1. Akawanda anosongana no zvinetso zvipi?

 IMWIMWI makambogara no cinangwa cekunamata asi makashuphirhwa kuti mucidzadzise here? b Hino ziyai kuti andimwipi mwega. Ngo muezaniso, Philip wakaona kuti waidikana kunamata kakawanda uye kutunhudzira mushobo wake wekuita munamato, asi wakashuphirhwa maningi kuti awone nguwa yekuita izvona. Uye Erika wainga ano cinangwa cekukasika kuguma ku misangano yekubuda mu basa re kuparidzira, asi kakawanda kakhona, iyena wainonoka kuguma. Tomáš wakaedza kakawanda kuti aerenge Bhaibheri rese. Asi iyena unopanganidza eciti: “Inini ndainga ndisikatombopfariri kuerenga Bhaibheri. Ndakaedza kurierenga katatu kese, asi pandaigumira mu bhuku ra Revhitiko ndaitoima kurierenga.”

2. Ngei tisikadikani kuora mwoyo kana tisati takwanisa kudzadzisa cinangwa catinaco?

² Kana imwimwi murikuseenza no simba kuti mudzadzise cinangwa cenyu asi amusati mazvikwanisa, musarangarire kuti imwimwi amubetseri. Kudzadzisa cinangwa kunyazi ciri cidoko iciro cinoda nguwa uye kupeta masimba. Uye kupeta masimba kamuri kuita kunotopangidza kuti munokoshesa ushamwari wenyu na Djehovha uye munoda kunyasa kumuseenzera. Ziyai kuti Djehovha anokoshesa maningi kupeta masimba kamuri kuita, uye zviri pamhene kuti iyena aaetseri kuti timuitire zviro zvatisikakwanisi kuita. (Pis. 103:14; Mik. 6:8) Hino, pamunosanangura cinangwa, garai no maonero ari pakati no pakati. Sanangurai cinangwa camunokwanisa kudzadzisa. Asi mumasure mekusanangura  cinangwa munodikana kuitei kuti mucidzadzise? Ngatione mazano manganani.

3. Ngei zvecikosha kuti tigare no cido cakabamba kuti tidzadzise zvinangwa zvedu?

³ Isusu tinodikana kugara no cido cakabamba kuti tikwanise kudzadzisa zvinangwa zvedu zvekunamata. Pamunonga muno cido cakabamba cekudzadzisa cinangwa cenyu, imwimwi munoseenza no simba kuti mucidzadzise. Cido catinaco cekudzadzisa zvinangwa zvedu, cingaezaniswa no dutu rinoita kuti bharko rigume kariri kuenda. Kana dutu ringarumbwa recivhuvhuta, bharko rinoguma kariri kuenda, uye kana dutu recivhuvhuta maningi, bharko rinotokasika kuguma. Ngo mushobo umwewo, kana tino cido cakabamba zvinoita nyore kuti tidzadzise zvinangwa zvedu. David hama imweni inogara ku El Salvador inopanganidza yeciti: “Kana imwimwi muno cido cakabamba munotopeta masimba. Imwimwi munotoita zviri zvese kuti musasiye kuti ciro cipi haco cimupingaidze kudzadzisa zvinangwa zvenyu.” Mungaitei kuti imwimwi mugare no cido cakabamba?

4. Tingakumbirei pa minamato yedu? (Afiripi 2:13) (Onai mufanikiso.)

⁴ Namatai mecikumbira kuti mugare no cido cakabamba. Djehovha angaseenzesa mwiya wake mucena kuti amuitise kuti mugare no cido cekudzadzisa cinangwa cenyu. (Erengai Afiripi 2:13.) Nguwa dzimweni, tingagara no cinangwa ngokuti tinoziya kuti ndizvona zvatinodikana kuita, uye kuita izvona azvizi kushata. Asi zvingaita kuti isusu atina cikonzero kana cido cekudzadzisa cinangwa icona. Ndizvona zvakaitika no hanzvadzi imweni inogara ku Uganda inozwi Norina. Iyona yainga ino cinangwa cekuitisa fundo ye Bhaibheri, asi yainga isina cikonzero cekuti iite izvona ngokuti yaidziona hingana kuti yainga isiripi mufundisi wakanaka. Iyona yakaitei? Inopanganidza yeciti: “Inini ndakatanga kunamata kuna Djehovha mazuwa ese ndecikumbira kuti iyena andibetsere kugara no cido cekuitisa fundo ye Bhaibheri. Inini ndakaita maererano no zvandakakumbira pa minamato yangu uye ndakapeta masimba kuti nditunhudzire mushobo wangu wekufundisa. Mumasure me mwedzi minganani ndakaona kuti cido cangu cakatunhudzira. Uye pa gore irona kamare ndakatanga kuitisa fundo mbiri dze Bhaibheri.”

