MUSORO WE KUFUNDA 19
NGOMA 22 Umambo Wotonga—Ngauuye!
Tinoziyei ngezve Mushobo Ucatonga Djehovha Anhu Mune Ramangwana?
“Djehovha . . . apana waanoda kuti atsakatiswe.”—2 PED. 3:9.
CINANGWA
Kubambisa rugondo redu rokuti kana Djehovha akatonga anhu, iyena acaita zvakanaka uye no unatsi.
1. Ngei tingabhuya kuti tiri kurarama mu nguwa inokosha?
ISUSU tiri kurarama mu nguwa inokosha maningi! Uphorofita we Bhaibheri uri kudzadzika pamberi pedu zuwa no zuwa. Ngo muezaniso, isusu tiri kuona “mambo we kakutsi” na “mambo we katemaidumba” eciita zviri zvese kuti akwanise kutonga nyika. (Dha. 11:40, masoko e pasi) Tiri kuonawo masoko akanaka e Umambo wa Mwari eciparidzwa nge mushobo unoshamisa watisati takamboona, uye mamirionji e anhu ari kusanangura kuseenzera Djehovha. (Isa. 60:22; Mat. 24:14) Uye tiri kutambira zvokurhya zve kumwiya “pa nguwa yakasisira.”—Mat. 24:45-47.
2. Tingagara no rugondo rei uye tinodikana kuzwisisei?
2 Djehovha anotibetsera kuzwisisa zviro zvinokosha zviri kuda kuitika mbai mbai pano. (Zvie. 4:18; Dha. 2:28) Isusu tingagara no rugondo rokuti dambudziko guru paricatanga, isusu tinonga taakuziya kuti zvinyi zvaticaita kuti tirumbwe takatendeka kuna Djehovha uye takabatana. Asi, zvinokosha kuzwisisa kuti zvinganani zvo mberi isusu atisati taakuzviziya. Mu fundo ino, ticaona cinjo dzatakaita mumazwisisiro edu uye pedzepo ticaona zviro zvataakuziya zvicaitika mune ramangwana uye mushobo wazvicaizwa no Baba edu e kudenga.
ZVATISIKAZII
3. Kareko taibhuyei ngezve kuponeswa ke anhu mumasure me kutanga ke dambudziko guru uye ngei?
3 Kareko taibhuya kuti mumasure mekuti dambudziko guru ratanga, apanazve waizogara no mukana we kusanagura kuseenzera Djehovha uye kupona pa Amagedhoni. Isusu takaguma pakurangarira kudaro ngokuti tairangarira kuti zvakaitika pa Ndambi Huru zvaiimirira zviya kamare zvaizoitika mune ramangwana. Ngo muezaniso, isusu tairangarira kuti kuitawo hingana anhu ainga asikacadikani kupinda mu areka mumasure mekuti Djehovha “afunga musuwo,” apanazve waizoseenzera Djehovha uye kuponeswa mumasure mekuti dambudziko guru ratanga.—Mat. 24:37-39.
4. Ngei isusu aticabhuizve kuti zviro zvakaitika mu nguwa ya Nowa zvaizodzadzika mune ramangwana?
4 Zvaizonga zvakanaka here kubhuya kuti ciro cimwe na cimwe cakaitika pa Ndambi Huru cinoimirira zviro zvicaitika mune ramangwana? Mhinduro ngeye kuti haiwa. Ngei? Ngekuti Bhaibheri arifundisi izvona. a Izvirokwazvo kuti Djesu akaezanisa “mazuwa a Nowa” no nguwa ye kuoneka kake, asi iyena aazi kubhuya kuti zviro zvakaitika mu mazuwa a Nowa, zvaizodzadzika kakakura mune ramangwana. Asi isusu tingafunda zvakawanda no ngano ya Nowa uye no zvakaitika pa Ndambi.
5. (a) Nowa wakapangidza kudini kutenda? (Ahebheru 11:7; 1 Pedru 3:20) (b) Kuparidza katinoita mazuwa ano kakaezana kudini no kuparidza kakaita Nowa?
