MUSORO WE KUFUNDA 21
Djehovha Anodaira Kudini Minamato Yedu
“Tinoziya kuti ticaona zviro zvatinokumbira, ngekuti tinonga tamukumbira zviro izvona.”—1 JUAU 5:15.
NGOMA 41 Ndapota, Izwai Munamato Wangu
ZVATICAFUNDA a
1-2. Anhu amweni anodzibvunzisei?
IMWIMWI makambodzibvunzisa kuti Djehovha anodairadi minamato yenyu here? Kana zviri izvona, amuripi mwega. Hama no hanzvadzi dzakawanda dzakabhuya kuti dzakambozwawo kudaro, kunyanya paaisongana no matambudziko. Izvona pazvinoitika, pamweni zvingamushuphirai maningi kuti muziye kuti Djehovha anodaira minamato yenyu.
2 Mu fundo ino ticaona kuti ngei tingagonda kuti Djehovha anodaira minamato ye aseenzi ake. (1 Juau 5:15) Ticadairawo mibvunzo dzinoteera: Ngei nguwa dzimweni tingaona hingana kuti Djehovha aadairi minamato yedu? Uye Djehovha anodaira minamato yedu ngo mushobo upi mazuwa ano?
ANGUWA DZESEPI DZEKUTI DJEHOVHA ANODAIRA MINAMATO YEDU HINGA ZVATAIDA
3. Ngei Djehovha ecida kuti tiite munamato kaari?
3 Bhaibheri rinotigondesa kuti Djehovha anotida maningi uye kuti tinokosha kaari. (Ajeu 2:7; 1 Juau 4:10) Ndiyo ndaa iyena anotipika kuti tikhwedere dhuze naye teciseenzesa minamato. (1 Ped. 5:6, 7) Djehovha anoda maningi kutibetsera kuti tirumbwe tecikhwedera dhuze naye uye kuti tikwanisane no matambudziko e upenyu.
Djehovha akadaira minamato ya Dhavhidhi, ngekumusunungura pa azondi ake, mufanikiso.(Onai ndima 4)
4. Tinoziya kudini kuti Djehovha anodaira minamato ye aseenzi ake? (Onai mufanikiso.)
4 Mu Bhaibheri, tinogumira ngano dzakawanda dzinopangidza kuti Djehovha akadaira kudini minamato dze aseenzi ake. Pano muezaniso wamuri kurangarira here? Pamweni marangarira ngezve muezaniso wa Mambo Dhavhidhi? Mukati me upenyu wake, iyena wakarhwisana no azondi akawanda, uye kakawanda kakhona iyena wakakumbira rubetso ra Djehovha eciseenzesa munamato. Pano nguwa yaakanamata eciti: “Haiwa Djehovha, izwai munamato wangu; purutanai kudeketera kangu kuti tibetserhwe. Ndidairei mukutendeka kenyu uye mu unatsi wenyu.” (Pis. 143:1) Djehovha akadaira minamato ya Dhavhidhi uye akamununura pa migariro yaikanda upenyu wake pa ngozi. (1 Sam. 19:10, 18-20; 2 Sam. 5:17-25) Ndiyo ndaa Dhavhidhi wakakwanisa kubhuya kuti: “Djehovha ari dhunze no anhu ese anomudainza.” Isusu tingagarawo no rugondo rimwero.—Pis. 145:18.
Djehovha akadaira minamato ya Pauro ngekumupasa simba rakakwana kuti ashingirire-mufanikiso (Onai mandima 5)
5. Kodi Djehovha aidaira minamato ye aseenzi ake e kare ngo mushobo waaikarira here? Pasai muezaniso. (Onai mufanikiso.)
5 Pamweni Djehovha aangadairi minamato yedu ngo mushobo wataikarira. Ndizvona zvakaitika no muphostori Pauro. Iyena wakakumbira kuti Djehovha amubvise “munzwa mu nyama.” Iyena wakanamata katatu kese ngezve dambudziko irona. Kodi Djehovha akadaira minamato ii? Honde, asi haiwa nge mushobo waikarirhwa ndi Pauro. Pane kupedza dambudziko ra Pauro, Djehovha akamupasa simba raaida kuti arumbwe eciseenzera Djehovha akagondeka.—2 Ako. 12:7-10.
