1-2. (a) Maererano na Zvierengo 16:31, tinodikana kuona kudini hama dzedu dzakura? (b) Ticadaira mibvunzo ipi mu fundo ino?

KUNO parki yakakura ku Arkansas, mu Estados Unidos, ye kuti kunooneka madhiyamante akawanda pasi. Ngekuti mapuwe awona aasati agadzirwha, anhu akawanda anokwanisa kuadarika asikaakoshesi.

² Nge gzanza rimwero, hama dzedu dzakura dzakagondeka dzakaita hinga madhiyamante aya, awona ndi upfumi unokosha. Soko ra Mwari rinoezanisa bvudzi rawo rakacena no korona. (Erengai Zvierengo 16:31; 20:29) Anhu akawanda angakwanisa kusama kukoshesa hama idzi dzacembera. Madjaha anoziya kuti anhu acembera anokosha angakwanisa kuwina zviro zvakawanda kaari kupinda upfumi. Mu fundo ino, ticaona mhinduro dze mibvunzo mitatu dzinoti: Ngei Djehovha eciona hama dzacembera hingana upfumi unokosha? Ngei awona anokosha maningi ku sangano ra Djeovha? Tingafunda kudini zvakawanda nge miezaniso yawo?

3. Maererano na Pisarema 92:12-15, ngei hama dzedu dzakura uye dzakagondeka dzinokosha kuna Djehovha?

³ Hama dzedu dzacembera uye dzakagondeka dzinokosha mu madziso a Djehovha. Ayena anokwanisa kuona zviri mu mwoyo me hama idzi dzakura, anodziziya uye anokoshesa mawara awo anoshamisa. Djehovha anopfara maningi hama idzi padzinocedza no madjaha nge zve mashiperiensiya awo aakaona ke makore akawanda paaimuseenzera akagondeka. (Djo. 12:12; Zvie. 1:1-4) Djehovha anokoshesawo kushingirira kawo. (Mar. 3:16) Upenyu wawo wainga usiripi nyore; kunyazi zvakadaro, kutenda kawo muna Djehovha akuzi kuzunguzwa. Kariro yawo ye ramangwana yakanyasa kubamba kudarika pa nguwa yaakafunda cokwadi uye Djehovha ane rudo rakakura nawo ngekuti  “kunyazi acembera,” awona ari kurumbwa eciziisa zina rake.—Erengai Pisarema 92:12-15.

4. Cinyi cinganyaradza hama dzedu dzinodiwa dzacembera?

⁴ Kana imwimwi muri kucembera, tapota garai no rugondo re kuti Djehovha anoedzurira zvese zvakanaka zvamakamuitira. (Ahe. 6:10) Imwimwi makatsigira no mwoyo wese basa re kuparidzira uye izvi zvakapfadza Baba edu e kudenga. Makasongana no matambudziko—kutombatanidzawo matambudziko akakura maningi—makatsigira cokwadi ce Bhaibheri, makaseenza no simba pa mitoro yemakapaswa nge sangano ra Djehovha uye makarowedzawo amweni. Nguwa dzese makaita zviri zvese kuti mutsigire cinjo dze sangano ra Djehovha. Uyezve makabetsera no kubambisa aya ari kuseenza mu nguwa yakadzara. Kugondeka kenyu, kunoitawo kuti rudo rina Djehovha kamuri ritunhudzirike. Ayena anogondesa kuti “aazosii aya akagondeka kaari”! (Pis. 37:28) Ayena anogondesa ku hama dzacembera kuti: “Dakara bvudzi renyu racena ndicarumbwa ndecimuriritirai.” (Isa. 46:4) Hino, musagare no mazwiro e kuti nge ndaa ye kuti ndakura andikoshi mu sangano ra Djehovha. Zvezvirokwazvo imwimwi munokosha maningi!

5. Hama dzedu dzacembera dzinodikana kuedzurirei?

⁵ Hama dzedu dzacembera dzino zvakawanda zvadzingaita. Zviri pamhene kuti awona aazi kubamba hingana kare, asi nge kuhamba ke makore akagara no mashiperiensiya akawanda maningi. Awona angarumbwa ecibetsera sangano ra Djehovha nge mishobo yakasiyana-siyana, ndizvo zvinopangidzwa no miezaniso dzinoteera dze mu nguwa ye kare no ye mazuwa ano.

