1. Cinangwa cipi cakanaka catinodikana kugara naco patinonga tecicembera?

PATINOCEMBERA, tingakwanisa kutanga kutya kuti aticanyanyi kukosha kuna Djehovha hingana kare. Izvirokwazvo kuti zvino, pamweni aticina simba rakawanda hingana kare, asi nguwa yakatipasa ruziyo uye eshiperiyensiya. Uye isusu tingakwanisa kubetsera madjaha kuti agume pa kuita zviya zvaanokwanisa uye kuti aite mabasa mapsva. Izvi ndizvona zvakarekethwa no mukuru umweni, iyena wakati: “Pandakacembera, ndakapfara maningi ngekuti mu ungano mainga muno madjaha akakwaniriswa kuti aite mabasa.”

2. Ticaonei mu fundo ino?

² Mu fundo yakadarika, takaona kuti ngei madjaha ecidikana kugara no ushamwari no hama dzacembera. Mu fundo ino, ticaona mawara marongomuna anodikana kupangidzwa no anhu acembera, kudzidodosa, kugara no maonero ari pakati no pakati, kutenda zvaanoizirhwa, uye rupo. Mawara aya, angabetsera acembera kuti aseenzese madjaha, uye izvi zvingakwanisa kubetsera ungano yese.

3. Maererano na Afiripi 2:3, 4, kudzidodosa cinyi, uye munhu wacembera ungapangidza kudini wara irona?

³ Kuti abetesre madjaha, hama dzacembera dzinodikana kudzidodosa. Munhu anodzidodosa ndi uya anoona anhu amweni hingana akakura kupinda iyena. (Erengai Afiripi 2:3, 4.) Munhu wacembera ungakwanisa kupangidza wara iri nge mishobo yakasiyana-siyana. Nge muezaniso, mabasa akawanda e mu ungano angakwanisa kuizwa nge mishobo yakasiyana, uye mishobo iyona ingapindirana no zviya zvinobhuiwa mu Bhaibheri uye ingaseenza zvakanaka. Munhu wacembera unodzidodosa, aetseri kuti anhu ese aite mabasa awo nge mushobo waaita kare. (Mup. 7:10) Kunyazi ano mashiperiyensiya akawanda kuti afundise madjaha mu ungano, munhu wacembera  unodzidodosa unoziya kuti “zviri kuitika mu nyika zviri kucinja,” ngekudaro pamweni zvinodikana kuti afundire kuseenzesa zviro zvipsva.—1Ako. 7:31.

4. Aonereri e nharaunda, anopangidza kudini maonero akatodzana no Arevhi?

⁴ Anhu acembera anodzidodosa anoziya kuti, paya paanonga ecikura pamweni aacakwanisi kuita zviro zvakawanda hinga kare. Nge muezaniso, rangarirai nge zve aonereri e nharaunda. Paanogumisa makore 70, awona anodaidzwa kuti aite mabasa amweni akasiyana. Kuno aya akaita cinjo idzi, zvingakwanisa kuanetsera. Awona aiwona basa re kuseenzera hama hinga ciro cinokosha maningi, ngekuti anoda maningi kuseenzera hama. Rudo rawo pa basa re nharaunda, ricakabamba mu mwoyo mawo. Kunyazi zvakadaro, awona anozwisisa kuti basa iri, rinodikana kuizwa no hama dzecidjaha. Hama idzi dzinodiwa, dzinopangidza maonero akaezana no Arevhi e munguwa ye Aisraeri, paaigumisa makore 50 awona aidikana kuema pa basa re kuseenza pa tabhernakuro. Asi mupfaro we Arevhi aya acembera, wainga usikabvi pa basa rawo re pa tabhernakuro. Pane kudaro, awona aidzipira pa kuita mabasa ese aaikwanisa kuita uye aiita zvese zvaaikwanisa kuti abetsere madjaha. (Nu. 8:25, 26) Izvi zvinoitikawo kune aya asikacaseenzi hingana aonereri e nharaunda, kunyazi asikacavhakaciri uye kubambisa ungano dzakawanda, awona i makomborero ku ungano dzaari.

