IMWIMWI muri kupeta masimba kuti murumbwe meciita fundo yo munhu ega uye muri kuita kuti iyona idakadze here? Zvingaita kuti pamweni paya tinosozviita. Asi rangarirai zviro zvimweni zvatinoita mazuwa ese hingana kusamba. Kusamba kunoda nguwa uye kupeta masimba, asi tinozwa zvakanaka mumasure mazvo! Fundo yo Bhabheri ingaitawo hingana “kusamba no mvura teciseenzesa soko.” (Aef. 5:26) Onai mazano manganani angakwanisa kumubetserai:

• Itai urongwa. Fundo yo Bhaibheri yo munhu ega iri pakati pe “zviro zvinokosha maningi” zvekuti Mukristu aadikani kusiya kuiita. (Afi. 1:10) Kuti mukwanise kuteerera urongwa wenyu, zvakadini kukanda pa mbuto inonyasa kuoneka, pakadai hingana pa kwadru ye zviziiso kana kuti pa musuwo wo jirera? Pamweni imwimwi mungasanangura kukanda ararme kuti izorire nguwa doko musati matanga kufunda.

• Cinjai maererano no zviya zvinodikanwa. Zvinyi zviri nyore kamuri, kukanda dangariro dzenyu pa nguwa yakareba here kana kuti nguwa doko? Imwimwi munoziya zvakanaka mugariro wenyu. Hino itai fundo yenyu ye munhu ega maererano no nguwa yenyu. Kana zvecimushuphirai kufunda pa nguwa yamasanangura, zvakadini kusanangura kufunda miseswa 10 basi? Nge kufunda kamucaita kunyazi ke nguwa doko basi, imwimwi munonga maita zvakawanda kudarika zvamungadai maita no gwanza rimweni. Uye mumasure me kutangisa kufunda, imwimwi munonga maano cido cokurumbwa mecifunda.—Afi. 2:13.

• Sanangurai pacino nguwa zvamunoda kufunda. Kana ikakwana nguwa yokufunda uye imwimwi motanga kudzibvunzisa kuti ndingafundei, pamweni imwimwi munonga musikanyasi “kukorovhera zvakanaka nguwa yenyu.” (Aef. 5:16) Zvakadini kuita mundandanda ye fundo kana misoro yamaizopfarira kufunda? Pese paya pamucagara no mubvunzo, itarirei. Uye paya pamunopedza kufunda, imwimwi mungatarazve zvimweni zvamucaona pa mundandanda wenyu we fundo kana misoro yamaizopfarira kufunda.

• Garai munhu anocinjika. Edzai kucinjika pa urongwa wenyu, panocokuita no nguwa yamunotora mecifunda kana misoro yamunosanangura. Cinokosha—aaguwapi yamunotora mecifunda, zvamunofunda kana kuti rini—Asi kuti munotora nguwa yakareba kudini kuti muzofundezve.

Kana tikafunda masumana ese zvicaitika zviro zvakanaka katiri. Ushamwari wedu na Djehovha ucagara wakabamba maningi, ticafundira kuita zvisananguro zvakanaka mu upenyu medu uye ticazwa takabamba.—Djs. 1:8.