6-7. Miezaniso ipi iri mu Bhaibheri ye anhu ainga acembera akakomborerhwa ngo kuseenzera Djehovha akagondeka?

⁶ Mu Bhaibheri tinogumira miezaniso yakanaka ye aseenzi a Djehovha akagondeka akarumbwa ecimuseenzera kunyazi no thunga raainga anaro. Ngo muezaniso, Mozesi ainga ano makore 80 paakatanga kuseenza hingana muphorofita wa Djehovha uye muimiriri we dzinza re Aisraeri. Dhanyeri pamweni paainga ano makore anokwana 90, Djehovha akarumbwa ecimuseenzesa hingana muphorofiti. Uye muphostori Juau pamweni ainga ano makore 90 paakafemerhwa kuti atare bhuku ra Zvakapangidzwa.

 ⁷ Aseenzi amweni a Djehovha akawanda akagondoka aasonyanyi kurekethwa mu Bhaibheri, uye awona angakwanisa kutama kuziikanwa no anhu. Asi Djehovha akaaona uye akaakomborera nge kugondeka kawo. Ngo muezaniso, Bhaibheri rinoreketa nge zve mwanarume wainga ari “munatsi uye wakaperera kuna Djehovha” waizwi Simoni, asi Djehovha aimuziya uye akamupasa makomborero e kuona Djesu paainga ari mwana mudoko. Uyezve kureketa uphorofiti unganani nge zvake uye nge zve mai ake. (Ru. 2:22, 25-35) Rangariraiwo nge zve muezaniso we muphorofitas kadzi ainga acembera aizwi Ana. Kunyazi no makore 84, tingakwanisa kubhuya kuti iyena “aazi kumboruza misangano.” Bhaibheri rinoti iyena “airumbwa ari pa tempro nguwa dzese,” ndiyo ndaa Djehovha akamupasawo makomborero akakura e kuona Djesu paainga ari mwana. Zviri pamhene kuti Simoni na Ana aikosha kuna Djehovha.—Ru. 2:36-38.

8-9. Pasai muezaniso unopangidza kuti afirhwa kadzi anokosha kudini ku sangano ra Djehovha?

⁸ Mazuwa ano, hama dzedu dzakawanda dzacembera dzakagondeka muezaniso wakanaka ku madjaha. Onai zvakaitika kuna hanzvadzi Lois Didur. Iyena akatanga kuseenza hinga mupionera kamare no makore 21 ku Canadá. Mu masure me izvi, iyena no mwamuna wake John, akaseenza ke nguwa yakareba hingana aonereri e nharaunda. No kuhamba ke nguwa awona akaseenza ke makore anokwana kuita 20 ku Bheteri re ku Canadá. Lois paainga ano makore 58, iyena na John kuti aseenze ku Ucrânia. Akatambira kudini mupiko uu? Akatanga kurangarira here kuti tacembera maningi atikwanisi kooseenzera ku nyika imweni? Haiwa. Awona akatendera kupikwa kaaizwa uye John akagadzwa hinga nhengo ye Dare re Firiari re ku Ucrânia. Mu masure me makore manomwe John akashaika, asi Lois akashinga kurumbwa eciseenza ari ikona. Pari zvino, no makore 81, Lois ari kurumbwa eciseenzera Djehovha akagondeka ku Bheteri re ku Ucrânia uye ese ikona anomuda maningi.

⁹ Afirhwa kadzi amweni akaita hingana hanzvadzi Lois, pamweni angakwanisa kutama kunyanya kukosheswa hinga nguwa yaainga ano amuna awo; asi kugara kawo hinga afirhwa kadzi, akuiti kuti awona asame kukosha. Ke makore akawanda hanzvadzi idzi dzakapeta masimba ari ese pakutsigira amuna awona kuti arumbwe eciseenzera Djehovha akagondeka. Tingakwanisa kuzwisisa kuti ngei awona ecikosha kuna Djehovha. (1Ti. 5:3) Pakutunhudzira, awona angakwanisawo kubambisa madjaha.

