MUSORO WE KUFUNDA 46
NGOMA 49 Kupfadza Mwoyo wa Djehovha
Hama—Muri Kupeta Masimba Kuti Mugare Mubati Anoseenzera Here?
“Kupasa kuno mupfaro kudarika kutambira.”—ZVII. 20:35.
CINANGWA
Kukohomedzesa hama dzakabhabhatidzwa kuti dzipete masimba kuti dzigare abati anoseenzera.
1. Muphostori Pauro wairangarirei ngezve abati anoseenzera?
ABATI anoseenzera anopasa rubetso rakakura maningi ku ungano. Muphostori Pauro waireremedza maningi anarume aya akagondeka. Cimwe ce cipangidzo icona nge cekuti paakatarira tsamba ku Akristu e ku Firipi, iyena wakacungamidza abati anoseenzera pamwepo no akuru e ungano.—Afi. 1:1.
2. Hama inozwi Luis inozwa kudini nge kugara mubati anoseenzera?
2 Hama dzakawanda dzakabhabhatidzwa, uye dze mathunga akasiyana dzinozwa mupfaro padzinoseenza mu ungano hinga abati anoseenzera. Ngo muezaniso, Devan ainga ano makore 18 paakagadzwa hinga mubati anoseenzera. Asi hama imweni inodainzwa kuti Luis yakagadzwa ino makore anodarika 50. Iyona inopanganidza mu cigwagwa mazwiro e abati anoseenzera akawanda, payakati: “Kandiri, i makomborero akakura maningi kuseenza mu ungano hinga mubati anoseenzera maka-maka pandinorangrira ngezve rudo randinopangidzirhwa no hama mu ungano!”
3. Ticaonei mu fundo ino?
3 Kana imwimwi muri hama yakabhabhatidzwa uye amusati magara mubati anoseenzera, mungagara no cinangwa ici here? Cinyi cingamubetserai kuti muite izvona? Uye zvinyi zvinobhuiwa no Bhaibheri zvamunodikana kuita kuti mugare mubati anoseenzera? Mu fundo ino, ticaona mhinduro dze mibvunzo idzi. Asi ticatanga nge kuona mabasa anoizwa no mubati anoseenzera.
ZVINYI ZVINOIZWA NO ABATI ANOSEENZERA?
4. Mabasa api anoizwa no abati anoseenzera? (Onaiwo foto.)
4 Abati amweni anoseenzera anoonerera ndima uye mabhuku atinoseenzesa mu basa re kuparidzira. Amweni anobetsera pa kuceneswa uye pa kugadziriswa ke Nyumba dze Umambo. Awonawo angagadzwa kuti agare arindiri uye kuonerera zvinoseenzeswa pa maaudhiyo no mavhidhiyo pa musangano. Mabasa akawanda anoizwa no abati anoseenzera, ngee zviro zvinobetsera ungano, asi kupinda zvese, hama idzi i anarume akakura pakunamata anoda Djehovha uye anorarama maererano no zviya zvinofundiswa no Bhaibheri. Awona ano rudo rakakura maningi ku hama no hanzvadzi mu ungano. (Mat. 22:37-39) Hama yakabhabhatidzwa, inodikana kuitei kuti igare mubati anoseenzera?
Abati anoseenzera anoteedzera Djesu nge kudzipira kuti aseenzere amweni (Onai ndima 4)
5. Cinyi cicamubetserai kuti mugare no makomborero e kugara mubati anoseenzera?
5 Bhaibheri rinopangidza zviro zvinodikana kuizwa no hama kuti igare mubati anoseenzera. (1 Ti. 3:8-10, 12, 13) Zvakadini kamuri kufunda zviro izvi uye kupeta masimba kuti muzviseenzese? Izvi zvicamubetserai kuti mugare no makomborero awona. Asi munodikana kutanga manyasa kurangarira cikonzero ciri kuita kuti imwimwi mude kugara mubati anoseenzera.
NGEI IMWIMWI MECIDA KUGARA MUBATI ANOSEENZERA?