5. Zvii zvamungafunda pa muezaniso wa Dan uye no mukadzi wake Katie?

 ⁵ Onai muezaniso wa Dan, iyena wakaseenza hinga muonereri we nharaunda ke makore anokwana kuita 23. Paakakwanisa makore 70, iyena no mukadzi wake, Katie, akagadzwa kuti aseenze hinga mapiyonero kamare. Awona akadjaira kudini migarire mipsva ye zviro? Dan unoti, mazuwa ano ndaakubatikana maningi! Iyena unoita basa rake mu ungano, anobetsera hama kuti dzikwaniriswe kugara abati anoseenzera, uye anofundisa amweni kuti akwanise kuparidzira mu mbuto dzino anhu akawanda no mukaraboso. Hama dzacembera, kunyazi muri mu basa re nguwa yakadzara kana kuti haiwa, mungakwanisa kuita zvakawanda kuti mubetsere amweni. Mungazviita kudini? Edzai kudjaira migarire mipsva ye zviro, garai no zvinangwa zvipsva, uye edzai kukanda ndangariro dzenyu pa zviro zvamunokwanisa kuita, haiwa pa zvamusikakwanisi kuita.

6. Ngei zvakanaka kugara no maonero ari pakati no pakati? Pasai muezaniso.

⁶ Munhu ano maonero ari pakati no pakati anoziya zvaasikakwanisi kuita. (Zvie. 11:2) Nge kugara no maonero ari pakati no pakati aetseri kuita zviro zvakawanda kupinda zviya zvaanokwanisa kuita. Migumisiro yakhona, iyena unorumbwa ecipfara uye ecibudirira. Tingaezanisa, munhu ano maonero ari pakati no pakati no munhu uri kutekenya karu pa mutunhu. Kuti akwire mutunhu iwona, mutekenyi unodikana kucinja magiya. Izvirokwazvo kuti pamweni paya, iyena unodikana kuthurudza magogomere aari kuita, asi unorumbwa ecihamba. Nge mushobo umwe-umwewo munhu uno maonero ari pakati no pakati, unoziya nguwa yaanodikana ‘kucinja magiya’ kuti arumbwe akabamba uye ecibudirira mu basa ra Djehovha.—Afi. 4:5.

7. Bhazirai wakapangidza kudini kuti wainga ano maonero ari pakati no pakati?

⁷ Onai muezaniso wa Bhazirai, painga aano makore anokwana kuita 80, iyena wakapikwa no Mambo Dhavhidhi kuti aite nhengo ye anhu anoseenza na mambo. Ngekuti wainga ano maonero ari pakati no pakati, Bhazirai wakaramba mupiko iwona. Iyena waiziya kuti nge ndaa ye thunga rake aacakwanisi kuita mabasa amweni, hino Bhazirai wakakumbira kuti mwanarume we cidjaha unozwi Kimhamu, aende pa mbuto yake. (2Sa. 19:35-37) Kuita hingana Bhazirai, anarume acembera anopfara nge kupasa mukana madjaha kuti aite mabasa amweni.

8. Mambo Dhavhidhi wakapangidza kudini kuti wainga ano maonero ari pakati no pakati paaida kuwaka tempro?

⁸ Mambo Dhavhidhi wainga ano muezaniso wakanaka we munhu ano maonero ari pakati no pakati. Ciro cimweni caaida maningi, cainga ce kuwakira Djehovha tempro. Asi Djehovha akazomubvunza kuti, makomborero awona aizopaswa mwana wake Soromoni, Dhavhidhi wakatenda zvakabhuiwa na Djehovha uye akaita zviri zvese kuti atsigire pa kuwakwa ke tempro. (1 Mak. 17:4; 22:5) Dhavhidhi aazi kurangarira kuti iyena basi ndiye akakwaniriswa pa kuita basa irona, ngekuti mwana wake wainga ari “djaha uye asina ruziyo.” (1 Mak. 29:1) Dhavhidhi waizviziya kuti kubudirira ke basa iri, kaizoitika nge makomborero a Djehovha, haiwa nge thunga kana kuti eshiperiyensiya ye aya ari kuritungamirira. Eciteedzera Dhavhidhi, mazuwa ano hama dzacembera dzinorumbwa dzakabamba kunyazi basa rawo racinjwa. Awona anoziya kuti Djehovha acakomborera madjaha ari kuita mabasa ake.

