1. Djehovha angagarei katiri?

DJEHOVHA ano mhuri ye anamati. Mhuri iyo inoumbwa ndi Djesu, uyo ari “dangwe re zvisikwa zvese,” uye nge ngirozi dzakawanda. (Ako. 1:15; Pis. 103:20) Kupinda izvona, Djesu paainga ari pa nyika, akafundisa kuti anhu akagondeka angakwanisawo kuona Djehovha hinga Baba. Ecireketa no afundi ake, Djesu akabhuya nge zva Djehovha kuti “Baba angu uye Baba enyu.” (Ju. 20:17) Patinodzipira kuna Djehovha uye tobhabhatidzwa, tinogara nhengo ye mhuri ye hama no hanzvadzi dzinotida.—Mk. 10:29, 30.

2. Ticaonei mu fundo ino?

² Anhu amweni zvinoashuphira kuona Djehovha hinga Baba ano rudo. Zvingaita kuti anhu amweni angasama kuziya kuti angapangidzira kudini rudo hama no hanzvadzi dzawo mukutenda. Fundo ino, icatipangidza kuti Djesu anotibetsera kudini kuti tione Djehovha hinga Baba anotida uye hinga Baba atingakwanisa kukhwedera dhuze nawo. Ticaonawo kuti tingateedzera kudini Djehovha pamabatire atinoita hama no hanzvadzi dzedu mukutenda.

3. Ciro cipi cinokosha ce munamato wekuezanisira, cinoita kuti tizwe tiri dhuze na Djehovha?

³ Djehovha ndi Baba ano rudo. Djesu anoda kuti tione Djehovha nge maonero aanoita—hinga baba ano rudo atingakwanisa kukhwederera, haiwa hinga munhu usina ushamwari. Izvi zviri pamhene pa munamato wa Djesu waakafundisa afundi ake. Ayena akatanga munamato wekuezanisira no masoko anoti: “Baba edu.” (Mt. 6:9) Djesu aikwanisa kutifundisa kuti tidainze Djehovha hinga “we Masimba ese,” “Musiki,” uye “Mambo asina mugumo”—mazina ese aya e kureremedza, akanaka uye anooneka mu Bhaibheri. (Ge. 49:25; Isa. 40:28; 1Ti. 1:17) Asi Djesu akatifundisa kuti tidainze Djehovha hinga  “Baba,” uye soko iri rinoita kuti tizwe tiri dhuze naye.

4. Tinoziya kudini kuti Djehovha anoda kukhwedera dhuze na isusu?

⁴ Zvinomunetsera here kuona Djehovha hinga Baba ano rudo? Amweni anoona kudaro. Pamweni izvona zvingaitika nge ndaa ye mbuto yaakarerha asikapangidzirhwi rudo. Zvinonyaradza maningi kuziya kuti Djehovha anozwisisa mazwiro edu! Ayena anoda kukhwedera dhuze na isusu. Ndiyo ndaa Soko rake recitikohomedzesa kuti: “Khwederai kuna Mwari, uye ayena acakhwedera kamuri.” (Tg. 4:8) Djehovha anotida uye ayena anoda kugara Baba akanaka katiri.

5. Maererano na Ruka 10:22, Djesu anotibetsera kudini kuti tizwe tiri dhuze na Djehovha?

⁵ Djesu angatibetsera kuti tikhwedere dhuze na Djehovha. Apana munhu unonyasa kuziya Djehovha kudarika Djesu. Ayena akateedzera unhu wa Baba ake ngo mushobo wakakwana, zvekuti akati: “Munhu wese unondiwona, unonga aonawo Baba.” (Ju. 14:9) Djesu akaita hinga mukoma edu akuru anotifundisa kureremedza nokuzwira Baba edu, uye zvatingaita kuti tiapfadze uye titenderhwe nawo. Uye cinonyanya kukosha, ngecekuti Djesu anotibetsa kuzwisisa mawara a Djehovha akadai hinga rudo rake rukuru uye unaki. (Erengai Ruka 10:22.) Ngatione miezaniso minganani inopangidza kuti Djehovha ndi Baba ano rudo.