6. Ngei nguwa dzimweni zvingaita hingana kuti Djehovha aaripi kudaira minamato yedu?
6 Nguwa dzimweni Djehovha angadaira minamato yedu ngo mushobo watainga tisikakariri. Asi tingagonda hedu kuti Djehovha anonyasa kuziya zvakatinakira. Iyena “angakwanisa kuita zvinodarika nokure zvese zvatinokumbira kana kuti zvatinorangaridza.” (Aef. 3:20) Ndiyo ndaa mhinduro ya Djehovha ye minamato yedu, ingaguma pa nguwa uye ngo mushobo watisikakariri.
7. Ngei nguwa dzimweni tinodikana kucinja zvinangwa zve minamato yedu? Pasai muezaniso.
7 Nguwa dzimweni tinodikana kucinja minamato yedu kana tikaona kuti ngacipi cido ca Djehovha katiri. Onai zvakaitika na Martin Poetzinger. Nguwa doko mumasure mekuti acata, Hama Poetzinger yakasungwa ku musasa we asungwa mu Nazista. Pakutanga, iyona yainamata yecikumbira kuna Djehovha kuti aibvise mu musasa we asungwa kuitira kuti icengete mukadzi wayo uye irumbwe yeciparidzira. Asi mumasure me masumana mairi, iyona yakaona kuti ici cainga cisiripi cinangwa ca Djehovha. Hino iyona yakatanga kunamata yeciti: “Ndapota Djehovha, ndipangidzei kuti zvinyi zvamunoda kandiri.” Pedzepo, iyona yakatanga kurangarira ngezve hama dzimweni dzainga dziri mu musasa. Akawanda awo ainga ecinetseka ngezve akadzi no ana awo. Mumasure mazvo, Hama Poetzinger akanamata eciti: “Maita basa Djehovha nge basa ripsva ramandipasa. Ndibetserei kuti ndibambise hama dzangu.” Uye iyona yakapedza makore mapfembamwe yeciita izvona kamare!
8. Tinodikana kuedzurirei patinoita munamato?
8 Tinodikana kuedzurira kuti Djehovha ano cinangwa uye acadzadzisa cinangwa icona pa nguwa yaakasanangura. Cinangwa ici cinobatanidza kutsakatisa zvacose matambudziko ese arikukonzera kushuphika, tsaona dzinoitika dzoga, matenda uye rufu. Uye Djehovha acadzadzisa cinangwa cake eciseenzesa Umambo wake. (Dha. 2:44; Zvak. 21:3, 4) Asi zuwa iri risati raguma, Djehovha arikutendera kuti Sathani atonge nyika. b (Juau 12:31; Zvak. 12:9) Kana Djehovha akagadzirisa matambudziko e anhu zvino, zvinozoita hingana kuti utongi wa Sathani urikubudirira. Asi izvona azvirei kuti Djehovha aatibetseri. Ngatione mishobo minganani yatirikubetserhwa na Djehovha nyamasi uno.
