MUSORO WE KUFUNDA 20
NGOMA 67 “Paridzai Soko”
Siyai kuti Rudo Rimuitisei kuti Murumbwe Meciparidzira!
“Masoko akanaka, anodikana kutanga aparidzirhwa ku madzinza ese.”—MARK. 13:10.
CINANGWA
Kuona kuti rudo rinotibetsera kudini kurumbwa teciparidzira.
1. Zvinyi zvatakafunda pa musangano we gore wa 2023?
PA MUSANGANO we gore ra 2023, a isusu takatambira mazwisisire mapsva anokosha, zviziiso zvinokosha zvinocokuita no basa re kuparidzira. Ngo muezaniso, pakabhuiwa kuti anhu anganani pamweni angatanga kuseenzera Djehovha mumasure me kutsakatiswa ke Bhabhironi Guru. Uye takaziyawo kuti kubvira mu mwedzi wa Novembro ya 2023, paizooneka cinjo ye mushobo yaizopasa aparidzi reratoriyo yawo ye basa re kuparidzira. Hino nge ndaa ye cinjo ii zvinoreya here kuti basa redu re kuparidzira aricakoshi uye aricadikani kuizwa nokukasika? Haiwa!
2. Ngei mazuwa paanonga ecidarika basa re kuparidzira recidikana kuizwa nokukasika? (Marko 13:10)
2 Mazuwa paanodarika, basa re kuparidzira rinotodikana kuizwa no kukasika maningi. Ngei? Ngokuti mazuwa ari kuenda. Onai zvakabhuiwa na Djesu ngezve basa re kuparidzira mu mazuwa e kupedzesera. (Erengai Marko 13:10.) Mu tsamba dza Mateu, Djesu akabhuya kuti masoko akanaka anodikana kuparidzirhwa “mugumo” usati waguma. (Mat. 24:14) Soko rokuti kupera rinoreya kupera zvacose ke nyika yakashata iri kuonererhwa ndi Sathani. Djehovha akagadza “zuwa no nguwa” ye zviitiko zvicaitika nokukasika. (Mat. 24:36; 25:13; ) Zuwa no zuwa tinonga tecikhwedera dhuze no mugumo. ( Zvii. 1:7Aro. 13:11) Dakara zuwa irona raguma isusu tinodikana kurumbwa teciparidzira.
3. Cinyi cinotiitisa kuti tiparidzire?
3 Patinorangarira ngezve basa re kuparidzira, tinodikana kudziita mubvunzo unokosha maningi. Ngei teciparidzira masoko akanaka? Nge mushobo uri nyore, isusu tinoparidzira nge ndaa ye rudo. Hino tinoita basa re kuparidzira ngekuti tinoda masoko akanaka, tinoda anhu uye maka-maka tinoda Djehovha ne zina rake. Zvino ngatione ciro cimwe na cimwe.
TINOPARIDZIRA NGEKUTI TINODA MASOKO AKANAKA
4. Zvinyi zvatinoita paya patinotambira masoka akanaka?
4 Imwimwi muciri kuedzurira zvamakazwa pamakapedzesera kutambira masoko akanaka—pamweni ngezve kubarhwa ke mwana mu mhuri kana kuti imwimwi makwanisa kugumira basa ramaida maningi? Pamweni imwimwi makapfara maningi mogara no cidaka-daka cekupanganidzira anyaukama enyu uye no shamwari dzenyu dzese. Kodi makazwawo zvimwezvo pamakazwa masoko akanaka maningi anocokuita no masoko e Umambo wa Mwari here?
5. Imwimwi makazwa kudini pemakafunda cokwadi ce Soko ra Mwari pekutanga? (Onaiwo mafoto.)
5 Rangarirai mushobo wamakazwa pamakatanga kuzwa cokwadi ngezve Soko ra Mwari. Imwimwi makafunda kuti Baba enyu e kudenga anomudai maningi uye anoda kuti muite dii re mhuri ye anamati ake. Imwimwi makafundawo kuti iyena akagondesa kupedza matambudziko ese uye munokwanisazve kuona anhu amunoda pa rumuko. Izvi i zviro zvinganani zvamakafunda. (Mark. 10:29, 30; Juau 5:28, 29; Aro. 8:38, 39; Zvak. 21:3, 4) Imwimwi makapfara maningi pamakafunda cokwadi ici. (Ruka 24:32) Imwimwi makafundira kuda zviro zvese izvi uye makada maningi kubvunzawo amweni nge zvazvo!—Ezanisai na Djeremiya 20:9.
