1-2. Anhu amweni anotii ngezve kunamorari?

 KUNAMORARI kungagara ciro cinopfadza maningi mu upenyu ku aya ari ku namorari. Kana imwimwi muri ku namorari, zvezvirokwazvo imwimwi muri kuda kuti zvese zvimuhambirei zvakanaka. Uye izvi ndizvo zvinopfarirhwa no anhu ese ari ku namorari. Tsion, a hanzvadzi imweni ye ku Etiópia, yakati: “Imwe ye nguwa yakapfadza maningi ndi nguwa yatainamorari. Isusu taicedza ngezve zviro zvinokosha, asi taisekawo maningi tese. Inini ndakapfara maningi kuziya kuti ndainga ndagumira munhu wandaida uye waindidawo.”

² Ngo dii rimweni, hama imweni inozwi Alessio inogara ku Holanda, inoti: “Zvakanaka maningi kunyasa kuziya mukadzi wangu pandainga ndecinamorari, asi kunamorari kedu kakagarawo no zvitsinzwa.” Mu fundo ino, ticaona zvitsinzwa zvinganani zvingaoneka uye mazano e mu Bhaibheri angabetsera aya ari kunamorari kuti akudze Djehovha. Uyewo ticaona kuti amweni mu ungano angabetsera kudini aya ari kunamorari.

CINANGWA CE KU NAMORARI

3. Ngacipi cinangwa ce kunamorari? (Zvierengo 20:25)

³ Kunamorari kungaunzisa mupfaro, asiwo i dano rinokosha rinoita kuti anhu agume pakucata. Pa zuwa re mucato, anhu anonga ecicata anopika pamberi pa Djehovha kuti acadana no kureremedzana ke upenyu wawo wese. Tisati taita mhiko ipi hayo tinodikana kunyasa kurangarira. (Erengai Zvierengo 20:25.) Uye izvi, zvinobatanidzawo mhiko ye mucato. Cinangwa ce kunamorari nge cekuti aya ari kurangarira kuwakana anyase kuziyana kuti aite cisananguro cakanaka. Nguwa dzimweni, cisananguro nge ce kuwakana, asi pamweni paya cisananguro cingagara ce kurambana. Kana aya ari kunamorari akasanangura kurambana, izvi azvidi kureya kuti namoroyo aizi kubudirira zvakanaka. Pane kudaro,  namoroyo yadzadzisa cinangwa cayo, awona aita cisananguro cakanaka.

4. Ngei isusu tese tecidikana kugara no maonero akanaka pa nyaya inocokuita no kunamorari?

⁴ Ngei zvinokosha kugara no maonero akanaka pa nyaya inocokuita no ku namorari? Kana munhu asati awaka kana kuwakwa akagara no maonero akanaka pa nyaya inocokuita no ku namorari, iyena aazonamorari no munhu asina cinangwa ce kuzowakana. Asi andiwopi basi anhu asikazi kuwaka kana kuwakwa anodikana kugara no maonero aya. Asiwo tese isusu tinodikana kuedzurira kuti ngacipi cinangwa ce ku namorari. Ngo muezaniso, anhu amweni anorangarira kuti aya ari kunamorari anodikana kucata. Asi izvona zvinobata-bata kudini hama dzisikazi kuwaka kana kuwakwa? Hanzvadzi imweni isikazi kuwakwa inozwi Melissa inogara ku Estados Unidos, inoti: “Kuno kubambidzirhwa kakakura maningi ku Apupuri a Djehovha ari ku namorari. Nge ndaa yazvo, aya ari kunamorari anothya kurambana, kunyazi eciona kuti namoro yawo airipi kuhamba zvakanaka. Uye aya asikazi kuwaka kana kuwakwa aatomboedzi ku namorari. Uyewo kubambidzirhwa ikona kungaita kuti adzirhye mwoyo.”