9. Nhengo imweni ye Dare re Firiyari, yakapangidza kudini kuti yainga ino maonero ari pakati no pakati?

 ⁹ Muezaniso we mazuwa ano we kugara pakati no pakati, nge we hama Shigeo. Mu gore ra 1976, painga aano makore anokwana kuita 30, wakagadzwa kuti agare nhengo ye Dare re Firiyari. Mugore ra 2004 iyena wakagadzwa kuti agare murongi we Dare re Firiyari. Nge kuhamba ke nguwa, iyena wakaona kuti wainga asisina simba uye wainga asikacakwanisi kuita mabasa hingana kare. Hino, Shigeo wakanamata nge zvazvo uye wakaona kuti zvainga zviri nani kuti hama imweni yecidjaha ipinde pa mbuto pake pa kuita basa irona. Nyamasi uno, Shigeo aaciripi murongi asi ari kurumbwa eciseenza hinga nhengo ye Dare re Firiyari. Hingana zvataona, muezaniso we Bhazirai, Mambo Dhavhidhi, uye Shigeo, munhu unodzidodosa uye ano maonero ari pakati no pakati, aakandi ndangariro dzake pa zviya zvisikakwanisi kuizwa nge madjaha, asi paakabambira. Iyena aaoni hingana azondi, asi anowaona hinga adoni ake e basa.—Zvie. 20:29.

10. Hama dzacembera dzinodikana kuona kudini madjaha ari mu ungano?

¹⁰ Kune hama dzacembera, madjaha icipo caanopaswa na Djehovha uye awona anotenda nge zvese zvinoizwa nge madjaha. Padzinozwa kuti adzicina simba, hama dzacembera dzinopfara nge kuziya kuti mu ungano mune madjaha ano simba uye akagadzirira kuti aite basa rese rinodikanwa.

11. Rute 4:13-16 inopangidza kudini kuti zvakanaka kutenda rubetso raanopaswa no madjaha?

¹¹ Mu Bhaibheri, Noemi imuezaniso wakanaka we munhu acembera akapangidza kutenda no zvaakaizirhwa. Iyena wakatenda nyamwana wake Rute wainga ari mudoko kaari.  Pakutanga, Noemi wakakohomedzesa Rute kuti ahwirire ku nyika yake. Asi Rute paakarumbwa ecikumbira Noemi kuti ahwirire ese ku Bheterehema, iyena wakatendera rubetso ra Rute. (Rut. 1:7, 8, 18) Uye ici cainga ciri cikomborero cikuru ku anakadzi aya! (Erengai Rute 4:13-16.) Acemberi anodzidodosa, anoteedzera muezaniso wa Noemi.

12. Muphostora Pauro, wakapangidza kudini kuti waitenda nge zviro zvaaizirhwa?

¹² Muphostora Pauro waitenda maningi nge rubetso raaipaswa. Nge muezaniso, iyena wakatenda maningi hama dze ku Firipi nge zvipo zvaakamutumira. (Afi. 4:16) Iyena wakatendawo nge rubetso raakapaswa na Timoti. (Afi. 2:19-22) Uyewo Pauro wakatenda maningi Mwari nge hama dzakaenda komubambisa paaitorhwa hinga musungwa kuti aendeswe ku Roma. (Zvi. 28:15) Pauro wainga ari munhu wakabamba uye wainga ambovhiyajari mamirionji e makirometro kuti aparidze uye kuti abambise ungano. Kunyazi zvakadaro, iyena wainga asikadzikudzi kuti asatende pa zviya zvaaizirhwa no hama dzake mu kutenda.

13. Cembere dzingapangidza kudini kuti dzinotenda nge madjaha ari mu ungano?

¹³ Kana imwimwi macembera, pano mishobo yakawanda yamungapangidza nayo kuti munotenda nge madjaha ari mu ungano yenyu. Ngomuezaniso, amweni awo angamupasa bhureya kuti muende kootenga-tenga, kana kuti kumuitirai ciro cimweni, hino garai munhu unotenda uye tenderai rubetso rawo. Onai rubetso hinga cipangidzo ce rudo ra Djehovha kamuri. Izvona zvingaita kuti mugare no ushamwari wakabamba no munhu unonga wamubetsewo. Nguwa dzese, pangidzai kuti muri kupfara nge kukura kuri kuita shamwari dzenyu pa kunamata, uye abvunzei kuti munopfara maningi nge kuona madjaha anopeta masimba kuti aite zvakawanda mu ungano. Pese pazvinobvira, reketai nawo nge zve mashiperiyensiya amakasongana nawo mu upenyu. Kana mukadaro, imwimwi “mucapangidza kuti munotenda” Djehovha nge madjaha aakakweera mu ungano.—Ako. 3:15; Ju. 6:44; 1Ate. 5:18.