DJEHOVHA ANODAIRA KUDINI MINAMATO YEDU MAZUWA ANO
9. Djehovha angatibetsera kudini patinonga tecida kuita zvisananguro? Bhuyai muezaniso uri mu ndima.
9 Djehovha anotipasa ungwaru. Djehovha anotigondesa kuti acatipasa ungwaru kuti tiite zvisananguro zvakanaka. Uye isusu tinoda maningi ungwaru wake kuitira paya patinoita zvisananguro zvinokosha mu upenyu. Ngo muezaniso patinosanangura kuti ticarumbwa tisikazi kuwaka kana kuwakwa here kana kuti ticawaka kana kuwakwa. (Tig. 1:5) Onai esperiensiya ye hanzvadzi imweni isikazi kuwakwa inozwi Maria. c Iyona yaiseenza hinga pionera we nguwa dzese uye yakaziya hama imweni. Iyena unoti: “Isusu takagara shamwari dzo padhuze no padhuze, uye nokuhamba ke nguwa tainga taakutopfarirana. Inini ndaiziya kuti ndaidikana kuita cisananguro. Ndiyo ndaa ndakaita minamato kakawanda kuna Djehovha. Ndaida kuti Djehovha anditungamirire, asi ndaiziyawo kuti iyena ainga asikazondiitiri cisananguro.” Maria unoona kuti Djehovha akadaira minamato yake yekukumbira ungwaru. Unozviona kudini? Iyena wakapsvakisisa mu mabhuku edu uye wakagumira mafundo akawanda akamubetsera kuona mhinduro dze mibvunzo dzake. Iyena wakazwawo mazano aakapaswa ndi mai ake. Zvese izvi zvakabetsera Maria kuti anyase kurangarira ngezve mazwiro ake, uye pakupedzesera, iyena wakakwanisa kuita cisananguro cakanaka.
Djehovha anotipasa kudini simba ratinoda kuti tishingirire? (Onai ndima 10)
10. Maererano na Afiripi 4:13, Djehovha anoitei kuti abetsere aseenzi ake? Pasai muezaniso. (Onai mufanikiso.)
10 Djehovha anotipasa simba kuti tishingirire. Hinga zvaakaita no muphostori Pauro, Djehovha acatipasawo simba ratinoda kuti tishingirire matambudziko edu. (Erengai Afiripi 4:13.) Onai mushobo wakabetsera Djehovha hama imweni inozwi Benjamin kuti ikwanisane no migariro inoshupha. Paainga aciri djaha, Benjamin wakapedza nguwa yakareba ku musasa we asungwa ku África pamwepo no mhuri yake. Benjamin unoti: “Ndaigara ndecinamata kuna Djehovha ndecikumbira simba kuti andibetsere kuita zviro zvakanaka mu maonero ake. Djehovha akadaira minamato yangu ngekundibetsera kuti ndizwe runyararo, ngekundipasa ushingi wekuti ndiparidzire uye ngekundipasa mabhuku andaida kuti ndirumbwe ndakabamba pakunamata. Kuerenga ngezve maesperiensiya e hama dzimweni uye kuziya kuti Djehovha akaabetsera kuti ashingirire, kakabambisa cisananguro cangu cekurumbwa ndakagondeka kaari.”
Imwimwi makamboona rubetso ra Djehovha eciseenzesa hama dzenyu here? (Onai mandima 11-12) d
11-12. Djehovha angaseenzesa kudini hama dzedu dze ku mwiya kuti adaire minamato yedu? (Onai mufanikiso.)
11 Djehovha anoseenzesa hama dzedu dze ku mwiya kuti dzitibetsere. Pa usiku asati afa, Djesu akarumbwa eciita munamato no mwoyo wese. Djesu ainga asikadi kuti anhu arangarire kuti iyena wainga asikazi kureremedza zina ra Baba ake. Ndiyo ndaa iyena akadeketera kuna Djehovha kuti asasiye izvona zveciitika. Asi pane kuita zvainga zvakumbirhwa ndi Djesu, Djehovha akatuma ngirozi kuti imubambise. (Ruka 22:42, 43) Djehovha angatibetserawo ngekuita kuti hama dzedu dzitifonere kana kuti dzitivhakacire kuti dzitibambise. Zvezvirokwazvo, tese isusu tingapsvaka mikana yekubhuya “soko rakanaka” kana kuti ciro cingabambisa hama dzedu.—Zvie. 12:25.