KUNYASA KUZIYANA ZVAKANAKA

5-6. Aya anonga ecinamorari anodikana kucedzesana ngezvei? (1 Pedru 3:4)

⁵ Kana imwimwi muri kunamorari, cinyi cicamubetserai kuti musanangure kuti mocata here kana kuti haiwa? I kuziya zvakanaka mudoni wenyu. Pamweni imwimwi maakuziya kare zviro zvinganani ngezve mudoni wenyu, kunyazi musati matotanga kunamorari naye. Asi zvino maano mukana we kunyasa kuziya “munhu wakarungama nge cemukati.” (Erengai 1 Pedru 3:4.) Pamunonga maakunamorari imwimwi maano mukana we kuziya kuti mudoni wenyu ushamwari wake na Djehovha wakadini, unhu wake uye zvaanorangarira. No kuhamba ke nguwa, imwimwi munozokwanisa kudaira mibvunzo dzinoteera: ‘Kodi mudoni wangu acazokwanisa kugara mwamuna kana mukadzi wakanaka kandiri here?’ (Zvie. 31:26, 27, 30; Aef. 5:33; 1 Ti. 5:8) ‘Inini ndicazokwanisa kuda mudoni wangu uye kumuzwisisa pedzepo ndotambirawo rudo rakadaro kubva kaari here? Ndicazokwanisa kushingirira kutama kukwana ke mudoni wangu here?’ b (Aro. 3:23) Pamunonga mecinyasa kuziyana zuwa no zuwa, edzurirai kuti: Cinonyanya kukosha akuezanapi ke zviro zviya zvamunopfarira, asi kuti makagadzirira dakara  papi kudjairana no kutama kukwana ke umwe no umwe wenyu.

⁶ I zviro zvipi zvamunodikana kunyasa kungwarira paya pamunonga mecinamorari? Musati matanga kugara no mazwiro akabamba e kuda mudoni wenyu, pamweni imwimwi mungada kutanga kucedza ngezve nyaya dzinokosha. Ngo muezaniso, zvicada kuizwa nge mudoni wenyu mune ramangwana, zvakadai hinga cinetso ce mare, cinetso ce uthongo kana kuti zviro zvakaitika kare mu upenyu we mudoni wenyu. Azviropi zvese zvinodikanwa kucedzwa paya pamunonga mecitangisa ku namorari. (Ezanisai na Juau 16:12.) Kana imwimwi meciona hingana kuti azvisati zvaakuita kudaira mubvunzo wamunopaswa no mudoni wenyu, nyasai kumudjekesera kuti ngei. Asi ziyai kuti no kuhamba ke nguwa, mudoni wenyu anodikana kuziya izvona kuti akwanise kuita zvisananguro zvakanaka. Hino, icazoguma nguwa yekuti imwimwi mucamubvunza masoko awona makagondeka.

7. Anhu ari kunamorari, anganyasa kudini kuziyana zvakanaka? (Onai bhokisi rakazwi “ Kunamorari no Munhu Unogara Kure.”) (Onaiwo foto.)

⁷ Tinganyasa kudini kuziya munhu zvaari? Umwe we mushobo we kuita izvona ndi kuita mubvunzo uye kakunyasa kupurutana zvaanoreketa. (Zvie. 20:5; Tig. 1:19) Mungaita izvona nge kuita mabasa muri pamwepo, zviro zvekuti zvingamupasai mukana kuti mucedze. Ngo muezaniso, kurhya pamwepo, kupasiyari ku mbuto dzino anhu kana kubuda mu basa re kuparidzira. Mungakwanisa kuonawo zviro zvimweni ku mudoni wenyu kana mukapedza nguwa mecicedza no shamwari uye anyaukama enyu. Psvakaizve mukana we kuita basa rekuti mudoni wenyu angacedza no anhu akawanda uye akasiyana-siyana. Onai zvakaizwa na Aschwin, anogara ku Holanda, paainamorari na Alicia. Iyena unoti: “Takasanangura kuita mabasa amweni tiri pamwepo kuti tinyase kuziyana zvakanaka. Pamweni paya, zvainga zviri zviro zvakareruka, zvakaita hinga kubika pamwepo, uye kuitawo mabasa amweni e pa nyumba. Nge kuita izvona, isusu takakwanisa kuona mawara akanaka e umwe na umwe wedu uye zvishaizvi zvake.”

