1. Tingafundei no anhu akura?

 Tese isusu tinoda rubetso pakuita zvisananguro zvinokosha mu upenyu. Akuru no Akristu amweni akura pakunamata angatibetsera pa mugariro uwona. Kunyazi awona akakura kudarika isusu, atidikani kurangarira kuti mazano awo akasarira. Djehovha anoda kuti isusu tifundire no anhu akura. Awona ararama nguwa yakareba kupinda isusu, ndiyo ndaa ano maesperiensiya akawanda uye ungwaru.—Djobo 12:12.

2. Ticaonei mu fundo ino?

² Mu nguwa yo kare, Djehovha akaseenzesa anarume akatendeka kuti abambise uye adziirire anhu ake. Anarume awona ainga akura, ngo muezaniso, Mozesi, Dhavhidhi, uye muphostori Juau. Awona aazi kurarama mu nguwa imweyo uye kusiya izvona upenyu wawo wainga wakasiyana maningi. Paainga aadhuze kuda kufa, akapasa mazano ano ungwaru ku madjaha uye umwe na umwe wawo wakabhuya ngezve kukosha ke kuzwira Mwari. Djehovha akaita kuti masoko awo atarhwe mu Bhaibheri kuti isusu tifunde nge zvawo. Tese isusu, madjaha kana kuti akura pa thunga, tingakwanisa kufunda no zvakabhuiwa no anarume aya. (Aro. 15:4; 2 Ti. 3:16) Mu fundo ino, ticaona masoko ekupedzesera e anarume aya atatu uye kuti tingafundei no zviya zvaakabhuya.

“IWEWE UCARARAMA MAKORE AKAREBA”

3. Zvinyi zvakaizwa na Mozesi?

³ Mozesi wakaseenzera Djehovha upenyu wake wese. Iyena wainga ari muphorofita, mutongi, mutungamiriri uye mutari. Zvese zvaakabatana nazvo mu upenyu, zvakaita kuti iyena agare no maesperiensiya akawanda! Iyena ndiye akanunura Aisraeri pa uranda ku Edjipitu uye iyena wakaona zvishamiso zvakawanda  zvecibva kuna Djehovha. Kusiya izvona, Djehovha akaseenzesa Mozesi kuti atare mabhuku mashanu okutanga ari mu Bhaibheri, Pisarema 90 uye pamweni Pisarema 91. Zvingatoitawo kuti iyena wakatara bhuku ra Djobo.

4. Mozesi wakapasa ani mazano uye ngei?

⁴ Pa nguwa doko Mozesi asati afa ano makore 120, iyena akaunganidza Aisraeri kuti aaedzurire zvese zvaainga aizirhwa na Djehovha. Anganani e Aisraeri paainga ari madjaha, akaona zvishamiso zvakaizwa ndi Djehovha uye kuphanica Kaakaita Aedjipitu. (Eki. 7:3, 4) Awona akaona Djehovha ecifungura Bahari ro Kupvsuka kuti awona akwanise kudarika uye akaona mushobo wakatsakatisa Djehovha Faraoo uye no anyahondo ake ese. (Eki. 14:29-31) Kurenje, Djehovha akaacengeta uye akaariritira. (Dhe. 8:3, 4) Aadhuze no kuda kupinda mu Nyika Yakapikirhwa, Mozesi aazi kusiya mukana uwona kuti aabambise ke kupedzesera. a

5. Masoko okupedzesera a Mozesi ari pana Dheuteronomiyo 30:19, 20 aipasa rugondo ripi ku Aisraeri?

⁵ Mozesi akabhuyei? (Erengai Dheuteronomiyo 30:19, 20.) Mozesi wakaedzurira dzinza re Aisraeri kuti awona ainga ano ramangwana rakanaka. No makomborero a Djehovha awona aizorarama nguwa yakareba mu nyika yaainga apikirhwa na Djehovha. Nyika ii yainga yakanaka uye yaidusa zvirimwa zvakawanda. Mozesi akatara kuti: “Nyika, ino mathaundi akakura akarungama amusikazi kuwaka no nyumba dzakadzara no zviro zvakanaka, zvamusikazi kuseenzera, no zvimbo zvamusikazi kucera, uye no muuvha uye miorivhi dzamusikazi kusima”—Dhe. 6:10, 11.