12 Onai esperiensiya ye hanzvadzi imweni inozwi Miriam. Mumasure me masumana manganani mekuti mwamuna wake afa, Miriam wainga ari ega pa nyumba akatsukwara maningi uye wainga akaora mwoyo. Iyena waindogara ecicema uye waida kucedza no munhu. Iyena unoti: “Ndainga ndisikakwanisi kufonera munhu, hino ndakanamata kuna Djehovha. Pandainga ndecicema uye ndecinamata pa nguwa imweyo, thurufunu yangu yakarira. Wainga ari mukuru we ungano uye shamwari yangu.” Rubetso raakapaswa no mukuru uu uye no mukadzi wake, zvakaita kuti Miriam anyaradzwe. Iyena uno rugondo rekuti Djehovha ndiyena akaita kuti mukuru uu amufonere.
Djehovha angaseenzesa kudini anhu asikamuseenzeri kuti atibetsere? (Onai mandima 13-14)
13. Bhuyai muezaniso unopangidza kuti Djehovha angaseenzesa anhu asikamuseenzeri kuti adaire minamato yedu.
13 Djehovha angaseenzesa anhu asikamunamati kuti atibetsere. (Zvie. 21:1) Nguwa dzimweni, Djehovha angadaira minamato yedu ngekuita kuti anhu asikamuseenzeri atibetsere. Ngo muezaniso, Djehovha akaita kuti Mambo Artaxerxe atendere kuti Neemiya ahwirire ku Djerusarema kuti abetsere pakuwakwazve ke thaundi. (Nee. 2:3-6) Mazuwa ano, Djehovha angaitawo kuti anhu asikamuseenzeri aitewo zvimwezvo.
14. Esperiensiya ya Soo Hing yamubambisai kudini? (Onai mufanikiso.)
14 Hanzvadzi imweni inozwi Soo Hing yakazwa mushobo wayakabetserhwa ndi Djehovha eciseenzesa medhiko wayo. Mwana wayo uno zvinetso zvakawanda zve mundangariro. Mumasure mekusongana no tsaona yakakura, iyona no mwamuna wayo akasanangura kusiya mabasa awo kuti acengete mwana wawo. Nge ndaa yazvo, aona akatanga kusongana no cinetso cekukonerhwa mare. Soo Hing wakabhuya kuti wainga aguma pakupererhwa uye kuti wainga asikazvizii kuti waizokwanisa kuzvishingirira here. Asi pedzepo, iyena wakanamata kuna Djehovha no mwoyo wese ecikumbira rubetso rake. Medhiko wainga ecirapa mwana wake wakasanangura kuti waizobetsera mhuri ii. Ndiyo ndaa Soo Hing no mwamuna wake akabetserhwa no govherno uye akaona nyumba yekuti agare. Pakupedzesera iyena wakati: “Isusu takaona nyara ya Djehovha yecitibetsera. Kubhuya zvazviri, iyena ndi ‘Muzwi we minamato.’”—Pis. 65:2.
KUTENDA KUNOTIBETSERA KUTI TIZWISISE UYE TITENDERE MHINDURO YA DJEHOVHA YE MINAMATO YEDU
15. Cinyi cakabetsera hanzvadzi imweni kuti iwone kuti Djehovha aidaira minamato yayo?
15 Kakawanda kakhona minamato yedu aidairhwi nge mushobo unoshamisa. Asi mhinduro ye minamato yedu yatinopaswa na Djehovha ndiyona kamare yatinoda kuti tirumbwe takagondeka kaari. Ngokudaro, garai makagadzirira kuti muone kuti Djehovha anodaira kudini minamato yenyu. Hanzvadzi imweni inozwi Yoko yaiona hingana kuti Djehovha ainga asikadairi zvikumbiro zvayo, ndiyo ndaa iyona yakatanga kutara zviro zvese zvayakakumbira kuna Djehovha. Mumasure mekanguwa iyona yakaringira zvayainga yatara uye yakaona kuti Djehovha ainga adaira minamato yake yakawanda zvekuti imweni yakhona iyona yainga yatoikanganwa. Ndiyo ndaa zvakanaka maningi kuti nguwa no nguwa tiime uye torangarira kuti Djehovha arikudaira kudini minamato yedu.—Pis. 66:19, 20.
