1-2. Cinyi cinobatanidzwa pa “mabasa akanaka” anoizwa no akuru e ungano?

 KANA imwimwi maakusenza ke nguwa yakareba hinga mubati anoseenzera, muri mu gwanza rakanaka kuti mugare mukuru we ungano. Maizopfarira kuita “basa rakanaka” rinoizwa no akuru e ungano here?—1 Ti. 3:1.

² Zvinyi zvinobatanidzwa pa basa re akuru e ungano? Anotungamirira basa re kuparidzira, anoseenza no simba pa kuusha no kufundisa, anobetsera ungano nge zviya zvaanoita uye zvaanoreketa. Ndiyo daa, Bhaibheri rino zvikonzero zvakanaka zve kudainza akuru e ungano anoseenza no simba hinga “zvipo zve anarume.”—Aef. 4:8.

3. Zvinyi zvinodikana kuizwa no hama kuti igare mukuru we ungano? (1 Timoti 3:1-7; Tito 1:5-9)

³ Cinyi camunodikana kuita kuti mugare mukuru we ungano? Kugara ne zvikwaniriso kuti mugare mukuru we ungano, azvizi kuezana nokukwaniriswa kuti muone basa. Kajinji kakhona, kana imwimwi meciziya mabasa manganani anodiwa na patrau imwimwi unoona basa. Nge dii rimweni, kana imwimwi mecida kugara mukuru munodikana kugara no zvikwaniriso zvakawanda pane kuparidzirira basi uye kufundisa zvakanaka. Imwimwi munodikana kugara no zvikwaniriso zve mu Bhaibheri zvinodikanwa ku akuru, zviri pana 1 Timoti 3:1-7 uye Tito 1:5-9. (Erengai.) Fundo ino, icareketa ngezve zviro zvinoetserhwa ku akuru pa matii matatu anokosha: (1) kuziikanwa nge mushobo wakanaka kunza uye mukati me ungano, (2) kugara musoro we mhuri unomuezaniso wakanaka, uye (3) kugara makagadzirira kuseenzera ungano.

 KUGARA NO ZINA RAKANAKA

4. Zvinoreyei kugara munhu “asina caanopumhwa”?

⁴ Kuti mugare mukuru we ungano, munodikana “kugara munhu asina caanopumhwa.”  Izvi zvinoreya kuti imwimwi muno zina rakanaka mu ungano, ngokuti apana munhu angamupumhai zviro zvakashata. Kusiya izvona, imwimwi munodikana “kupupurirhwa zvakanaka no anhu o kunza.” Anhu amweni angakwanisa kumuphikisai ngokuti imwimwi muri Mukristu, asi apana munhu anodikana ku kana-kana kuti muri munhu akatendeseka uye akanaka. (Dha. 6:4, 5) Dzibvunzisei kuti: ‘Kodi ndino muhambiro wakanaka kunza uye mukati me ungano here?’

5. Zvinyi zvamunodikana kuita kuti “mude zvakanaka”?

⁵ Imwimwi mucadikanawo “kuda zvakanaka,” kana kuti kupsvaka zviro zvakanaka ku anhu uye kusimba hama no mawara akanaka aanawo. Imwimwiwo munodikana kupfara nge kuita zvakanaka ku amweni, kuita zvese zvamunokwanisa. (1 Ate. 2:⁠8; onai masoko e kufunda ari pana Tito 1:⁠8 “kuda maningi zviro zvakawanda.”) Ngei wara iri rinokosha maningi ku akuru? Ngokuti awona anoseenzesa nguwa yakawanda inokosha kuti aushe ungano uye aicengetedze. (1 Ped. 5:1-3) Kusiya izvona, mupfaro waanozwa we kuseenzera amweni wakakura maningi kupinda kupeta masimba kaanoita.—Zvii. 20:35.

6. “Mungatambira arendo” zvakanaka nge mushobo upi? (Ahebheru 13:2, 16; onaiwo foto.)