Patakaziya cokwadi, isusu taida kubvunza anhu ese zviya zvataifunda! (Onai ndima 5)
6. Zvinyi zvamafunda no esperiensiya ya Ernest uye Rose?
6 Onai zvakaitika no hama imweni inozwi Ernest. b Iyona payainga ino makore 10 baba akhona akafa. Ernest unoti: “Inini ndaidzibvunzisa kuti: ‘Kodi baba angu aenda kudenga here? Kodi ndicazoaonazve here?’ Inini ndaizwira bibvu ku ana amweni ainga ano baba.” Ernest nguwa dzese waienda ku makuwa waigodama pamberi pe guwa ra baba ake uye otanga kunamata eciti: “Ndapota Mwari, ndiri kuda kuziya kuti baba angu aripo.” Mumasure me kudarika makore 17 baba ake aa afa, Ernest wakapaswa fundo ye Bhaibheri uye wakatenda ciriporipoco. Iyena wakapfara maningi paakaziya kuti akafa apana caanoziya uye kuti Bhaibheri rinofundisa kuti anhu akafa acamutswa. (Mup. 9:5, 10; Zvii. 24:15) Pakupedzesera, iyena wakazoziya mhinduro yo mubvunzo waaida kuziya maningi! Ernest waishamisika maningi no zvokwadi zvo Bhaibheri zvaaifunda. Mukadzi wake Rose, wakatangawo kufunda uye ecizwawo rudo rimwero ro masoko e Umambo. Mugore ra 1978 awona akabhabhatidzwa. Pedzepo akatanga kureketa no anyaukama, shamwari uye no anhu amweniwo ngezve zvokwadi zve Bhaibheri zvaakafunda. Mugumisiro ngewe kuti Ernest na Rose akabetsera anhu anodarika 70 kufunda Bhaibheri dakara pakubhabhatidzwa.
7. Cinyi cinoitika kana zvokwadi zvo Bhaibheri zvikabaya mwoyo wedu? (Ruka 6:45)
7 Kana isusu tikada zvokwadi zvo Bhaibheri, tinogara no cidaka-daka ce kubvundzawo amweni nge zvazvo. (Erengai Ruka 6:45.) Isusu tinozwawo zvakazwa afundi a Djesu, awo akati: “Atingasii kureketa zviro zvatakaona no zvatakazwa.” (Zvii. 4:20) Isusu tinoda maningi cokwadi zvekuti tinoda kureketa ngezvazvo kuno anhu akawanda.
ISUSU TINOPARIDZIRA NGEKUTI TINODA ANHU
8. Cinyi cinotiitisa kuti tiparidzire anhu masoko akanaka? (Onai bhokisi rakazwi “ Idai Anhu—Kuti Muite Afundi.”) (Onaiwo foto.)
8 Kuita hingana Djehovha no Mwana wake, isusu tinodawo anhu. (Zvie. 8:31; Juau 3:16) Isusu tinozwira usisi ku aya ‘asikazii Mwari’ uye ‘asina kariro.’ (Aef. 2:12) Anhu aya ari kutambudzika no zvinetso zve upenyu uye isusu tino zvaanoda kuti akwanise kurarama—masoko akanaka e Umambo wa Mwari. Usisi uye rudo ratinozwa kaari rinotiitisa kuti tide kuaparidzira masoko akanaka. Anhu paanozwa masoko akanaka, izvona zvinoabetsera kuti agare no kariro mune ramangwana, “kupfara zvino” uye kuzogara no upenyu usikaperi mu nyika ipsva.—1 Ti. 6:19.
Usisi uye rudo ratinozwa ku anhu rinotiitisa kuti tibhuye nawo ngezve masoko akanaka (Onai ndima 8)
9. Zvinyi zvatinoziisa ngezve ramangwana? (Ezekiyeri 33:7, 8)
9 Rudo ratinaro ku anhu rinotiitisa kuti tibvunze anhu kuti mugumo waa padhuze. (Erengai Ezekiyeri 33:7, 8.) Isusu tinozwira usisi anhu ese izvona zvinobatanidza anyaukama edu asikaseenzeri Djehovha. Akawanda awo anobatikana no zviro zve zuwa no zuwa uye aazii kuti cinyi ciri kukhwedera—“dambudziko guru risati rakamboitika kubvira pakasikwa nyika dakara zvino, arisati uye arizoitikizve.” (Mat. 24:21) Isusu tinoda kuti anhu aziye kuti I cinyi cicazoitika pa nguwa iyona yekutongwa—kunamata ke kunyepa kucatsakatiswa pedzepo zviro zvese zvakashata zve mu nyika ino zvicatsakatiswa pa Amagedhoni. (Zvak. 16:14, 16; 17:16, 17; 19:11, 19, 20) Isusu tinonamata kuti anhu akawanda azwe masoko edu uye oita cisananguro co kuseenzera Djehovha pamwepo na isusu. Asi zvakadini no anhu ese aya kutobatanidzawo anyaukama edu asikadi kutipurutana zvino?