5 Nowa paakazwa ngezve ngwadzo ya Djehovha, iyena wakapangidza kuti wainga ano kutenda uye wakatanga kuwaka areka. (Erengai Ahebheru 11:7; 1 Pedru 3:20.) Nge mushobo umwewo, anhu paanozwa masoko akanaka e Umambo anodikana kuseenzesa zviya zvaakafunda. (Zvii. 3:17-20) Pedru wakadainza Nowa kuti “muparidzi we unatsi.” (2 Ped. 2:5) Asi, hingana zvatakaona mu fundo yakadarika, isusu atinyasi kuzviziya kuti Nowa wakaparidzira anhu ese e mu nguwa yake. Nyamasi uno, isusu tirikuita basa rokuparidzira mu nyika yese uye tinoita izvona pese pazvinobvira. Asi azvinei nokuti taedza kangana, isusu atikwanisi kuparidzira anhu ese mugumo usati waguma. Ngei?
6-7. Ngei tingabhuya kuti isusu atizokwanisi kuparidzira anhu ese mugumo usati waguma?
6 Rangarirai zvakaizwa na Djesu ngezve basa re kuparidzira. Iyena wakati masoko akanaka acaparidzwa “mu nyika yese inogarhwa, kuti anhu ese aazwe.” (Mat. 24:14) Nyamasi uno kudarika kare uphorofita uu urikudzadzika. Masoko e Umambo anooneka mu mireketero inodarika 1000 uye peciseenzeswa saiti jw.org, anhu akawanda mu nyika angafunda ngezve Umamabo wa Mwari.
7 Asi Djesu akabvunza afundi ake kuti aona ainga asikazohambi “mu mathaundi ese” kana kuti awona ainga asikazokwanisi kuparidzira anhu ese mugumo usati waguma. (Mat. 10:23; 25:31-33) Uye masoko a Djesu anoseenzawo mu mazuwa edu. Mamiriyonji e anhu anogara mu mbuto yokuti isusu atikwanisi kuparidzira takasudzunuka. Kusiya izvona, ana akawanda anobarhwa pa museswa umwe na umwe. Isusu tinoita zvese zvatinokwanisa kuti tigumire “anhu e madzinza ese uye mireketero” uye kuparidza masoko akanaka kaari. (Zvak. 14:6) Asi cokwadi nge cekuti isusu atizokwanisi kuparidzira anhu ese mu nyika mugumo usati waguma.
8. Mibvunzo dzipi dzingamuka dzekuti Djehovha acatonga kudini anhu mune ramangwana? (Onaiwo mafoto.)
8 Asi pano mubvunzo unomuka: Zvakadini no anhu aya ekuti pamweni aazozwi masoko akanaka dambudziko guru risati ratanga? Djehovha no Mwana wake waakapasa basa rokutonga acaitei nawo? (Juau 5:19, 22, 27; Zvii. 17:31) Tsamba yakawakirhwa fundo ino inobhuya kuti Djehovha “apana waanoda kuti atsakatiswe.” Kusiya izvona “anoda kuti anhu ese acinyuke.” (2 Ped. 3:9; 1 Ti. 2:4) Tinodinaka kuzwisisa kuti Djehovha aasati atipanganidzira mushobo waacatonga anhu asikazi kugara no mukana we kuzwa masoko akanaka. Zviri pamhene kuti Djehovha aabambidzirhwi kutipanganidzira zvaakaita uye zvaacaita.
Djehovha acaitei no anhu aya asikazi kugara no mukana we kuzwa masoko akanaka dambudziko guru risati ratanga? (Onai ndima 8) c
9. Djehovha acaitei mune ramangwana?
9 Eciseenzesa Bhaibheri, Djehovha anotibvunza zviro zvinganani zvaacaita. Ngo muezaniso, isusu taerenga kuti Djehovha acamutsa anhu “asiripi anatsi” kana kuti anhu aya asikazi kugara no mukana we kuzwa masoko akanaka uye kucinja upenyu. (Zvii. 24:15; Ruka 23:42, 43) Uye izvona zvinomutsa mubvunzo umweni unokosha.