6. Cinyi cinodikana kumuitisai kuti muite ciro cipi haco pa kubetsera anhu amweni? (Mateu 20:28; onaiwo ye pa kapa.)
6 Djesu Kristu ndi muezaniso wakanaka, uye zvese zvaaiita zvaitungamirirhwa nge rudo—rudo kuna Djehovha uye ku anhu. Rudo rakaita kuti Djesu apete masimba ari ese kuti abetsere anhu amweni uye aite mabasa amweni ekudzidodosa. (Erengai Mateu 20:28; Juau 13:5, 14, 15) Kana zvese zvamunoita zvikatungamirirhwa nge rudo, Djehovha acamukomborerai uye acamubetserai kuti mudzadzise cinangwa cenyu cekugara mubati anoseenzera.—1 Ako. 16:14; 1 Ped. 5:5.
Nge kusuka mirenje dze aphostori, Djesu akafundisa ngo muezaniso kuti awona anodikana kudzidodosa uye kuseenzera amweni pane kupsvaka mbiri (Onai ndima 6)
7. Ngei tisikadikani kudzikudza uye kudisisa maningi cigaro?
7 Mu nyika, akawanda anoshamisika nge anhu akakwirira uye anoedza kuita kuti aonekwe. Asi anhu a Djehovha akasiyana no anhu aya. Hama inoseenzera anhu nge rudo, kuitawo hingana Djesu, aipsvaki kukudzwa, masimba kana kuoneka hingana inokosha kudarika amweni. Kana mwanarume anoedza kuita kuti aonekwe akagadzwa hinga mubati anoseenzera, zviri pamhene kuti pamweni waizoramba kuita mabasa manganani ekudzidodosa anodiikanwa pa kucengetedza mabira anokosha a Djehovha. Pamweni iyena anodziona kuti anokosha maningi uye azviiti kuita mabasa awona. (Juau 10:12) Djehovha aazombokomboreri anhu anoita zviro nge kudzikudza kana kuti anoda kuoneka hingana anokosha.—1 Ako. 10:24, 33; 13:4, 5.
8. Djesu akapasa mazano api ku aphostori ake 12?
8 Pa migariro imweni, kunyazi shamwari dza Djesu dze padhuze dzakaedza kuda kugara no ubaba no cinangwa cakashata. Onai nyaya yo aphostori airi a Djesu—Tiyago na Juau. Awona akakumbira Djesu kuti agare pa mbuto inokosha maningi mu Umambo. Djesu aazi kuasimba nge cido ici ce kuda kugara anokosha kudarika amweni, pane kudaro iyena akati ku aphostori ake 12: “Uya anoda kugara mukuru pakati penyu anodikana kugara museenzi wenyu, uye uya anoda kugara wekutanga pakati penyu ngaagare muranda wenyu.” (Mark. 10:35-37, 43, 44) Kana hama ikaedza kugara mubati anoseenzera no cinangwa cakanaka ce kuseenzera amweni, iyona inogara makomborero mu ungano.—1 Ate. 2:8.
MUNGATUNHUDZIRA KUDINI CIDO CENYU CE KUDA KUGARA MUBATI ANOSEENZERA?
9. Mungatunhudzira kudini cido cenyu ce kuseenzera amweni?
9 Apana mubvunzo kuti imwimwi munoda Djehovha uye munoda kuseenzera amweni. Kunyazi zvakadaro, pamweni imwimwi mungatama kugara no cido ce kuda kugara mubati anoseenzera, ngokuti munoziya kuti izvi zvinoda kuseenza no simba. Hino, mungatunhudzira kudini cido cenyu ce kuda kuseenzera amweni? Umwe we mushobo we kuita izvona, ngewe kurangarira mupfaro watinogara nawo paya patinobetsera hama no hanzvadzi dzedu. Djesu akati: “Kupasa kuno mupfaro kudarika kutambira.” (Zvii. 20:35) Upenyu wa Djesu i muezaniso wazvo. Djesu ainga ano mupfaro we zvirokwazvo ngokuti aiseenzera amweni uye izvona zvicaitikawo na imwimwi.