6. Ngei Djehovha akasiya kuti madzinza amweni arhwise Aisraeri?

⁶ Mozesi wakapasawo ngwadzo Aisraeri. Kana awona ecida kurarama mu nyika inobudirira yaaizotambira, awona aidikana kurumbwa ecizwira Djehovha. Mozesi wakaaedzurirawo kukosha ke kuti awona “asanangure upenyu” nge kupurutana Djehovha uye “kugara dhuze naye.” Asi Aisraeri aazi kuzwira. Nge ndaa yazvo, nokuhamba ke nguwa, Djehovha akasiya kuti Aasiriya akazodainzwa kuti Abhabhironi, arhwise nyika yawo uye atore Aisraeri hinga asungwa.—2 Mad. 17:6-8, 13, 14; 2 Mak. 36:15-17, 20.

7. Tinofundei no masoko a Mozesi? (Onaiwo foto.)

⁷ Tingafundei? Kuzwira kunoponesa upenyu wenyu. Kuitawo hinga Aisraeri aida kupinda mu Nyika Yaakapikirhwa, isusuwo tiri dhuze kamare nokuda kupinda mu nyika yatakapikirhwa na Djehovha. Mbai-mbai pano nyika yese icacinja yogara paraizo. (Isa. 35:1; Ruka 23:43) Dhiyabhurosi no madhimoni ake aacagarizve no simba ro kutikuhunyisa. (Zvak. 20:2, 3) Apacazoonekizve magereja okunyepa uye apana ucacengedzwazve nawo. (Zvak. 17:16) Apacazoonekizve munhu ucatambudzwa no anyautongi e pa nyika. (Zvak. 19:19, 20) Djehovha aazosii kuti munhu upi hake abare matambudziko mu paraizo. (Pis. 37:10, 11) Anhu ese acazwira mitemo ya Djehovha uye izvona zvicaita kuti paoneke runyararo uye rubatano. Kusiya izvona, anhu acagonda umwe na umwe wawo uye acadanana. (Isa. 11:9) Zvezvirokwazvo isusu tinocidaka-daka ce kuona izvi zveciitika! Kana tikarumbwa tecizwira Djehovha, isusu ticagara no mukana we kurarama mu paraizo pa nyika pano, haiwa ke nguwa doko basi asi nokusikaperi.—Pis. 37:29; Juau 3:16.

8. Cipikirhwa ce upenyu usikaperi cakabetsera kudini mu misiyonario? (Djudha 20, 21)

⁸ Kana cipikirhwa cakaita Djehovha cikanyasa kugara cakabamba mu ndangariro dzedu, isusu ticakwanisa kuzwira Djehovha azvinei no matambudziko aticabatana nawo mu upenyu.  (Erengai Djudha 20, 21.) Uye cipikirhwa ici ndico cinotipasa simba ratinoda kuti tirhwisane no patakarembera. Hama imweni iri kuseenza hinga misiyonario mu Africa ke makore akawanda, inoreketa ngezve kurhwisana no payakarembera pa nyama. Iyona inoti: “Pandakaona kuti ndainga ndiri pa ngozi yokutama kupinda mu paraizo nge kutama kuzwira Djehovha, ndakasanangura kupeta masimba kuti ndirhwisane no pa ndakarembera uye ndakadeketera kuna Djehovha kuti andibetsere. Nge rubetso ra Djehovha ndakakwanisa kukunda pandainga ndakarembepo.”