8. Ngei zvakanaka kuti aya ari kunamorari afunde pamwepo Bhaibheri?

⁸ Imwimwi mucanyasawo kuziyana zvakanaka kana mukafunda pamwepo Bhaibheri. Kana imwimwi mukazowakana, munodikana kusanangura zuwa rokuita fundo ye mhuri. Mwari anodikana kugara pa mbuto yokutanga mu mucato wenyu. (Mup. 4:12) Ndiyo ndaa, zvaizonga zvakanaka kutanga kufunda Bhaibheri pamwepo pa nguwa yamuri ku namorari. Izvirokwazvo  kuti ari kunamorari aasati aa mhuri, kureya kuti hama aisati yagara musoro we hanzvadzi yairi kunamorari nayo. Kunyazi zvakadaro, kana imwimwi mukafunda Bhaibheri muri pamwepo, mudoni wenyu ngaape maonero ake ngezva Djehovha. Max na Laysa, kazado imweni inogara ku Estados Unidos, akaona zviro zvimweni zvinobetsera. Iyena unoti: “Kubvira patainamorari, isusu tinofunda ngezve mabhuku anoreketa ngezve kunamorari uye upenyu we mu mhuri. Kufunda mabhuku aya, kakatibetsera kucedza ngezve nyaya dzinokosha dzekuti dzaizotishuphira kucedza ngezvadzo.”

ZVIRO ZVIMWENI ZVAANGAONGORORA

9. Aya ari kunamorari anodikana kurangarira ngezvei panocokuita no kubvunza anhu ngezve kunamorari kawo?

⁹ Mungabvunza ani ngezve kunamorari kenyu? Ici i cisananguro cenyu muri airi. Pamunonga mecinamorari, pamweni imwimwi mungasanangura kubvunza anhu padoko basi. (Zvie. 17:27) Nge kuita izvona, zvicaita kuti musabambidzirhwe uye musapaswe mibvunzo dzisikabetseri. Asi kana imwimwi mukatama kubvunza munhu umweni, zvicaita kuti mupedze nguwa yakareba musikaonani mecithya kuti anhu amweni angazviziya. Uye izvona zvingamukandai pa ngozi. Kaizonga kuri kupangidza ungwaru kubvunza aya aizomubetserai uye kupasa mazano akanaka. (Zvie. 15:22) Ngo muezaniso, imwimwi mungabvunza anhu e mu mhuri yenyu, shamwari dzakakura pakunamata, kana akuru.

10. Aya ari kunamorari angagara kudini no namoro inokudza Djehovha? (Zvierengo 22:3)

¹⁰ Mungagara kudini no maitiro akanaka anopfadza Djehovha? No kuhamba ke nguwa, mazwiro enyu ngezve umweni anotunhudzira. Imwimwi mungadzidziirira kudini pakuita zviro zvisikapfadzi Djehovha? (1 Ako. 6:18) Musacedze ngezve zviro zvinocokuita no zvepamaponde, musagare muri mwega pa mbuto isina anhu kana kumwisa doro. (Aef. 5:3) Kana imwimwi mukaita kudaro, cido ce kuda kuita zvepamaponde cinokura uye zvinozoshupha kuita zvinoda Djehovha. Hino ngei musikacedzi kakawanda ngezve zviro zvamungaita kuti mugare no namoro yakacena? (Erengai Zvierengo 22:3.) Onai zvakabetsera Dawit na Almaz e ku Etiópia. Awona anoti: “Isusu taipedza nguwa tiri pamwepo pa mbuto yakadzara anhu kana no shamwari dzedu. Isusu atizi kumbogara tiri tega mukaru kana mu nyumba. Ngo mushobo uwona, taidzingwaririra kuti tisadzikande pa ngozi.”

