1. Zvineso zvipi zviri kusongana no aseenzi a Djehovha?

IMWIMWI muri kusongana ne dambudziko here? Pamweni hama ye mu ungano yakamurhwadzisa. (Tg. 3:2) Kana kuti zvingaita kuti shamwari ye kubasa kana kuti ye ku cikora iri kumuseka ngekuti imwimwi muri Mupupuri wa Djehovha. (1Pe. 4:3, 4) Pamweni anyaukama enyu ari kumubambidzira kuti imwimwi musapinde misangano ye ungano kana kuenda kooparidzira. (Mt. 10:35, 36) Ici cineso cakakura maningi. Pamweni cingamuita kuti mude kusiya kuseenzera Djehovha. Asi mungagara no rugondo rokuti, kunyazi mungasongana no cineso cipi haco, Djehovha acamupasa ungwaru no simba ramunoda kuti mukwanise kushingirira matambudziko.

2. Maererano na Aroma 15:4, kuerenga Bhaibheri kungatibetsera kudini?

² Djehovha akaita kuti mu Soko rake mutarhwe ngano dze aseenzi ake akasongana no zvineso. Ngei Djehovha akaita kuti zvitarhwe? Kuti tikwanise kufunda nawo. Ndiyo ndaa Djehovha akafemera mupostori Pauro masoko atinogumira pana Aroma 15:4. (Erengai.) Kuerenga ngano idzi dze mu Bhaibheri zvingatinyaradza uye kutipasa kariro. Asi kuti tinyase kubetsereka nadzo, tinodikana haiwa kundoerenga basi Bhaibheri, tinodikana kutendera kuti Bhaibheri ricinje mushobo wedu wekurangarira uye ribaye mwoyo wedu. Tinodikana kuitei kana tecida nhungamiriro kuti tikwanise kukunda dambudziko ratinonga tinaro? Tinodikana kuita matanho anoteera: (1) Namatai, (2) Rangarirai, (3) Nyasai Kurangarira, uye (4) Seenzesai Zvamunonga Mafunda. Mu fundo ino, ticada kuona zvinobatanidzwa mu danho rimwe na rimwe. * Uye ticafundawo  zvakaitika kuna Mambo Dhavhidhi no mupostori Pauro.

3. Tinodikana kuitei tisati tatanga kuerenga Bhaibheri, uye ngei?

³ (1) Namatai. Musati matanga kuerenga Bhaibheri, kumbirai Djehovha kuti amubetsere kuona kuti mungabetsereka kudini no zviro zvamuri kuerenga. Ngo muezaniso, kana mecipsvaka nhungamiriro dzakaringana nge cineso cimweni, namatai kuna Djehovha mecikumbira kutungamirirhwa nge mazano ari musoko ra Mwari kuti amubetsere kuziya zvokuita.—Afi. 4:6, 7; Tg. 1:5.

4. Cinyi cingamubetsera kuti munyase kuzwisisa ngano dziri mu Bhaibheri?

⁴ (2) Rangarirai. Djehovha akatipa simba rokurangarira. Kuita kuti zviro zvamunoerenga zvimubetsere, edzai kurangarira zvirikuitika, uye itai hingana ndimwi munanga mecireketwa. Edzai kuona zviro hingana mushobo waakazviona, uye kuzwa hingana mushobo waakazvizwa.

5. Cinyi cinozwi kunyasa kurangarira, uye imwimwi mungazviita kudini?

⁵ (3) Nyasai Kurangarira. Kunyasa kurangarira, kukanda nzero dzenyu pa zviro zviya zvamunonga mecierenga, uye meciona kuti mungaseenzesa kudini fundo rimwe na rimwe. Kunyasa kurangarira kunomubetsera kuti muone kubatana kunoita masoko, uye moona ruziyo rakakura rakaringana no nyaya iyona. Kunyasa kurangarira, kubatanidza ma pessa kuti mubuse ciro cimwe comutero. Kuti mukwanise kunyasa kurangarira imwimwi munodikana kudziita mibvunzo dzinoteera: ‘Cinyi caakaita kuti akwanise kukunda dambudziko iri? Djehovha akamubetsera kudini? Zviro izvi zvedafunda zvingandibetsera kudini kuti ndishingirire?’