⁶ Imwimwi munopangidza kuti “munotambira arendo zvakanaka” nge kuitira amweni zvakanaka, kutobatanidzawo aya asikaiti dii ro shamwari dze padhuze. (1 Ped. 4:9) Bhuku rimweni rinopanganidza mwanarume umweni nge mushobo uu: “Musuwo we pa nyumba pako uye we mu mwoyo mako unodikana kugara wakafununguka ku anhu ausikazii.” Hino dzibvundzisei kuti: ‘Kodi inini ndinoziikanwa hinga munhu unopangidza unaki ku aya anovhakacira ungano yangu here?’(Erengai Ahebheru 13:2, 16.) Mwanarume unotambira arendo zvakanaka unopangidza unaki uye unopasa zvaanokwanisa ku aya anomuvhakacira. Izvona zvinobatanidza aya ano urombo wakakura, uye asina cekupasa anhu amweni uyewo anouya kooita mharidzo mu ungano ecibva ku ungano dzimweni, kutobatanidzawo anoseenza no simba kuti apfadze hama akaita hingana aonereri e nharaunda.—Gen. 18:2-8; Zvie. 3:27; Ruka 14:13, 14; Zvii. 16:15; Aro. 12:13.

7. Mukuru ungapangidza kudini “kuti aadisisi mare?”

⁷ “Asikadisisi maningi mare.”  Izvi zvinobatanidza kusama kukanda ndangariro dzenyu pa zviro zve ku nyama. Azvinei kuti imwimwi muri mupfumi kana kuti murombo, imwimwi munokanda Umambo wa Mwari pa mbuto yekutanga pa mbuto ipi hayo mu upenyu wenyu. (Mat. 6:33) Imwimwi munoseenzesa nguwa yenyu, simba renyu, uye zviro zvimweni kuti munamate Djehovha, muriritire mhuri henyu, uye kuti museenzere ungano. (Mat. 6:24; 1 Juau 2:15-17) Hino zvibvunzisei kuti: ‘Ngaapi maonero angu pano co kuita no mare? Kodi ndiri kupfara no zviro zvinodikanwa basi here? Kana kuti ndiri kupsvaka kugara no mare yakawanda uye zviro zvakawanda zve kunyama?’—1 Ti. 6:6, 17-19.

8. Mushobo upizve umweni wekuti imwimwi munopangidza kuti “munodzibata” pa zviro zvamunoita uye muno “maonero ari pakati no pakati”?

⁸ Kana imwimwi mukagara munhu “anodzibata” uye “kugara no maonero ari pakati no pakati,” izvona, zvinoda kureya kuti imwimwi munogara no maonero ari pakati no pakati, pa zvese zvamunoita mu upenyu wenyu. Kana kuti munokwanisa kukanda mugano pa zviro zvinocokuita no kurhya, kumwa, mushobo we kupfeka uye we kudziwaraidza. Imwimwi amuteedzeri upenyu we anhu asikaseenzeri Djehovha. (Ruka 21:34; Tig. 4:4) Imwimwi munorumbwa makaterama kunyazi anhu paanomuambirai uye paanomubatai zvisina unatsi. Imwimwi “amudikani kugara cidhakwa”; uye kuziikanwa hingana munhu anomwisa maningi doro. Dzibvunzisei kuti: ‘Kodi mushobo wandinorarama unopangidza kuti ndinodzibata pazviro zvandinoita uye ndino maonero ari pakati no pakati here?’

9. Zvinyi zvinobatanidzwa kugara no “marangariro akanaka” uye “akarongeka”?

⁹ Kuti imwimwi mugare “no marangariro akanaka,” munodikana kugadzirisa nyaya imwe na imwe meciseenzesa cokwadi cisikacinji co Bhaibheri. Imwimwi munonyasa kurangarira kuti cokwadi cisikacinji co Bhaibheri cinoseenzeswa kudini pa mugariro umwe na umwe. Ngokudaro, imwimwi mungakwanisa kuzwisisa uye kugara no zvisananguro zvakanaka. Imwimwi amutangi maita cisananguro, musati magara no masoko akadzara. (Zvie. 18:13) Ngo kuita kudaro, imwimwi mucakwanisa kugara munhu ari pakati no pakati uye moita zvisananguro zvinoenderana no marangariro a Djehovha. Kuti mugare “akarongeka,” munodikanawo kugara munhu akarongeka uye anobata nguwa. Imwimwi munoziikanwa hingana munhu akagondeka uye unozwira nhungamiriro. Mawara aya acabetsera imwimwi kugara no zina rakanaka. Ngationei zvino mushobo watingaita zvinodiwa no Bhaibheri uye kupasa muezaniso wakanaka hinga musoro we mhuri.

