MUSORO WE KUFUNDA 39
Kana Munhu Wamunoda Akasiya Djehovha
“Kakawanda kese . . . aimurhwadzisa.”—PIS. 78:40.
NGOMA 124 Rumbwa Wakatendeka
ZVATICAFUNDA *
1. Amweni anozwa kudini panoona munhu waanoda ecidzingwa?
IMWIMWI muno hama kana kuti shamwari yakadzingwa mu ungano here? Izvi zvinorhwadza maningi! Hanzvadzi imweni inozwi Hilda, inoti: “Mwamuna wangu paakafa mumasure me makore 41 e mucato, ndakarangarira kuti ici ciro cakashatisisa maningi cingaitika kandiri. * Asi mwana wangu paakasiya ungano, mukadzi wake, uye no ana ake, izvi zvakanyanya kundirhwadza.”
Djehovha anozwisisa kushuphika kedu kana munhu watinoda akasiya cokwadi (Onai mandima 2-3) *
2-3. Maererano na Pisarema 78:40, 41, Djehovha anozwa kudini paanoona aseenzi ake ecimusiya?
2 Rangarirai kuti Djehovha akarhwadziwa kudini, ngirozi idzona dzainga dziri nhengo dze mu mhuri yake kamare pedzakamupandukira! (Dju. 6) Uye rangarirai matsukwarire aakaita paakaona Aisraeri, dzinza raaida maningi recimupandukira kakawanda. (Erengai Pisarema 78:40, 41.) Garai no rugondo rekuti kana hama uye shamwari ikasiya cokwadi, Djehovha anotsukwarawo maningi. Baba edu e kudenga ano rudo anozwisisa zvamuri kuzwa. No unaki, Djehovha acamubambisa uye acamubetsera.
3 Mu fundo ino, ticaona zvatingaita kuti titambire rubetso ra Djehovha. Ticaonawo kuti tingabetsera kudini amweni mu ungano, arikubatana no migariro ii inoshupha. Asi ngatitange nge kuona murangariro wakashata watisikadikani kugara nawo.
MUSADZIPASE NDAA
4. Abereki akawanda anozwa kudini paanoona mwana wawo ecisiya Djehovha?
4 Mwana wamunoda paanosiya Djehovha, kajinji abereki anogara ecidzibvunzisa kuti cinyi caaidikana kuitazve kuti amubetsere kurumbwa ari mucokwadi. Mumasure mekuti mwana wake wadzingwa, hama imweni inozwi Luke yakatendera yeciti: “Inini ndaidzipasa ndaa. Ndainga ndisikawati nge ndaa yazvo. Nguwa dzimweni, ndaicema uye mwoyo wangu wairhwadza.” Elizabeth, hanzvadzi yakasongana no migariro yakatodzana no ii, yaidzinetsa yecirangarira kuti: “Ndipapi pendakashaisha? Ndinoona kuti andizi kuita zviri zvese kuti cokwadi cipinde mu mwoyo me mwana wangu.”
5. Kana munhu akasiya Djehovha, ndaa ngeyani?
5 Isusu tinodikana kuedzurira kuti Djehovha akapasa umwe na umwe wedu rusudzunuko rekusanangura. Izvi zvinoda kureya kuti, umwe na umwe wedu ungasanangura kuti unoda kumuzwira here kana kuti haiwa. Ngo muezaniso, madjaha amweni ainga asina abereki ano muezaniso wakanaka, kunyazi zvakadaro, awona akasanangura kuseenzera Djehovha. Uyewo kuno madjaha akarerhwa no abereki akaita zviri zvese kuti aafundise cokwadi ciri mu Bhaibheri. Kunyazi zvakadaro, madjaha aya paakakura akasanangura kusiya cokwadi. Izvi zvinotifundisei? Zvinotifundisa kuti munhu umwe na umwe unodikana kusanangura ega kuseenzera Djehovha. (Djos. 24:15) Ndiyo ndaa, kana muri baba kana mai makatsukwara ngekuti mwana wenyu wakasiya Djehovha, edzurirai kuti andimwipi muno ndaa. Hino, kana marangariro awona akatanga kumuuirai, rhwisanai nawo!
6. Djaha ringazwa kudini panoona abereki ecisiya Mwari?
6 Nguwa dzimweni, umwe we abereki ungasiya cokwadi uye ungatosiyawo mhuri yake kamare. (Pis. 27:10) Izvi zvingarhwadzisa maningi ana ngekuti kajinji awona anoona abereki hingana muezaniso wawo. Esther, wakaona baba ake ecidzingwa, unoti: “Inini ndaicema ngekuti baba angu ainga asikasii cokwadi basi, awona akasanangura kusiya Djehovha ecizviziya kamare. Ndinoda baba angu. Ndiyo ndaa paakadzingwa, ndakanetseka maningi nge zvakaanakira. Inini ndakatombopatika.”
