1-2. Kuzungunuswa kupi kakarekethwa na Ajeu kaizoitika mazuwa edu?

“PAMISESWA minganani basi, maroja no mapredhiyo e kare akatanga kuhidhika.” “Anhu ese akapatika . . . Anhu akawanda akabhuya kuti cigidhigidhi ici cakatora miseswa miiri basi. Asi kandiri cakaita hingana kuti cakatora makore akawanda ceciitika.” Masoko aya akarekethwa nge anhu anganani akapona pa cigidhigidhi cakaitika ku Nepal mu 2015. Eshiperiensiya inotyisa hingana ii painoitika, imwimwi amuzomboikanganwi.

² Mu mazuwa edu ano, tirikurarama mucigidhigidhi cakasiyana. Kuzungunika uku akuitiki basi mu thaundi kana kuti mu nyika imwe basi, asi mu nyika dzese uye zvakatanga kuitika kubvira kare. Muphorofiti Ajeu akareketa kuti kuzungunika uku kaizoitika mu mazuwa edu. Iyena wakatara kuti: “Djehovha we anyahondo anoti: ‘Mbai-mbai pano—ndicazungunusazve—denga, nyika, bahari no pasi pakaoma.’”—Aje. 2:6.

3. Ngei tingabhuya kuti kuzungunika kakarekethwa na Ajeu kakasiyana no kuzungunuswa kunoitika no cigidhigidhi?

³ Kuzungunuswa ke uphorofita wa Ajeu, akuzi kuita hingana cigidhigidhi cinouya kooparadza basi. Pane kudaro, icona cinomugumisiro wakanaka. Djehovha wene anototibvunza kuti: “Ndicazungunusa madzinza ese, uye zviro zvinokosha zvinobva ku madzinza ese zvicauya uye ndicadzadza nyumba ino norukudzo.” (Aje. 2:7) Uphorofiti uu waireyei ku anhu airarama mu mazuwa a Ajeu? Uye unoreyei katiri mazuwa ano? Ngatione mhinduro yakhona, uyewo ngatione kuti basa redu ngaripi pa ciitiko ici cinoita kuti madzinza azungunike mazuwa ano.

4. Ngei Djehovha akatuma muphorofiti Ajeu ku anhu ake?

⁴ Djehovha akapasa muphorofiti Ajeu basa rinokosha rekuti  aite. Onai zvakaitika iyena asati atambira basa iri. Pamweni Ajeu wainga aripakati pe Adjudha akabuda mu usungwa ku Bhabhironi ecihwirira ku Djerusarema muna 537 K.A.A. paakandoguma, aseenzi aya akagondeka a Mwari akatanga kuwaka tempro, nyumba ya Djehovha. (Esd. 3:8, 10) Asi pasati padarika nguwa yakareba, pakaitika ciro cinotsukwarisa. Azondi amweni akaita kuti awona aore mwoyo uye aime kuwaka tempro. (Esd. 4:4; Aje. 1:1, 2) Hino, muna 520 K.A.A., Djehovha akatuma Ajeu kuti abetsere aseenzi ake kuti agarezve no simba uye ahwirire kuwaka tempro. *—Esd. 6:14, 15.

5. Ngei zvingaita kuti masoko a Ajeu akabambisa anhu a Djehovha?

⁵ Masoko a Ajeu aakabvunza Adjudha, ainga ano cinangwa cekubambisa kutenda kawo muna Djehovha. No ushingi, iyena wakaabvunza kuti: “‘Bambai imwimwi anhu ese e nyika ino,’ anodaro Djehovha, ‘uye seenzai. Ngekuti ndinemwi,’ anodaro Djehovha we anyahondo.” (Aje. 2:4) Zvingaita kuti Soko rekuti “Djehovha we anyahondo” rakabambisa anhu aya. Djehovha ano cikwata cikuru ce ngirozi cakagadzirira kurhwira anomuzwira. Hino, kudai Adjudha aida kubudirira, awona aidikana kugonda na Djehovha.

