha dza Sauro.—1Sa. 20:32-34.

9. Djonatani waiwona Dhavhidi hingana murhwisi here? Panganidzai.

⁹ Djonatani waida maningi Dhavhidhi, ndiyo ndaa aazi kumuona hingana nyamarhwa. Djonatani wainga ari munhu anokwanisa kurhwa. Iyena na baba ake Sauro ainga ano mbiri ye “kugara anhu aigogoma maningi kudarika magodzi” uye “anosimba kudarika mhondoro.” (2Sa. 1:22, 23) Kana tikada kuona, Djonatani ungadai akadzikudza. Kunyazi zvakadaro, Djonatani aazi kurhwisa kana kugumbuka. Kusiyana nazvo, Djonatani waisirira Dhavhidhi nge kushinga kake uye kugondeka kake kuna Djehovha. Zvezvirokwazvo mu masure mekuuraya Goriati ndipona paakatanga kunyanya kuda Dhavhidhi hingana iyena kamare. Tingapangidzira kudini rudo ku hama no hanzvadzi dzedu?

10. Zvinoreyei “kudanana maningi zvecibva pa mwoyo”?

¹⁰ Bhaibheri rinotibvunza kuti “tidanane maningi zvecibva pa mwoyo.” (1Pe. 1:22) Djehova anotipa muezaniso. Rudo rake rakanyanya kukura zvokuti kana tikagondeka kaari apana cingaputsa ushamwari iwona. (Aro. 8:38, 39) Mu ciGedego soko rokuti “rikuru” rinoda kureya kupangidza rudo—kunyazi zvekutobambidzira. Nguwa dzimweni, tinotodikana “kudzitatamura” uye “kuphanisira” kuti tikwanise kupangidza rudo rikuru kuno aya atinonamata nawo. Patinogumburhwa, tinodikana kurumbwa “tecishingirirana mu rudo teciedza no mwoyo wese kucengeta rubatano re mwiya mucisungo ce runyararo.” (Aef. 4:1-3) Kana tikaseenza pakucengetedza “cisungo ce runyararo” atizoringiri zvishaishi zve hama dzedu. Ticaita no zvese zvatinokwanisa kuti tione hama dzedu hinga maonero adzinoizwa na Djehovha.—1Sa. 16:7; Pis. 130:3.

11. Ngei kusakurira rudo rikuru zvecinesa nguwa dzimweni?

¹¹ Azviri nyorepi kurumbwa tecipangidza  rudo rikuru ku hama dzedu, kajinji patinoziya zvishaishi zvawo. Izvi zvainga zvakaomera amweni aKristu e pakutanga. Ngo muezaniso, Yudhiya na Sindike aazi kusongana no cineso painga eciseenza “pamwepo na [Pauro] nge masoko anopfadza.” Asi nge cinkonzero cimweni, aona akambosama kuzwirana. Hino Pauro wakaakohomedzesa kuti “agare no maonero amwewo muna Tenzi.”—Afi. 4:2, 3.

12. Tingasakurira kudini rudo ku hama no hanzvadzi dzedu?

¹² Tingaitei kuti tisakurire rudo rikuru re hama no hanzvadzi dzedu mazuwa ano? Patinonyasa kuzia hama dzedu, tingakwanisa kunyasa kuazia uye kusakurira rudo rikuru kaari. Makore uye no zvakasongana no munhu, azvidikani kupingaidza. Edzurirai kuti, Djonatani wainga ano makore 30 kudarika Dhavhidhi. Imwimwi mungakwanisa kugara no cido ce kushamwaridzana no munhu mukuru—kana munhu mudoko here? Pamunoita izvi, mungakwanisa kupangidza kuti “munoda sangano rese re hama.”—1Pe. 2:17.

