MUSORO WE KUFUNDA 21
NGOMA 107 Djehovha Muezaniso we Rudo
Tingagumira Kudini Waticawakana Naye
“Ndiani angakwanisa kuona mukadzi wakanaka? Iyena anokosha maningi kudarika mapuwe e korari.” —ZVIE. 31:10.
CINANGWA
Kuona zvokwadi zve Bhaibheri zvisikacinji zvingabetsera munhu kupsvaka we kuwakana naye uye kuonawo kuti amweni mu ungano angabetsera kudini madjaha asati awaka kana kuwakwa anonga ecida kupsvaka wekuwakana naye.
1-2. (a) Akristu asati awaka kana kuwaka anodikana kurangarirei asati atanga kunamorari? (b) Zvinyi zvinobatanidzwa pa “kunamorari”? (Onai pakazwi “Nyasai Kuzwisisa.”)
IMWIMWI muri kupsvaka wekuwakana naye here? Izvirokwazvo kuti mupfaro we munhu autsamiri pa kuwaka, kunyazi zvakadaro Akristu akawanda asati awaka kana kuwakwa madjaha kutobatanidzawo no aya aanothunga rakura anoda maningi kupsvaka munhu wekuwakana naye. Asi zviri pamheni kuti musati matanga kudanana no munhu imwimwi munodikana kugara makagadzirira panocokuita nokunamata, mundangariro uye kutobatanidzawo zvekurarama nazvo. a (1 Ako. 7:36) Kana imwimwi mukagara makagadzirira pamweni imwimwi mungagara no mucato unopfadza.
2 Asi cokwadi nge cekuti azviripi nyore kugumira munhu we kuwakana naye. (Zvie. 31:10) Uye kunyazi kana imwimwi mukagumira munhu, uye moda kunyasa kuziyana naye pamweni zvingashupha kuti mutange kunamorari naye. b Mu fundo ino, ticaona zviro zvingabetsera anhu asati awaka kuti angagumira kudini munhu waanoda uye wotanga kunamorari. Uye ticaonawo kuti aya ari mu ungano angabetsera kudini aya ari kuda kuwakana.
KUGUMIRA MUNHU WE KUWAKANA NAYE
3. Mukristu asati awaka kana kuwakwa unodikana kurangarirei asati atanga kupsvaka wekuwakana naye?
3 Kana imwimwi mecida kuwaka kana kuwakwa, zvinokosha maningi kuziya zvamuri kuda ku munhu umweni musati matanga kunamorari. c Kana mukatama kudaro, imwimwi mungasiya munhu waizogara mwamuna kana mukadzi wakanaka kamuri kana kutanga kunamorari no munhu usina zvikwaniriso kamuri. Zviri pamhene kuti uya wamucada kunamorari naye unodikana kugara Mukristu wakabhabhatidzwa. (1 Ako. 7:39) Asi izvona azvidi kureya kuti munhu wese wakabhabhatidzwa ucagara munhu unozvikwaniriso. Hino ndingadzibvunzisa kuti: ‘Zvinangwa zvipi zvandinazvo mu upenyu? Mawara api anokosha angakwanisa kugara no mwamuna kana mukadzi wangu? Zviro zvandinoetsera ku munhu umweni zvino musoro here?’