6. Kuzungunuswa kakarekethwa na Ajeu kaizogara no migumisiro ipi?

⁶ Djehovha akatuma Ajeu kuti abvunze Adjudha kuti ayena aizozungunusa madzinza ese. Masoko aya akabambisa Adjudha aya ainga akaora mwoyo uye ainga aima kuwaka tempro. Masoko awona aya, aigondesa kuti Djehovha aizoita kuti Pérsia itetemere. Uye onai kuti Pérsia wainga uri utongi uno simba we panguwa iyona waibatanidza nyika dzese. Ngaipi migumisiro yakhona? Kutanga anhu a Mwari aizokwanisa kupedzesa kuwaka tempro. Hino, kunyazi anhu aya ainga asiripi Adjudha aizobatana nawo pakunamata Djehovha mu tempro yake yakawakeazve. Zvezvirokwazvo, masoko a Ajeu akanyasa kubambisa anhu a Mwari!—Zak. 8:9.

7. I basa ripi ratirikuita riri kuita kuti madzinza azungunuke? Panganidzai.

⁷ Uphorofiti wa Ajeu unoreyei katiri nyamasi uno? Djehovha arikuitazve kuti madzinza ese azungunuke uye isusu taakubatanidzwawo. Cimborangarirai zvinoteera: Muna 1914, Umambo wa Mwari wakatanga kutonga kudenga uye Djehovha akagadza Djesu Kristu kuti agare Mambo we Umambo uu. (Pis. 2:6) Masoko aya ainga akashata ku atongi e nyika. “Nguwa yakatemerhwa madzinza” yainga yadzadzika. Nge masoko amweni, nguwa yekuti painga pasina mutongi waiimirira Djehovha kamare yainga yapera. (Ru. 21:24) Ndiyo ndaa, kubvira muna 1919, anhu a Djehovha akatanga kuparidzira ku anhu ese kuti Umambo wa Mwari ndiwo basi kariro ku anhu. Kuparidzirhwa ke masoko aya “akanaka e Umambo” kuri kuvhuruza nyika dzese kubvira pa nguwa iyona.—Mt. 24:14.

8. Maererano na Pisarema 2:1-3, madzinza akawanda anotambira kudini masoko e Umambo?

⁸ Anhu anotambira kudini masoko aya? Anhu akawanda aatambiri zvakanaka. (Erengai Pisarema 2:1-3.) Madzinza ese arikudzutaira. Awona arikuramba mutongi wakasanangurhwa ndi Mwari. Kaari, masoko anopfadza e Umambo atinoparidzira, “amasokopi akanaka.” Zvezvirokwazvo, atongi amweni akatorambidza basa rekuparidzira! Kunyazi akawanda ecitendera kuti anoseenzera  Mwari, awona aadi kusiya zvigaro zvaanazvo. Kuita hingana atongi e munguwa ya Djesu, awona anopangidza kuti anozonda muzodziwa wa Djehovha nge kuteerera ateeri ake akagondeka.—Zvi. 4:25-28.

9. Kunyazi madzinza akawanda asikatambiri zvakanaka masoko e Umambo, Djehovha arikuwapasa nguwa yekuti aitei?

⁹ Ngaipi mhinduro ya Djehovha ngo ndaa ye mushobo unotambirhwa ndiwo masoko akanaka nge madzinza? Pisarema 2:10-12 inodaira yeciti: “Hino imwimwi madzimambo, garai no ungwaru, tendai kupangirhwa, imwimwi atongi e nyika. Seenzerai Djehovha mecimutya uye pfarai mecitetemera. Kudzai mwana we rume, ngekuti mukasama kudaro Mwari acashatirhwa uye mucafira mugwanza, ngekuti hasha dzake dzinokwira nokukasika. Anopfara ese anotizira kaari.” Ngekuti ano rudo, Djehovha acirikupasa azondi aya nguwa yekuti acinje uye atende Umambo wake. Asi nguwa yakhona irikupera. Nyamasi uno, tirikurarama mu “mazuwa ekupedzesera” e nyika ino. (2Ti. 3:1; Isa. 61:2) Ino ndiyo nguwa yekuti anhu aziye cokwadi uye yekuti aite cisananguro cekuseenzera Djehovha.