5. Kuti titunhudzire cido cedu tinodikana kunyasa kurangarira ngezvei?

⁵ Nyasai kurangarira zvamakamboizirhwa na Djehovha. (Pis. 143:5) Muphostori Pauro wainyasa kurangarira ngezve nyasha dzaakapangidzirhwa ndi Djehovha, uye izvona zvaimuitisa kuti aseenzere Djehovha no simba. (1 Ako. 15:9, 10; 1 Ti. 1:12-14) Ngo mushobo umwewo, pamunorumbwa mecinyasa kurangarira ngezve zviro zvamakamboizirhwa ndi Djehovha, cido cenyu cekudzadzisa cinangwa cenyu cinotunhudzirikawo. (Pis. 116:12) Onai cakabetsera hanzvadzi imweni inogara ku Honduras kuti idzadzise cinangwa cayo cekugara mupionera we nguwa dzese. Iyona inoti: “Ndaiima,  ndorangarira mushobo wandinodiwa na Djehovha. Iyena akandibetsera kuti ndigumire anhu ake. Iyena anondicengeta uye anondidziirira. Kunyasa kurangarira ngezve zviro izvi kakabambisa rudo rangu kaari uye kakatunhudzirawo cido cangu.”

6. Ciro cipizve cicatibetsera kuti titunhudzire cido cedu?

⁶ Rangarirai ngezve kubetsereka kamungaita ngekudzadzisa zvinangwa zvenyu. Rangarirai zvakabetsera Erika wamborekethwa nge zvake kuti adzadzise cinangwa cake cekukasika kuguma pa misangano yekubuda mu basa re kuparidzira. Iyena unoti: “Ndakaona kuti pandainonoka ndaitoruza zvakawanda. Asi pandaikasika kuguma, ndaikwanisa kucungamidza hama no hanzvadzi uye kupedza cinguwa tiri tese. Ndaikwanisa kuzwawo maonero aipaswa e kubuda mu basa re kuparidzira.” Erika wakarangarira ngezve kubetsereka kaaizoita ngekukasika kuguma uye wakakwanisa kudzadzisa cinangwa cake. Makamborangarira ngezve kubetsereka kamungaita ngekudzadzisa zvinangwa zvenyu? Ngo muezaniso, kana cinangwa cenyu ciri cekuerenga Bhaibheri kana kuita munamato, rangarirai kuti izvona zvicabambisa kudini ushamwari wenyu na Djehovha. (Pis. 145:18, 19) Kana cinangwa cenyu ciri cekusakurira wara rimweni re Cikristu, rangarirai kuti izvona zvicatunhudzira kudini ushamwari wenyu no amweni. (Ako. 3:14) Zvakadini kutara zviro zvakanaka zvicaitika kana mukadzadzisa cinangwa cenyu? Mumasure me cinguwa potai meciona zvamakatara. Tomáš, wamborekethwa nge zvake unoti: “Kana pano zvikonzero zvakawanda zvekuti ndiedze kudzadzisa cinangwa cangu, inini ndicaseenza no simba kuti ndicidzadzise.”