7. Ngaapi mazwiro a Djehovha nge zve djaha rina baba kana mai akadzingwa?
7 Madjaha, kana umwe we abereki enyu wakadzingwa, isusu tiri kurhwadziwawo ndizvo! Asi gondai henyu kuti Djehovha anonyasa kuzviziya zvamuri kuzwa. Ayena anomuda uye anokoshesa kugondeka kenyu, uye na isusuwo—hama no hanzvadzi dzenyu mukutenda tinomudawo. Edzurirai kuti imwimwi amuna ndaa nge zvisananguro zvakaizwa no abereki enyu. Hingana zvarekethwa pakutanga, Djehovha akapasa munhu umwe na umwe rusudzunuko rekusanangura. Uye munhu wese wakadzipira obhabhatidzwa ndiyena ‘ucathwara mutoro wake.’—Aga. 6:5.
8. Padzinonga dzecietsera kuti hama yakadzingwa ihwirire kuna Djehovha, nhengo dzimweni dze mumhuri dzingaitei? (Onai bhokisi rakazwi “ Hwhirirai kuna Djehovha.”)
8 Kana munhu wamunoda akasiya Djehovha, zvakadjairika kugara no kariro yekuti zuwa rimweni iyena ucahwirira. Asi asati ahwirireko, imwimwi mungaitei? Zvinokosha kuti murumbwe mecidziriritira pakunamata kenyu. Nge kuita izvona, mucapasa muezaniso wakanaka kune nhengo dzimweni dze mhuri kutobatanidzawo no uya wakadzingwa. Mucaonawo simba rinodikanwa kuti mushingirire mazwire akashata. Ngatione zviro zvinganani zvamungaita.
ZVAMUNGAITA KUTI MURUMBWE MAKABAMBA PAKUNAMATA
9. Mungaitei kuti mutambire simba ra Djehovha? (Onai bhokisi rakazwi “ Matsamba Angatinyaradza Kana Munhu Watinoda Akasiya Djehovha.”)
9 Garai no urongwa wakanaka wezvekunamata. Zvinokosha maningi kuti murumbwe mecibambisa kutenda kenyu no ke mhuri yenyu. Mungazviita kudini? Garai no urongwa wekuerenga Bhaibheri nguwa dzese, kunyasa kurirangarira uye kupinda misangano. Izvona zvicamubetsera kuti mutambire simba ra Djehovha. Joana, una baba no hama akasiya cokwadi, unoti: “Ndinozwa runyararo mu masure mekuerenga nge zve anhu anorekethwa mu Bhaibheri hingana Abhigairi, Esteri, Djobo, Zuzee uye Djesu. Miezaniso yawo inodzadza mwoyo wangu uye nzero dzangu nge marangariro akanaka anoita kuti ndizwe ndiri nani. Uye ngoma dzedu dze mu Broadcasting, dzinondibambisawo maningi.”
10. Pisarema 32:6-8 ingamubetsera kudini pamunonga makatsukwara maningi?
10 Panganidzirai Djehovha zvamuri kuzwa. Pamunonga makatsukwara maningi, musambosiye kuita munamato kaari. Kumbirai Djehovha kuti ‘amubetsere kuona mugariro wenyu nge maonere ake. Kumbiraiwo kuti amupase ungwaru uye amufundise gwanza ramunodikana kuhamba naro.’ (Erengai Pisarema 32:6-8.) Zviri pamhene kuti azviripi nyore kupanganidzira Djehovha nguwa dzese zvamuri kuzwa. Asi ayena anonyasa kuzwisisa zvamuri kuzwa. Ayena anomuda maningi uye anomukohomedzesa kuti mubhuye zvese zviri mu mwoyo menyu.—Eki. 34:6; Pis. 62:7, 8.
11. Maererano na Ahebheru 12:11, ngei tecidikana kugonda no mupango we rudo wa Djehovha? (Onai bhokisi rakazwi: “ Kudzinga—Cipangidzo ce Rudo ra Djehovha.”)
11 Tsigirai zvisananguro zve akuru. Kudzingwa urongwa unobva kuna Djehovha. Mushobo wakanaka wekubetsera munhu unonga ashaisha uye zvicabetsera ungano yese. (Erengai Ahebheru 12:11.) Pamweni makambozwa anhu ecishaisha kureketa nge zve akuru kana pangadzingwa munhu, asi zvingaita kuti munhuwo aadi kureketa zviro zvakashata zvakaizwa no munhu wakadzingwewo. Zvezvirokwazvo, isusu atina masoko akadzara. Gondai henyu kuti akuru ainga ari mudare rekutonga, akaita zviri zvese kuti aseenzese mazano e Bhaibheri uye kuti atonge pa “mbuto ya Djehovha.”—2Mak. 19:6.