10. Maererano na Ajeu 2:7-9 kuzungunuka ke madzinza ese kaizounzisa mugumisiro upi wakanaka?

¹⁰ Kuzungunuswa kakarekethwa na Ajeu kunobetsera anhu amweni. Iyena unotibvunza nge zve mugumisiro wekuzungunika uku, “zviro zvese zvinokosha, [kana kuti, anhu akanaka e madzinza ese] aizonamata Djehovha.” * (Erengai Ajeu 2:7-9.) Maphorofita amweni hingana Isaya na Mika, akareketawo nge zve zviitiko zvakatodzana no izvi zvaizoitika mu “mazuwa e kupedzesera.”—Isa. 2:2-4, masoko opasi; Mik. 4:1, 2, masoko opasi.

11. Hama imweni yakaitei peyakatanga kuzwa masoko e Umambo?

¹¹ Ngo muezaniso, onai zvakaitika na hama Ken arikuseenza ku mashikritorio makuru. Padarika makore 40 kubvira paakazwa masoko e Umambo kekutanga. Asi iyona inoedzurira zvaakazwezvo hingana zvaitika nyamasi.  Iyona inoti: “Pandakatanga kuzwa cokwadi ce Soko ra Mwari, ndakapfara maningi nge kuziya kuti tirikurarama mu mazuwa e kupedzesera. Ndakazwisisa kuti kana ndecida kutenderhwa na Djehovha uye kuti ndionewo upenyu usikaperi, ndaidikana kusiyana no nyika ino isikazi kugarisika uye ndorumbwa ndakabamba kudii ra Djehovha. Hino ndakaita munamato ndecikumbira rubetso uye ndakaita cinjo nokukasika. Ndakasiya nyika ino sure uye ndakapsvaka kucengetedzwa mu Umambo wa Mwari. Zvezvirokwazvo, Umambo uu auzombozungunuswi.”

12. Tempro yekumwiya ya Djehovha irikudzara kudini ne rukudzo mu mazuwa ano e kupedzesera?

¹² Tinorugondo rekuti Djehovha arikukomborera anhu ake. Mu mazuwa ano e kupedzesera, tirikuona kutunhudzirika kurikuita numero ye anhu anonamata Mwari. Muna 1914, tainga tiri mamirionji manganani. Asi nyamasi uno, taamamirionji anodarika masere tecinamata Mwari takagondeka uye mamirionji amweni anobatana na isusu makore ese kuti arangaridze rufu ra Kristu. Ngo kudaro, ruwanze re pasi pano re tempro yekumwiya ya Djehovha, kana kuti urongwa waakagadza pakunamata kakacena, inodzara ngo “zviro zvinokosha zve madzinza ese.” Zvezvirokwavzo, izvi zvinokudza Djehovha. Asi ciro cimweni cinokudzawo zina ra Djehovha, icinjo dzirikuizwa no mamirionji aya kuti apfeke unhu upsva.—Aef. 4:22-24.

13. Kutunhudzirika kuri kuita numero ye anamati a Djehovha kuri kudzadzisa zvipikirhwa zvipi? (Onai foto ye pa kapa.)

¹³ Zviro zvese izvi zviri kuitika, zviri kudzadzisa zvipikirhwa zvimweni, hingana zvatinogumira pana Isaya kapituro 60. Vhersikuro 22 ye kapituro ii inoti: “Mudoko acagara ciuru uye akadodoka acagara dzindza rino simba. Inini Djehovha ndicaita kuti zvikasike pa nguwa yazvo.” Nge ndaa ye kutunhudzirika ke numero ye anamati ecokwadi, pano ciro cinoshamisa cinoitika. Paanouya ku sangano ra Djehovha, “zviro izvi zvinokosha” zvinouya no matarento akawanda, no uzii uye awona akagadzirira kuparidzira “masoko akanaka e Umambo.” Isaya wakabhuya nge zve uzii uu uri pakati pe anhu a Djehovha kuti, “mukaka we madzinza”. (Isa. 60:5, 16) No rubetso re  anarume uye no anakadzi aya ano matarento, basa re kuparidzira riri kuizwa mu nyika dzinokwana kuita 240 uye kuri kuturikirhwa mabhuku mu mareketero anodarika 1000.