10. Mibvunzo dzipi dzimweni pamweni dzingamuka?
10 Kodi anhu ese aya acafa pa nguwa ye dambudziko guru acatsakatiswa pasina mukana we kumutswa? Bhaibheri rinosiya pamhene kuti anhu ese aya anophikisa anhu a Djehovha ndiwo acatsakatiswa pa hondo ye Amagedhoni uye aazomutswi. (2 Ate. 1:6-10) Asi anhu anganani pa nguwa ye dambudziko guru pamweni angafa no zvikonzero zvimweni, ngo muezaniso, kurhwara, thunga, tsawana kana kutouraiwa no munhu umweni. Pamugariro uwona zvinyi zvicaitika kaari? (Mup. 9:11; Zak. 14:13) Kodi anhu awona acagara ku dii re anhu “asiripi anatsi” acamutswa mu nyika ipsva? Isusu atizii mhinduro.
ZVATINOZIYA
11. Anhu acatongwa pa Amagedhoni maererano nei?
11 Isusu tinoziya zviro zvinganani zvicaitika mune ramangwana. Ngo muezaniso, tinozviziya kuti pa Amagedhoni anhu acatongwa maererano no mushobo waakabata hama dza Kristu. (Mat. 25:40) Aya acatsigira akadzodzwa uye Kristu acatongwa hinga mabira. Asi tinoziyawo kuti akadzodzwa anganani anonga aciri pa nyika mumasure mekutanga ke dambudziko guru uye acatorhwa kuti aende kudenga Amagedhoni yooda kutanga. Ngekuti akadzodzwa anganani anonga aciri pa nyika, zvinobvira kuti anhu ano mwoyo unoda, angagara no mukana we kuatsigira uye kutsigira basa raanoita. (Mat. 25:31, 32; Zvak. 12:17) Ngei zviro izvona zvecikosha?
12-13. Anhu amweni angaitei mumasure me kuona kutsakatiswa ke “Bhabhironi Guru”? (Onaiwo mafoto.)
12 Mumasure mekuti dambudziko guru ratanga, zvingaita kuti anhu anganani anonga awona kutsakatiswa ke “Bhabhironi Guru” angaedzurira kuti Apupuri a Djehovha ke makore akawanda akabhuya kuti izvi waizoitika. Kodi anhu anganani awona angatanga kugara no kutenda muna Djehovha here?—Zvak. 17:5; Ezek. 33:33.
13 Kana izvi zvikaitika zvaizotiedzurira zvakaitika ku Edjipitu mu nguwa ya Mozesi. Edzurirai kuti anhu akawanda akaperekedza Aisraeri paakabuda mu Edjipitu. Anhu anganani pamweni “akatanga kugara no kutenda” muna Djehovha paakaona ngwadzo dza Mozesi ngezve Matambudziko Gumi eciitika. (Eki. 12:38) Hino kana zviro zvakaita hingana izvi zvikaitika mumasure mekuti Bhabhironi Guru ratsakatiswa, tinonyangadzwa here kana kuti tinoona kuti azvina unatsi anhu amweni kubatana na isusu mugumo usati waguma? Izvirokwazvo kuti haiwa! Isusu tinoda kuita hinga Baba edu e kudenga “Mwari ane usisi, anononoka kutsamwa uye akadzara no rudo risikacinji no cokwadi.” b—Eki. 34:6.
Anhu amweni acaona kutsakatiswa ke “Bhabhironi Guru,” acaedzurira kuti Apupuri a Djehovha aireketa nge zvazvo kubvira kare (Onai mandima 12-13) d
14-15. Kodi ramangwana risikaperi re munhu rinotsamira here pa zuwa raakafa kana kuti kaanogara? Panganidzai (Pisarema 33:4, 5)
14 Nguwa dzimweni tinozwa hama dzimweni dzecirekata ngezve anyaukama awo eciti: “Zvaizonga zvakanaka kuti iyena afe dambudziko guru risati ratanga ngokuti ucazogara no mukana we kuzomutswa.” Angabhuya izvona no cinangwa cakanaka. Asi ramangwana risikaperi re munhu aritsamiri pa zuwa raacafa. Djehovha ndi Mutongi akakwana—Zvisananguro zvake nguwa dzese zvakakwana uye ngezve unatsi. (Erengai Pisarema 33:4, 5.) Tingagara no rugondo rokuti “Mutongi we nyika yese” nguwa dzese anoita zvakanaka.—Gen. 18:25.