10. Cinyi cinopangidza kuti Djesu aipfara nge kuseenzera amweni? (Marko 6:31-34)
10 Onai muezaniso wekuti Djesu aipangidza kupfara nge kuseenzera amweni. (Erengai Marko 6:31-34.) Pa mugariro umweni, Djesu no aphostori ake ainga akaremba maningi. Awona akaenda ku mbuto iri kure yakanyararira no cinangwa ce kuda kuzorora. Asi anhu akawanda akatanga kugumeyo awona asati aguma, ecietsera Djesu. Awona aida kuzwa fundiso dza Djesu. Djesu angadai abhuya kuti haiwa, ngokuti aida kuzorora. Zvezvirokwazvo, iyena no aphostori “ainga asina mukana kunyazi we kurhya.” Kana kuti, Djesu angadai akaafundisa zvokwadi zviiri, pedzepo oabvunza kuti aende. Asi Djesu aida maningi anhu, ndiyo ndaa iyena “akatanga kuafundisa zviro zvakawanda.” Uye iyena akarumbwa eciita izvona dakara “kaakudoka.” (Mark. 6:35) Djesu aiita izvona haiwa nge kubambidzirhwa, asi ngokuti “aizwira usisi” anhu. Iyena aida kuafundisa ngokuti aiada. Kuita izvona, zvaimusiya akapfara.
11. Djesu akaiteizve kuti abetsere anhu aya? (Onaiwo mufanikiso.)
11 Pane kuafundisa zviro zvakawanda, Djesu akaseenzerawo anhu aya nge mushobo umweni. Iyena akabetserawo anhu aya pa zviro zve kunyama. Pa nguwa iyona, iyena akaita cishamiso ce kuita kuti pau no howe zviwande uye akaseenzesa afundi ake kuti akowanise zvekurhya izvi ku anhu. (Mark. 6:41) Nge mushobo uwona, Djesu akafundisa afundi ake kuseenzera amweni. Iyena akapangidza kuti zvinokosha kubetserawo amweni nge zviito, uye ndizvo kamare zvinodikana kuizwa no abati anoseenzera. Cimborangaridzai mupfaro wakazwa aphostori nge kubetsera Djesu pa kukowanisa zvekurhya zviya dakara “ese arhya oguta”! (Mark. 6:42) Apa andipopi basi paakakanda zvido zve amweni pa mbuto yekutanga. Iyena akaita izvona ke upenyu wake wese paainga ari pa nyika pano. (Mat. 4:23; 8:16) Kufundisa amweni uye kuita zviro zvinoonerhwa pasi kuti aabetsere, zvaimupasa mupfaro mukuru. Uye zvezvirokwazvo, imwimwi mucazwawo mupfaro mukuru kana mukakanda zvido zve amweni pa mbuto yekutanga uye mopeta masimba kuti mugare mubati anoseenzera.
Rudo renyu kuna Djehovha uye cido cenyu ce kuseenza, zvicamuitisai kuti muite zvese zvamunokwanisa kuti mubetsere amweni mu unango (Onai ndima 11) a
12. Ngei pasina munhu ano cikonzero cekubhuya kuti aakoshi ku ungano?
12 Anhu anganani anorangarira kuti aana zvikwaniriso zvinokosha kuti aseenzeswe mu ungano. Kana imwimwi mecizwa kudaro, musaore mwoyo. Zvezvirokwazvo, imwimwi muno mawara anokosha kuti mubetsere hama. Munoonawo kudini kuerenga masoko a Pauro ari pana 1 Akorinti 12:12-30 uye monamata ngezvazvo? Pa mavherisikuro aya, Pauro unosiya pamhene kuti museenzi umwe na umwe wa Djehovha kutobatanidzawo imwimwi, unokosha maningi uye unodiwa mu ungano. Hino, kana imwimwi musina zvikwaniriso zve kugara mubati anoseenzera parizvino, musarembe henyu. Kusiya izvona, itai zvese zvamunokwanisa kuti museenzere Djehovha uye mubetsere hama no hanzvadzi. Uye mungagara no rugondo rekuti akuru acarangarirawo nge zvenyu uye acamupasai mabasa amunokwanisa kuita.—Aro. 12:4-8.