7. Cinyi cakabetsera Julio no mukadzi wake kuti adzadzise cinangwa cawo?

⁷ Pedzai nguwa no anhu anomuitisa kuti mugare no cido. (Zvie. 13:20) Onai zvakabetsera Julio no mukadzi wake kuti adzadzise cinangwa cawo cekuita zvakawanda mu basa re kuparidzira. Iyena unoti: “Isusu tinopsvaka kugara no shamwari dzatingareketa nadzo ngezve zvinangwa zvedu uye dzinotitsigira. Akawanda awo akambogara no zvinangwa zvakada kutodzana uye anotipasa mazano anobetsera. Shamwari dzedu dzaitibvunzisa kuti urongwa wedu wainga wakadini uye dzaitibambisa pataida.”

8. Cinyi cingaitika kana tikaetsera kugara no cido cekudzadzisa zvinangwa zvedu? (Onai mufanikiso.)

⁸ Kubhuya zvazviri, tese isusu tino mazuwa atinozwa tisina cido. Asi izvona zvicatipingaidza kuti tidzadzise zvinangwa zvedu here? Haiwa. Ngo muezaniso, dutu ringagara no simba rekundunda bharko kuti rigume kariri kuenda. Asi simba re dutu ringakwanisa kucinja, uye mumazuwa amweni, dutu ringasama kuvhuvhuta. Hino bharko rinodikana kuima nge ndaa yazvo here? Haiwa. Irona ringarumbwa recienda kariri kuenda. Ngo muezaniso, mabharko amweni ano motori kana ciro cipi haco cingaseenzeswa pakuendesa bharko kariri kuenda.  Cido cedu cakaitawo hingana dutu, uye mumazuwa amweni tingazwa tisina cido cekudzadzisa cinangwa cedu. Kana imwimwi murikuetsera kugara no cido cekudzadzisa cinangwa cenyu, pamweni amuzokwanisi kucidzadzisa nariini. Kuita hingana bharko rinokwanisa kuguma kariri kuenda pasinei nokuti akuna dutu, isusuwo tingakwanisa kudzadzisa zvinangwa zvedu kunyazi tisina cido. Zviri pamhene kuti kuita izvona azviripi nyore, asi kuzviita zvinobetsera. Ngatione mubvunzo umwe wekuti pamweni amweni angadziita, uye pedzepo toona mazano manganani atingaita.

9. Kodi zvino musoro here kuti tidzadzise cinangwa catinaco kunyazi tisina cido cekuzviita? Panganidzai.

⁹ Djehovha aadi kuti tiite ciro hingana tirikubambidzirhwa, asi kuti tiite no cido. (Pis. 100:2; 2 Ako. 9:7) Hino tinodikana kurumbwa teciseenza no simba kuti tidzadzise cinangwa cekunamata kunyazi tisina cido cekuzviita here? Onai muezaniso we muphostori Pauro. Iyena wakati: “Ndinopangira mwiri wangu ndeciuita hinga muranda.” (1 Ako. 9:25-27, masoko e kufunda e pasi e vhersikuro  27) Pauro waidzibambidzira kuita zviro zvakanaka kunyazi paainga asina cido cekuzviita. Uye Djehovha aiwona kudini zvaiizwa ndi Pauro? Iyena akapfara nge basa rakaizwa ndi Pauro! Uye akakomborera kupeta kake masimba.—2 Ti. 4:7, 8.

10. Ngei zvakanaka kuti tidzadzise cinangwa catinaco kunyazi patinozwa tisina cido?

¹⁰ Ngo mushobo umwewo, Djehovha anopfara maningi paanotiona teciseenza no simba kuti tidzadzise cinangwa catinaco kunyazi tisina cido cekuzviita. Iyena anopfara ngekuti anoziya kuti isusu tirikupeta masimba haiwa nge ndaa ye rudo ratinaro ku ciro icona, asi ku rudo redu kaari. Kuita hingana Pauro wakakomborerhwa ndi Djehovha, Djehovha acakomborerawo kupeta kedu masimba. (Pis. 126:5) Uye patinoona kuti Djehovha arikutikomborera, cido cedu cinotunhudzirikawo. Hanzvadzi imweni inogara ku Polônia inozwi Lucyna inoti: “Nguwa dzimweni, inini andina cido cekubuda mu basa re kuparidzira, kunyanya pandinonga ndakaremba. Asi mupfaro wandinozwa pandinohwirira icipo cinoshamisa ca Djehovha kandiri.” Parizvino ngatione zvatingaita patinozwa tisina cido.