“IWEWE UCABUDIRIRA”

9. Dhavhidhi wakabatana no zvinetso zvipi mu upenyu?

⁹ Dhavhidhi wainga ari mambo wakagondeka kuna Djehovha. Iyena wainga ari muembi, waibhuya masoko anopfadza, murhwisi uye mophorofita. Asi iyena wakabatanawo no zvinetso. Ngo muezaniso, ke makore akawanda, iyena wakararama hinga mutizi ecitiza Mambo waiga ano bibvu Sauri. Mumasure me kugara mambo Dhavhidhi wakatizazve kuti aponese upenyu wake, nge ndaa yokuti mwana wake Absaramu waiedza kugara mambo pa mbhuto pake. Kunyazi no zvinetso zvese izvi uye no paakarembera, Dhavhidhi wainga akagondeka kuna Djehovha dakara upenyu wake wese zvekuti Djehovha akabhuya ngezvake eciti: “Mwanarume unopfadza mwoyo wangu.”—Zviito 13:22; 1 Mad. 15:5.

10. Ngei Dhavhidhi akapasa zano mwana wake Soromoni asati agara mambo?

¹⁰ Ngo muezaniso, onai zano rakapasa Dhavhidhi mwana wake Soromoni wekuti waizogara mambo we Israeri. Djehovha akasangura Soromoni kuti awake tempro, mbuto yaizonamata anhu Djehovha. (1 Mak. 22:5) Soromoni wainga ano basa rakakura maningi uye waida rubetso ra Djehovha kuti akwanise kutonga anhu. Hino Dhavhidhi wakamupa zano ripi kuti amubetsere? Ngatione.

11. Maererano 1 Madzimambo 2:2, 3, Dhavhidhi akapasa Soromoni mazano api, uye zviro zvipi zvakanaka zvakaitika na Soromoni pa nguwa yaaizwira Djehovha? (Onaiwo foto.)

¹¹ Dhavhidhi wakabhuyei? (Erengai 1 Madzimambo 2:2, 3.) Dhavhidhi wakabvunza Soromoni kuti kudai iyena akazwira Djehovha, Djehovha aizomukomborera nguwa dzese. Uye ke makore akawanda Djehovha akapasa Soromoni zviro zvakawanda zvakanaka uye akamubetsera nge mishobo yakasiyana-siyana. (1 Mak. 29:23-25) Soromoni wakawaka tempro yakarungama maningi uye masoko ake akawanda akatarhwa mu Bhaibheri. Iyena wakagara no mbiri nge ndaa yo ungwaru wake uye upfumi. (1 Mad. 4:34) Hingana zvakabhuiwa na Dhavhidhi, Soromoni waizobudirira basi kana akazwira Djehovha. Asi zvinotsukwarisa kuti paakakura iyena wakatanga kunamata madzimwari okunyepa, nge ndaa yazvo, Djehovha akasiya kumukomborera uye iyena aazi kukwanisazve  kutonga anhu no unatsi uye no ungwaru.—1 Mad. 11:9, 10; 12:4.

12. Zvinyi zvatingafunda no mazano a Dhavhidhi?

¹² Tingafundei? Kuzwira kunoita kuti tikomborerhwe. (Pis. 1:1-3) Zviri panhene kuti nyamasi uno, Djehovha aabhuyi kuti acatipasa mbiri uye upfumi hingana zvaakaitira Soromoni. Asi kana tikazwira Djehovha nguwa dzese, iyena acatipasa ungwaru watinoda kuti tikwanise kuita zvisananguro zvakanaka. (Zvie. 2:6, 7; Tig. 1:5) Mazano a Djehovha angatibetsera kuti tiite zvisananguro zvakanaka zvinocokuita no basa, kufunda, mare uye waraidzo. Kuseenzesa mu upenyu wedu ungwaru wa Djehovha, zvicatidziirira pa marhwadzo akawanda. (Zvie. 2:10, 11) Kusiya izvona, ticagara no shamwari dzakagondeka uyewo ticaziya zvatingaita kuti mhuri yedu ipfare.