4. Anhu amweni anobatanidzei pa minamato yawo?
4 Kana imwimwi mecida kuwaka kana kuwakwa, zvezvirokwazvo makambonamata nge zvazvo. (Afi. 4:6) Zviri pamhene kuti Djehovha aamugondesii kuti acamupsvakirai munhu wekuwakana naye. Asi iyena anoziya mazwiro enyu uye zviro zvamunoda uye acamubetserai pamunonga mecipsvaka wekuwakana naye. Hino rumbwai mecibvunza Djehovha mazwiro enyu uye zvamunoda. (Pis. 62:8) Namatai mecikumbira mwoyo unononoka kutsamwa uye ungwaru. (Tig. 1:5) John, d hama imweni isati yawaka inogara ku Estados Unidos, yakabhuya zviro zvainobatanidza pa munamato wayo: “Inini ndinobvunza Djehovha mawara andinoda ku mukadzi wandinoda kuzowakana naye. Inini ndinonamata ndecipsvaka mikana yekugumira munhu wakanaka .Uye ndecikumbira kuti Djehovha andibetsere kusakurira mawara akanaka acandiita kuti ndigare mwamuna wakanaka.” Tanya, hanzvadzi imweni inogara ku Sri Lanka, inoti: “Inini pandinopsvaka munhu wekuwakana naye, ndinokumbira Djehovha kuti andibetsere kurumbwa ndakatendeka, ndecipfara uye ndino marangariro akanaka.” Kunyazi mecidikana kuetsera nguwa yakareba kudarika iya yamairangarira kuti mugumire munhu wamucawakana naye, Djehovha anogondesa kurumbwa ecimucengetai pa zviro zvinocokuita no ku nyama uye mu ndangariro.—Pis. 55:22.
5. Akristu asati awaka kana kuwakwa ano mikana ipi ye kugumira munhu unoda Djehovha? (1 Akorinti 15:58) (Onaiwo foto.)
5 Bhaibheri rinotikohomedzesa kuti tigare no “zvakawanda zvekuita mu basa ra Tenzi.” (Erengai 1 Akorinti 15:58.) Kana imwimwi mukarumbwa makabatikana mu basa ra Djehovha uye kupedza nguwa yakawanda muno hama no hanzvadzi dzimweni, pane kukhorovhera basi ushamwari wenyu, imwimwi mucagarawo no mukana wekuziya anhu amweni asati awaka kana kuwakwa ano zvinangwa zvimwezvo no zvenyu zve kuseenzera Djehovha. Uye pamunonga meciita zvese zvamunokwanisa kuti mupfadze Djehovha, imwimwi mucapfara maningi.
Kana imwimwi mukabatikana mu basa ra Djehovha uye mopedza nguwa no hama no hanzvadzi dzakasiyana-siyana zvingabvira kuti mungagumirawo munhu arikudawo kucata (Onai ndima 5)
6. Akristu anonga asati awaka kana kuwakwa anodikana kuedzurirei paanonga ecipsvaka we kuwakana naye?
6 Asi ngwarirai kuti musasiye kuti nyaya ii inyanye kukosha mu upenyu wenyu. (Afi. 1:10) Mupfaro autsamiri pakuti makawaka kana kuwakwa, asi, pa ushamwari wamunawo na Djehovha. (Mat. 5:3) Pamunonga musati mawaka kana kuwakwa, imwimwi muno mukana wakakura wekuita zviro zvakawanda pakuseenzera Djehovha. (1 Ako. 7:32, 33) Hino, seenzesai nguwa yenyu zvakanaka. Jessica hanzvadzi imweni inogara ku Estados Unido yakawakwa yaano makore anoda kukwana 40 inoti: “Pandainga ndisati ndawakwa, inini ndaikanda ndangariro dzangu pa basa re kuparidzira.”
PSVAKAI NGUWA YE KUNYASA KUONGORORA
7. Ngei zvakanaka maningi kunyasa kumboongora munhu musati mamubvunza kuti munomupfarira? (Zvierengo 13:16)
7 Hino kana imwimwi mukagumira munhu wamapfarira, munodikana kutomubvunza here? Bhaibheri rinobhuya kuti munhu akangwara anorangarira asati aita ciro. (Erengai Zvierengo 13:16.) Hino unonga uri ungwaru kana mukanyasa kuongorora nge cekure ke kacinguwa musati mamupangidzira kuti muri kumupfarira. Aschwin we ku Holanda unoti: “Mazwire e munhu angakwanisa kuuya asiwo angakwanisa kuenda nokukasika. Hino kana imwimwi mukakwanisa kunyasa kuongorora munhu, amuzotangi kunamorari musati manyasa kurangarira.” Kusiya izvona, pamunonga mecinyasa kuongorora munhu pamweni munoenda koona kuti amuna marangariro amwewo.