11. Tingaitei kuti tigare anhu anodzibata?

¹¹ Namatai mecikumbira kuti mugare munhu unodzibata. Kudzibata kunoita kuti tikwanise kuonerera mazwiro uye maitiro edu. Kakawanda kakhona kunobatanidza kudzibata kuti musaite ciro cakashata. Asi isusu tinodikanawo kugara anhu anodzibata kuti tiite zviro zvakanaka, maka-maka kana ciri ciro cinoshupha, kana ciro catisina cido cekuciita. Edzurirai kuti wara rekudzibata rinobatanidzwawo pa zvibereko zve mwiya mucena, hino namatai kuna Djehovha mecikumbira mwiya wake mucena kuti mugare no wara iri rinokosha. (Ruka 11:13; Aga. 5:22, 23) David wamborekethwa ngezvake wainga asikakwanisi kuita fundo ye munhu ega nguwa dzese. Iyena unobhuya mabetserhwe aakaizwa ngekuita munamato. Iyena unoti: “Ndaigara ndecikumbira Djehovha kuti ndigare munhu unodzibata. No rubetso rake, inini ndakakwanisa kuita urongwa wakanaka wekufunda.”

12. Muparidzi 11:4 inotibetsera kudini kuti tidzadzise zvinangwa zvedu zvekunamata?

¹² Musagare mecietsera mugariro wakakwana. Mu nyika ino yatiri kugara atidikani kuetsera kuti zviro zvese zvigare zvakakwana. Kana tikaetsera kuti izvona zviitike, pamweni atizombodzadzisi zvinangwa zvedu. (Erengai Muparidzi 11:4.) Hama imweni inozwi Dayniel inoti: “Akuna migariro yakakwana. Isusu tingagara no migariro yakanakisisa patinotanga kuita ciito.” Hama imweni inozwi Paul inogara ku Uganda inobhuya kuti ngei tisikadikani kugara no cierengera. Iyona inoti: “Patinotanga  kuita ciro kunyazi no zvinetso, tinonga tecipasa Djehovha ciro cekuti iyena ungacikomborera.”—Mara. 3:10.

13. Ngei zvakanaka kudzadzisa cinangwa ngekutangisa padoko no padoko?

¹³ Tangisai padoko no padoko. Pamweni mungazwa musina cido ngekuti cinangwa cenyu cinoita hingana kuti ciri kure kuti mucidzadzise. Kana zvakadaro, zvakadini kudzadzisa cinangwa cenyu ngekutanga padoko no padoko? Kana mecida kusakurira wara rimweni zvakadini kuripangidza no zviito zvidoko zuwa no zuwa? Kana cinangwa cenyu ciri cekuerenga Bhaibheri rese, zvakadini kurierenga mu miseswa minganani zuwa no zuwa? Tomáš, wamborekethwa panotangira fundo ino, wainga asikakwanisi kudzadzisa cinangwa cake cekuerenga Bhaibheri pa gore rimwe. Iyena unoti: “Ndakaona kuti ndaiedza kuerenga zvakawanda pa nguwa imwe basi. Hino ndakasanangura kuedza kutangazve, asi parizvino, ndakasanangura kuerenga mandima manganani pa zuwa uye ndonyasa kurangarira zvandaierenga. Hino ndakatanga kupfarira kuerenga Bhaibheri.” Uye ngekufundira kuerenga Bhaibheri, Tomáš’ wakakwanisa kupedza nguwa yakawanda ecierenga. Ngekudaro, iyena wakakwanisa kuerenga Bhaibheri rese. c

14. Zvinetso zvipi zvatinga songana nazvo?

¹⁴ Kunyazi mutori no cido uye makatonyasa kugadzirira, zvinotsukwarisa kuti mungatosongana no zvinetso pakugumira zvinangwa zvenyu. Ngo muezaniso, “zviro zvinoitika tisikakariri” nguwa dzimweni zvingatisiya tisina nguwa yekudzadzisa zvinangwa zvedu. (Mup. 9:11) Kana kuti dambudziko ringatisiya tecidzirhya mwoyo uye tisina simba. (Zvie. 24:10) Ngekuti tiri anhu asikazi kukwana tingakwanisa kuita zviro zvakashata zvingaita kuti tisadzadzise zvinangwa zvedu. (Aro. 7:23) Kana kuti tingazwa takaremba. (Mat. 26:43) Asi cinyi cingatibetsera kuti tishingirire zvinetso kana kuti zuwa rinoshupha?