6. Tinoziya Kudini kuti Djehovha aipurutana minamato ya Djesu?

⁶ Djehovha anopurutana ana ake. Onai migariro minganani yekuti Djehovha akapurutana Mwana wake we dangwe. Paainga ari pa nyika, Djesu akaita munamato kakawanda uye Djehovha aimupurutana. (Ru. 5:16) Djehovha akapurutana Mwana wake paaita munamato wakaringana nge zvisananguro zvinokosha zvaaidikana kuita, ngo muezaniso, pakusanangura aphostori 12. (Ru. 6:12, 13) Djehovha akapurutanazve Djesu ecinamata paainetseka maningi. Nguwa doko asati apandukirhwa, Djesu akanamata no mwoyo wake wese kuna Baba ake nge zve muedzo mukuru waaizosongana nawo. Pa ciitiko ici, Djehovha  aazi kupurutana munamato wa Djesu basi, asi akatumawo ngirozi kuti ibambise Mwana Wake anodiwa.—Ru. 22:41-44.

7. Munozwa kudini nge kuziya kuti Djehovha anopurutana minamato yedu?

⁷ Nyamasi uno, Djehovha aciri kupurutana minamato ye aseenzi ake uye ayena anodaira minamato ii panguwa yakasisira uye ngo mushobo wakanaka. (Pis. 116:1, 2) Hanzvadzi imweni yeku Índia yakakwanisa kuona izvi zveciitika mu upenyu wayo. Iyona yaisongana no matambudziko akakura e mu ndangariro. Iyona yakaita munamato no mwoyo wese kuna Djehovha uye yakabhuya zvese zvainga zveciitika. Iyona yakatara kuti: “JW Broadcasting ra Mauwe 2019 raireketa nge zvekuti tingakunda kudini zviro zvingatiodza mwoyo, ndizvona kamare zvandainga ndecida kuzwa. Djehovha akadaira munamato wangu eciseenzesa Broadcasting iri.”

8. Djehovha akapangidza kudini kuti aida Djesu?

⁸ Djehovha anoda Djesu uye akamubetsera pa mazuwa anonetsa aakasongana nawo paainga ari pa nyika, uye ayena anozwa rudo rimwero ku umwe na umwe wedu. (Ju. 5:20) Djehovha akaita zvese zvaidiwa na Djesu pakunamata, zvemundangariro uye zvekunyama. Uye ayena akadjekesera Mwana wake kuti aimuda uye kuti aimupfarira. (Mt. 3:16, 17) Ngekuziya kuti aikwanisa kugonda na Baba ake e kudenga ano rudo, Djesu aazi kumbozwa ari ega.—Ju. 8:16.

9. Zviro zvipi zvatinazvo zvinopangidza kuti Djehovha anotida?

⁹ Hinga Djesu, tese isusu takazviona no madziso edu kamare Djehovha ecipangidza kuti anotida. Rangarirai zvinoteera: Djehovha anotendera kuti tigare shamwari dzake uye anoticengeta pa mazwiro edu eciseenzesa hama no hanzvadzi dzedu dzatinonamata nadzo dzinoita kuti tipfare. (Ju. 6:44) Djehovha anotipasawo zvese zvatinoda pakunamata kuti tigare nokutenda kakabamba. Ayena anototibetserawo kuti tione zviro zvekurarama nazvo. (Mt. 6:31, 32) Patinorangarira nge zve rudo ra Djehovha katiri, rudo redu kaari rinotunhudzirika.

10. Tingateedzera kudini Djehovha?

¹⁰ Djehovha anobata hama no hanzvadzi dzedu no rudo. Asi katiri zvingatishuphira kupangidzira rudo ku hama dzedu. Ciro cinoita kuti zvitishuphire ngecekuti isusu tino tsika dzakasiyana uye takarerhwa mumigariro yakasiyana. Uye tese tinoita zvishaishi zvinoita kuti amweni anyangadzwe uye aore mwoyo. Kunyazi zvakadaro, umwe na umwe wedu ungakwanisa kuita zvese zvaanokwanisa kuti rudo rinoita kuti tibatane, rirumbwe rakabamba. Tingazviita kudini? Ngekuteedzera Baba edu uye kupangidza rudo ku hama no hanzvadzi dzedu. (Aef. 5:1, 2; 1Ju. 4:19) Ngatione zvatingafunda kubva pa muezaniso wa Djehovha.