14. Cisananguro cipi cinodikana kuizwa no anhu zvino?

¹⁴ Mu nguwa ino yekupedzesera, kuzungunuka ke madzinza kuri kubambidzira anhu kuti aite cisananguro. Awona angasanangura kutsigira Umambo wa Mwari kana kuti angagonda no utongi we nyika ino. Ici cisananguro cakakura cinodikana kuizwa no anhu ese nyamasi uno. Zvirokwazvo kuti atiripi apanduki. Hinga aseenzi a Djehovha, tinozwira mitemo ye anyautongi, asi atina katinotsigira uye atipindiri mune zvematongerhwe e nyika. (Aro. 13:1-7) Tinoziya kuti Umambo wa Mwari ndiwo basi ucagadzirisa matambudziko e anhu. Umambo uu auti dii re nyika ino.—Ju. 18:36, 37.

15. Bhuku ra Zvakapangidzwa rinobhuya nge zve muedzo upi wakakura wekugondeka?

¹⁵ Bhuku ra Zvakapangidzwa rinobhuya nge zve kuedzwa ke kugondeka ke anhu a Mwari mu mazuwa e kupedzesera, kugondeka ke anhu a Mwari kaizoedzwa. Muedzo iwona unonga wakakura maningi. Anyautongi acatibambidzira kuti tianamate nokuwatsigira uye acateerera ese acaramba kuzviita. (Zva. 13:12, 15) Awona ‘acabambidzira anhu ese, adoko no akuru, apfumi no arombo, akasudzunuka no aranda, kuti atambire cidhindo pa muoko kwawo kana kuti pa huma yawo.’ (Zva. 13:16) Kareko, aranda aitambira cidhindo cisikaperi kuti apangidze kuti aiseenzera ani. Ngo mushobo umwewo, mazuwa edu ano, atongi acaetsera kuti anhu ese agare no cidhindo, kana kuti apangidze kuti anotsigira ani. Asi marangariro uye zviito zve anhu ndizvo zvicapangidza pamhene kuti awona anotsigira zvematongerhwe e nyika.

16. Ngei tecidikana kudziongorora nokukasika kuti takagondekadi kuna Djehovha here?

¹⁶ Asi isusu ticatenda here kutambira cidhindo ici? Ticatsigira anyautongi here? Uya ucaramba kuzviita ucabatana no ngozi uye zvinetso zvakawanda. Bhuku ra Zvakapangidzwa rinobhuya kuti apana munhu ucakwanisa kutenga uye kutengesa kunze ke uya uno cidhindo. (Zva. 13:17) Asi aseenzi a Mwari anoziyawo kuti Mwari acaitei no aya anonga ano cidhindo cinobhuiwa pana Zvakapangidzwa 14:9, 10. Ndiyo ndaa, pane kuti atambire cidhindo icona, awona acatara mu nyara kuti: “Ndiri wa Djehovha.” (Isa. 44:5) Ino ndiyo nguwa yekuongorora kuti takagondekadi kuna Djehovha here. Kana takagondeka, Djehovha acapfara nge kubhuya kuti tiri anhu ake!