13. Cinyi cakabetsera Carmen kuti aite cisananguro cakanaka?

¹³ Carmen unogara ku Moçambique, wairangarira kuti fundiso yo pamusoro-soro yaizoita kuti upenyu wake ugare wakanaka. Iyena wakapinda mu fakuridhadhi ye arkitetura. Uye iyena unoti: “Inini ndaida maningi zvandaifunda, asi ndainga ndisisinazve nguwa uye simba kuti ndiite zviro zvimweni. Inini ndaipinda 7:30 uye ndaikotoka 18. Zvaindishuphira maningi kupinda misangano uye ushamwari wangu na Djehovha wakatanga kuremba. Nge mu mwoyo mangu kamare ndainga ndazvibata kuti zvezvirokwazvo inini ndaiedza kuseenzera madzitenzi mairi.” (Mat. 6:24) Iyena wakaita munamato kuna Djehovha ngezve zviya zvakaitika uye wakapsvakisisa mu mabhuku edu. Iyena unotunhudzira eciti: “Mumasure me kupaswa mazano na mai angu uye no akuru, ndakasanangura kusiya fakuridhadhi uye ndakatanga kuseenzera Djehovha mu nguwa yakadzara. Inini andina mubvunzo kuti ndakaita cisananguro cakanaka mu upenyu wangu uye ndiri kupfara maningi nge ndaa yazvo.”

14. Masoko api anokosha akasiiwa na Mozesi uye Dhavhidhi?

¹⁴ Mozesi na Dhavhidhi aida maningi Djehovha uye aizviziya kuti zvinokosha maningi kumuzwira. Pa masoko awo okupedzesera awona akakohomedzesa amweni kuti ateerere miezaniso yawo. Mozesi na Dhavhidhi akasiya pamhene kuti aya anosiya Djehovha aangarumbwi ecitambira makomborero a Djehovha uye mibairo yaanopasa. Mazano aakapasa anokosha maningi katiri mazuwa ano. Uye paapadarika  makore akawanda, museenzi umweni wakatendeka wa Djehovha wakabhuyawo kuti zvinokosha maningi kurumbwa takagondeka kuna Djehovha. Ngatione zvinganani nge zvake.

“ANDINA MUPFARO MUKURU KUDARIKA UU”

15. Muphostori Juau wakaona zviro zvipi mu upenyu wake?

¹⁵ Juau wainga ari mufundi waidiwa maningi na Djesu. (Mat. 10:2; Juau 19:26) Iyena wakaperekedza Djesu pa basa rake re kuparidzira pa nguwa yese yaainga ari pasi pano, uye wakaona zvishamiso uye wakarumbwa ari naye pa nguwa dzaishupha. Iyena wakaona Djesu paakauraiwa uye wakamuonawo mumasure me kumutswa. Juau wakaonawo kuwanda kakaita Akristu no kuhamba ke nguwa. Iyena wakararamawo nguwa yakakwana kuti awone masoko akanaka “eciparidzirhwa zvisikwa zvese zviri pasi pe denga.”—Ako. 1:23.

16. Ndiani ari kubambiswa no masoko a Juau mazuwa ano?

¹⁶ Juau paainga wa mwanarume wakura pa thunga, iyena wakagara no makomborero okutara bhuku rinoshamisa ro Zvakapangidzwa rekuti rinounzisa “zvakapangidzwa na Djesu Kristu.” (Zvak. 1:1) Juau wakatarawo Vhangeri rinotora zina rake uye matsamba amweni matatu akafemerhwa. Tsamba yake yocitatu, iyena wakaitarira Mukristu wakatendeka unozwi Gayo, uya waidiwa maningi na Juau hingana mwana wake kamare. (3 Juau 1) Pamweni Juau wainga ano ana akawanda ekumwiya aaida maningi. Zvakatara mwanarume uu wakatendeka zviciri kubambisa ateeri ese a Djesu dakara mazuwa ano.