11. Djesu akateedzera kudini “usisi wakakura”wa Djehovha?

¹¹ Djehovha anopangidza “usisi wakakura.” (Ru. 1:78) Munhu uno usisi uno netseka paanoona munhu umweni ecitambudzika uye unopsvaka mishobo yekumubetsera uye nokumunyaradza. Hingana Djehovha, Djesu akapangidza usisi nge mabatire aaiita anhu. (Ju. 5:19) Eciona grupu rakakura re anhu, Djesu “akaazwira usisi ngokuti aibathwa zvakashata uye ainga akabararika hingana mabira asina muushi.” (Mt. 9:36) Asi Djesu ainga asikazwiri anhu usisi basi, ayena akaita ciro kuti aabetsere. Ayena akaporesa anorhwara uye akabambisa aya ‘aiseenza no simba uye ainga akaremerhwa.’—Mt. 11:28-30; 14:14.

12. Pasai muezaniso wekuti tingapangidzira kudini usisi?

 ¹² Kuti tipangidze usisi ku hama dzedu, kutanga tinodikana kurangarira nge zve zvinetso zvaarikusongana nazvo. Ngo muezaniso, pamweni hanzvadzi imweni ingagara no dambudziko rakakura re uthongo. Iyona ingasama kugurunguta, asi pamweni ingada rubetso. Kodi hanzvadzi iyona iri kukwanisa kuriritira mhuri yayo here? Yaizopfara nge kutambira rubetso rekubika kana kucenesa nyumba here? Zvingaitawo kuti hama imweni ingapererhwa ngo basa. Zvakadini kuibetsera painonga yecipsvaka basa rimweni? Zvingaita kuipasa mare musikadzipangidziri kuti ndimwi mamupasa?

13-14. Tingateedzera kudini no rupo ra Djehovha?

¹³ Djehovha ano rupo. (Mt. 5:45) Isusu atidikani kuetsera kuti hama dzedu dzikumbire rubetso kuti tiapangidzire usisi. Kuita hingana Djehovha, tingakwanisa kutanga kuzviita. Ayena anoita kuti zuwa ritidjekere mazuwa ese tisikatozi kumukumbira! Uye kupisa ke zuwa kunoita kuti anhu ese ararame, haiwa basi aya anotenda Djehovha nge zvaanoaitira. Ngekutipasa zvese zvatinoda, Djehovha anopangidza kuti anotida. Uye isusu tinomudawo maningi nge ndaa ye unaki uye rupo rake!

¹⁴ Eciteedzera Baba edu e kudenga, hama no hanzvadzi dzakawanda dzinotanga kupangidza rupo. Ngo muezaniso, muna 2013, Supertufão Haiyan yakaparadza zviro zvakawanda ku Filipinas. Hama no hanzvadzi dzakawanda dzakaruza nyumba dzawo uye zviro zvawo. Asi mhuri yedu ye ku mwiya ye mu nyika dzese dzakakasika kuabetsera. Akawanda akaita mupiro uye akapinda mucirongwa cikuru cekuwaka kuti agadzirise uye kuti awake nyumba dzinokwana kuita 750 mu gore rimwe basi! Mu nguwa ye nhenda ye COVID-19, Apupuri a Djehovha arikupeta masimba ari ese kuti abetsere hama no hanzvadzi dzawo. Patinokasika kubetsera mhuri yedu yekumwiya, tinonga tecipangidza kuti tinoida maningi.

15-16. Maererano na Ruka 6:36, tingateedzera kudini Baba edu e kudenga?

¹⁵ Djehovha ano nyasha uye anorekerera. (Erengai Ruka 6:36.) Mazuwa ese, isusu tinopupurira nyasha dza Baba edu e kudenga. (Pis. 103:10-14) Djesu akateedzera zvakanaka Baba ake. Kunyazi eciona kuti ateeri ake  ainga asikazi kukwana, ayena aigara eciabata no usisi uye eciarekerera. Djesu akatopasa upenyu wake kuti zvitema zvawo zvirekererhwe. (1Ju. 2:1, 2) Kuziya kuti Djehovha na Djesu ano nyasha uye anorekerera zvezvirokwazvo, izvona azvitunhudziri rudo redu kaari here?

¹⁶ Rudo rinobatanidza mhuri yedu ye kumwiya rinonyasa kubamba ‘patinorekererana no mwoyo wese.’ (Aef. 4:32) Zviri pamhene kuti nguwa dzimweni, azviripi nyore kurekerera, asi tinodikana kupeta masimba kuti tikwanise kuzviita. Ciro cakabetsera maningi hanzvadzi imweni, i fundo ye Murindiri inoti: “Kanganwiranai Nomwoyo Wose.” * Iyona yakatara kuti: “Kufunda musoro uu kakandibetsera kucinja maonero angu nge zve nyaya ii, uye kuiona ngo mushobo uri nani. Fundo iyona yakapanganidza kuti kurekerera amweni akurei kuti tinonga tecitendera miitiro yakashata yawo kana kuti kurerusa zviro zvakashata zvaakatiitira. Kurekerera kunoreya kubvisa bundu ripi haro ngecishaishi caanonga atiitira uye kucengetedza runyararo redu.” Patinorekerera no mwoyo wese hama no hanzvadzi dzedu, tinonga tecipangidza kuti tinodzida uye tinonga teciteedzera Baba edu Djehovha.