6. Ngei tecidikana kuseenzesa zviro zvatinofunda?

⁶ (4) Seenzesai Zvamunonga Mafunda. Djesu akati, munhu wiya asikaseenzesi zviro zvaanofunda, wakaezana no munhu unowaka nyumba yake pamadjeca. Basa rese raanoita, kupedza nguwa. Ngei? Ngekuti kana pakauya madutu no mvura, nyumba yake icaputsika. (Mt. 7:24-27) Zvimwezvimwezvoo, masimba ese atinopeta kuti tiite munamato, kurangarira, uye kunyasa kurangarira kunonga kurikuseenzera pasina kana tikasama kuseenzesa zviya zvatinonga tafunda. Patinosongana no miedzo ye kutenda kedu, yakaita hingana matambudziko, kana kuteererhwa kutenda kedu kucatonhora. Asi kana tikaseenzesa zviro zvatinonga tafunda, ticakwanisa kuita zvisananguro zvakana, tino runyararo uye kutenda kedu kunorumbwa kakabamba. (Isa. 48:17, 18) Zvino ngaticimboone kuti tingaseenzesa kudini matanho marongomuna ataona, paticafunda ku zviro zvakaitika kuna Mambo Dhavhidhi.

7. I ngano ipi ye mu Bhaibheri yaticaona zvino?

⁷ Makambocengedzwa nge anyaukama kana nge shamwari yenyu here? Kana zvakaitika, ciro cingamubetsera ngece kuedzurira zvakaita Mambo Dhavhidhi mwana wake Absaramu paakamupandukira kuti iyena agare mambo pa mbuto pake.—2Sa. 15:5-14, 31; 18:6-14.

8. Imwimwi mungakumbirei Djehovha?

⁸ (1) Namatai. Musati maerenga ngano ii ye upenyu wa Dhavhidhi, panganidzirai Djehovha mazwire amurikuita nge kushaishirhwa ke maizwa. (Pis. 6:6-9) Hino, kumbirai kutungamirirhwa ndi Djehovha kuti mugumire mazano e Bhaibheri acamubetsera kuziya zvokuita.

9. Cinyi cakaitika kuna Dhavhidhi na Absaramu?

⁹ (2) Rangarirai. Rangarirai zviro zvese zvakaitika uye onai kuti zviro izvi zvakashupha  kudini Mambo Dhavhidhi. Kutanga Absaramu, mwana wa Dhavhidhi wakatora makore akawanda eciita kuti iyena atenderhwe nge anhu. (2Sa. 15:7) Mu masuremo paakaona kuti nguwa yakwana iyena wakatuma asori mu Israeri yese kuti agadzirire anhu kuti amutendere hingana mambo. Uye iyena wakatokwanisawo kucengedza shamwari huru uye cipanga mazano ca Dhavhidhi, Aitoferi, kuti abatanewo pakupandukira Dhavhidhi. Absaramu unodziita mambo uye unoedza kubata nokuuraya Dhavhidhi, pamweni nguwa iyona wainga ecirhwara maningi. (Pis. 41:1-9) Dhavhidhi unoona mirau ya Absaramu uye unotiza mu Djerusarema. Hino, anyahondo a Absaramu anorhwisana no anyahondo a Dhavhidhi. Absaramu unonyiswa uye unobva afirepo.

10. Mambo Dhavhidhi waikwanisa kuitei?

¹⁰ Rangarirai muzwire wakaita Dhavhidhi pa zviro zvese zvakaitika. Davhidhi waida Absaramu uye waigonda Aitoferi. Asi anhu aya e padhuze, akamucengedza. Akamurhwadzisa maningi uye akaedza kumuuraya. Dhavhidhi waikwanisa kusama kugonda no shamwari dzake dzimweni, ecirangarira kuti pamweni awona ainga abatana na Absaramu. Iyena waikwanisa kutanga kurangarira nge zvake basi uye kutotiza ari ega. Zvaibvira kuti iyena adzirhye mwoyo. Asi Dhavhidhi aazi kuzviita. Iyena wakakwanisa kukunda matambudziko e upenyu wake. Ngei Dhavhidhi wakazvikwanisa?

11. Dhavhidhi wakaitei pa mugariro uu unoshupha?

¹¹ (3) Nyasai Kurangarira. Imwimwi mungafundei pa zviro zvakaitika mu upenyu wa Dhavhidhi? Dairai mubvunzo, “Dhavhidhi wakaitei kuti agadzirise dambudziko rake?” Dhavhidhi wakaita zviro no ungwaru haiwa nge zvido zvake. Iyena aazi kuvhunduka kana kutya kuti aite cisananguro. Pane kudaro iyena wakanamata ecikumbira rubetso ra Djehovha. Iyena wakakumbirawo rubetso re shamwari dzake. Uye iyena wakatanga kuseenzesa nokukasika zviro zviya zvaainga asanangura kuita. Kunyazi ecirhwadziwa, Dhavhidhi aazi kusiya kugonda anhu, uye aaziwo kutogara no uzondi. Iyena wakarumbwa ecigonda Djehovha pamwepo no shamwari dzake.