17. Maererano na 3 Juau 4, cinyi cinotipasa mupfaro?

¹⁷ Juau wakatarei? (Erengai 3 Juau 4.) Juau wakatara kuti kuzwira Djehovha kunounzisa mupfaro wakakura maningi. Panguwa yaakatara tsamba yake yocitatu anhu anganani aiedza kubararisa fundiso dzokunyepa uye eciita kuti muoneke dambudziko mu ungano. Asi zvinopfadza ngezve kuti amweni airumbwa “ecihamba mu cokwadi.” Awona aizwira Djehovha uye airumbwa “ecihamba maererano no mitemo yake.” (2 Juau 4, 6) Anarume aya akatendeka aipfadza maningi haiwa basi mwoyo wa Juau asiwo wa Djehovha.—Zvie. 27:11.

18. Tingafundei no masoko a Juau?

¹⁸ Tingafundei? Kugondeka kunounza mupfaro. (1 Juau 5:3) Ngo muezaniso, isusu tinopfara maningi nge kuziya kuti tinopfadza mwoyo wa Djehovha. Djehovha anopfara maningi paanotiona tecikwanisa kuramba miedzo ye nyika ino uye tozwira mitemo yake. (Zvie. 23:15) Ngirozi kudenga dzinopfarawo maningi ndizvo. (Ruka 15:10) Isusu tinopfarawo maningi patinoona  hama dzedu dzecirumbwa dzakatendeka kunyazi padzinoteererhwa uye padzinobatana no miedzo. (2 Ate. 1:4) Nyika ya Sathani paicatsakatiswa isusu ticagara no mupfaro we kuziya kuti takwanisa kugara takatendeka kuna Djehovha dakara kumugumo.

19. Hanzvadzi inozwi Rachel inotii ngezve kufundisa cokwadi? (Onaiwo foto.)

¹⁹ Ciro cimweni cinotipasa mupfaro wakakura maningi i kureketa ngezva Djehovha. Rachel unogara ku República Dominicana, unopanganidza kuti i makomborero akakura maningi kureketa ngezve masoko akanaka ku anhu amweni. Paanorangarira ngezve ese aakafundisa ngezva Djehovha, iyena unopanganidza kuti: “Zvinondishuphira kupanganidza kupfara kandinoita pandinoona aya andakabetsera kuti afunde ngezva Djehovha eciita cinjo mu upenyu wawo uye ecirumbwa ecigonda Djehovha. Mazwiro aya anotsiya cinetso cipi haco kana kudzipira kupi hako kuti ndikwanise kuafundisa cokwadi.”

FUNDIRAI NO MASOKO EKUPEDZESERA E AFUNDI AKATENDEKA

20. Takaezana papi na Mozesi, Dhavhidhi uye Juau?

²⁰ Mozesi, Dhavhidhi na Juau, akararama mu nguwa yakasiyana maningi no yatiri kurarama mazuwa ano. Kunyazi zvakadaro, isusu tino zviro zvakawanda maningi zvakaezana, awona akaseenzera Mwari we zvirokwazvo Djehovha uye isusu tiri kumuseenzerawo. Kuitawo hingana awona, isusu tinonamata kuna Djehovha, tinomugonda uye tinopsvaka nhungamiriro dzake. Kusiya izvona, kuitawo hingana anarume aya akatendeka, isusu tino rugondo rokuti Djehovha anopasa makomborero akawanda ku aya ese anomuzwira.

21. Makomborero api anoetsera aya anozwira mazano a Mozesi, Dhavhidhi uye Juau?

²¹ Zvezvirokwazvo, isusu tinoda maningi kuseenzesa mazano e anarume aya akura pa thunga uye kuzwira Djehovha. Kana tikadaro, isusu ticakomborerhwa maningi na Mwari wedu Djehovha. Isusu ticaonawo mukana we kurarama ke “nguwa yakareba,” kubhuya zvazviri, nokusikaperi! (Dhe. 30:20) Tisikareketi ngezve kupfadza katicaita Baba edu ano rudo acatikomborera nge mushobo watisikakwanisi kurangarira.—Aef. 3:20.