15 Hino tingagara no rugondo rokuti ramangwana risikaperi re munhu aritsamiri kaanogara. Djehovha aazombotongi mamiriyonji e anhu uye owati i “mbudzi” ngokuti anogara ku mbuto yokuti masoko akanaka aazi kumboparidzirhwa ikona. (Mat. 25:46) Mutongi munatsi we nyika yese anorangarira maningi anhu awona. Kana isusu tikarangarira maningi anhu awona kuzoti kei mutongi we nyika yese. Isusu atikwanisi kuziya kuti Djehovha acabatana kudini no mugariro uwona pa dambudziko guru. Pamweni anhu anganani acino mukana we kufunda ngezva Djehovha, kutenda maari, uye pamweni anhu anganani akhona mumasure me kuona zvicaitika pa dambudziko guru, angasanangura kugara ku dii ra Djehovha kana iyena akacenesa zina rake mu nyika yese.—Ezek. 38:16.
Mumasure mekutanga ke dambudziko guru, . . . kodi anhu amweni acacinja maitiro awo here?
16. Tinoziyei ngezva Djehovha? (Onaiwo mifanikiso.)
16 Paciseenzeswa fundo ye Bhaibheri, isusu takafunda kuti munhu umwe na umwe unokosha maningi kuna Djehovha. Iyena akapasa upenyu we Mwana wake kamare kuitira kuti tese isusu tigare no mukana we kurarama nokusikaperi. (Juau 3:16) Tese isusu tinonyasa kuzwa rudo rakakura ra Djehovha katiri. (Isa. 49:15) Iyena anoziya zina re umwe na umwe wedu. Iyena anonyasa kutiziya zvekuti kunyazi tikafa anotimutsa hinga zvatanga takaita kamare! (Mat. 10:29-31) Isusu tinodikana kugara no rugondo rese rokuti Baba edu ano rudo e kudenga acatonga munhu umwe na umwe no unatsi, no ungwaru uye no usisi.—Tig. 2:13.
Tingagara no rugondo rokuti Djehovha acatonga umwe na umwe wedu no unatsi, no ungwaru uye usisi (Onai ndima 16)
17. Ticaonei mu fundo inoteera?
17 Zvino zvatagara no mazwisisiro mapsva aya, tinozwisisa kuti basa redu re kuparidzira rinokosha maningi kudarika kare. Ngei tecibhuya kudaro? Uye cinyi cinoita kuti tirumbwe tecipeta masimba pa basa re kuparidzira masoko akanaka? Fundo inoteera icadaira mibvunzo idzi.
NGOMA 76 Munozwa Kudini ne Basa Iri?
a Kuti muziye zvakawanda ngezve kuti ngei pakaizwa cinjo ii, onai fundo yakazwi “Iyi Ndiyo Nzira Yamakabvumira,” mu Murindiri wa 15 ya marso ya 2015, mapaji. 7-11 mu ciShona.
b Mumasure mekuti Bhabhironi Guru ratsakatiswa, aseenzi ese a Djehovha acaedzwa paacarhwisa na Gogi we Magogi. Uye aya acabatana no aseenzi a Mwari mumasure me kutsakatiswa ke Bhabhironi Guru acaedzwawo.
c KUPANGANIDZWA KE FOTO YE: Zvikonzero zvitatu zvecipangidza zviro zvinoita kuti anhu amweni asagumirhwe no masoko akanaka: (1) Mwanakadzi ecigara ku mbuto yekuti akutenderhwi kucinja gereja, (2) Kazado inogara ku mbuto yekuti kuno ngozi yekufunda cokwadi uye (3) Mwanarume unogara ku mbuto yekuti kunoshupha kugumika.
d KUPANGANIDZWA KE MUFANIKISO: Mudjaha wakasiya kuseenzera Djehovha, unoedzurira zviro zvaakafunda ngezve kutsakatiswa ke “Bhabhironi Guru.” Iyena unosanangura kuhwirira kuna Djehovha uye kupsvaka rubetso re abereki ake. Kana zviro zvakaita hinga izvi zvikaitika, tinoda kugara hinga Djehovha Baba edu ano usisi uye rudo, uye ticapfara no aya akasanangura kuhwirira kuna Djehovha.