KUPASA MUEZANISO WAKANAKA HINGA MUSORO WE MHURI

10. Kodi mwanarume angatungamirira kudini “zvakanaka mhuri yake?”

¹⁰ Kana imwimwi makawaka uye munoda kugara mukuru we ungano, muhambiro we mhuri yenyu unodikana kugara wakanaka. Hino, imwimwi munodikana “kutungamirira zvakanaka mhuri [yenyu].” Imwimwi munodikana kuziikanwa hingana musoro we mhuri ano rudo uye ano ubaba. Izvona zvinobatanidza kutungamirira matii ese anocokuita no kunamata Djehovha. Ngei izvona zvinokosha? Muphostori Pauro wakabvunzisa kuti: “Kana mwanarume asikakwanisi kutungamirira mhuri yake, angazokwanisa kutungamirira kudini ungano ya Mwari?”—1 Ti. 3:5.

11-12. Ngei muhambiro we ana unokosha maningi kana hama yecida kugara mukuru? (Onaiwo foto)

¹¹ Kana imwimwi muri baba, munodikana kugara no “ana anozwira no mwoyo wese.” Imwimwi munodikana kuafundisa uye kuwarowedza no rudo. Izvirokwazvo kuti imwimwi munoda kuti ana enyu apfare uye adziwaraidze hinga ana amweni. Asi kurowedza zvakanaka kamucaaita, zvicaabetsera kuti agare ana anozwira, ano rureremedzo, uye acagara no maitiro akanaka. Kusiya izvona, imwimwi munodikana kuita zviri zvese kuti mubetsere ana enyu kuti agare no ushamwari wakabamba na Djehovha, kutondoedza zvokwadi zvisikacinji zvo Bhaibheri, uye obudirira dakara kubhabhatidzwa.

¹²  “Ano ana anotenda asikapumhwi kuti ano muhambiro wakashata kana kuti aazwiri.” Kana mwana ari Mupupuri wa Djehovha akaita citema cakakura, izvona zvinobata-bata kudini baba? Kana baba akatama kupasa rowedzo uye kupangira zvinodikanwa, hino awona aacakwaniriswizve kuti asenze hingana mukuru.—Onaiwo Murindiri wa 15 ya Otubro 1996, paji. 21, mandi. 6-7. mu ciShona.

KUSEENZERA UNGANO

13. Mungapangidza kudini kuti muri munhu “unozwisisa” “haiwa munhu anoomerera pa zvido zvake”?

¹³ Hama dzino mawara akanaka e Cikristu dzinodiwa maningi mu ungano. Mwanarume “unozwisisa” unoita zviri zvese kuti paoneke runyararo. Kana imwimwi mecida kuziikanwa hinga munhu unozwisisa, izwai zvinobhuiwa no anhu amweni uye garai makagadzirira kuseenzesa mazano amweni. Pa musangano we akuru e ungano, imwimwi maizogara makagadzirira kutsigira zvisananguro zve amweni kana izvona zvecienderana no mitemo uye zvokwadi zvo Bhaibheri zvisikacinji here? Imwimwiwo “amudikani kuomerera pa zvido zvenyu” kana kuti amudikani kurumbwa meciita zviro nge mushobo wenyu. Imwimwi munodikana kukoshesa maonero uye marangariro e amweni. (Gen. 13:8, 9; Zvie. 15:22) Imwimwi amudikani kugara munhu “anoreketedzana” uye “anokasika kutsamwa.” Pane kugara munhu anoshupha uye kusama kupindirana no amweni, imwimwi munodikana kugara munhu akanaka uye anoreketa zvakanaka. Hinga munhu anoda runyararo, imwimwi ndimwi mucatanga kuita kuti pagare no runyararo, kunyazi pazvinonga zvecishupha. (Tig. 3:17, 18) Kana imwimwi mukapangidza unaki pa munoreketa no anhu ese, kutobatanidzawo aya asiripi hama dzedu, mucaabetsera kuti agare akaterama uye athurudzike shungu dzawo.—Ato. 8:1-3; Zvie. 20:3; 25:15; Mat. 5:23, 24.

14. Zvinoda kureyei “kugara munhu wabva kutendeuka” uye “akagondeka?”

¹⁴ Kuti adzadzise zvinodikanwa uye kugara mukuru, “aadikani kugara munhu wabva kutendeuka.” Azvirei kuti iyena inodikana kugara munhu wakabhabhatidzwa ke makore akawanda, asi unodikana kugara munhu wabhabhatidzwa ke nguwa inokwana kuti agare Mukristu wakakura pa kunamata. Kuita hingana Djesu, musati magadzwa hinga mukuru, imwimwi munodikana kupangidza kuti imwimwi munodzidodosa uye muno mwoyo unononoka kutsamwa mecietsera nguwa yakasisira ya Djehovha kuti amupasei mabasa amweni mu ungano. (Mat. 20:23; Afi. 2:5-8)  Imwimwi mungapangidza kuti muri munhu “akagondeka” ngo kubatisisa zvinodiwa na Djehovha, mitemo yake uye zvokwadi zvisikacinji uyewo kuteera nhungamiriro dze sangano rake.—1 Ti. 4:15.