10. Muezaniso upi wakanaka watinoona pana hama Tony?

¹⁰ Hama dzedu dzakawanda dzakagondeka dzinorarama mu nyumba dzinocengeterhwa cemberi, ndi upfumi unokosha. Ngo muezaniso, hama imweni inozwi Tony, pari zvino iri kuraramira mu nyumba idzona. Iwona akabhabhatidzwa no makore 20 mu mwedzi wa Katutu wa 1942 ku Pennsylvania, mu Estados Unidos. Apazi kudarika nguwa yakawanda, awona akasongana no muedzo we zve matongerhwe e nyika,  nge kuramba kwenda kuhondo awona akakandhwa mukaraboso ke makore mairi no hafu. Awona no mukadzi wawo Hilda, akakudza ana awo airi mu cokwadi. Ke makore akawanda, Tony akaseenza mu ungano nhatu hinga mutungamiriri we ungano (zvino unozwi murongi we dare re akuru) hingana muonereri we gungano re nharaunda. Awona akaitisa misangano no fundo dze Bhaibheri mukaraboso. Pari zvino, Tony aano makore 98 uye aamborangariri kusiya kuseenzera Djehovha. Awona ari kurumbwa ecipeta masimba pakuseenzera Djehovha akabatana no ungano yaari kupinda!

11. Tingapangidza kudini ku hama dzedu dzacembera dzinorarama mu nyumba dzinocengeterhwa anhu akura kuti dzinokosha katiri?

¹¹ Tingakudza kudini hama dzedu dzacembera dzinorarama mu nyumba dze acembera? Akuru angakwanisa kuabatanidzawo pa mabasa e ungano pese pazvinobvira. Tinokwanisawo kupangidza kuti tinoarangarira nge kuavhakacira uye kuapika kuti ticedze nawo teciseenzesa vhidhiyo chamada. Kana teciziya hama yacembera inorarama pa nyumba inorerhwa anhu acembera kure no ungano yaanopinda, tinodikana kupangidza kuti tinoakoshesa. Kana tikasama kungwarira, tingapedzesera takanganwa hama dzedu dzacembera. Amweni akhona angakwanisa kuona hinga kuti azvibetseri kureketa nge zvawo kana kuti zvinoshupha kureketa zvaari kusongana nazvo. Asi kana tikaita mibvunzo uye tonyasa kuapurutana paya paanobhuya nge zve mupfaro waakaona pakuseenzera Djehovha, ticabambiswa maningi.

12. Tingagumira hama dzakadini mu ungano yedu?

¹² Pamweni tingashamiswa asi mu ungano yedu kamare tingakwanisa kugumira hama dzedu dzakagondeka dzacembera dzinomuezaniso wakanaka katiri. Hanzvadzi imweni inozwi Harriette, yaakuseenzera Djehovha yakagondeka ke makore akawanda mu ungano yawo Nova Jersei, mu Estados Unidos. Awona aidikana kufuruka kuti aende koogara no mwana wawo. Hama dze mu ungano yawo dzakatora nguwa kuti anyase kuaziya, uye dzakaona kuti ainga agumira upfumi. Hanzvadzi Harriette akaapanganidzira mashiperiensiya akawanda aakasongana nawo mu basa re kuparidzira paakatanga kufunda cokwadi mu gore ra 1920. Pa nguwa iyona, paaibuda mu basa re kuparidzira aihamba no shikovha ye kucukuca mazino mu pasta nguwa dzese—kuitira kuti pamweni aizopinzwa mukaraboso. Asi zvezvirokwazvo, awona akapinzwa mukaraboso ke sumana imwe kairi kese muna 1933. Pa zviitiko zviiri izvi, mwamuna wawo anga asiripi Mupupuri wa Djehovha, asi akarumbwa eciatsigira uye eciriritira ana awo atatu. Zvezvirokwazvo, hama dzakura dzakagondeka, dzakaita hingana hanzvadzi Harriette dzakasisira kuti tidzireremedze!