10. Ngei zvecikosha kuti tiziise anhu nokukasika mazuwa ano?
10 Hingana zvatakaona mu fundo yadarika, zvinobvira kuti anhu acaona kutsakatiswa ke Bhabhironi Guru uye otanga kutenda muna Djehovha angaponeswa naye. Kana zviri izvona, zvinokosha maningi kuti tiziise anhu zvino zviro zvicazoitika mune ramangwana. Rangarirai zvinoteera: Anhu anondoedzurira zviya basi zvatakamboabvunza kare. (Ezanisai na Ezekiyeri 33:33.) Pamweni awona acaedzurira ngezve ngwadzo yatakamboabvunza uye oda kuseenzera Djehovha pamwepo na isusu nguwa isati yapera. Kuitawo hingana zvakaitika ku murindi we kadheya unogara ku Filipos, iyena wakatanga kupangidza kutenda ku masoko akanaka mumasure me kuitika “cigidhi-gidhi cakakura,” pamweni anhu asikadi kuzwa masoko akanaka nyamasi uno angakwanisa kucinja maitiro awo ngekuona kutsakatiswa ke Bhabhironi Guru kucaitika ciriporipoco.—Zvii. 16:25-34.
TINOPARIDZA NGEKUTI TINODA DJEHOVHA UYE ZINA RAKE
11. Tingapasa kudini Djehovha rureremedzo, rukudzo uye simba? (Zvakapangidzwa 4:11) (Onaiwo mafoto.)
11 Cikonzero cinokosha cinotiitisa kuti tiparidze ngece kuti tinoda Djehovha uye zina rake cena. Kuparidzira i mushobo we kukudza Mwari wedu watinoda. (Erengai Zvakapangidzwa 4:11.) Isusu tinotenderana no mwoyo wese kuti: Djehovha akasisira kukudzwa, kureremedzwa uye kusimbwa no ese akagondeka kaari. Tinopangidza kuti tinokudza uye kureremedza Djehova patinobhuya ku anhu zvikonzero zvinopangidza kuti iyena “akasika zviro zvese” uye kuti isusu tiripo ngekuti iyena akatipasa upenyu. Tinopasa Djehovha simba redu patinoseenzesa nguwa yedu uye zvese zvatinazvo kuti tibude mu basa re kuparidzira maererano no mugariro wedu. (Mat. 6:33; Ruka 13:24; Ako. 3:23) Nge masoko padoko, isusu tinoda kureketa ngezva Mwari watinoda, tinodawo kureketa ngezve zina rake ku amweni uye kuti iyena ndiani kamare.
Isusu tinopasa Djehovha simba redu patinoseenzesa nguwa yedu uye zvese zvatinazvo kuti tibude mu basa re kuparidzira pese pazvinobvira (Onai ndima 11)
12. Nge mushobo upi watinocenesa zina ra Djehovha mu basa re kuparidzira?
12 Rudo redu kuna Djehovha rinotiitisa kuti tide kucenesa zina rake. (Mat. 6:9) Izvona zvinoreya kuti isusu tinoda kubvunza anhu kuti zvese zvakabhuya Sathani ngezva Djehovha i manyepo. (Gen. 3:1-5; Djobo 2:4; Juau 8:44) Patinoparidza isusu tinoda kubvundza anhu ese akagadzirira kupurutana kuti Djehovha ndiani kamare. Isusu tinoda kuti ese aziye kuti wara guru ra Djehovha i rudo uye kuti anotonga no unatsi nguwa dzese uye Umambo wake ucapedza matambudziko ese, ucaunza runyararo no mupfaro ku anhu ese. (Pis. 37:10, 11, 29; 1 Juau 4:8) Patinoreketa cokwadi ngezva Djehovha, tinonga tecicenesa zina rake uye isusu tinopfara nge kuziya kuti tiri kuita zviya zvinoetserhwa no Apupuri a Djehovha. Kuita kudini?