13. Ngei tisikadikani kuedza kudziezanisa ne anhu ese e mu ungano?

¹³ Kugara no rudo rikuru ku hama no hanzvadzi dzedu, ndizvo zvicaita kuti tizwe tiri padhuze pa umwe na umwe ari mu ungano here? Haiwa, andizvopi hazvo. Azvizi kushata hazvo kupfarira amweni kupinda amweni nge nda ye mazwiro akatodzana ne edu. Djesu akabvunza aphostori ake ese kuti “shamwari” asi ainga ano rudo rakakura kuna Juau. (Ju. 13:23; 15:15; 20:2) Kunyazi zvakadaro, Djesu aazi kupangidza rusananguro kuna Juau. Ngo muezaniso, Juau ne hama yake Tiyago paakakumbira kuti azoone cimbuto mu Umambo wa Mwari, Djesu akaabvunza kuti: “Andinipi ndinopasa mbuto yekugara kudii re muoko kwawo here kana kuruboshuwe.” (Mk. 10:35-40) Mukuteedzera Djesu, atidikani kusanangura kutamba ne shamwari dze padhuze  basi. (Tg. 2:3, 4) Kuita izvi kunomutsa kuparadzana—i wara risina mbuto mu ungano ye ciKristu.—Dju. 17-19.

14. Maererano na Afiripi 2:3, cinyi cicamubetsera kuti mudzidodose?

¹⁴ Patinopangidza rudo rikuru ku umwe na umwe, tinonga tecidziirira ungano pa mudzimu we kurhwisa. Edzurirai kuti Djonatani aazi kurhwisana na Dhavhidhi nge ndaa ye cigaro. Tese tingakwanisa kuteedzera muezaniso wa Djonatani. Musaone adoni enyu hingana nyamarhwa wenyu nge ndaa ye zviro zvaanokwanisa kuita, “asi ne kudzidodosa onai amweni hingana akuru kamuri.” (Erengai Afiripi 2:3.) Edzurirai kuti umwe na umwe mu ungano anobetsera. Kana tikagara tecidzidodosa, teciona zvakanaka zve hama dzedu, ticabetserhwa nge muezaniso wawo wekugondeka.—1Ako. 12:21-25.

15. Mafundei pa zviro zvakasongana na Tania ne mhuri yake?

¹⁵ Patinosongana ne miedzo isikakarirhwi, Djehovha acatinyaradza no rudo ratinoona kubva ku hama no hanzvadzi. Cimborangarirai zvakaitika ne mhuri imweni pasure pekupinda zuwa rimwe re gungano ra 2019 “Rudo Arimboperi!” Gungano re Nyika Dzakawanda rakaizirhwa ku Estados Unidos. “Petaihwirira ku hoteri,” anodaro Tania mai we ana atatu, “karu peyakapfotsora yowiya kuzotibhima. Apana wakakuwara, asi takabuda mu karu toima mu gwanza tecishamiswa. Umweni wakatibvunza kuti tibude mugwanza. Yainga iri hama yedu yaibvawo ku gungano. Uye ndiyo yega yakaimepo.  Hama shanu dze ku Suécia dzakaimawo. Hanzvadzi dzakakhumbatira inini ne ana angu, ndizvo zvataida! Ndakaagondesa kuti taizosara zvakanaka, asi awona aazi kutisiya tiri tega. Awona akagara nesu kunyazi medhiko paakaguma, awona akagara no cokwadi cekuti tino zviro zvese zvetaida. Pa muedzo wese, takaona rudo ra Djehovha. Zviro izvi, zvakabambisa rudo redu ku hama no hanzvadzi pamwepo na Djehovha.” Imwimwi munokwanisa kuedzurira nguwa yamaida ciro, uye shwamwari yomupangidzira rudo here?

16. Zvikonzero zvipi zvinoita kuti tipangidze rudo rikuru ku umwe na umwe?

¹⁶ Cimboonai migumisiro yatinoona kana tikapangidza rudo rikuru ku umwe na umwe. Isusu tinobambisa hama ne hanzvadzi dzedu pa nguwa ye zvineso. Isusu tinobambisa rubatano riri pakati pe anhu a Djehovha. Tinopangidza kuti tiri afundi a Djesu, uye izvi zvicatora amweni kuti awiye mu cokwadi. Pa musoro pa zvese, isusu tinokudza “Baba ano usisi wese Mwari we kunyaradza kese,” Djehovha. (2Ako. 1:3) Tese hedu ngatirumbwe tecisakurira uye kupangidza rudo rikuru!