13. Tingafundei nge zve kukosha kunoita hama dzedu dzacembera mu sangano ra Djehovha?

¹³ Hama no hanzvadzi dzedu dzacembera dzinokosha maningi ku sangano ra Djehovha. Awona akakwanisa kuona no madziso awo kamare kuti Djehovha akakomborera kudini sangano rake nge makwanza akasiyana-siyana uye kuti akaakomborerawo kudini pacawo. Awona akakwanisawo kugara no mikana ye kufunda mafundo anokosha nge zvishaishi zvawo kamare. Hino, onai hama idzi hingana “manyuku e uzii,” uye fundai zvakawanda nge zve mashiperiensiya awo. (Zvie. 18:4) Kana mukatorawo nguwa kuti munyase kuaziya, mucabambisa kutenda kenyu uye mucakwanisa kufunda zvakawanda kubva kaari!

14. I kohomedzeso ipi yatinopaswa pana Dheuteronomiyo 32:7?

¹⁴ Tangai ndimwi kucedza no hama dzacembera. (Erengai Dheuteronomiyo 32:7.) Awona angasama kukwanisa kuona zvakanaka,  kunyazi kugara no simba re kureketa kana kuhamba, asi mwoyo yawo yakaita hinga ye madjaha uye awona akaita “zina rakanaka” mu madziso a Djehovha. (Mup. 7:1) Edzurirai nguwa dzese kuti ngei Djehovha ecikoshesa hama dzacembera. Rumbwai mecibata hama idzi no rureremadzo. Itai hingana Erizeu. Iyena akashinga kurumbwa ari kudii ra Eriya mu mazuwa ake ekupedzesera. Erizeu akabvunza Eriya katatu kese kuti: “Andizombomusii.”—2Mad. 2:2, 4, 6.

15. Mibvunzo ipi yatingaita ku hama dzedu dzacembera?

¹⁵ Pangidzai kuti munokoshesa hama dzacembera ngo kuaita mibvunzo dzakanaka. (Zvie. 1:5; 20:5; 1Ti. 5:1, 2) Mungakwanisa kuaita mibvunzo yakaita hingana ii: “Pe mainga muri djaha, cinyi cakamugondesa kuti mainga magumira cokwadi?” “Zvemakasongana nazvo zvakamukhwededzai kudini padhuze na Djehovha?” “Ngazvipi zvakamubetserai kuti murumbwe meciseenzera Djehovha no mupfaro?” (1Ti. 6:6-8) Pedzepo, nyasai kupurutana paanonga ecipanganidza zvaakasongana nazvo.

16. Cinyi cinoitika kana hama dzacembera no madjaha paanocedza ese?

¹⁶ Hama dzacembera no madjaha paanocedza ese, anobambisana. (Aro. 1:12) Hama dze cidjaha dzinotunhudzira rugondo rawo rekuti Djehovha anoriritira aseenzi ake akagondeka uye hama dzacembera dzinozwa dzecidiwa. Hama dzedu dzacembera dzicapfara maningi nge kutipanganidzira mashiperiensiya aakasongana nawo uye kuti Djehovha akaakomborera kudini mu upenyu wawo.

17. Ngei tingati hama dzedu dzacembera dzinorumbwa dzecirungama nge kuhamba ke makore?

¹⁷ Kajinji kakhona kurungama ke muiri kunotanga kupera paanokura, asi aya akagondeka kuna Djehovha anorumbwa akarungama mu madziso ake zuwa no zuwa. (1Ate. 1:2, 3) Ngei? Ngekuti nge kuhamba ke nguwa, awona akatendera kuti mwiya mucena wa Mwari uwagadzirise nguwa dzese kana kuti uwabetsere kusakurira mawara akanaka. Patinorumbwa tecinyasa kuziya hama no hanzvadzi dzedu dzinokosha, uye patinorumbwa tecifunda nawo, ticakwanisa kuona kuti zvezvirokwazvo awona i pfuma inokosha maningi isikaerengeki!

18. Ticaonei mu fundo inoteera?

¹⁸ Ungano inorumbwa yakabamba haiwa basi hama dze cidjaha padzinoreremedza hama dzacembera, asi hama dzacembera padzinoreremedzawo hama dze cidjaha. Mu fundo inoteera, ticaona kuti hama dzacembera dzingapangidzawo kudini kuti dzinokoshesa hama dze cidjaha dziri mu ungano.