15. Ngei zvinetso azvidikani kuita kuti imwimwi murembe? Panganidzai. (Pisarema 145:14)

 ¹⁵ Kusongana no zvinetso pamunonga meciedza kugumira cinangwa azvidikani kuita kuti imwimwi murembe. Bhaibheri rinopangidza pamhene kuti kunyazi tecisongana kakawanda no zvinetso tingakwanisa kumuka toenderera mberi. Uye isusu tino rubetso ra Djehovha. (Erengai Pisarema 145:14.) Philip wambobhuiwa ngezvake unoti: “Kuti ndione kuti ndiri kubudirira kana kuti haiwa inini andikandi ndangariro dzangu pakuti ndakambwera kangana. Asi, ndinokanda ndangariro dzangu kuti ndakamuka kangana uye ndorumbwa ndecienderera mberi.” David wambobhuiwa ngezvake, unopanganidza eciti: “Ndinoedza kuona zvinetso uye mazuwa anonetsa, haiwa hingana zvitsinzwa, asi hingana mikana yekupangidza rudo rangu kuna Djehohva.” Patinorumbwa tecienderera mberi kunyazi tecisongana no zvinetso, tinopangidza Djehovha kuti tinoda kumupfadza. Uye Djehovha anopfara maningi nge kumuonai mecipeta masimba kuti mugumire zvinangwa zvenyu!

16. Zvinetso zvingatifundisei?

¹⁶ Fundirai no zvinetso. Rangarirai ngezve ciro caitisa zvinetso izvona, uye dzibvunzisei kuti ‘Kodi pano candingaita kuti zviro izvi zvisaitikezve here?’ (Zvie. 27:12) Nguwa dzimweni, zvinetso zvingapangidza kuti cinangwa catinaco atikwanisi kucigumira. Kudai uu uri mugariro wenyu, cimbonyasai kurangarira ngezve cinangwa cenyu uye onai kuti imwimwi munokwanisa kucigumiradi here. d Kana imwimwi mukakonerhwa kudzadzisa cinangwa cenyu, Djehovha aazomuoni hingana kuti amubetseri.—2 Ako. 8:12.

17. Ngei zvakanaka kurangarira zvinangwa zvamakakwanisa kudzadzisa?

¹⁷ Cimborangarirai ngezve zviro zvamakakwanisa kudzadzisa. Bhaibheri rinobhuya kuti: “Ngekuti Mwari amunhupi asina unatsi kuti akanganwe basa renyu.” (Aheb. 6:10) Hino itai zvimwezvo. Musakanganwe zviro zvese zvamakakwanisa kuita—ngo muezaniso kugara no ushamwari na Djehovha, kureketa no amweni ngezvake kana kuti kubhabhatidzwa. Kuita hingana mushobo wamakakwanisa kudzadzisa zvinangwa zvenyu kare, imwimwi mucakwanisawo kudzadzisa zvinangwa zvamunazvo zvino.—Afi. 3:16.

18. Tinodikana kuedzurira kuitei patinoseenza no simba kuti tigumire cinangwa cedu? (Onai mufanikiso.)

¹⁸ No rubetso ra Djehovha, imwimwi mungagumira zvinangwa zvenyu, kuita hingana munhu urikuita rhwendo no bharko unopfara ngekuguma kaari kuenda. Asi edzurirai kukhorovhera rhwendo ramuri kuita. Kana kuti, pamunoedza kugumira zvinangwa zvenyu, pfarai ngekuona mabetserhwe amuri kuizwa ndi Djehovha uye kukomborera kaari kuita kupeta kenyu masimba. (2 Ako. 4:7) Kana mukasama kuremba mucatambira makomborero akakura.—Aga. 6:9.