8. Munhu usati awaka ungaongorora kudini munhu umweni asati amubvunza kuti arikumupfarira? (Onaiwo foto.)
8 Hino, mungaongorora kudini munhu, iyena asikazvizii? Imwimwi mungakwanisa kuita izvona pamunonga muri pa musangano we ungano kana kuti pamunonga muno shamwari dzakawanda, pa mugariro uwona imwimwi mucagara no mukana we kuongorora unhu wake, mushobo waari panocokuita no kunamata, uye maitiro ake. Dzibvunzisei kuti: Shamwari dzake ngadzipi? Iyena unonyanya kucedza ngezvei? (Ruka 6:45) Zvinangwa zvedu zvakaezana here? Imwimwi mungacedza no mukuru we ungano yaanopindira kana kuti no Mukristu wakura pa kunamata anonyasa kumuziya zvakanaka. (Zvie. 20:18) Imwimwi mungabvunzisawo kuti iyena unonyasa kuziikanwa kudini uye ngaapi wawara ake akanaka. (Rute 2:11) Pamunonga meciongorora ngwarirai kuti musapedze nguwa yakawanda muri dhuze naye mecipsvaka kuziya zvamunoda. Musanyanye kukwarakwatisa zvakadzika ngezve upenyu wake, uye reremedzai mazwiro ake.
Musati mabvunza munhu kuti murikumuda, tangai mambomuongorora ngece kure (Onai mandima 7-8)
9. Munodikana kugara no rugondo rei, musati mabvunza munhu kuti munomuda?
9 Hino mungatora nguwa yakareba kudini meciongora munhu ngece kure musati mamubvunza kuti muri kumupfarira? Kana imwimwi mukareketa nokukasika zvicaita kuti munhuwo arangarire kuti imwimwi muri munhu unoreketa zviro asikazi kurangarira. (Zvie. 29:20) Asi, kana mukanonoka maningi zvingaita kuti munhuwo aranagrire kuti imwimwi amucizii camuri kuda makamaka kana munhuwo aakuziya kuti imwimwi muri kumuda. (Mup. 11:4) Musakanganwe kuti imwimwi amudikani kugara no rugondo rokuti mucacata no munhuwo musati maenda kooreketa naye. Asi munodikana kugara no rugondo rokuti imwimwi makagadzirira kucata uye kuti munhuwo uno mawara amuri kuda.
10. Cinyi camunodikana kuita kana mukaona kuti pano munhu ari kumudai asi imwimwi musikamudi?
10 Uye kana imwimwi mukaziya kuti pano munhu ari kumudai? Kana imwimwi musikamudi nyasai kudzekesa no maitiro enyu. Zvaizonga zvakashata kamuri kuita kuti munhuwo arangarire kuti imwimwi munomudawo nepoo imwimwi amuna mazwiro awona.—1 Ako. 10:24; Aef. 4:25.
11. Kana imwimwi mukabetsera munhu kuti aone munhu we kuwakana naye kana kunamorari, izviro zvipi zvamunodikana kurangarira?
11 Mu mbuto dzimweni, abereki kana anyaukama ano tsika ye kupangidza munhu ku nyaukama asati aaka kuti aakane naye. Mu mbuto dzimweni anyaukama kana shamwari anoedza kupsvaka munhu kuitira munhu asati awaka kana kuwakwa kuitira kuti manarumewo uye manakadziwo aziyane uye aone kuti anopindirana here kana kuti haiwa. Kana munhu akamukumbirai kuti mumupsvakire munhu psvakai zviro zvinopfarirhwa no munhu umwe na umwe uye zvaanoda. Mumasure mekuona munhu wakasisira edzai kuita zviri zvese kuti muziye ngezve unhu wake, mawara uye kupinda zvese ngezve kukura kake pakunamata. Ushamwari we padhuze na Djehovha unokosha maningi kudarika mare, kufunda uye maonerhwe aanoizwa. Asi musakanganwe kuti i hameyo kana hanzvadziyo isati yawaka kana kuwakwa icaita cisananguro cokuti icawakana no munhuwo kana kuti haiwa.—Aga. 6:5.