15. Mukuru anodikana kugara muiti we mharidzo wakanakisisa here? Panganidzai.

¹⁵ Bhaibheri rinopangidza pamhene kuti akuru anodikana kugara anhu “anokwanisa kufundisa.” Izvona zvinoda kureya kuti akuru ese anodikana kuita mharidzo dzakanakisisa here? Haiwa. Akuru akawanda akanaka, kunyazi asikakwanisi kunyasa kuita mharidzo, anokwanisa kufundisa zvakanaka mu basa re kuparidzira uye pa kuita basa re kuusha. (1 Timoti 3:2; ezanisai na 1 Akorinti 12:28, 29 uye Aefeso 4:11.) Kunyazi imwimwi musikadikani kugara muiti we mharidzo wakanakisisa, imwimwi munodikanawo kupeta masimba kuti mutunhudzire kukwanisa kenyu kufundisa. Imwimwi mungazviita kudini?

16. Imwimwi mungaitei kuti mugare mufundisi wakanaka? (Onaiwo foto.)

¹⁶ “Anobatisisa masoko akatendeka.” Kuti mugare mufundisi wakanaka, seenzesai Bhaibheri pese pamunonga mecifundisa uye kupasa mazano, garai mufundi wakanaka we Bhaibheri uye we mabhuku edu. (Zvie. 15:28; 16:23 Tito 1:9.) Pamunonga mecifunda, nyasai kungwarira kuti muone kuti muri kupanganidza uye kuseenzesa mavhersikuro ari mu Bhaibheri nge mushobo wakanaka here. Uye pamunonga mecifundisa, itai zviri zvese kuti mubaye mwoyo we aya ari kumupurutanai. Imwimwi mungatunhudzirawo kufundisa zvakanaka nge kukumbira mazano ku akuru agara no basa uye moaseenzesa. (1 Ti. 5:17) Akuru “anodikana . . . kubambisa” hama no hanzvadzi dzawo; asi nguwa dzimweni pamweni paya anodikanawo kupasa mazano kana kuti “kusumurura.” Pa mugariro upi hawo, awona anodikana kupangidza unaki. Kana imwimwi mukagara munhu akanaka uye ano rudo uye moseenzesa Soko ra Mwari pese pamunofundisa, imwimwi mucagara mufundisi wakanaka, ngokuti munonga meciteedzera Mufundisi Mukuru, Djesu.—Mat. 11:28-30; 2 Ti. 2:24.

 RUMBWAI MECIITA ZVAMUNOKWANISA

17. (a) Cinyi cingabetsera abati anoseenzera kuti arumbwe ecipeta masimba? (b) Akuru anodikana kuedzurirei paanonga eciongorora hama kuti aipase ubaba? (Onaiwo bhokisi “ Musaetsere Kukwana ke Amweni.”)

¹⁷ Mumasure me kuona zviro zvinodikanwa kuti hama iseenze hingana mukuru, anganani e abati anoseenzera angaguma pakurangarira kuti aazokwanisi kuita zvinodikanwa kuti agare mukuru. Asi edzurirai kuti Djehovha no sangano rake aaetseri kuti hama dzipangidze ngo mushobo wakakwana mawara aya. (1 Ped. 2:21) Mwiya mucena wa Djehovha ucamubetserai kuti mugare no mawara aya. (Afi. 2:13) Pano wara ramaona kuti munodikana kusakurira here? Hino namatai kuna Djehovha ngezvazvo. Kwarakwatisai ngezve nyaya yakhona, uye kumbirai mukuru umwe angamupasai mazano angamubetserai pa nyaya iyona.

18. Abati ese anoseenzera anodikana kuitei?

¹⁸ Tese isusu, kutobatanidzawo aya aa akuru, tinodikana kurumbwa tecipeta masimba kuti tipangidze mawara aya ataona mu fundo ino. (Afi. 3:16) Imwimwi maa mubati anoseenzera here? Musaime ipona! Kumbirai Djehovha kuti amurowedzei uye amubetserei kuita mabasa akawanda mu ungano. (Isa. 64:8) Zvezvirokwazvo, Djehovha acakomborera kupeta masimba kamunoita kuti mugare mukuru.