17. Tinodikana kuedzurirei nge zve mwoyo unononoka kutsamwa wa Djehovha?

¹⁷ Mazuwa ano e kupedzesera, Djehovha anopangidza maningi mwoyo unononoka kutsamwa. Ayena, aadi kuti munhu upi hake aparadzwe. (2Pe. 3:9) Uye ayena arikupasa anhu ese mukana wekuti acinyuke uye kuti aite cisananguro cakanaka. Asi mwoyo unononoka kutsamwa wa Djehovha uno paunogumira. Uya unoramba mukana uu waarikupaswa, ucadzikanda mu mugariro wakatodzana no wa Farao, mu mazuwa a Mozesi. Djehovha akati kuna Farao: “Inini ndingadai ndakatambaradza nyara yangu kuti ndikufure no nhenda inoparadza iwewe no anhu ako, uye mungadai musiripi panyika. Asi ndaita kuti urumbwe wecirarama ngo ndaa ye ici: kuti ndikupangidze simba rangu uye kuti zina rangu riziiswe mu nyika yese.” (Eki. 9:15,  16) Madzinza ese acapedzesera aakuziya kuti Djehovha ndiye basi Mwari we zvirokwazvo. (Eze. 38:23) Izvona zvicaitika kudini?

18. (a) Kuzungunika kupi kumweni kunorekethwa pana Ajeu 2:6, 20-22? (b) Tinoziya kudini kuti masoko a Ajeu acadzadzika mu nguwa ye mberi?

¹⁸ Mazana e makore mumasure mekufa ka Ajeu, muphostori Pauro wakafemerhwa kureketa kuti masoko a Ajeu 2:6, 20-22 aizodzadzika mu nguwa yo mberi. (Erengai.) Pauro wakatara kuti: “Asi zvino akagondesa kuti: ‘Ndicazungunusazve haiwa nyika basi, asi no kudenga.’ Soko re kuti ‘ndicazungunusazve’ rinopangidza kubviswa ke zviro zvinozozungunuswa, zviro zvakaizwa no munhu, kuti zviro zvisikazi kuzungunuswa zvirumbwe zviripo.” (Ahe. 12:26, 27) Asi kuzungunuswa uku kakasiyana no kuya kunorekethwa pana Ajeu 2:7. Kuzungunuswa ikona kunoreya kuti aya akaita hinga Farao, kana akaramba kutendera kuti Djehovha ndiye unodikana kutonga, acaparadzwa nokusikaperi.

19. Ngacipi cisikazozungunuswi, uye tinozviziya kudini?

¹⁹ Cinyi cisikazozunguniswi kana kuparadzwa? Pauro unoenderera mberi eciti: “Ngokuti ticazotambira Umambo usikazozungunuswi, ngatirumbwe tecitambira nyasha, uye idzona dzicatibetsera kuitira Mwari basa cena ngo mushobo waanoda tecimutya uye no kumureremedza.” (Ahe. 12:28) Mumasure mekuzungunuka ke kupedzesera uku, bukuta paricaterera, Utongi wa Mwari basi ndiwona unonga usikazi kuzungunuswa. Uwona ucarumbwa wakabamba nokusikaperi!—Pis. 110:5, 6; Dha. 2:44.

20. Cisananguro cipi cinodikana kuizwa nge anhu, uye tingaabetsera kudini?

²⁰ Apacina nguwa! Anhu anodikana kusanangura kuti: Acaenderera mberi ecitsigira mushobo wekurarama we nyika ino, kana kuti acapeta masimba kuti ararame maererano nokuda ka Mwari. Cisananguro cokutanga cinoendesa mukuparadzwa, asi cisananguro cecipiri cinoendesa ku upenyu usikaperi. (Ahe. 12:25) Nge basa rekuparidzira, tingakwanisa kubetsera anhu kuti aite cisananguro ici cinokosha. Ngatirumbwe tecibetsera zviro izvi zvinokosha kuti arumbwe ecitsigira Umambo wa Mwari. Nguwa dzese tecirangarira zvatakabvunzwa na Tenzi Djesu kuti: “Masoko aya akanaka e Umambo acaparidzwa mu nyika yese inogarhwa, kuitira kupasa upupuri ku madzinza ese, uye zvadaro mugumo ucauya.”—Mt. 24:14.