PAMUNOTANGA KUNAMORARI
12. Mungabvunza kudini munhu kuti muri kumuda?
12 Kana imwimwi mecida kunamorari no munhu mungamubvunzira kudini? e Imwimwi mungacedza no munhuwo hope no hope kana mu terefoni. Nyasai kudzekesa pamunonga mecireketa ngezve zviro zvamuri kuda (1 Ako. 14:9) Kana zvecidiikanwa, pasai munhuwo nguwa yekurangarira uye kudaira. (Zvie. 15:28) Uye kana munhuwo asikadi reremedzai cisananguro cake.
13. Cinyi camungaita kana munhu akamubvunzai kuti anomudai? (Akorosi 4:6)
13 Uye kana munhu akamubvunza kuti anomudai? Zvezvirokwazvo zvingaita kuti munhuwo wakagara no ushingi wakakura maningi kuti arekete na imwimwi, hino pangidzai unaki uye rureremedzo. (Erengai Akorosi 4:6.) Kana imwimwi mecida nguwa yekumborangarira kuti mucatenda here munhuwo kana kuti haiwa, mubvunzei asi edzai kumupasa mhinduro nokukasika. (Zvie. 13:12) Kana imwimwi musikamudi, mudjekeserei asi no unaki. Onai mushobo wakadaira hama imweni inozwi Hans inogara ku Áustria, ku hanzvadzi imweni yakareketa kuti yaimuda, iyona yakati: “Inini ndakadzekesa ngezve cisananguro cangu asi no rureremedzo. Inini ndakazviita nokukasika ngokuti ndainga ndisikadi kuti arangarire kuti ndinomuda. Nge ndaa yazvo, inini ndakatanga kungwarira mushobo wandaiita zviro pamberi pake mumasure mazvo.” Nge dii rimweni, kana imwimwi mecida kutanga kunamorari no munhu, bhuyai ngezve mazwiro enyu uye mushobo wamunoetsera kuti zvihambe. Zvamunoetsera zvingasiyana nozvinorangarirhwa no munhu umweni nge ndaa ye tsika uye no zvikonzero zvimweni.
AMWENI ANGATSIGIRA KUDINI HAMA KANA HANZVADZI DZISATI DZAWAKA KANA KUWAKWA?
14. Tingatsigira kudini aya asati awaka kana kuwakwa no zvatinoreketa?
14 Tese isusu tingatsigira kudini aya asati awaka kana kuwakwa uye anoda kuwakana? Umwe we mushobo ngewe kungwarira zviya zvatinoreketa. (Aef. 4:29) Isusu tingadzibvunzisa kuti: ‘Kodi ndino musambo we kusingirira aya arikuda kuwakana here? Pandinoona hama kana hanzvadzi isati yawakwa ecicedza kodi ndinorangarira kuti awona aakudana here?’ (1 Ti. 5:13) Kusiya izvona, atidi kuti hama no hanzvadzi dzirangarire kuti pano zviro zvakashata kaari ngekuti awona aasati awaka kana kuwakwa. Hans wambobhuiwa nge zvake unoti: “Hama dzimweni dzinobhuya kuti: ‘Ngei iwewe auwaki? Iwewe aucaripi mwana.’ Masoko awona anoita kuti hama dzisati dzawaka dzigare no mazwiro akashata uye dzizwe dzecibambidzirhwa kucata.” Zvakanaka maningi kupsvaka mukana we kusimba hama dzisati dzawaka kana kuwakwa!—1 Ate. 5:11.
15. (a) Maererano na Aroma 15:2 musati mapasa mazano munhu asati awaka kana kuwakwa, ngazvipi zvamunodikana kurangarira? (Onaiwo foto.) (b) Zvinyi zvamanyanya kupfarira pa vhidhiyo?