12. Amweni akawona migumisiro ipi yakanaka ngekutsigira mupango wa Djehovha?
12 Kana mukatsigira zvisananguro zve akuru, munonga mecibetsera wakadzingwewo kuti ahwirire kuna Djehovha. Elizabeth, wamborekethwa nge zvake unoti: “Zvakatinetsa maningi kusama kureketa no mwana wedu we dangwe. Asi iyena paakawhirira kuna Djehovha, wakatendera kuti zvainga zvakasisiradi kuti adzingwe. Nokuhamba ke nguwa, iyena wakabhuya kuti wakafunda zviro zvakawanda zvinokosha. Izvi zvakandibetsera kuona kuti mupango wa Djehovha wakanaka nguwa dzese.” Mark, mwamuna wa Elizabeth wakabhuyawo kuti: “Mu masure me nguwa yakareba, mwana wedu wakandibvunza kuti cimwe ce zviro cakamubetsera kuti ahwirire ngecekuti isusu takaita zvaidikana kuizwezvo kamare. Ndinotenda maningi Djehovha nge kutibetsera kuti tigare anhu anomuzwira.”
13. Cinyi cingamubetsera kuti mushingirire marhwadzo?
13 Cedzai no shamwari dzinozwisisa zvamurikusongana nazvo. Kana mukagara mecishamwaridzana no aKristu akakura pakunamata zvingamubetsera kuti mugare no maonero akanaka. (Zvie. 12:25; 17:17) Joana, wamborekethwa nge zvake, unoti: “Inini ndaizwa ndiri ndega mu mwoyo mangu. Asi pandaicedza no shamwari dzangu dzandaithemba, ndaizwa ndiri nani.” Asi kana hama dzimweni dzikareketa zviro zvingaita kuti murhwadziwe?
14. Ngei tecidikana ‘kurumbwa tecizwisisana uye tecirekererana no mwoyo wese’?
14 Garai no mwoyo unononoka kutsamwa no hama dzenyu mukutenda. Zvezvirokwazvo, aanhuesepi acatibvunza zviro zvakanaka. (Tg. 3:2) Tese hedu tiri anhu asikazi kukwana. Hino musashamisike kana amweni akatama kuziya zvokureketa kana kutoreketa asikadi zviro zvingamurhwadza. Edzurirai zano rakapaswa no muphostori Pauro: “Rumbwai mecizwisisana uye mecirekererana no mwoyo wese, kunyazi kana pano munhu ano caakashaishirhwa no umweni wake.” (Ako. 3:13) Hanzvadzi imweni ino hama yakadzingwa inoti: “Hama dzimweni dzakaedza kuita zviro zvakanaka nge mushobo usikazi kukwana, asi Djehovha akandibetsera kuti ndiarekerere.” Ungano ingaitei kuti ibetsere nhengo dze mhuri dzino anyaukama akadzingwa?
UNGANO INGABETSERA
15. Tingaitei kuti tibetsere hama dzino anyaukama akabva kudzingwa?
15 Shamwaridzanai no mhuri dzino anyaukama akadzingwa. Hanzvadzi imweni inozwi Miriam inotendera kuti, hama yake ye kunyama peyakadzingwa, iyena wainetseka maningi kuti aende kumisangano. Iyona inoti: “Ndaitya kuti anhu amweni aizoreketei. Asi hama nohanzvadzi dzakapangidza unaki uye dzakatsukwarawo pamwepo na inini. Awona aazi kureketa zviro zvakashata nge zve zvakaitika no hama yangu. Ngo rubetso re hama no hanzvadzi, andizi kushingirira ndega marhwadzo angu.” Hanzvadzi imweni inoedzurirawo yeciti: “Mwana wedu paakadzingwa, hama dzinodiwa, dzakauya kuzotinyaradza. Amweni akatendera kuti ainga asikazii zvekureketa. Kunyazi zvakadaro, amweni akacema pamwepo na inini uye amweni akanditumira tsamba dzinobambisa. Zvaakandiitira zvakandibetsera maningi!”