13. Zvinyi zvinonyanya kukosha pa zviro zvinodiikanwa kuti munhu agare mubati anoseenzera?
13 Onai cikonzero cimweni cinoita kuti imwimwi mupete masimba kuti mugare mubati anoseenzera: Zvamunodikana kugara nazvo ndizvo zviya zvinodikana kuizwa no Akristu ese. Ngo muezaniso, Mukristu wese unodikana kubambisa ushamwari wake na Djehovha, kugara akagadzirira kuti aseenzere amweni no mupfaro uye kupasa muezaniso wakanaka pa maitiro ake. Hino, pamweni imwimwi matosakurira mawara ese anodikanwa kuti mugare mubati anoseenzera, asi zviro zvipi kamare zvinodikanwa ku hama iri kuda kugadzwa hinga mubati anoseenzera?
ZVINYI ZVAMUNGAITA KUTI MUGARE MUBATI ANOSEENZERA?
14. Zvinoreyei kugara munhu “anoita zviro no mwoyo wese”? (1 Timoti 3:8-10, 12)
14 Ngatifunde zviro zvinganani zvinodikanwa zvinobhuiwa no Bhaibheri pana 1 Timoti 3:8-10, 12. (Erengai.) Abati anoseenzera anodikana kugara “anhu anoita zviro no mwoyo wese.” Soko iri ringaturikirhwawo kuti “kusisira rureremedzo ro amweni,” “kugara akakwaniriswa,” kana kuti “kuita zviro nge mushobo unoita kuti anhu amureremedze.” Izvi azvireyi kuti amudikani kumbotambawo kana kudziwaraidza. (Mup. 3:1, 4) Zano nge rekuti imwimwi munodikana kubatisisa ubaba wamunawo. Kana imwimwi mukagara munhu unopeta masimba uye unogondwa, zvicaita kuti ungano yese imureremedzei.
15. Zvinoreyei kugara mwanarume “asina masoko mairi” uye anoda “kuona upfumi ngo mushobo wakashata”?
15 Kugara mwanarume “asina masoko mairi,” zvinoreya kuti imwimwi munoreketa zvinobva mu mwoyo, munogondwa uye nguwa dzese munoreketa cokwadi. Imwimwi munoita zvamunoreketa uye amucengedzi amweni. (Zvie. 3:32) “Aadikani kuda kuona upfumi ngo mushobo wakashata,” zvinoreya kuti imwimwi makatendeseka pa basa renyu uye pa mushobo wamunoseenzesa mare. Imwimwi amuzokhorovheri shamwari dzenyu dze mu ungano kuti muone mare nge ndaa yawo.
16. (a) Zvinoreyei kutama “kumwisa maningi doro”? (b) Zvinoreyei kugara “no hana yakacena”?
16 “Aadikani kumwisa maningi doro,” zvinoreya kuti imwimwi amudikani kudarika mudida we kumwa zviro zvinoraradzisa uye kuziikanwa kuti munomwisa maningi doro. Kugara “no hana yakacena,” zvinoreya kuti imwimwi munoreremedza zvinobhuiwa na Djehovha kuti zvakanaka uye zvakashata. I zvirokwazvo kuti imwimwi muri munhu usikazi kukwana, asi imwimwi muno ushamwari wakanaka na Djehovha uye ngokudaro munozwa runyararo.