15 Zvakadini kana mukaona kuti hama no hanzvadzi dzaizopindirana uye dzaizogara kazado yakanaka? Bhaibheri rinobhuya kuti tireremedze mazwire e anhu amweni. (Erengai Aroma 15:2.) Akawanda asati acata aapfariri kana isusu tikaapsvakira anhu uye isusu tinodikana kureremedza izvona. (2 Ate. 3:11) Uye kuno amweni anotoda kamare kubetserhwa asi isusu atidikani kuzvipindira kana awona akatama kubhuya kuti isusu tiite izvona. f (Zvie. 3:27) Amweni asati acata anopfarira kupangidzwa munhu nge mushobo usikazi kurongwa. Lydia hanzvadzi imweni isati yawakwa ye ku Alemanha inoti: “Imwimwi mungabatanidza hama isati yawaka no hanzvadzi isati yawakwa pa cikwata cakakura ce anhu, imwimwi psvakai basi mukana wekuti hama kana hanzvadziyo anyanse kuziyana uye zvinoteera siyai kaari.”
Pa cikwata ce hama dzakawanda uya asikazi kuwaka ano mikana ye kuziya munhu waangazowakana naye (Onai ndima 15)
16. Hama no hanzvadzi dzisikazi kuwaka kana kuwakwa, dzinodikana kuedzurirei?
16 Tese isusu—pasinei nokuti tacata kana kuti atisati—tingakwanisa kugara no upenyu unopfadza uye unogutsa! (Pis. 128:1) Asi kana imwimwi muri kuda kuwaka kana kuwakwa, asi amusati magumira munhu wakhona rumbwai mecikanda ndangariro dzenyu pa basa ra Djehovha. Hanzvadzi imweni yo ku Macau inozwi Sin Yi inoti: “Kana mukada kuezanisa nguwa yamucagara no mukadzi wenyu kana mwamuna wenyu mu Paraizo, aingaezaniswi no nguwa yamucapedza musikazi kuwaka kana kuwakwa. Nyasai kukhorovhera nguwa ii.” Asi zvakadini kana imwimwi matomugumira munhu uye muri kuto namorari? Mu fundo inoteera, ticaona kuti ngazvipi zvamungaita kuti mugare no namoro icamubetserai kuita cisananguro no ungwaru.
NGOMA 137 Akadzi Akagondeka, Hanzvadzi dze Cikristu
a Kuti muone rubetso rekuona kuti makagadzirira here kuti mucate, onai artigu ino musoro unoti “Kudanana—Chikamu 1: Ndagadzirira Kudanana Nemumwe Munhu Here?” Mu ciShona.
b NYASAI KUZWISISA: Fundo ino no inoteera, icabhuya ngezve “kunamorari.” Ii ndi nguwa yokuti mwanarume no mwanakadzi anopongidzirana pamhene kuti arikupfarirana uye ari kuda kunyasa kuziyana no cinangwa cekuda kuziya kuti angacata here. Namoro iyona inorumbwa dakara awona aita cisananguro cokuti acarambana here kana kuti acacata.
c Mu ndima dzinoteera, ticanyanya kureketa ngezve namoro tecinyanya kuseenzesa muezaniso we hama asi mazano awona anoseenzawo ku hanzvadzi.
d Mazina amweni acinjwa.
e Mu tsika dzimweni, zvakadjairika kuti hama ndidzo dzinokhwederera hanzvadzi no cinangwa ce kunamorari. Asi hanzvadzi dzingakwanisawo kukhwederera hama no cinangwa icona. (Rute 3:1-13) Kuti muziye zvakawanda onai artigu ino musoro unoti: “Vechiduku Vanobvunza Kuti . . . Ndingamuudza Sei Manzwiro Andinoita?” mu Mukai! wa 22 ya Otubro ya 2004, mu ciShona.
f Onaiwo mu site jw.org vhidhiyo ino musoro unoti: Airhwira kuti Abudirire Pakutenda—Akristu Asikazi Kuwaka kana Kuwakwa.