13. Ngei kudainzwa kuti Apupuri a Djehovha i makomborero akakura maningi katiri? (Isaya 43:10-12)
13 Djehovha akatisanangura kuti tigare “Apupuri” ake. (Erengai Isaya 43:10-12.) Makore manganani adarika, tsamba ye Dare Rinotungamirira yakabhuya kuti: “Makomborero akagara na umwe na umwe wedu i kudainzwa kuti Mupupuri wa Djehovha.” c Ngei tingabhuya kudaro? Cimborangarirai ngezve muezaniso unoteera. Kudai imwimwi mecida kusanangura munhu kuti amupupurirei ku tribhunari, imwimwi maizosanangura munhu wamunogonda, munhu uno muhambiro wakanaka waizoita kuti zvaanobhuya zvigondwe. Ndizvona zvaakaizwa na Djehovha. Paakatisanangura kuti tigare Apupuri ake, iyena akapangidza kuti anonyasa kutiziya uye kuti anogonda kuti isusu ticabvunza anhu kuti iyena ndiye Mwari umwe basi we zvirokwazvo. Katiri makomborero akakura maningi kugara Apupuri a Mwari wedu. Ndiyo ndaa, tinoda kukhorovhera mikana iri yese kuti tibhuye no amweni ngezve zina ra Djehovha uye kupangidza kuti zviro zvese zvakashata zvinobhuiwa ngezvake i manyepo. Patinoita izvona, isusu tinopangidza kuti zvezvirokwazvo tiri Apupuri a Djehovha!—Pis. 83:18; Aro. 10:13-15.
TICARUMBWA TECIPARIDZIRA DAKARA KU MUGUMO
14. Zviro zvipi zvinokosha zvatiri kuetsera?
14 Tikarangarira zvicaitika mune ramangwana tinodzara no mupfaro! No makomborero a Djehovha, tinoetsera kuti anhu akawanda atendere cokwadi dambudziko guru risati ratanga. Isusu tinopfarawo ngo kuziya kuti kunyazi dambudziko guru parinonga reciitika, nguwa inoshupha maningi ku anhu, pamweni anhu akawanda angasanangura kubuda mu nyika ya Sathani uye obatana na isusu pakunamata Djehovha!—Zviit 13:48.
15-16. Isusu tinoda kurumbwa teciitei uye dakara rini?
15 Asi izvona zvisati zvaitika, isusu tinobasa rakakura maningi. Isusu tino makomborero ekubatikana mu basa rokuti aricazophindwizve—kuparidzira masoko akanaka e Umambo wa Mwari mu nyika yese. Pa nguwa imweyo, isusu tinodikana kurumbwa tecingwadza anhu, awona anodikana kuziya kuti mugumo we nyika ino yakashata waa padhuze. Pa nguwa iyona ye kutongwa ikaguma awona acazotendera kuti masoko ataiparidzira aibva kuna Djehovha.—Ezek. 38:23.
16 Hino, tese isusu tinoda kuitei? Isusu tinoda kurumbwa teciparidzira nge ndaa ye rudo ku masoko akanaka, ku anhu uye maka-maka kudarika zvese, rudo kuna Djehova no zina rake. Ngatirumbwe tecishingairira pa kuita basa re kuparidzira uye tizviite nokukasikasika dakara Djehovha abhuya kuti: “Zvakwana!”
NGOMA 54 “Iri Ndiro Gwanza”
a Musangano we gore wakaizwa mu zuwa 7 ya Otubro 2023, ku Nyumba ye Magungano ye Apupuri a Djehovha ku Newburgh, Nova York, ku EUA. Mumasure mazvo musangano uwona wakazobudiswa mu JW Broadcasting®—Dii 1 rakaduswa mu 1 ya Novembro 2023 uye Dii ro 2 ricaduswa mu Janero 2024.
b Onai dii rakazwi: “Cokwadi Cinocinja Upenyu—Ndakafarira Chaizvo Mhinduro Dzakajeka uye Dzine Musoro dzeBhaibheri,” mu Murindiri we 1 wa Fevrero 2015 mu ciShona.
c Onai Bhuku Regore reZvapupu zvaJehovha ra 2007, paji. 3 mu ciShona.