11. Aya ari ku namorari, angaitei kuti asanangure zvakanaka kupangidzirana rudo?

¹¹ Hino zvakadiniwo no kupangidzirana rudo? Rudo renyu parinorumbwa recikura, pamweni imwimwi mungada kupangidza rudo iri nge mushobo wakanaka. Asi cido cekuda kuita zvepamaponde cikakura, zvinozoshupha kurangarira no ungwaru uye kuita cisananguro cakanaka. (Ngo. 1:2; 2:6) Kupangidzirana rudo uku, zvingaita kuti zvimushuphirei kudzionerera uye mugume pakuita zviro zvakashata zvisikapfadzi Djehovha. (Zvie. 6:27) Hino pamunonga mecitanga ku namorari, imwimwi mungacedza ngezve paya pamunodikana kugumira maerano no mitemo ye Bhaibheri. c (1 Ate. 4:3-7) Imwimwi muri ku namorari, mungadziita mibvunzo dzakaita hingana idzi: ‘Ku mbuto yandinogara, anhu anopangidzirana rudo nge mushobo upi? Zvatinoita, zvinoita here kuti tigare no cido cekuda kuita zvepamaponde?’

12. Kana aya ari kunamorari asikapindirani, cinyi caanodikana kuedzurira?

¹² Aya ari kunamorari angaitei kuti arhwisane no matambudziko uye kusama kupindirana? Kana imwimwi nguwa dzimweni mukasama  kupindirana, kodi izvi zvinoreya kuti imwimwi amuzi kusisirana kuti munamorari mwese here? Haiwa; ese ari kunamorari anosonganawo nazvo. Mucato wakabamba unobatananidzwa no anhu airi anoreremedzana uye akagadzirira kukanda cido ce umweni pamberi. Mushobo wamunogadzirisa matambudziko enyu zvino, ndiwona ucapangidza kuti mucato wenyu ucabudirira here kana kuti haiwa. Dzibvunzisei kuti: ‘Kodi isusu tinokwanisa kugadzirisa matambudziko nge mushobo wakaterama here? Tinotendera zvishaishi zvedu uye topeta masimba kuti ticinje here? Takagadzirira kutendera, kukumbira rurekerero uye kurekerera here?’ (Aef. 4:31, 32) Asi kana musikapindirani nguwa dzese uye mecireketedzana paya pamunonga mecinamorari, zviri pamhene kuti pamunozocata zviro azvizohambi zvakanaka. Ndiyo ndaa, kana umwe wenyu akaona kuti umweni aazi kusisira kaari, cisananguro cakanaka kamuri muri airi ngece kurambana. d

13. Cinyi cingabetsera aya ari kunamorari kuona nguwa yaacapedza ecinamorari?

¹³ Munodikana kupedza nguwa yakareba kudini mecinamorari? Kana tikatama kutora nguwa yekuti tiite cisananguro, zviro azvitihambiri zvakanaka. (Zvie. 21:5) Hino namoro yenyu inodikana kutora nguwa yakasisira kuti munyase kuziya mudoni wenyu. Asi imwimwi amudikani kunamaorari ke nguwa yakareba maningi. Bhaibheri rinotiwo: “Ciro cinoetsera munhu cikatama kuitika pa nguwa yaanoetsera, mwoyo unonetseka.” (Zvie. 13:12) Kusiya izvona, kana mukapedza nguwa yakareba muri mwese, zvicamushuphirai kuti mukunde muedzo we kuita zvepamaponde. (1 Ako. 7:9) Pane kukanda ndangariro dzenyu kuti muri kunamorari ke nguwa yakaremba kudini, zvakanaka kudzibvunzisa kuti: ‘Cinyizve candinodikana kuona ku mudoni wangu kuti ndiite cisananguro cakanaka?’

AMWENI ANGABETSERA KUDINI AYA ARI KUNAMORARI?