17. Zvinoreyei “kutanga aongororhwa kuti aoneke kuti anosisira”? (1 Timoti 3:10; onaiwo foto.)
17 “Kutanga aongororhwa kuti aoneke kuti anosisira,” zvinoreya kuti akuru anomuonai kuti imwimwi munokwanisa kuita zvakanaka mabasa amunopaswa uye kuti awona anomugondai. Hino, kana akuru akamukumbirai kuti muite basa, tondowedzai nhungamiriro dzaanomupasai uye dzamunopaswa no mabhuku e sangano. Psvakai kuzwisisa zvese zvinobatanidzwa pa basa ramunopaswa uye kuti basero rinodikana kupedzwa rini. Kana imwimwi mukacengeta zvakanaka ubaba wamunopaswa, anhu ese mu ungano acakwanisa kuzwisisa kuti imwimwi munokoshesa ubaba wamunawo uye acaona kubudirira kenyu. Akuru, musasiye kurowedza hama dzakabhabhatidzwa. (Erengai 1 Timoti 3:10.) Mu ungano menyu, muno madjaha akabhabhatidzwa ano makore 13, 14, kana kuti asati aguma pa makore aya? Awona anosoita fundo ye munhu ega uye kugadzirira zvakanaka misangano here? Awona anosodaira pa misangano uye anosobuda kakawanda kese mu basa re kuparidzira here? Kana mhinduro nge yekuti honde, apasei mabasa aanokwanisa kuita kunyazi thunga rawo ricakadodoka. Ngo kuita izvona, madjaha aya anonga “eciongororhwa kuti aoneke kuti anosisira.” Paacazogara no makore 17 kana 18, awona pamweni acazokwanisa kugadzwa kuti agare abati anoseenzera.
Akuru anopasa mabasa hama dzakabhabhatidzwa, nge kuita izvona anonga eciaona kuti “akasisira here” (Onai ndima 17) )
18. Zvinoreyei kugara “asina caanopumhwa”?
18 Kugara “asina caanopumhwa,” zvinoreya kuti apana uno cikonzero ce kumupumha nge kuita zviro zvakashata. Izvirokwazvo kuti pamweni anhu angamunyeperai kuti maita zviro zvakashata. Izvi zvakaitikawo na Djesu uye iyena akati ateeri ake aizobatanawo nazvo. (Juau 15:20) Asi kana imwimwi mukagara no muhambiro wakacena kuitawo hingana Djesu, imwimwi munozogara no zina rakanaka pakati pe hama.—Mat. 11:19.
19. Zvinoreyei “kugara no mukadzi umwe basi”?
19 “Kugara no mukadzi umwe basi.” Imwimwi munodikana kugara no maonero amwewo no a Djehovha ngezve mucato—mubatanidzwa we mwanarume umwe no mwanakadzi umwe. (Mat. 19:3-9) Mukristu aadikani kuita uhure. (Aheb. 13:4) Uyezve munodikana kugara makagondeka ku mukadzi wenyu uye amudikani kupangidza kumbopfarira anakadzi amweni.—Djobo 31:1.
20. Zvinoreyei kugara anarume “anotungamirira zvakanaka ana awo, pamwepo no mhuri yawo kamare”?
20 “Anotungamirira zvakanaka ana awo, pamwepo no mhuri yawo kamare.” Kana imwimwi muri musoro we mhuri, munodikana kubata zvakanaka mabasa enyu. Itai mazuwa ese kunamata ke mhuri. Itai zviri zvese kuti mubude mu basa re kuparidzira no mukadzi wenyu uye no ana enyu. Betsai ana enyu kuti asakurire ushamwari wakabamba na Djehovha. (Aef. 6:4) Mwanarume anobata zvakanaka mhuri yake anopangidza kuti anokwanisa kubata zvakanaka ungano.—Ezanisai na 1 Timoti 3:5.
21. Kana amusati magara mubati anoseenzera, mungaitei?
21 Kana imwimwi amusati magara mubati anoseenzera, taponda fundai fundo ino mecinyasa kungwarira uye namatai ngezve nyaya ii. Fundaiwo zvikwaniriso zviri mu Bhaibheri ku abati anoseenzera uye petai masimba kuti mukwaniriswe. Nyasai kurangarira madire amunoita Djehovha uye hama no hanzvadzi dze mu ungano yenyu. Izvona zvicatunhudzira cido cenyu ce kuda kuaseenzera. (1 Ped. 4:8, 10) Kana imwimwi mukagara mubati anoseenzera, mucazwa mupfaro wakakura we kuseenzera hama no hanzvadzi dze mu ungano. Uye garai no rugondo rokuti Djehovha acakomborera kupeta masimba kenyu kuti mugare mubati anoseenzera!—Afi. 2:13.
NGOMA 17 “Ndinoda”
a KUPANGANIZDWA KE MUFANIKISO WE PA: Ku moko wo boshwe, Djesu anoseenzera afundi ake ecidzidodosa; ku moko wo kwawo, mubati anoseenzera unobetsera hama yacembera.