12. Djehovha akaitei kuti abetsere Dhavhidhi?

¹² Djehovha akabetsera kudini Dhavhidhi? Kana mukakwarakwatisa, mucaona kuti Djehovha, akapasa Dhavhidhi simba raaida kuti akwanise kushingirira. (Pis. 3:1-8 masoko e pa musoro) Djehovha akakomborera zvisananguro zva Dhavhidhi. Ayenawo akabetsera shamwari dzakagondeka dza Dhavhidhi paakarhwisa kuti adziirire mambo wawo.

13. Kana munhu akamurhwadzisa, mungateedzera kudini Dhavhidhi? (Mateu 18:15-17)

¹³ (4) Seenzesai Zvamunonga Mafunda. Dzibvunzisei kuti, ‘Ndingateedzera kudini Dhavhidhi?’ Kasikai kuita ciito kuti mugadzirise dambudziko renyu. Zvecienderana ne migariro inanga iripo, seenzesai zano ra Djesu riri pana Mateu kapituro 18. (Erengai Mateu 18:15-17.) Musaite zvisananguro makatsamwa, asi ne ungwaru. Namatai mecikumbira kuti Djehovha ateramise mwoyo wenyu uye amupase ungwaru kuti mukwanisane no dambudziko ramunanga munaro. Musasiye kugonda shamwari dzenyu, pane kudaro tenderai rubetso rawo. (Zvie. 17:17) Uye cinonyanya kukosha pa zvese, purutanai mazano a Djehovha ari mu Bhaibheri.—Zvie. 3:5, 6.

14. 2 Timoti 1:12-16; uye 4:6-11, 17-22 dzingamubetsera pa migariro ipi?

¹⁴ Imwimwi muri kuzondwa mu mhuri here?  Muri kurarama mu nyika yekuti basa renyu rakarambidzwa here? Kana zviri izvona tsamba dza 2 Timoti 1:12-16 uye 4:6-11, 17-22 dzingamubetsera. * Pauro wakatara mavhersikoro aya paainga ari mu karaboso.

15. Imwimwi mungakumbirei kuna Djehovha?

¹⁵ (1) Namatai. Musati maerenga ngano ii, tangai mapanganidzira Djehovha dambudziko renyu uye muzwire wamurikuita. Hino kumbirai Djehovha kuti amutungamirire kuti mugumire ngano ye upenyu wa Pauro uye mazano angamubetsera kuti muziye zvokuita.

16. Cinyi cakaitika kuna Pauro?

¹⁶ (2) Rangarirai. Edzai kudzikanda pa mbuto ya Pauro. Iyena uri mukaraboso ku Roma. Uye wakasungwa nge makorenti, iyena wainga akambosungwazve kare, asi zvino iyena waanorugondo rokuti ucauraiwa. Madzishamwari ake amweni ano musiya, uye iyena waremba.—2Ti. 1:15.

17. Pauro waikwanisa kuitei?

¹⁷ Pauro waikwanisa kugadzika nzero dzake pa zviro zvakaitika kare, ecirangarira kuti kudai nondisikazi kuzviita hingana ndisikazi kusungwa. Iyena waikwanisa kugara no shungu ku anhu aya e ku Ásia ainga amusiya, uye waikwanisa kusama kugonda shamwari dzake. Asi Pauro aazi kuita izvona. Cinyi cakamubetsera kuti arumbwe ecigonda shamwari dzake uye no rubetso ra Djehovha?

18. Pauro wakaitei kuti akunde matambudziko?

¹⁸ (3) Nyasai kurangarira. Dairai mubvunzo unoti: Cinyi cakaizwa ndi Pauro kuti agadzirise matambudziko ake? Kunyazi paaityisidzirhwa kuuraiwa, Pauro aazi kukanganwa ciro cinokosha—kupasa mbiri Djehovha. Uye iyena wakarumbwa ecirangarira kubambisa kaangaita anhu amweni. Iyena wakapangidza rugondo rake kuna Djehovha ngekurumbwa ecinamata. (2Ti. 1:3) Pauro aazi kurumbwa ecirangarira hama dziya dzainga dzamusiya, pane kudaro, iyena wakatenda rudo raainga apangidzirhwa nge shamwari dzakamubetsa. Kusiya izvona, Pauro wakarumbwa ecifunda Soko ra Mwari. (2Ti. 3:16, 17; 4:13) Uye cinonyanya kukosha, iyena wainga anorugondo rokuti, Djehovha na Djesu, aimuda. Awona ainga asikazi kusiya Pauro, uye aizomukomborera nge basa rake rakagondeka.