16. Mushobo upi umweni watingapangidza nawo kuti tino kutenda? (Ahebheru 11:6)
16 Isusu tinopangidza kuti tino kutenda haiwa basi patinoita minamato kuna Djehovha, asi patinotenderawo mhinduro yaanotipasa pasinei nokuti yadairhwa kudini. (Erengai Ahebheru 11:6.) Onai muezaniso wa Mike no mukadzi wake Chrissy. Aona ainga ano cinangwa cekuseenzera ku Bheteri. Aona anoti: “Isusu takatarira Bheteri petisao ke makore akawanda uye takanamata kuna Djehovha kakawanda nge zvazvo, asi atizi kumbodaidzwa.” Mike na Chrissy ainga ano rugondo rekuti Djehovha aiziya kuti aona aizonyasa kuseenzeswa kupi. Aona akarumbwa eciita no paanokwanisa napo eciseenza hinga mapionero e nguwa dzese ku mbuto yaidiwa aparidzi akawanda uye ecitsigira maprojeto e kuwaka. Nyamasi uno, awona arikuseenza hinga aonereri e nharaunda. Mike unotunhudzira eciti: “Anguwa dzesepi yekuti Djehovha akadaira minamato yedu ngo mushobo wataietsera, asi nguwa dzese iyena aidaira minamato yedu ngo mushobo wakanaka watainga tisikakariri.”
17-18. Maererano na Pisarema 86:6, 7, tingagara no rugondo ripi?
17 Erengai Pisarema 86:6, 7. Mutari we pisarema Dhavhidhi wainga ano rugondo rekuti Djehovha aipurutana uye aidaira minamato yake. Uye imwimwi mungagarawo no rugondo irona. Maesperiensiya ataona mu fundo ino anotigondesa kuti Djehovha angatipasa ungwaru uye simba ratinoda rekuti tishingirire. Iyena angaseenzesa hama dzedu kutobatanidzawo no anhu asikamuseenzeri kuti atibetsere.
18 Izvirokwazvo kuti anguwa dzesepi dzekuti Djehovha acadaira minamato yedu nge mushobo watinoetsera. Asi cokwadi ngecekuti iyena acadaira minamato yedu. Iyena acatipasa zviya zvatinoda kamare pa nguwa yakasisira. Hino rumbwai mecinamata muno kutenda uye no rugondo rekuti Djehovha acamucengetai zvino uye kuti mu nyika ipsva iyena “acadzadzisa zvido zve zviro zvese zvipenyu.”—Pis. 145:16.
NGOMA 46 Tinotenda Djehovha
a Djehovha anotigondesa kuti acadaira minamato yedu kana iyona yecienderana maererano no kuda kake. Patinosongana no matambudziko, tingagonda hedu kuti iyena acatibetsera kuti tirumbwe takagondeka kaari. Mu fundo ino ticaona kuti Djehovha anodaira kudini minamato yedu.
b Kuti muziye zvakawanda ngezve kuti Djehovha anotendera kuti Sathani atonge nyika, onai fundo inoti: “Ramba Wakaisa Pfungwa Dzako Panyaya Inokosha,” mu Murindiri wa Junyo wa 2017, mu ciShona.
c Mazina amweni akacinjwa.
d KUPANGANIDZWA KE MUFANIKISO: Mai no mwana wawo eciguma ku nyika imweni hinga atizi e hondo. Hama no hanzvadzi dzawo anoatambira no rudo uye anoabetsera.