14. Amweni mu ungano angabetsera kudini aya ari kunamorari? (Onaiwo foto.)

¹⁴ Kana imwimwi mukaziya kuti aripo ari kunamorari mu ungano, mungaabetsera kudini? Mushobo wakanaka we kuita izvona ngewe kuapika kuti murhye nawo pa nyumba penyu, kubatanidzawo pa kunamata ke mhuri, kana kuti pa zviro zvimweniwo. (Aro. 12:13) Awona angakhorovhera mikana ii kuti anyase kuziyana zvakanaka. Pamweni tingaabetsera nge kudzipira kuhamba nawo kuti asahambe oga, uye kuapasawo bhureya kana kuti kusiya kuti acedze mu nyumba medu ari oga, asi asiripi pa mbuto isikaoneki.  (Aga. 6:10) Alicia, wamborekethwa nge zvake pakutanga, unoedzurira kubetserhwa kaakaizwa no hama paainga ecinamorari na Aschwin. Iyena unoti: “Isusu takapfara maningi patakaona hama dzecidzipira kutibetsera paya pataida kucedza tiri tega, asi tisikagari pa mbuto isina anhu.” Kana aya ari kunamorari akamukumbirai kuti muaperekedze, izvi zvicagara rubetso rakakura kaari uye awona acapfara maningi. Ngwarirai kuti musasiye aya ari kunamorari ari oga, asi pa nguwa imweimweyo moapasawo mukana kuti akwanise kucedza.—Afi. 2:4.

15. Ngazvipi zvimweni zvatinodikana kuita kuti tibetsere aya ari kunamorari? (Zvierengo 12:18)

¹⁵ Isusu tingabetsera aya ari kunamorari pa zviro zvatinobhuya kana kuti zvatisikabhuyi. Nguwa dzimweni, zvinotishuphira kuonerera cido cedu ce kuda kureketa. (Erengai Zvierengo 12:18.) Ngo muezaniso, pamweni tingagara no cido ce kuda kubhuya kuti aripo atanga ku namorari, pamweni aya ari namorari ndiwo anoda kuzviziisa oga. Atidikani kuita mapsveda ngezve aya ari kunamorari kana kushora zvisananguro zvawo. (Zvie. 20:19; Aro. 14:10; 1 Ate. 4:11) Kusiya izvona, isusu atidikaniwo kuaita mubvunzo kana kureketa zviro zvinoita kuti azwe kubambidzirhwa kucata. Hanzvadzi inozwi Elise pamwepo no mwamuna wayo inoti: “Zvaindishamisa maningi kuzwa anhu ecitibvunzisa ngezve urongwa wedu we mucato, nepoo isusu tainga atisati tambocedza nge zvazvo.”

16. Cinyi catinodikana kuita kana aya ari kunamorari akasanangura kurambana?

¹⁶ Asi zvakadini kana anhu awona akaita cisananguro ce kurambana? Zvinonga zvisikazi kunaka kuaita mibvunzo kana kuedza kuona kuti ndiani wainga ano ndaa. (1 Ped. 4:15) Hanzvadzi imweni inozwi Lea, inoti: “Ndakazoziya kuti anhu aigara ecipsvaka kuziya kuti ngei inini no hama imweni takarambana. Izvona zvakandirhwadza maningi.” Hinga zvatamboona pakutanga, kana anhu akaita cisananguro ce kurambana azvidi kureya kuti namoro yawo yainga isikaripi kuhamba zvakanaka. Asi zvinoreya kuti namoro yadzadzisa cinangwa cayo—ce kubetsera anhu aya ari kunamorari pa kuita cisananguro cakanaka. Kunyazi zvakadaro, kuita cisananguro icona zvainga zvisiripi nyore, pamweni anhu aya akatsukwara uye akazwa ari oga. Ndiyo ndaa zvakanaka maningi kuti tese isusu tiedze kuabetsera.—Zvie. 17:17.

17. Aya ari kunamorari anodikana kurumbwa eciitei?

¹⁷ Hinga zvatamboona, kunamorari kuno zvitsinzwawo zvinganani, asiwo kungagara nguwa inopfadza maningi mu upenyu wenyu. Jessica unopanganidza eciti: “Kunamorari kuno basa rakakura. Asi zvakabetserawo maningi kupedza nguwa uye simba rese kuti tinyase kuziyana zvakanaka.” Kana imwimwi muri ku namorari, rumbwai mecipeta masimba kuti munyase kuziyana. Kana imwimwi mukaita izvona, namoro yenyu icamubetserai kuti muite zvisananguro zvakanaka.