17. Maererano na Mateu 5:16, tingakudza kudini Baba edu e kudenga?

¹⁷ I makomborero akakura kugara nhengo ye mhuri ye pasi rese ino rudo. Tinoda kuti anhu akawanda abatane nesu pakunamata Mwari. Ndiyo ndaa, tinodikana kungwarira kuti tisaite ciro cipi haco cingasvipisa zina ra Baba edu Djehovha uye re anhu ake. Nguwa dzese tinoedza kurarama nge mushobo unoita kuti anhu atende masoko akanaka.—Erengai Mateu 5:16.

18. Cinyi cingatibetsera kuti tisatye kuparidzira?

¹⁸ Pamweni paya tinoshorhwa uye tinotoguma pakuteererhwa nge kuzwira Baba edu e kudenga. Izvona zvinoita kuti mutye kureketa no amweni nge zviya zvamunotenda here? Hino garai norugondo rekuti Djehovha  no Mwana wake acamubetsera. Djesu akagondesa ateeri ake kuti ainga asikadikani kunetseka nge zvaaizoreketa uye no mushobo waaizoreketa. Ngei? Djesu akapanganidza eciti: “Mucazopaswa zvokureketa panguwa iyona. Ngokuti andimwipi basi munonga mecireketa, asi mwiya mucena wa Baba enyu ndiwo unonga wecireketa weciseenzesa imwimwi.”—Mt. 10:19, 20.

19. Pasai muezaniso we munhu wakaparidzira no ushingi.

¹⁹ Onai muezaniso wa Robert. Iyena waifunda Bhaibheri ke nguwa doko basi, ndiyo ndaa wainga asina uzii wakawanda. Hino iyena waidikana kuenda ku tribhunari inotongwa anyahondo ye ku África do Sul. No ushingi, iyena wakapanganidzira mutongi kuti waida kurumbwa akagondeka ngekuti aida hama dzake mukutenda. Iyena waitenda nge kugara nhengo ye mhuri ya Djehovha! Pedzepo, mutongiwo akamubvunzisa kuti: “Hama dzako ngadzipi?” Robert wakashamiswa no mubvunzo uu. Ndipo paakaedzurira tsamba ye zuwa, ya Mateu 12:50 inoti: “Uya unoita kuda ka baba angu ari kudenga, ndiyena hama yangu hanzvadzi yangu uye mai angu.” Kunyazi eciziya kuti Robert wainga asina nguwa yakareba ecifunda Bhaibheri, Djehovha akamupasa mwiya mucena wekuti iyena adaire mubvunzo uu no dzimweni dzaainga asikakariri. Pamweni Djehovha akapfara maningi nge zvakaizwa na Robert! Uye ayena anopfarawo na isusu patinomugonda uye patinogara no ushingi wekuparidzira mu migariro inoshupha.

20. Munodikana kushinga kuitei? (Juau 17:11, 15)

²⁰ Rumbwai mecikoshesa makomborero a munawo e kugara nhengo ye mhuri yekumwiya ino rudo. Isusu tino Baba akanaka maningi kupinda amweni ese uye tino hama no hanzvadzi dzakawanda dzakagondeka. Asi musarangarire kuti kugara nhengo ye mhuri ii kunoreya kuti amucasongani no matambudziko. Sathani no ateeri ake ano uzondi wakakura, anoedza kuzungunusa rugondo redu rekuti Djehovha anotida uye anoedza kuparadza kubatana kedu. Asi Djesu akanamata ecikumbira Baba ake kuti aticengete kuitira kuti mhuri yedu ye kumwiya irumbwe yakabatana. (Erengai Juau 17:11, 15.) Uye Djehovha arikudaira munamato iwona. Hinga Djesu, garai no rugondo re rudo ra Djehovha. Gondai henyu kuti ayena acarumbwa ecimutsigira. Shingai kurumbwa mecikhwedera dhuze no mhuri yenyu ye kumwiya.