19. Djehovha akabetsera kudini Pauro?

¹⁹ Djehovha ainga aziisa Pauro kuti iyena waizoshuphika no kuteererhwa nge ndaa ye kugara mu Kristu. (Zvi. 21:11-13) Asi Djehovha akabetsera kudini Pauro? Ayena akadaira minamato ya Pauro, uye Djesu akagara ku dii ra Pauro ecimupasa simba. (2Ti. 4:17) Pauro wakapaswa rugondo rokuti waizokomborerhwa nge kuseenza kake pa basa no simba. Djehovha akaseenza shamwari dzake dzakagondeka kuti amubetsere pa zviro zvaaida.

20. Tecirangarira tsamba ya Aroma 8:38, 39 tingateedzera kudini kutenda ka Pauro?

²⁰ (4) Seenzesai Zvamunonga Mafunda. Dzibvunzisei kuti, ‘Ndingateedzera kudini muezaniso wa Pauro?’ Kuita hingana Pauro, tinocokwadi cokuti ticateererhwa nge ndaa yekutenda kedu. (Mk. 10:29, 30) Nge kurumbwa takagondeka kuna Djehovha, kunyazi tecisongana no matambudziko, tinodikana kurumbwa tecinamata kaari uye tecifunda Soko rake nguwa dzese. Atidikani kukanganwa kuti ciro cinonyanya kukosha nge ce kupasa mbiri Djehovha. Tinodikanawo kugonda kuti, Djehovha aazombotisii uye apana cingakwanisa kuizwa nge anhu, cingapedza rudo ra Djehovha katiri.—Erengai Aroma 8:38, 39; Ahe. 13:5, 6.

21. Cinyi cakabetsera Aya na Hector kuti akunde matambudziko aakasongana nawo?

²¹ Azvinei no matambudziko atingasongana nawo, miezaniso dziri mu Bhaibheri dzingakwanisa kutibambisa. Ngo muezaniso, Aya mupioneira unogara ku Japão, unopanganidza kuti ngano ya Djona yakamubetsera kukunda rutyo rokubuda mu basa rokuparidzira muno anhu akawanda. Hector, djaha roku Indonésia rino abereki asiripi aKristu, rinoti muezaniso wa Rute unomukohomedzesa kufunda zvakawanda nge zva Djehovha uye kumuseenzera.

22. Imwimwi mungakhorovhera kudini mavhidhiyo e ngano dziri mu Bhaibheri uye ne mindandanda ye musoro unoti “Tevedzera Kutenda Kwavo”?

²² Ngakupi kamungagumira miezaniso dze Bhaibheri dzingabambisa kutenda kenyu? Kuerengwa ke Bhaibheri kakaita drama, mavhidhiyo uye mindandanda ino musoro unoti “Tevedzera Kutenda Kwavo” Zvinotibetsera kuti tinyase kuzwisisa Bhaibheri. * Marevhista, mavhidhiyo, ne mabhurushura, zvinobudiswa mu masure mekunyasa kupsvakisiswa. Hino musati mazviseenzesa pa fundo ye munhu ega, kumbirai kutungamirirhwa na Djehovha kuti mugumire mafundo amunoda kubetsereka nawo. Edzai kudzikanda pa mbuto ye munhu uri kureketwa. Nyasai kurangarira kuti aseenzi aya a Djehovha akaitei uye kuti Djehovha akaabetsera kudini pa matambudziko awo. Hino seenzesai zvemafunda. Tendai Djehovha nge rubetso raarikumupa. Uye pangidzai kuti munoreremedza rubetso irona nge kupsvaka mikana ye kubetsera uye kubambisawo amweni.

23. Maererano na Isaya 41:10, 13, Djehovha anogondesa kutiitirei?

²³ Upenyu mu nyika ino ya Sathani auri nyorepi. (2Ti. 3:1) pamweni paya atitozii zvokuita. Asi atidikani kudzirhya mwoyo kana kutya. Djehovha anoziya zvatiri kusongana nazvo, kana tikawa ayena anogondesa kutibetsera ne muoko kwawo we unatsi. (Erengai Isaya 41:10, 13.) Tinorugondo rokuti Djehovha acatibetsera uye Bhaibheri rinotipasa simba ratinoda kuti tikwanise kukunda matambudziko.