16. Ungano ingarumbwa yecibetsera kudini hama dze munhu akadzingwa?
16 Rumbwai mecitsigira hama dzino anyaukama akadzingwa. Awona anoda kupangidzwa rudo uye kubambiswa ndimwi. (Ahe. 10:24, 25) Nguwa dzimweni, hama dzimweni dzinoima kureketa no hama dze munhu wakadzingwa uye awona anopedzesera aakuzwa hingana kuti akadzingwawo. Musasiye izvona zveciitika! Kunyanya madjaha ana baba kana mai akadzingwa, anoda maningi kusimbwa no kubambiswa. Maria, wakaona mwamuna wake ecidzingwa uye ecisiya mhuri, unoti: “Shamwari dzangu dzinganani dzakauya kumba kangu, dzotibikira uye dzakatibetsera kuita fundo ye mhuri. Awona akarhwadziwa na inini uye akacema na inini. Pakatanga kurekethwa masoko asiriopi nge zvangu, awona angandidziirira. Zvezvirokwazvo, awona akandibambisa!”—Aro. 12:13, 15.
Ungano ingabetsera uye ingapangidza rudo ku hama dzino anyaukama akadzingwa (Onai ndima 17) *
17. Akuru angaitei kuti anyaradze hama dze munhu wakadzingwa?
17 Akuru, khorovherai mikana yese kuti mubambise kutenda ke hama dze munhu wakadzingwa. Imwimwi muno ubaba unokosha wekunyaradza hama dzino anyaukama akasiya Djehovha. (1Ate. 5:14) Tangai ndimwi kuabambisa misangano painonga isati yatanga uye painopera. Avhakacirei uye itai munamato nawo. Budai mwese mu basa re kuparidzira uye kana zveciita, apikei pakunamata kenyu ke mhuri. Aushi akakura pakunamata, anoziya kuti anodikana kupangidza rudo uye kurangarira mabira a Djehovha arikushuphika.—1Ate. 2:7, 8.
MUSARUZE KARIRO UYE RUMBWAI MECIGONDA NA DJEHOVHA
18. Maererano na 2 Pedru 3:9, Mwari anodei ku aya akaima kumuseenzera?
18 Djehovha “aadi kuti munhu upi hake aparadzwe, asi anoda kuti anhu ese acinyuke.” (Erengai 2 Pedru 3:9.) Kunyazi kana munhu akaita citema cakakura, upenyu wake unorumbwa wecikosha kuna Mwari. Rangarirai ngezve mutengo wakakura wakaripwa ndi Djehovha nge ndaa ye upenyu we ashaishi ese—upenyu we Mwana wake anodiwa. No rudo rakakura, Djehovha anoedza kubetsera anhu akamusiya kuti ahwirire kaari. Uye ayena anoetsera kuti awona atende rubetso iri hingana zvinopangidzwa pa mufanikiso wa Djesu we mwana anohwirira kumba. (Ru. 15:11-32) Anhu akawanda akasiya cokwadi, akazohwirira kusangano ra Djehovha. Uye ungano yaakaatambira no nyara mbiri. Elizabeth, wamborekethwa nge zvake wakakwanisa kuzwa mupfaro uu nge kuona mwana wake ecihwirinzwa. Eciedzurira zvakaitika kare, unoti: “Ndinotenda maningi kuna ese akandikohomedzesa kuti ndisaruze kariro.”
19. Ngei tingagonda na Djehovha nguwa dzese?
19 Isusu tingagonda na Djehovha nguwa dzese. Ayena anotipasa nhungamiriro kuti zvitihambire zvakanaka. Ayena ndi Baba anobata zvakanaka ano rupo uye anoda maningi ese anomunamata. Gondai henyu kuti, pamunosongana no matambudziko akakura, Djehovha aazomusii muri mwega. (Ahe. 13:5, 6) Mark wamborekethwa nge zvake unoti: “Djehovha aasati akambotisiya. Pese patinosongana no matambudziko, ayena anonga ari kudii redu.” Djehovha acarumbwa ecimupasa “simba rakatunhudzirhwa.” (2Ako. 4:7) Ndiyo ndaa, kana munhu wamunoda akasiya Djehovha, garai no rugondo rekuti imwimwi mungakwanisa kurumbwa makagondeka uye muno kariro.
NGOMA 28 Ndiani angagara Shamwari ya Djehovha?
^ par. 5 Isusu tinotsukwara maningi patinoona munhu watinoda ecisiya Djehovha! Mu fundo ino, ticaona kuti Mwari anozwa kudini izvi pazvinoitika. Ticaonawo zviro zvingaizwa no hama dze munhu wakadzingwa kuti akurire marhwadzo uye kuti arumbwe akabamba pakunamata. Ticaonawo kuti hama dzese dze mu ungano dzingaitei kuti dzinyaradze uye dzibetsere hama dze munhu wakadzingwa.
^ par. 1 Mazina amweni mu fundo ino akacinjwa.
