Haiwa, nge kuti apana ngano kana Bhaibheri rinobhuya izvona.

Mushobo unoerengwa tsamba ii mu ma Bhaibheri majinji zvakaita kuti anhu amweni arangarire kuti rubhabhatidzo re mu mvura nge mu zina re akafa raiizwa mu mazuwa a Pauro. Nge muezaniso: “Kana pasina rumuko, cinyi cicaitika ku anhu aya anobhabhatidzirhwa akafa?”—Nova Versão Internacional.

Kunyazi zvakadaro, onai zvakareketwa nge afundi airi e Bhaibheri. Dr.  Gregory Lockwood akati marangariro aya ekuti anhu aibhabhatidzwa mu “zina re munhu wakafa” wainga “utori mushobo wekutobhabhatidzwa, kunyazi zvikarangarirhwa kudini hako, azviezani no zvinoreketwa nge Bhaibheri.” Nge mushobo umwewo, mufundisi Gordon D. Fee wakatara kuti: “Izvi azvitomboreketwi mu Novo Testamento uye kuti apana upupuri we kuti izvi zvakamboizwa no aKristu ekutanga kana kuti no magereja amweniwo hawo akaumbwa mumasure mekufa ke aphostori.”

Bhaibheri rinobhuya kuti ateeri a Djesu aidikana “kuita afundi e anhu e madzinza ese, eciabhabhatidza . . . , eciafundisa kucengeta zviro zvese” zvaakaafundisa kuti aite. (Mt. 28:19, 20) Munhu asati agara mufundi wakabhabhatidzwa, waidikana kufundira kutenda uye kupurutana Djehovha no Mwana wake. Munhu wainga atofa muguwa waisazokwanisapi kuita izvi kunyazi mu Kristu utori kurarama aakwanisi kumuitira izvi.—Mup. 9:5, 10; Ju. 4:1; 1Ako. 1:14-16.

Pauro waireyei?

Anhu amweni e ku Korinti airambira kuti akafa acazomutswa. (1Ako. 15:12) Pauro wakaapangidza kuti izvi zvainga zvisirizvopi. Iyena wakareketa kuti ‘zuwa no zuwa iyena wainga akaringisana no rufu.’ Honde, iyena wainga aciri mupenyu. Asi, kunyazi ecisongana no ngozi, iyena wainga ano rugondo rekuti kana angafa, waizomutswa hingana mwiya uno simba, hingana zvakaitika na Djesu.—1Ako. 15:30-32, 42-44.

AKristu e ku Korinti aidikana kuziya kuti kugara muKristu wakadzodzwa kunoreya kuti aizosongana no miyedzo ye zuwa no zuwa uye kuti aizofa asati amutswa. “Kubhabhatidzwa muna Kristu Djesu” kaibatanidza “kubhabhatidzwa mu rufu rake.” (Aro. 6:3) Rubhabhatidzo rake rokufanikidzira raizokonzera rufu rake uye kumutsirhwa kuenda kudenga.

Kaa kadarika makore mairi Djesu aa abhabhatidzwa mumvura, akabvunza aphostori ake airi kuti: “Norubhabhatidzo randiri kubhabhatidzwa naro, mucabhabhatidzwawo.” (Mk. 10:38, 39) Djesu ainga asikarei kubhabhatidzwa mu nvhura. Ayena aireya kuti kurarama kake ke kurumbwa akaperera kaizomuuraisa. Pauro wakatara kuti akadzodzwa ‘aizoshupika pamwepo [kuitira kuti] azokudzwa pamwepo.’ (Aro. 8:16, 17; 2Ako. 4:17) Hino awona aidikanawo kuti afe kuitira kuti amutsirhwewo upenyu kudenga.

Ngekudaro masoko a Pauro angarangarirhwa nge mushobo wakanaka mu kuti: “Kana zvisiripi izvona, aya ari kubhabhatidzwa no cinangwa ce kufa acazoitei? Kana anhu akafa asikazomutswi, ngei acirikubhabhatidzwa no cinangwa cekugara akadaro?”