14. Mambo Davhidhi, wakapangidza kudini kuti wainga ano rupo?

¹⁴ Muezaniso wa Mambo Dhavhidhi unopangidza wara rimweni rinokosha maningi rinodikana kupangidzwa no cembere—rupo. Pa kuwakwa ke tempro, Dhavhidhi wakapasa mare yakawanda uye zviro zvinokosha zvaakabvisa pa pfuma yake kamare. (1 Mak. 22:11-16; 29:3, 4) Iyena wakaita izvi kunyazi eciziya kuti yaizodaidzwa kuti tempro ya Soromoni. Mumazuwa edu, zvingaita kuti aticina simba re kuwaka nyumba dzinoseenzeswa pa kunamata Djehovha, kunyazi zvakadaro, tingatsigira zviwakwa izvi nge mipiro yedu maererano no zviya zvatinazvo. Uye isusu tingakwanisa kubetsera madjaha nge kucedza nawo nge zve maxperiyensiya atinawo.

15. Timoti wakafundiswa zviro zvipi zvinokosha na Pauro?

¹⁵ Tecireketa nge rupo, rangarirra nge zve muezaniso wakasiiwa nge muphostori Pauro. Iyena wakapika Timoti kuti aseenze ese pa basa re misiyonariyo, nge rupo Pauro wakafundisa Timoti mishobo ye kuparidzira uye no yekufundisa. (Zvi. 16:1-3) Nge kufundiswa kaakaizwa na Pauro, Timoti wakagara muparidzi wakanaka uye mufundisi we masoko akanaka. (1Ako. 4:17) Timoti wakaseenzesa zvaakafundiswa na Pauro kuti afundisewo amweni.

16. Ngei Shigeo wakafundisa amweni?

¹⁶ Hama dzacembera adzigumi pa kurangarira kuti acagara anhu asina basa mu ungano  kana akafundisa madjaha. Nge muezaniso, Shigeo wambobhuiwa pekutanga, wakapedza makore akawanda ecifundisa hama dzecidjaha dze mu Dare re Firiyari. Iyena wakaita izvi, ngekuti waiziya kuti zvaizonga zvakanaka pa basa re Umambo mu nyika yaiseenzera. Migumisiro yakhona nge yekuti, pakazoguma nguwa yakasisira, painga paano hama yakanyasa kufundiswa yaizoseenza pa mbuto yake hingana murongi. Shigeo uri kurumbwa ecireketa no hama dzecidjaha nge zve maxperiyensiya aakaona mu makore 45 aakaseenza hinga nhai ye Dare re Firiyari. Hama hingana ii, makomborero ku anhu ese a Mwari!

17. Maererano na Ruka 6:38, anhu acembera angakwanisa kupasei amweni?

¹⁷ Imwimwi hama dzinodiwa dzacembera, muri cipangidzo cekuti upenyu unonyanya kupfadza kana tikaseenzera Djehovha no kutenda uye takagondeka. Muezaniso wenyu, unopangidza kuti zvakanaka kufundira mazano e Bhaibheri uye kuaseenzesa mu upenyu wedu. Imwimwi munoziya no maxperiyensiya enyu, maizirhwe aithwa zviro kare uye munoziyawo kuti ngei zvakanaka kudjairana no zviro zvipsva. Kunyazi imwimwi macembera makabhabhatidzwa zvino uno; muno zvakawanda zvamunoita. Mungakwanisa kureketa nge zve mupfaro we kuziya Djehovha maa makura. Madjaha acapfara maningi nge kuzwa maxperiyensiya enyu, uye zviro zvamakafundira. Kana mukagara nge “rupo” uye kureketa nge madjaha nge zve mashiperiyensiya akawanda amunawo, mucatambira makomborero akawanda a Djehovha.—Erengai Ruka 6:38.

18. Acembera uye no madjaha angabetserana kudini?

¹⁸ Kana akacembera uye no madjaha akashamwaridzana, awona angakwanisa kupasa uye kutambira rubetso. (Aro. 1:12) Cikwata cimwe na cimwe cino zviro zvakasiyana. Acembera ano ruziyo uye no mashiperiyensiya aakaona ne kuhamba ke makore. Asi madjha akabamba uye ano simba. Kana madjaha uye no acembera paanonseenza pamwepo hinga shamwari, anonga ecikudza Baba edu e kudenga ano rudo uye anogara makomborero ku hama dzese mu ungano.